ໃນວັນທີ 9 ມິຖຸນາ 2022, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິ ຫານງານສູນກາງພັກ, ປະທານປະເທດ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ໂອ້ລົມ ພະນັກງານຫລັກແຫລ່ງ ສະຖາບັນການເມືອງ ແລະ ການປົກຄອງແຫ່ງຊາດ(ສມປຊ) ໂດຍໃຫ້ກຽດຕ້ອນຮັບຢ່າງອົບອຸ່ນຂອງ ສະຫາຍ ຮສ ພູວົງ ອຸ່ນຄໍາແສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວຫນ້າສະຖາບັນການເມືອງ ແລະ ການປົກຄອງ ແຫ່ງຊາດ ພ້ອມດ້ວຍຄະນະ, ມີບັນດາຄະນະກົມ, ຫ້ອງການ, ຄະນະຕ່າງໆ, ສູນຂໍ້ມູນຂ່າວສານ ແລະ ສູນຄົ້ນຄວ້າແນວຄິດ ໄກສອນ ພົມວິຫານ, ນັກສຶກສາເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ, ສະຫາຍ ຮສ ພູວົງ ອຸ່ນຄໍາແສນ ໄດ້ລາຍງານໃຫ້ຮູ້ກ່ຽວກັບຜົນງານການ ເຄື່ອນໄຫວຕະຫລອດໃນໄລຍະທີ່ຜ່ານມາ ເຊິ່ງຄະນະພັກ-ຄະນະນໍາ ສມປຊ ແລະ ພະນັກງານ, ຄູ-ອາ ຈານ ໄດ້ເປັນເຈົ້າການເຄື່ອນໄຫວເຮັດໜ້າທີ່ການເມືອງຂອງຕົນຢ່າງຕັ້ງຫນ້າ ໂດຍສະເພາະແມ່ນການ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິຕົກລົງກອງປະຊຸມໃຫຍ່ ຄັ້ງທີ V ຂອງອົງຄະນະພັກ ສມປຊ ໂດຍໄດ້ສ້າງແຜນການເຄື່ອນໄຫວສຶກສາ ອົບຮົມການເມືອງ-ແນວຄິດ; ບາລຸງ, ກໍ່ສ້າງຖັນແຖວສະມາຊິກພັກ, ພະນັກງານ, ຄູອາຈານ ແລະ ນັກສຶກສາ ໃນແຕ່ລະໄລຍະຢ່າງຈະແຈ້ງ, ໄດ້ຖືສໍາຄັນວຽກງານຕິດຕາມ, ເກັບກໍາ ແລະ ແກ້ໄຂສະພາບການກໍຄືທ່າອ່ຽງ ການຜັນແປທາງດ້ານແນວຄິດ ຂອງຖັນແຖວສະມາຊິກພັກ, ພະນັກງານລັດຖະກອນ ແລະ ນັກສຶກສາຢ່າງທັນການ, ສ້າງລະບອບລາຍງານສ່ອງແສງ ແລະແຈ້ງຂ່າວພາຍໃນຢ່າງເປັນ ປົກກະຕິ. ກົງຈັກການຈັດຕັ້ງຂອງສະຖາບັນ ໄດ້ສືບຕໍ່ປັບປຸງ ໃຫ້ມີຄວາມເຂັ້ມແຂງ, ສາມາດປະຕິບັດໜ້າທີ່ການເມືອງ ຢ່າງມີປະສິດທິຜົນ ອີງຕາມຄວາມຮຽກຮ້ອງຕ້ອງການ ຂອງໜ້າທີ່ການເມືອງເພີ່ມຂຶ້ນ, ໄດ້ສ້າງຕັ້ງ 02 ກົມເພີ່ມຕື່ມຄື: ສູນຄົ້ນຄວ້າແນວຄິດໄກສອນ ພົມວິຫານ ເເລະ ກົມກວດກາ; ສັບຊ້ອນຈາກ 48 ພະແນກ ຍັງເຫລືອ 38 ພະແນກ, ຄະນະນໍາຂັ້ນສູງຂອງສະຖາບັນ ມີ 04 ສະຫາຍ, ຍິງ 02 ສະຫາຍ, ໃນນັ້ນໄດ້ຮັບການແຕ່ງຕັ້ງຈາກຂັ້ນເທິງ 02 ສະຫາຍ.

ສະຫາຍ ຮສ ພູວົງ ອຸ່ນຄໍາແສນ ຍັງໃຫ້ຮູ້ອີກວ່າ: ສະຖາບັນການເມືອງ ແລະ ການປົກຄອງແຫ່ງຊາດ ທີ່ ຜ່ານມາໄດ້ດໍາເນີນໂຄງການຫລັກສູດການຮຽນ-ການສອນ ທັງຫມົດ 4 ລະບົບຮຽນຄື: ລະບົບຊັ້ນສູງເລັ່ງລັດ 5 ເດືອນ, ລະບົບອະນຸປະລິນຍາ 2 ປີ; ລະບົບປະລິນຍາຕີ 4 ປີ ແລະ ລະບົບປະລິນຍາໂທການເມືອງ-ການປົກຄອງ 2 ປີ. ນອກນັ້ນຍັງໄດ້ຄຸ້ມຄອງ ການຈັດຕັ້ງປະຕິບັດການຮຽນ-ການສອນ ໂຄງການຫລັກສູດລະບົບຊັ້ນກາງ, ຊັ້ນອະນຸປະລິນຍາຂອງໂຮງຮຽນການເມືອງ ແລະ ການປົກຄອງທ້ອງ ຖິ່ນທົ່ວປະເທດ, ຄຸ້ມຄອງຫລັກສູດຝຶກອົບຮົມທິດສະດີການເມືອງ-ການປົກຄອງ ໄລະຍະສັ້ນ 45 ວັນ ຂອງບັນດາກະຊວງ-ອົງການອ້ອມຂ້າງສູນກາງ ແລະ ໄລຍະ ປີ 2020-2022 ສມປຊ ມີນັກສຶກສາທີ່ມາສຶກສາຄົ້ນຄວ້າ ໄລຍະຍາວທັງຫມົດ 1.205 ສະຫາຍ, ຍິງ 299 ສະຫາຍ, ໃນນັ້ນ ໄດ້ສໍາເລັດ ການສຶກສາໃນ ສົກຮຽນ 2020-2021 ຈໍານວນ 674 ສະຫາຍ, ຍິງ 157 ສະຫາຍ ແລະ ຍັງສືບຕໍ່ຮຽນໃນສົກຮຽນ 2021-2022 ຈໍານວນ 531 ສະຫາຍ, ຍິງ 144 ສະຫາຍ; ດໍາເນີນການຝຶກອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນ ຢູ່ບັນດາກະຊວງ-ອົງການອ້ອມຂ້າງສູນກາງ ສົກຮຽນ 2020-2021 ລວມມີ 12 ກະຊວງ-ອົງການອ້ອມຂ້າງສູນກາງ ທີ່ເປີດຝຶກອົບຮົມຫລັກສູດດັ່ງກ່າວ ລວມມີຈໍານວນຜູ້ເຂົ້າຮ່ວມທັງຫມົດ 1.323 ສະຫາຍ, ຍິງ 548 ສະຫາຍ; ດໍາເນີນການຝຶກອົບຮົມທິດສະດີຕາມຫົວຂໍ້ສະເພາະ ໃຫ້ເລຂາພັກເມືອງ, ຄະນະປະຈໍາພັກເມືອງໃນທົ່ວປະເທດ ໄລຍະສັ້ນ 10-15 ວັນ, ສົກຮຽນ 2020-2021 ລວມມີຜູ້ເຂົ້າຮ່ວມ 139 ສະຫາຍ, ຍິງ 14 ສະຫາຍ; ດໍາເນີນການຝຶກອົບຮົມທິດສະດີ ຕາມຫົວຂໍ້ສະເພາະ ຜູ້ບໍລິຫານລັດວິສາຫະກິດ ໄລຍະສັ້ນ 5 ວັນ, ໃນສົກຮຽນ 2020-2021 ມີຜູ້ເຂົ້າຮ່ວມ 117 ສະຫາຍ, ຍິງ 18 ສະຫາຍ. ພ້ອມກັນນັ້ນ ສມປຊ ໄດ້ຊີ້ນໍາ ແລະ ຄຸ້ມຄອງດ້ານວິຊາການຕໍ່ໂຮງຮຽນການເມືອງ ແລະ ການປົກຄອງແຂວງທົ່ວປະເທດ ໄດ້ຈັດຕັ້ງປະຕິບັດຢູ່ 2 ລະບົບຄື: ລະບົບຊັ້ນກາງ ແລະ ລະບົບອະນຸປະລິນຍາ ມີນັກສຶກສາທັງຫມົດ 3.303 ສະຫາຍ, ຍິງ 886 ສະຫາຍ ແລະ ໄດ້ມີຜົນສໍາເລັດຢ່າງຕັ້ງໜ້າໃນການພົວພັນຮ່ວມມືກັບຕ່າງປະເທດ ຕາມບົດບັນທຶກການຮ່ວມມື ໂດຍ ສະເພາະການຮ່ວມມືກັບເພື່ອນມິດຍຸດທະສາດສັງຄົມນິຍົມ ສສ ຫວຽດນາມ ແລະ ສປ ຈີນ ເຊິ່ງໄດ້ປະກອບສ່ວນຍົກສູງຄຸນນະພາບການ ຮຽນ-ການສອນ, ການຄົ້ນຄວ້າວິທະຍາສາດ, ການບໍາລຸງ-ກໍ່ສ້າງ ພະນັກງານ, ຄູ-ອາຈານ ແລະ ຍາດແຍ່ງການ ຊ່ວຍເຫລືອຕ່າງໆ ເຂົ້າສູ່ສະຖາບັນໄດ້ຢ່າງມີຜົນສໍາເລັດ.

ໂອກາດນີ້, ສະຫາຍ ເລຂາທິການໃຫຍ່ ໄດ້ໂອ້ລົມ ແລະ ສະແດງ ຄວາມຍ້ອງຍໍຊົມເຊີຍຕໍ່ຜົນສໍາ ເລັດຫລາຍດ້ານ ທີ່ ສມປຊ ຍາດມາໄດ້ຕະຫລອດໄລຍະທີ່ຜ່ານມາ ແລະ ເພື່ອຕອບສະຫນອງ ກັບຄວາມ ຮຽກຮ້ອງຕ້ອງການກັບຫນ້າທີ່ການເມືອງຂອງໃນໄລຍະໃຫມ່, ສມປຊ ຕ້ອງຍົກສູງການນໍາພາຢ່າງຮອບ ດ້ານ ແລະ ການພັດທະນາຖັນແຖວພະນັກງານ, ຄູ-ອາຈານ, ເອົາໃຈໃສ່ສ້າງຖັນແຖວຄູ-ອາຈານ, ນັກວິ ທະຍາສາດ, ພະນັກງານບໍລິຫານ ໃຫ້ມີຄວາມຮູ້, ຄວາມສາມາດ, ມີທັດສະນະການເມືອງຫນັກແຫນ້ນ, ມີຄຸນສົມບັດສິນທໍາປະຕິວັດ, ໄດ້ຮັບການກໍ່ສ້າງທີ່ເປັນລະບົບ, ລົງເລິກທາງດ້ານທິດສະດີ, ມີວິທີວິທະຍາດ້ານການສິດສອນ.

ພ້ອມນັ້ນ, ສະຫາຍ ທອງລຸນ ສີສຸລິດ ຍັງໄດ້ເນັ້ນໃຫ້ສະຖາບັນ ຕ້ອງສູ້ຊົນສ້າງ ແລະ ພັດທະນາໃຫ້ກາຍເປັນສະຖາບັນທີ່ທັນສະໄໝ, ຮັກສາໄດ້ທາດແທ້ຂອງໂຮງຮຽນພັກ ແລະ ເຊື່ອມໂຍງກັບສາກົນ, ພັກ ແລະ ລັດຖະບານ ຍາມໃດກໍໃຫ້ຄວາມສໍາຄັນ ແລະ ໃຫ້ການລົງທຶນຢ່າງເໝາະສົມ ໃຫ້ແກ່ສະຖາບັນ ໃນການພັດທະນາພື້ນຖານໂຄງລ່າງ, ເຕັກນິກສ້າງໃຫ້ສະຖາບັນກາຍເປັນສູນກາງແຫ່ງການບໍາລຸງ, ກໍ່ສ້າງພະນັກງານ ທາງດ້ານທິດສະດີການເມືອງ-ການປົກຄອງ, ເປັນສູນກາງແຫ່ງການຄົ້ນຄວ້າທິດສະດີ ມາກ-ເລນິນ, ແນວຄິດໄກສອນ ພົມວິຫານ ເປັນຂົວຕໍ່ລະຫວ່າງລະບົບໂຮງຮຽນພັກ, ສູນບໍາລຸງພະນັກງານຢູ່ບັນດາກະຊວງ, ອົງການຕ່າງໆ. ສະຖາບັນ ຄວນເອົາໃຈໃສ່ວຽກງານເປີດກວ້າງຍົກສູງຄຸນນະພາບ, ປະສິດທິຜົນການຮ່ວມມືສາກົນ, ຮັບເອົາບົດຮຽນທີ່ດີຈາກບັນດາປະເທດເພື່ອມິດ ໃນວຽກງານບໍາລຸງ-ກໍ່ສ້າງພະນັກງານ, ການຄົ້ນຄວ້າວິທະຍາສາດ ເປັນຕົ້ນນ ແມ່ນວິທະຍາສາດການເມືອງ, ວິທະຍາສາດ ການນໍາພາ, ຄຸ້ມຄອງທີ່ກ້າວໜ້າ ທັງນີ້ເພື່ອເຮັດໃຫ້ສະຖາບັນ ເຮັດສໍາເລັດຫນ້າທີ່ການເມືອງທີ່ພັກ, ລັດມອບຫມາຍໃຫ້ປະກອບສ່ວນສໍາຄັນເຂົ້າໃນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກຢ່າງມີຜົນສໍາເລັດ.

ຂ່າວ-ພາບ: ສມປຊ

#Medialaos MMD #ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)

ປັດຈຸບັນ ມີສື່ອອນລາຍທີ່ບໍ່ແມ່ນສື່ທາງການຈຳນວນໜຶ່ງ ໄດ້ເຜີຍແຜ່ຂໍ້ມູນຜ່ານໜ້າເພຈຂ່າວຂອງຕົນ ໂດຍອ້າງວ່າ: ນາຍົກລັດຖະມົນຕີ ແຕ່ງຕັ້ງບັນດາທ່ານເຫລົ່ານີ້ ມາຮັບຜິດຊອບວຽກງານຕ່າງໆ ພ້ອມປະກອບຮູບພາບເປັນ ສະມາຊິກສະພາແຫ່ງຊາດ ແລະ ນັກທຸລະກິດ ຈຳນວນໜຶ່ງ ເຊິ່ງບໍ່ຖືກຕ້ອງຕາມເນື້ອໃນຈິດໃຈຂໍ້ຕົກລົງຂອງລັດຖະບານ ທັງເປັນການສ້າງຄວາມສັບສົນວຸ້ນວາຍໃນສັງຄົມ ເກີດຄວາມເຂົ້າໃຈຜິດ ແລະ ວິພາກວິຈານຕ່າງໆນາໆ ໃນລັກສະນະບໍ່ສ້າງສັນ.

ຄວາມຈິງແລ້ວ, ລັດຖະບານ ກໍຄື ທ່ານ ພັນຄຳ ວິພາວັນ ນາຍົກລັດຖະມົນຕີ ໄດ້ອອກຂໍ້ຕົກລົງ ສະບັບເລກທີ 36/ນຍ ລົງວັນທີ 06.06.2022 ວ່າດ້ວຍການແຕ່ງຕັ້ງຄະນະສະເພາະກິດ ຮັບຜິດຊອບຊີ້ນຳ ແລະ ວາງມາດຕະການຮີບດ່ວນ ໃນການແກ້ໄຂບັນຫານ້ຳມັນເຊື້ອໄຟ, ລາຄາສິນຄ້າ ແລະ ເງິນຕາຕ່າງປະເທດ ປະກອບດ້ວຍ:

1) ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ຜູ້ຊີ້ນຳຂົງເຂດວຽກງານເສດຖະກິດ ເປັນຫົວໜ້າຄະນະ;

2) ແຕ່ງຕັ້ງ ທ່ານ ລັດຖະມົນຕີ ກະຊວງການເງິນ ເປັນຮອງຫົວໜ້າຄະນະ;

3) ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ເປັນຄະນະ;

4) ທ່ານ ຜູ້ວ່າການທະນາຄານແຫ່ງ ສປປ ລາວ ເປັນຄະນະ;

5) ທ່ານ ຮອງຫົວໜ້າຫ້ອງວ່າການສູນກາງພັກ ເປັນຄະນະ;

6) ທ່ານ ຮອງຫົວໜ້າອົງການກວດກາແຫ່ງລັດ ເປັນຄະນະ;

7) ທ່ານ ຫົວໜ້າກົມໃຫຍ່ຕຳຫລວດ, ກະຊວງປ້ອງກັນຄວາມສະຫງົບ ເປັນຄະນະ;

8) ທ່ານ ປະທານສະມາຄົມນໍ້າມັນເຊື້ອໄຟລາວ ແລະ ອາຍແກັດ ເປັນຄະນະ.

ສໍາລັບ ສິດ ແລະ ໜ້າທີ່ ຂອງ ຄະນະສະເພາະກິດຮັບຜິດຊອບ ແມ່ນວາງມາດຕະການຮັບປະກັນການນຳເຂົ້ານໍ້າມັນເຊື້ອໄຟ ເພື່ອສະໜອງຄວາມຕ້ອງການອັນຈຳເປັນ ໃຫ້ເປັນປົກກະຕິ ແລະ ຮັບປະກັນການກໍານົດລາຄາໃນແຕ່ລະໄລຍະໃຫ້ທັນການ ແລະ ສອດຄ່ອງກັບການຜັນແປຂອງລາຄານ້ຳມັນເຊື້ອໄຟຢູ່ຕະຫລາດໂລກ ແລະ ສະພາບຄວາມເປັນຈິງຂອງປະເທດເຮົາ.

ວາງມາດຕະການຕ່າງໆ ແລະ ວິທີການຕົວຈິງ ໃນການສະໜອງເງິນຕາຕ່າງປະເທດ, ການຄຸ້ມຄອງອັດຕາແລກປ່ຽນເງິນຕາຕ່າງປະເທດ, ການແກ້ໄຂບັນດາຮ້ານແລກປ່ຽນ, ການນຳໃຊ້ເງິນຕາໃນທ້ອງຕະຫລາດ ໃຫ້ມີຄວາມສະຫງົບ ແລະ ມີສະຖຽນລະພາບ.

ຕິດຕາມກວດກາ ແລະ ປະຕິບັດມາດຕະການເຂັ້ມງວດ ຕໍ່ຜູ້ລ່ວງລະເມີດກົດໝາຍ, ສ້າງຄວາມປັ່ນປ່ວນ, ສ້າງບັນຫາເສຍຫາຍໃຫ້ແກ່ເສດຖະກິດ-ການເງິນຂອງຊາດ.

ວາງມາດຕະການຕ່າງໆ ເພື່ອຄວບຄຸມລາຄາສິນຄ້າ, ການກໍານົດສິນຄ້າຍຸດທະສາດ ເພື່ອໃຫ້ລາຄາສິນຄ້າໃນທ້ອງຕະຫລາດ ຢູ່ໃນເກນປົກກະຕິ.

ວາງມາດຕະການຕ່າງໆ ນໍາໃຊ້ຕົວຈິງ ເພື່ອແກ້ໄຂທຸກບັນຫາ ທີ່ເປັນຜົນກະທົບເຖິງຄວາມໝັ້ນຄົງຂອງຊາດ ທາງດ້ານເສດຖະກິດ ຕາມສະພາບການເກີດຂຶ້ນ ເພື່ອສາມາດຮັບມືກັບການແກ້ໄຂສະພາບການຢ່າງທັນການ.

ໃນມາດຕາ 3 ຂອງຂໍ້ຕົກລົງດັ່ງກ່າວ, ຍັງມອບໃຫ້ຫົວໜ້າຄະນະສະເພາະກິດ ແຕ່ງຕັ້ງໜ່ວຍງານຊ່ວຍວຽກຂອງຕົນ ຕາມຄວາມຈຳເປັນ.

#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)

ເພື່ອເປັນການຊຸກຍູ້, ຕິດຕາມ ການພັດທະນາພື້ນຖານໂຄງລ່າງ ດ້ານການຄົມມະນາຄົມ ໂດຍສະເພາະກໍ່ແມ່ນການກໍ່ສ້າງ-ສ້ອມແປງ ຖະໜົນຫົນທາງ ແລະ ຂົວ ໃນທົ່ວເມືອງວິລະບູລີ ໃຫ້ຢູ່ໃນສະພາບທີ່ແຂງແຮງ ແລະໃຊ້ງານໄດ້ຕະຫຼອດເວລາ ຮັບປະກັນໃຫ້ມີຄວາມປອດໄພ, ຄວາມສະດວກສະບາຍໃນການສັນຈອນໄປມາ ຂອງພໍ່ແມ່ປະຊາຊົນ ໃນໄລຍະລະດູຝົນນີ້,

ດັ່ງນັ້ນ ມາໃນຕອນເຊົ້າຂອງວັນທີ 4 ມິຖຸນາ 2022 ນີ້ ທ່ານຄໍາຜຸຍ ສີບຸນເຮືອງ ກໍາມະການພັກແຂວງ ເລຂາພັກເມືອງ ເຈົ້າເມືອງວິລະບູລີ ພ້ອມດ້ວຍພະນັກງານວິຊາການຈາກຫ້ອງໂຍທາທິການ ແລະຂົນສົ່ງເມືອງ ໄດ້ລົງເຄື່ອນໄຫວຊຸກຍູ້, ຕິດຕາມ ການກໍ່ສ້າງຂົວຂ້າມນໍ້່າຫ້ວຍຄຽງ ຕັ້ງຢູ່ເສັ້ນທາງລະຫວ່າງບ້ານບຸ່ງຄໍາ ຫາ ບ້ານຫ້ວຍດ່າງ ເຊິ່ງຂົວແຫ່ງນີ້ ແມ່ນເປັນປະເພດຂົວຈົມ ແບບນໍ້່າລົ້ນ ສ້າງດ້ວຍເບຕົງເສີມເຫຼັກ ວາງທໍ່ໃສ່ໃຫ້ນໍ້າໄຫຼລອດຈໍານວນ 4 ຈຸດ, ມີຄວາມຍາວທັງໝົດ 26 ແມັດ, ກວ້າງ 6 ແມັດ ແລະ ສູງ 2,50 ແມັດ ມີມູນຄ່າໃນການກໍ່ສ້າງທັງໝົດ 83 ພັນໂດລາສະຫະລັດ ໂດຍແມ່ນນໍາໃຊ້ງົບປະມານ ຈາກກອງທຶນພັດທະນາທ້ອງຖິ່ນ ຂອງບໍລິສັດລ້ານຊ້າງ ມີເນໂຣນສ໌ ລິມິເຕັດ ແລະ ທຶນສົມທົບຂອງບໍລິສັດເອກະຊົນຈໍານວນໜຶ່ງ ,ເຊິ່ງໄດ້ເລີ່ມລົງມືກໍ່ສ້າງມາແຕ່ຕົ້ນເດືອນ ພຶດສະພາ ຜ່ານມາ ແລະ ຄາດວ່າຈະໃຫ້ສໍາເລັດໃນເດືອນມິຖຸນາ 2022 ນີ້.

ຈາກນັ້ນທ່ານ ເຈົ້າເມືອງວິລະບູລີ ພ້ອມຄະນະ ກໍ່ໄດ້ສືບຕໍ່ເດີນທາງໄປເບິ່ງການສ້ອມແປງຂົວຂ້າມນໍ້າເຊນ້ອຍ ຕັ້ງຢູ່ບ້ານນາເຕີ້ ໃນເສັ້ນທາງແຕ່ 3 ແຍກທາງເລກ 10 ບ້ານດົງບັງ ເຂົ້າຫາບ້ານທາດນາງລາວ ຂົວແຫ່ງນີ້ມີຄວາມຍາວທັງໝົດ 36 ແມັດ, ກວ້າງ 4,50 ແມັດ ເຊິ່ງວ່າການສ້ອມແປງແມ່ນຈະໄດ້ເລີກຮື້ເອົາໄມ້ຂົວເກົ່າອອກທັງໝົດ ແລ້ວປະກອບລາງເຫຼັກຂົວໃສ່ແທນ ແລະ ປູໄມ້ພື້ນຂົວໃໝ່ທັງໝົດ ມີມູນຄ່າໃນການສ້ອມແປງທັງໝົດ 29 ພັນໂດລາສະຫະລັດ ໂດຍນໍາໃຊ້ງົບປະມານຈາກກອງທຶນພັດທະນາທ້ອງຖິ່ນ ຂອງບໍລິສັດລ້ານຊ້າງມີເນໂຣນ ລິມິເຕັດ, ຄາດວ່າຈະໃຫ້ສໍາເລັດພາຍໃນ ທ້າຍເດືອນ ມິຖຸນານີ້ ແລະ ຮັບເໝົາກໍ່ສ້າງສ້ອມແປງຂົວທັງ 2 ແຫ່ງດັ່ງກ່າວ ໂດຍແມ່ນບໍລິສັດ ຈະເລີນກໍ່ສ້າງສ້ອມແປງຂົວ-ທາງ ແລະຊົນລະປະທານ ຈໍາກັດຜູ້ດຽວ.

ຂ່າວ-ພາບ: ນັກຂ່າວວິທະຍຸກະຈາຍສຽງ ສະຫວັນນະເຂດ

#Medialaos MMD  #Savannakhet Province

ໃນຕອນເຊົ້າຂອງວັນທີ 1 ມີຖຸນາ 2022 ຜ່ານມານີ້ ຢູ່ທີ່ບ້ານ ດອນຂາວ ເມືອງທ່າປາງທອງ ແຂວງສະຫວັນນະເຂດ ໄດ້ຈັດກອງປະຊຸມເຜີຍແຜ່ເຊື່ອມຊຶມບັນດາເອກະສານ ກ່ຽວກັບການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຂຶ້ນ ແລະ ພ້ອມທັງສຶກສາອົບຮົມກຸ່ມເປົ້າເສບຢາເສບຕິດ ເຊິງນຳໂດຍ ທ່ານ ພັທ ຈັນທະວີ ໄຊຍະຈັກ ຮອງຫົວໜ້າກອງບັນຊາການ ປກສ ເມືອງທ່າປາງທອງ, ທ່ານ ກອງມະນີ ອິນທິລາດ ເລຂາຄະນະພັກຮາກຖານ ກຸ່ມບ້ານທີ 9 ( ທ່າພີ່ ) ມີປກສ ກຸ່ມ 9 , ການຈັດຕັ້ງຂັ້ນບ້ານ ຜູ້ປົກຄອງ ແລະ ເປົ້າໝາຍຜູ້ເສບຢາເສບຕິດຈຳວນ 39 ຄົນ.

ໃນການລົງເຜີຍແຜ່ຄັ້ງນີ້ ກໍ່ໄດ້ຍົກໃຫ້ເຫັນ ກ່ຽວກັບວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ບັນຫາຢາເສບຕິດ ແມ່ນໄດ້ມີການແຜ່ລະບາດຢ່າງຮ້າຍແຮງ ນັບແຕ່ຕົວເມືອງໃຫຍ່ ຮອດເຂດຊົນນະບົດຫ່າງໄກສອກຫຼີກ, ເຂົ້າເຖິງທຸກຊັ້ນຄົນໃນທົ່ວສັງຄົມ ນັບແຕ່ນັກຮຽນ-ນັກສຶກສາ, ພໍ່ຄ້າຊາວຂາຍ, ກຳມະກອນ, ຜູ້ວ່າງງານ, ຕະຫຼອດຮອດພະນັກງານ-ລັດຖະກອນຈຳນວນໜຶ່ງ ນອກຈາກນັ້ນ ຢາເສບຕິດຍັງສົ່ງຜົນກະທົບຕໍ່ສຸຂະພາບ ແລະ ຊີວິດຂອງຊາວໜຸ່ມຮຸ່ນສືບທອດ ເປັນສາເຫດພາໃຫ້ເກີດປະກົດການຫຍໍ້ທໍ້ ແລະ ບັນຫາອາຊະຍາກຳປະເພດຕ່າງໆ, ເປັນການກົດໜ່ວງຖ່ວງດຶງການພັດທະນາເສດຖະກິດ-ສັງຄົມ, ສົ່ງຜົນກະທົບຕໍ່ຄວາມໝັ້ນຄົງທາງດ້ານການເມືອງ ແລະ ຄວາມເປັນລະບຽບຮຽບຮ້ອຍຂອງສັງຄົມ.

ໃນໄລຍະຜ່ານມາເຖິງແມ່ນວ່າລັດຖະບານ ໄດ້ສຸມໃສ່ຫຼາຍມາດຕະການແກ້ໄຂບັນຫາຢາເສບຕິດກໍ່ຕາມ ແຕ່ບັນຫາດັ່ງກ່າວ, ກໍ່ຍັງຈະສືບຕໍ່ເພີ່ມທະວີຄວາມຮຸນແຮງ ແລະ ແຜ່ລະບາດເປັນວົງກວ້າງ, ດ້ວຍເຫດນັ້ນລັດຖະບານ ຈຶ່ງຖືເອົາການແກ້ໄຂບັນຫາຢາເສບຕິດ ເປັນວຽກງານບູລິມະສິດຈຳເປັນ, ຮີບດ່ວນ ຍົກໃຫ້ເປັນວາລະແຫ່ງຊາດ ເພື່ອສຸມທຸກກຳລັງແຮງສັງລວມ ເຂົ້າໃສ່ການແກ້ໄຂບັນຫາສໍາຄັນຂອງຊາດເວົ້າລວມເວົ້າສະເພາກໍຄືເມືອງທ່າປາງທອງ ພ້ອມກັນນີ້ ທ່ານ ພັທ ຈັນທະວີ ໄຊຍະຈັກ ຮອງຫົວໜ້າກອງບັນຊາການ ປກສ ເມືອງທ່າປາງທອງ ກໍ່ໄດ້ ຜ່ານແຜນການຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດຢູ່ເມືອງທ່າປາງທອງ ວ່າ : ສຳລັບເມືອງທ່າປາງທອງ ກໍ່ເປັນເມືອງໜຶ່ງ ທີ່ໄດ້ຮັບຜົນກະທົບຈາກບັນຫາຢາເສບຕິດ, ຍ້ອນສະພາບຈຸດພິເສດຂອງບ້ານຫ່າງໄກຊອກຫຼີກ ເຊິ່ງເປັນສາເຫດເຮັດໃຫ້ກຸ່ມຄົນບໍ່ດີຈຳນວນຫນຶ່ງ ສວຍໃຊ້ໂອກາດ ຄ້າຂາຍຢາເສບຕິດ ແລະ ສິ່ງຜິດກົດໝາຍປະເພດຕ່າງໆ ເຂົ້າມາບ້ານດັ່ງກ່າວດ້ວຍຫຼາຍຮູບການ; ຕໍ່ກັບບັນຫາດັ່ງກ່າວ ຄະນະພັກແຕ່ລະຂັ້ນພາຍໃນເມືອງ ແມ່ນໄດ້ເອົາໃຈໃສ່ແກ້ໄຂ ດ້ວຍຫຼາຍຮູບການ, ຫຼາຍວິທີການຢ່າງຕໍ່ເນື່ອງ ແລະ ມີຈຸດສຸມ ເຊິ່ງເຮັດໃຫ້ຫຼາຍພາກສ່ວນໃນທົ່ວສັງຄົມ ໄດ້ມີຄວາມຕື່ນຕົວເຂົ້າຮ່ວມປະກອບສ່ວນ ໃນການແກ້ໄຂບັນຫາຢາເສບຕິດດ້ວຍຄວາມເປັນເຈົ້າການ, ແຕ່ກໍ່ຍັງມີຈຳນວນຫນຶ່ງ ຍັງບໍ່ທັນໄດ້ເຂົ້າໃຈຢ່າງເລິກເຊິ່ງ ໃນການເຂົ້າຮ່ວມແກ້ໄຂບັນຫາຢາເສບຕິດຢ່າງຈິງຈັງ.

ສໍາລັບທິດທາງແຜນການຈັດຕັ້ງປະຕິບັດໃນຕໍ່ໜ້າ ກໍ່ແມ່ນເລັ່ງໃສ່ການໂຄສະນາເຜີຍແຜ່ບັນດາເອກະສານຕ່າງໆ ແລະ ສຶກສາອົບຮົມເປົ້າໝາຍຜູ້ເສບຢາ ໂດຍກົງ ພ້ອມທັງຜູ້ກ່ຽວຂ້ອງກັບຢາເສບຕິດ ໃຫ້ທົ່ວເຖິງ ໂດຍສະເພາະກໍ່ແມ່ນໃນກຸ່ມຊາວໜຸ່ມ-ໄວໜຸ່ມ ແລະ ເປົ້າໝາຍອື່ນໆ, ເອົາໃຈໃສ່ສະກັດກັ້ນການຄ້າຂາຍຢາເສບຕິດ ດ້ວຍຮູບການຕ່າງໆ, ຂຶ້ນແຜນສືບຄົ້ນຫາເປົ້າໝາຍ, ຈັບກຸມຄຸມຂັງ ແລະດໍາເນີນຄະດີຕາມລະບຽບກົດໝາຍຢ່າງຈິງຈັງ. ຈາກນັ້ນກໍ່ໄດ້ເຮັດບົດບັນທຶກໃນການສຶກສາອົບຮົມຄັ້ງນີ້ ກັບກຸ່ມເປົ້າໝາຍທີ່ເສບຢານຳອີກດ້ວຍ.

ຂ່າວ-ພາບ: ນັກຂ່າວວິທະຍຸກະຈາຍສຽງ ສະຫວັນນະເຂດ

#Medialaos MMD  #Savannakhet Province

ມາໃນຕອນເຊົ້າວັນທີ 7 ມິຖຸນາ 2022 ນີ້ ຢູ່ທີ່ວັດ ບ້ານ ດອນເຄັງ ເມືອງຈຳພອນໄດ້ມີການຈັດກອງປະຊຸມ ປ່ອນບັດເລື້ອກຕັ້ງນາຍບ້ານຊຸດໃໝ່ ແລະ ໝ່ວຍພັກຊຸດໃໝ່ໃຫ້ກຽດເປັນປະທານ ໂດຍ ທ່ານ ສີສຸວັນ ສຸວັນະສານ ຮອງເລຂາພັກເມືອງ.ທ່ານ ແວວຕາ ອິນສົມບັດ ກຳມະການພັກເມືອງ ຫົວໝ້າຫ້ອງການພາຍໃນເມືອງ,ມີຫ້ອງການທີ່ກ່ຽວຂ້ອງເຂົ້າຮ່ວມ ພ້ອມດ້ວຍເລຂາຄະນະພັກຮາກຖານ ກຸ່ມບ້ານທີ 5 ແລະ ນາຍ ບ້ານ ພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ

ໃນພິທີດັ່ງກ່າວ ທ່ານ ລຳໂພ ໂຄສະດາ ຮອງເລຂາພັກບ້ານ ກໍ່ໄດ້ຜ່ານ ຂໍ້ຕົກລົງຂອງທ່ານ ເຈົ້າເມືອງວ່າດ້ວຍການອະນຸມັດການເລືອກຕັ້ງນາຍ ບ້ານ ຊຸດໃໝ່ ໃຫ້ແກ່ບ້ານດອນເຄັງຮັບຮູ້,ຈາກນັ້ນ ທ່ານ ສີສະນະ ຄຳພະຈັນ ນາຍ ບ້ານກໍ່ໄດ້ຜ່ານ ບົດສະຫຼຸບ ຂອງບ້ານໃນໄລຍະ 5 ປີ ຜ່ານມາ,ບ້ານ ດອນເຄັງມີຜົນລະເມືອງທັງໝົດ 614 ຄົນ ຍິງ 311 ຄົນ,ມີ 125 ຄອບຄົວ,ມີ 97 ຫຼັງຄາຮືອນ,ບ້ານ ດອນເຄັງ ມີເນື້ອທີ່ທຳການຜະລິດເຂົ້ານາປີ 330ກວ່າ ເຮັກຕາ,ນາແຊງ 15 ເຮັກຕາ,ປະຊາຊົນສາມາດຜະລິດເຂົ້າໄດ້ 3,5 ໂຕນ/ເຮັກຕາ,ໃນນັ້ນພາຍໃນບ້ານຍັງມີຄອບຄົວຕົວແບບ 2 ຄອບຄົວຄື: ຄອອບຄົວ ທ່ານ ຕຸ່ຍ,ຄອບຄົວ ທ່ານ ສິດ ທີ່ສາມາດທຳການຜະລິດເຂົ້າກາຍເປັນສິນຄ້າ ໄດ້ 20.000.000 ກີບ(ຊາວລ້ານກີບ)ຕໍ່ປີ, ແລະ ມີ 25 ຄອບຄົວ ສາມາດຜະລິດຜຶດລະດູແລ້ງໄດ້ມີຄື:ການປູກມັນຕົ້ນ,ການປູກມັນຊັບປາລັງ,ສາມາດສ້າງລາຍຮັບໄດ້ 10.000.000 – 15.000.000 ລ້ານກີບຕໍ່ປີ, ໃນນັ້ນຍັງໄດ້ຮັບຮອງເປັນບ້ານວັດທະນະທຳໃນປີ 2016 ແລະ ໄດ້ປະກາດຮັບຮອງເປັນບ້ານແບບຢ່າງປະຕິບັດກົດໝາຍແລ້ວ,ໃນນັ້ນທາງອຳນາດການປົກຄອງບ້ານ ແລະ ພໍ່ແມ່ປະຊາຊົນຍັງໄດ້ປຸກລະດົມຂົນຂວາຍໃນການສ້າງທາງເປຕົງ ພາຍໃນວັດ ມີມູນຄ່າທັງໝົດ 43.000.000 ກີບ(ສີ່ສີບສາມລ້ານກີບ)ແລະສ້າງກຳແພງວັດ ມີມູນຄ່າ 5.000.000 ກີບ,ຈາກນັ້ນ ທ່ານ ນາງ ແວວຕາ ອິນສົມບັດ ກຳມະການພັກເມືອງ ຫົວໝ້າຫ້ອງການພາຍໃນເມືອງກໍ່ໄດ້ຜ່ານໃບສັນລະເສີນຕໍ່ຜູ້ທີ່ມີຜົນງານ ຜ່ານມາ 5 ປີ ແລະ ຜ່ານມາດຖານເງື່ອນໄຂຄຸນລັກສະນະຂອງຜູ້ສະໝັກນາຍບ້ານຊຸດໃໝ່ພ້ອມທັງປະກາດລາຍຊື່ຜູ້ສະໝັກນາຍບ້ານຊຸດໃໝ່,ຜົນການເລືອກຕັ້ງແມ່ນ,ທ່ານ ຕຸ່ຍ ໄຊສະນະ ເປັນນາຍບ້ານ,ທ່ານ ສີສະນະ ສີພະຈັນ ເປັນຮອງນາຍບ້ານ,ທ່ານ ສົມໝາຍ ເປັນຮອງ.

ມາໃນຕອນບ່າຍ ກໍ່ໄດ້ມີການເລືອກຕັ້ງຄະນະພັກຊຸດໃໝ່,ບ້ານດອນເຄັງ ມີສຳມຊິກພັກທັງໝົດ 12 ສະຫາຍ ຍິງ 2 ສະຫາຍ,ຜົນການເລືອກຄະນະໝ່ວຍພັກຊຸດໃໝ່,ທ່ານ ຕຸ່ຍ ໄຊຊະນະ ເປັນເລຂາ,ທ່ານ ແຕ່ງ ໄຊຊະນະ ເປັນຮອງເລຂາ,ທ່ານ ສົມໝາຍ ເປັນຮອງ,ສຸດທ້າຍ ທ່ານ ສີສຸວັນ ສຸວັນະສານ ກໍໄດ້ໂອລົມຕໍ່ກອງປະຊຸມ ແລະເນັ້ນໃຫ້ຄະນະບ້ານເອົາໃຈໃສ່ໃນການສາມະຄີ ແລະ ແບ່ງແບບແຜນວິທີເຮັດວຽກຂອງແຕ່ລະຄົນໃຫ້ເໝາະສົມແລະທ່ຽງທຳ ແລະ ໂປ່ງໃສໃນການພັດທະນາບ້ານໃຫ້ດີຂື້ນກ່າວເກົ່າ.

ຂ່າວ-ພາບ: ນັກຂ່າວວິທະຍຸກະຈາຍສຽງ ສະຫວັນນະເຂດ

#Medialaos MMD  #Savannakhet Province

ຕອນເຊົ້າວັນທີ 7 ມີຖຸນາ 2022 ນີ້ຢູ່ສູນສອບເສັງໂຮງຮຽນປະຖົມອຸດົມສຸກ ເມືອງເຊໂປນ ແຂວງສະຫວັນນະເຂດ ໄດ້ຈັດຕັ້ງການສອບເສັງຈົບຊັ້ນປະຖົມສຶກສາປີທີ 5 ,ໂດຍເປັນກຽດເຂົ້າຮ່ວມຕັດຫົວບົດສອບເສັງ ມີ ທ່ານ ຄຳພອງ ໄຊທິບຸດ ຮອງເຈົ້າເມືອງເຊໂປນ ພ້ອມດ້ວຍຄູອາຈານ ແລະ ນ້ອງນັກຮຽນເຂົ້າຮ່ວມ.

ທົ່ວເມືອງເຊໂປນມີໂຮງຮຽນປະຖົມຈຳນວນ 109 ແຫ່ງ, ສົມບູນ 95 ແຫ່ງ, ໃນສົກຮຽນ 2021-2022 ມີສູນສອບເສັງທົ່ວເມືອງ 11 ສູນ, ໃນນີ້ສູນປະຖົມເມືອງຈັນ ມີນັກສອບເສັງທັງໝົດ 77 ຄົນ, ຍິງ 38ຄົນ, ມີຫ້ອງສອບເສັງ 4 ຫ້ອງ, ສູນປະຖົມອຸດົມສຸກ ມີນັກສອບເສັງທັງໝົດ 164 ຄົນ, ຍິງ 85 ຄົນ, ມີຫ້ອງສອບເສັງ 8 ຫ້ອງ, ສູນປະຖົມດົງສະຫວັນ ມີນັກສອບເສັງທັງໝົດ 169 ຄົນ, ຍິງ 74 ຄົນ, ມີຫ້ອງສອບເສັງ 9 ຫ້ອງ, ສູນປະຖົມຫ້ວຍສານ ມີນັກສອບເສັງທັງໝົດ 138 ຄົນ, ຍິງ 78 ຄົນ, ມີຫ້ອງສອບເສັງ 7 ຫ້ອງ, ສູນປະຖົມລະໂກ ມີນັກສອບເສັງທັງໝົດ 41 ຄົນ, ຍິງ 20 ຄົນ, ສູນປະຖົມນາບໍ່ ມີນັກສອບເສັງທັງໝົດ 92 ຄົນ, ຍິງ 50 ຄົນ, ມີຫ້ອງສອບເສັງ 5 ຫ້ອງ, ສູນປະຖົມໂພນໄຮ ມີນັກສອບເສັງທັງໝົດ 78 ຄົນ, ຍິງ 40 ຄົນ, ມີຫ້ອງສອບເສັງ 4 ຫ້ອງ, ສູນປະຖົມໂພໄຊ ມີນັກສອບເສັງທັງໝົດ 115 ຄົນ, ຍິງ 55 ຄົນ, ມີຫ້ອງສອບເສັງ 5 ຫ້ອງ, ສູນປະຖົມລາດຫໍ້ ມີນັກສອບເສັງທັງໝົດ 33 ຄົນ, ຍິງ 10 ຄົນ ມີຫ້ອງສອບເສັງ 2 ຫ້ອງ, ສູນປະຖົມກະດໍ ມີນັກສອບເສັງທັງໝົດ 43 ຄົນ, ຍິງ 16 ຄົນ, ມີຫ້ອງສອບເສັງ 2 ຫ້ອງ, ສູນປະຖົມມະຫາດ ມີນັກສອບເສັງທັງໝົດ 36 ຄົນ, ຍິງ 14 ຄົນ, ມີຫ້ອງສອບເສັງ 2 ຫ້ອງ, ລວມມີຈຳນວນນັກຮຽນສອບເສັງທັງໝົດ 986 ຄົນຍິງ 481 ຄົນ, ມີຫ້ອງສອບເສັງ 50 ຫ້ອງ, ວິຊາທີ່ຈະສອບເສັງມີ 3 ວິຊາຄື: ວິຊາພາສາລາວ(ພາກຫັດແຕ່ງ+ໄວຍາກອນ) ພາກຂຽນທວາຍ, ວິຊາຄະນິດສາດ ແລະ ວິຊາໂລກອອ້ມຕົວ.

ຂ່າວ-ພາບ: ນັກຂ່າວວິທະຍຸກະຈາຍສຽງ ສະຫວັນນະເຂດ

#Medialaos MMD  #Savannakhet Province

ໃນຕອນເຊົ້າວັນທີ 8 ມີຖຸນາ 2022 ທີ່ສະໂມສອນ ເມືອງອຸທຸມພອນ ແຂວງສະຫວັນນະເຂດ ໄດ້ປິດຊຸດຝຶກອົບຮົມທິດສະດີການເມືອງ-ການປົກຄອງ ລະບົບ 10 ວັນ ຊຸດທີ III ໃຫ້ເລຂາໜ່ວຍພັກບ້ານ-ນາຍບ້ານ ແລະ ຄະນະບ້ານໃນທົ່ວເມືອງ ປະຈໍາປີ 2022 ,ໂດຍການເຂົ້າຮ່ວມເປັນປະທານຂອງທ່ານ ແສນສັກ ພີມວົງສາ ກໍາມະການພັກແຂວງ,ເລຂາພັກເມືອງ,ເຈົ້າເມືອງອຸທຸມພອນ,ທ່ານ ພູເຂົາ ສີຫາວົງ ອໍານວຍການໂຮງຮຽນການເມືອງ-ການປົກຄອງແຂວງ.

ໃນພິທີທ່ານ ນາງ ມະນີວອນ ຕຸລາບຸດ ຮອງຫົວໜ້າຂະແໜງວິຊາການ ໂຮງຮຽນການເມືອງ-ການປົກຄອງແຂວງ ກໍ່ໄດ້ສະຫຼຸບສັງເກດຕີລາຄາຄືນ ກ່ຽວກັບການຮຽນ-ການສອນໃນໄລຍະຜ່ານມາວ່າ: ການເປີດຊຸດຝຶກອົບຮົມທິດສະດີ 10 ວັນໃຫ້ເລຂາພັກບ້ານ,ນາຍບ້ານ ແລະ ຄະນະບ້ານ ປະຈໍາປີ 2022 ຂອງເມືອງອຸທຸມພອນໃນຊຸດທີ III ມີຈໍານວນນັກຝຶກອົບຮົມທັງໝົດ 70 ທ່ານ,ຍິງ 15 ທ່ານ, ທາງດ້ານໂຄງການຫຼັກສູດ ມີເອກະສານທີ່ນໍາມາຝຶກອົບຮົມ 16 ບົດ, ລວມມີ 56 ຊົ່ວໂມງ,ອາຈານຂັ້ນແຂວງຮັບຜິດຊອບ 29 ຊົ່ວໂມງ, ຂັ້ນເມືອງ ຮັບຜິດຊອບ 27 ຊົ່ວໂມງ

ໂອກາດເຂົ້າຮ່ວມ ທ່ານ ພູເຂົາ ສີຫາວົງ ອໍານວຍການໂຮງຮຽນການເມືອງ-ການປົກຄອງແຂວງ ກໍ່ມີຄໍາເຫັນວ່າ: ການຈັດຊຸດອົບຮົມທິດສະດີການເມືອງ ລະບົບ10 ວັນ ໃຫ້ເລຂາໜ່ວຍພັກ,ນາຍບ້ານ ແລະ ຄະນະບ້ານຄັ້ງນີ້ ກໍ່ເພື່ອເປັນການຍົກລະດັບຄວາມຮູ້ທາງດ້ານທິດສະດີໃນຂັ້ນພື້ນຖານໃຫ້ເລຂາໜ່ວຍພັກ,ນາຍບ້ານ ແລະ ຄະນະບ້ານ ເພາະວ່າການສັບຊ້ອນໜ້າທີ່ຢູ່ຂັ້ນຮາກຖານ ຢ່າງໜ້ອຍຕ້ອງໄດ້ຈົບທິດສະດີ,ສະນັ້ນສະມາຊິກພັກທຸກຄົນ ນັບແຕ່ຮາກຖານຂັ້ນບ້ານ ຕ້ອງໄດ້ຜ່ານການຮຽນທິດສະດີກ່ອນ ທີ່ຈະມີຕໍາແໜ່ງໃດໜື່ງ.

ຈາກນັ້ນທ່ານ ແສນສັກ ພີມວົງສາ ເຈົ້າເມືອງອຸທຸມພອນ ກໍ່ໄດ້ເປັນກຽດມອບ ໃບຢັ້ງຢືນ ທິດສະດີການເມືອງ 10 ວັນ ໃຫ້ນັກສຶກສາແຕ່ລະທ່ານຢ່າງສົມກຽດ %

ຂ່າວ-ພາບ: ນາງ ເກດສະພອນ ສີທໍາມະວັນ

#Medialaos MMD  # Savannakhet Province

ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງສາລະວັນ ລົງເຜີ່ຍແຜ່ແຜນປັບປຸງຜະລິດຕະພັນທ່ອງທ່ຽວຢູ່ທີ່ຕາດເລາະ-ຕາດຮັງ ສຳລັບທ້າຍປີ 2022 ແລະປີ 2023, ໄດ້ຈັດຂື້ນໃນວັນທີ 7 ມີຖຸນາ 2022, ທີ່ສູນຂໍ້ມູນຂ່າວສານທ່ອງທ່ຽວຕາດເລາະ, ໂດຍການເຂົ້າຮ່ວມຂອງທ່ານ ມະໄລວອນ ສີປະເສີດ ກຳມະການພັກແຂວງ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງ, ມີບັນດາທ່ານຫົວໜ້າຫ້ອງການຖະແຫລງຂ່າວ, ວັດທະນະທຳ ແລະທ່ອງທ່ຽວເມືອງສາລະວັນ ແລະເມືອງເລົ່າງາມ, ອົງການຈັດຕັ້ງບ້ານຂົວເສັດ ແລະບ້ານແສນວັງ, ຫົວໜ່ວຍຜູ້ປະກອບການຮ້ານອາຫານ, ເຮືອນພັກ, ຮ້ານບັນເທີງເຂດທ່ອງທ່ຽວຕາດເລາະ-ຕາດຮັງເຂົ້າຮ່ວມ.

ທ່ານ ທິບພະວົງ ສຸວັນນະແພງສີ ຮອງຫົວໜ້າຂະແໜງທ່ອງທ່ຽວ ພະແນກ ຖວທ ແຂວງສາລະວັນ ກໍໄດ້ຜ່ານ“ ແຜນການປັບປຸງຜະລິດຕະພັນທ່ອງທ່ຽວຕາດເລາະ-ຕາດຮັງ ສຳລັບທ້າຍປີ 2022 ແລະປີ 2023 ແຜນດັ່ງກ່າວຈະໄດ້ມີການປັບປຸງກິດຈະກຳທ່ອງທ່ຽວເຂດຕາດເລາະ-ຕາດຮັງ ໂດຍເປັນການຈັດຕັ້ງຜັນຂະຫຍາຍແຜນຕ້ອນຮັບນັກທ່ອງທ່ຽວຂອງແຂວງສາລະວັນ ຕິດພັນກັບເສັ້ນທາງທ່ອງທ່ຽວສີຂຽວ ເພື່ອ“ ຟື້ນຟູການທ່ອງທ່ຽວຕາດເລາະ-ຕາດຮັງ ໃຫ້ກັບສູ່ສະພາບບໍລິການປົກກະຕິ, ສະອາດ-ປອດໄພ ສາມາດຕ້ອນຮັບນັກທ່ອງທ່ຽວ ,ສ້າງອາຊີບ, ສ້າງລາຍຮັບ ແລະ ເຮັດໃຫ້ເສດຖະກິດທ້ອງຖິ່ນມີການຂະຫຍາຍຕົວເທື່ອລະກ້າວ ” ໃຫ້ກາຍເປັນຜະລິດຕະພັນທ່ອງທ່ຽວທີ່ໂດດເດັ່ນ ແລະ ປະທັບໃຈນັກທ່ອງທ່ຽວພາຍໃນ ແລະ ຕ່າງປະເທດ, ສ້າງຄວາມເຂັ້ມແຂງໃຫ້ຜູ້ປະກອບການ ແລະ ພະນັກງານບໍລິການ ໂດຍຮູບການສ້າງຕັ້ງເປັນກຸ່ມຜູ້ປະກອບການທຸລະກິດທ່ອງທ່ຽວຕາດເລາະ ແລະ ມີການແຕ່ງຕັ້ງຄະນະຮັບຜິດຊອບທ່ອງທ່ຽວຂັ້ນບ້ານ, ສົ່ງເສີມການມີສ່ວນຮ່ວມຂອງບ້ານ ແລະ ປະຊາຊົນທ້ອງຖິ່ນ ເຂົ້າໃນກິດຈະກຳທ່ອງທ່ຽວເຊັ່ນ: ການວາງແຜນ, ການອອກແຮງງານ ແລະ ການແບ່ງປັນຜົນປະໂຫຍດ, ສ້າງວຽກງານທຳ, ການເຂົ້າຮ່ວມກິດຈະກຳ, ການຍົກລະດັບການບໍລິການຂອງພາກລັດ-ພາກທຸລະກິດໃນການບໍລິການທ່ອງທ່ຽວ, ສ້າງສິ່ງອຳນວຍຄວາມສະດວກໃນຈຸດທ່ອງທ່ຽວເຊັ່ນ: ຈຸດຖ່າຍຮູບ, ຂົວຂ້າມນໍ້າ, ທາງຍ່າງ, ປ້າຍໂຄສະນາ, ປ້າຍແນະນຳ ແລະການປັບປຸງພື້ນທີ່, ສ້າງຄວາມປອດໄພແກ່ນັກທ່ອງທ່ຽວ, ແຫຼ່ງທ່ອງທ່ຽວ ແລະ ບ້ານອ້ອມຂ້າງຕາດເລາະ-ຕາດຮັງ, ເພື່ອຄຸ້ມຄອງ ແລະແກ້ໄຂບັນຫາຂໍ້ຂັດແຍ່ງພາຍໃນແຫຼ່ງທ່ອງທ່ຽວເຊັ່ນ: ການບຸກລຸກເນື້ອທີ່ດິນ, ການຕັດໄມ້, ຄວາມບໍ່ເຂົ້າໃຈຕໍ່ວຽກງານທ່ອງທ່ຽວ ແລະ ສ້າງລະບຽບການຄຸ້ມຄອງແຫຼ່ງທ່ອງທ່ຽວ,ເພື່ອສ້າງລະບົບລາຍງານ-ສ່ອງແສງ-ຖອດຖອນບົດຮຽນກ່ຽວກັບການຈັດຕັ້ງປະຕິບັດສ້າງຜະລິດຕະພັນທ່ອງທ່ຽວ.

ແຫຼ່ງທ່ອງທ່ຽວຕາດເລາະ-ຕາດຮັງ ແມ່ນຕັ້ງຢູ່ແມ່ນໍ້າເຊເສັດ ເຂດບ້ານແສນວັງ ເມືອງສາລະວັນ ແລະບ້ານຂົວເສັດ ເມືອງເລົ່າງາມແຂວງສາລະວັນ ເປັນແຫຼ່ງທ່ອງທ່ຽວທີ່ສວຍງາມ, ມີໂຮງແຮມ, ເຮືອນພັກ, ບັງກະໂລ, ຮ້ານອາຫານ, ນຳທ່ຽວ, ຮ້ານກິນດື່ມ, ມີວັດທະນະທຳໂດດເດັ່ນ, ງານປະເພນີໜ້າສົນໃຈ, ສາມາດເຊື່ອມໂຍງທ່ອງທ່ຽວກັບບັນດາເມືອງ ແລະ ພາກໃຕ້ຂອງ ສປປ ລາວ.ຈາກນັ້ນຜູ້ເຂົ້າຮ່ວມຍັງໄດ້ຮັບຟັງການຜ່ານເອກະສານນຳທ່ຽວ ແລະ ຜູ້ນຳທ່ຽວ ( ກົດໝາຍທ່ອງທ່ຽວ ເລກທີ 32/ສພຊ ) ແລະບົດບັນທຶກກອງປະຊຸມປືກສາຫາລືລາຍການທ່ອງທ່ຽວ ທີ່ຈະນຳນັກທ່ອງທ່ຽວມາທ່ຽວ ແຂວງສາລະວັນ, ເອກະສານເງື່ອນໄຂ-ມາດຕະຖານສະມາຄົມ/ກຸ່ມຜູ້ປະກອບການທຸລະກິດທ່ອງທ່ຽວຕາດເລາະ( ດໍາລັດສະມາຄົມ 238/ລບ ).

ໃນຕອນບ່າຍຂອງກອງປະຊຸມ ທ່ານ ມະໄລວອນ ສີປະເສີດ ຫົວໜ້າພະແນກ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວແຂວງ ກໍໄດ້ມີຄຳເຫັນເນັ້ນໃຫ້ຜູ້ປະກອບການເຂດແຫຼງທ່ອງທ່ຽວຕາດເລາະ-ຕາດຮັງ ເພີ່ມທະວີຄວາມສະມັກຄີຮ່ວມແຮງ ຮ່ວມໃຈ, ຈັດຕັ້ງປັບປຸງຜະລິດຕະພັນທ່ອງທ່ຽວຂອງຕົນເຊັ່ນ: ການບໍລິການນັກທ່ອງທ່ຽວ,ໃຫ້ປະຊາຊົນມີສ່ວນຮ່ວມນຳເອົາຜະລິດກະສິກຳຕ່າງໆຕາມລະດູການໃຫ້ບໍລິການນັກທ່ອງທ່ຽວ ເພື່ອເພີ່ມສີສັນ ແລະ ສ້າງລາຍຮັບໃຫ້ການທ່ອງທ່ຽວ, ເນັ້ນໃຫ້ມີການອະນຸລັກ-ຮັກສາຮີດຄອປະເພນີທີ່ດີງາມ, ສົ່ງເສີມໃຫ້ມີການຈັດງານບຸນ, ການຈັດກິດຈະກໍາທາງສາສະໜາ ໃຫ້ຕິດພັນການທ່ອງທ່ຽວ ແລະຮັບໃຊ້ນັກທ່ອງທ່ຽວ, ພ້ອມນີ້ຍັງໄດ້ຮຽກຮ້ອງໃຫ້ຜູ້ປະກອບການ ແລະປະຊາຊົນໃນເຂດຕາດເລາະ ເອົາໃຈໃສ່ໃນການປະຕິບັດກົດໝາຍ, ດໍາລັດ, ລະບຽບການ, ຂໍ້ກຳນົດໃນການຄຸ້ມຄອງ ແລະ ການປະຕິບັດພັນທະເຂົ້າລັດ ລວມທັງລະບຽບການອື່ນໆ ທີ່ກ່ຽວຂ້ອງ; ນອກນັ້ນໃຫ້ເອົາໃຈໃສ່ໃນການປະຕິບັດຕາມເນື້ອໃນ 02 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງເສດຖະຖະກິດ-ການເງິນ ແລະ ບັນຫາຢາເສບຕິດ ກະຈ່າຍລາຍຮັບສູ່ປະຊາຊົນ, ທ້ອງຖິ່ນ ທັງທາງກົງ ແລະ ທາງອ້ອມ.

ໂອກາດດຽວກັນນັ້ນ ທ່ານຫົວຫນ້າພະແນກຖະແຫລງຂ່າວ-ວັດທະນະທຳ ແລະ ທ່ອງທ່ຽວ ແຂວງສາລະວັນ ພ້ອມຄະນະ ກໍ່ໄດ້ລົງໄປຊຸກຍູ້ວຽກງານທ່ອງທ່ຽວຢູ່ແຫລງທ່ອງທ່ຽວດອນຝັນດີ ແລະ ລົງຢ້ຽມຢາມຮ້ານສຸກໃຈ ສາລະວັນ ຕື່ມອີກ.

ໂດຍ: ກິນດາວັນ ອ້ວນນາຄູ

#Medialaos MMD  #Salavad Province

ສະພາຄຸ້ມຄອງວິຊາຊີບປິ່ນປົວ ກະຊວງສາທາລະນະສຸກ ໄດ້ຈັດພິທີມອບໃບອະນຸຍາດເຄື່ອນໄຫວວິຊາຊີບວິຊາຊີບປິ່ນປົວ ໃຫ້ຜູ້ປະກອບການເປັນທ່ານໝໍ,ທັນຕະແພດ,ພະຍາບານ ແລະໝໍຜະດຸງຄັນ ທີ່ເຄື່ອນໄຫວວຽກງານການປິ່ນປົວຢູ່ໃນແຂວງຫຼວງພະບາງ ໄດ້ຈັດຂຶ້ນວັນທີ 6 ມິຖຸນາ 2022 ທີ່ຫໍປະຊຸມໃຫຍ່ແຂວງຫຼວງພະບາງ ໂດຍໃຫ້ກຽດເຂົ້າຮ່ວມເປັນປະທານມີທ່ານ ປະລິນຍາເອກ ດຣ. ບຸນແຝງ ພູມມະໄລສິດ ກໍາມະການສູນກາງພັກ, ລັດຖະມົນຕີກະຊວງສາທາລະນະສຸກ;ທ່ານ ສາດສາດາຈານ ດຣ. ປອນເມກ ດາລາລອຍ ອະດີດກໍາມະການສູນກາງພັກ, ອະດີດລັດຖະມົນຕີກະຊວງສາທາລະນະສຸກ, ປະທານສະພາຄຸ້ມຄອງວິຊາຊີບປິ່ນປົວ;ທ່ານ ຮອງສາດສະດາຈານ ດຣ. ບຸນກອງ ສີຫາວົງ ອະດີດລັດຖະມົນຕີກະຊວງສາທາລະນະສຸກ;ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ,ມີຫົວໜ້າພະແນກສາທາລະນະສຸກແຂວງ ພ້ອມດ້ວຍ ອໍານວຍການໂຮງໝໍແຂວງ, ຫ້ອງການສາທາລະນະສຸກເມືອງ, ໂຮງໝໍຊຸມຊົນ ແລະໂຮງໝໍນ້ອຍ,ຕາງໜ້າຈາກຫ້ອງວ່າການແຂວງ ແລະຂະແໜງການທີ່ກ່ຽວຂ້ອງຂອງແຂວງເຂົ້າຮ່ວມ.

ເພື່ອເປັນການຢັ້ງຢຶນ ແລະອະນຸຍາດເຄື່ອນໄຫວວິຊາຊີບປິ່ນປົວ ໃຫ້ແກ່ຜູ້ປະກອບວິຊາຊີບປິ່ນປົວຂອງທ່ານໝໍທັນຕະແພດ, ພະຍາບານ ແລະທ່ານໝໍຜະດຸງຄັນ ທີ່ເຄື່ອນໄຫວວຽກງານປິ່ນປົວຢູ່ແຂວງ ຫຼວງພະບາງ ພ້ອມທັງແນະນໍາຄູ່ມືເອກະສານ ທີ່ ສໍາຄັນຄື ຈັນຍາບັນ, ຂອບເຂດ ແລະ ມາດຕະຖານການປະຕິບັດງານດ້ານວິຊາຊີບປິ່ນປົວ, ແນໃສ່ຮັບປະກັນຄຸນນະພາບ ແລະ ຄວາມປອດໄພຂອງການບໍລິການສຸຂະພາບ, ປົກປ້ອງສິດ ແລະ ຜົນປະໂຫຍດອັນຊອບທຳຂອງຜູ້ມາຮັບບໍລິການສຸຂະພາບ ແລະ ຜູ້ໃຫ້ການບໍລິການສຸຂະພາບ ກໍ່ຄືຜູ້ປະກອບວິຊາຊີບປິ່ນປົວ ໃນ ສປປ ລາວ ທັງຮັບປະກັນໄດ້ 5 ດີ 1 ພໍໃຈ ຂອງກະຊວງສາທາລະນະສຸກວາງອອກ.

ທ່ານ ສາດສາດາຈານ ດຣ. ປອນເມກ ດາລາລອຍ ອະດີດລັດຖະມົນຕີກະຊວງສາທາລະນະສຸກ, ປະທານສະພາຄຸ້ມຄອງວິຊາຊີບປິ່ນປົວ ກ່າວວ່າ: ໂດຍອີງຕາມກົດໝາຍວ່າດ້ວຍການປິ່ນປົວ ແລະຍຸດທະສາດວ່າດ້ວຍລະບົບການອອກໃບອະນຸຍາດປະກອບວິຊາຊີບປິ່ນປົວ ແລະການຂື້ນທະບຽນຜູ້ປະກອບວິຊາຊີບປິ່ນປົວ ໃນ ສປປ ລາວ ແຕ່ປີ 2016-2025 ແລະ ບົດແນະນຳການຈັດຕັ້ງປະຕິບັດການຂຶ້ນທະບຽນ ແລະ ອອກໃບອະນຸຍາດເຄື່ອນໄຫວວິຊາຊີບປິ່ນປົວໄລຍະຂ້າມຜ່ານຮອດປີ 2020 ໂດຍບໍ່ໄດ້ສອບເສັງລະດັບຊາດ ເລກທີ 0182/ສວປ, ລົງວັນທີ 11 ຕຸລາ 2019.ເພື່ອເຮັດໃຫ້ການຈັດຕັ້ງປະຕິບັດການຂື້ນທະບຽນ ແລະອອກໃບອະນຸຍາດເຄື່ອນໄຫວວິຊາຊີບປິ່ນປົວ ໂດຍບໍ່ຜ່ານການສອບເສັງລະດັບຊາດໄດ້ຮັບຜົນດີ, ມີປະສິດທິພາບ ແລະ ປະສິດທິຜົນ. ເດືອນ ມິຖຸນາ 2020 ສະພາຄຸ້ມຄອງວິຊາຊີບປິ່ນປົວ ໄດ້ເຮັດການທົດລອງຄົ້ນຄວ້າຢັ້ງຢືນອອກໃບອະນຸຍາດ ແລະຂື້ນທະບຽນໃຫ້ແກ່ຜູ້ປະກອບວິຊາຊີບປິ່ນປົວທີ່ເຮັດວຽກການປິ່ນປົວ ຢູ່ໂຮງໝໍເດັກ ຂັ້ນສູນກາງ, ເຊີ່ງໄດ້ຄົ້ນຄວ້າຢັ້ງຢືນການອອກໃບອະນຸຍາດເຄື່ອນໄຫວວິຊາຊີບປິ່ນປົວໃຫ້ໄດ້ທັງໝົດ 78 ຄົນ, ໃນນັ້ນມີ ທ່ານໝໍຊັ້ນປະລິນຍາຕຼີຂຶ້ນໄປ 47 ຄົນ, ທັນຕະແພດປລິນຍາຕຼີຂຶ້ນໄປ 4 ຄົນ ແລະ ພະຍາບານຊັ້ນສູງຂຶ້ນໄປ 27 ຄົນ.ຜ່ານການຖອດຖອນບົດຮຽນຢູ່ໂຮງໝໍເດັກຂັ້ນສູນກາງ ແລະ ສືບຕໍ່ຜັນຂະຫຍາຍຈັດຕັ້ງປະຕິບັດການອອກໃບອະນຸຍາດ ແລະຂຶ້ນທະບຽນໃຫ້ແກ່ຜູ້ປະກອບວິຊາຊີບປິ່ນປົວທີ່ເຄື່ອນໄຫວວຽກງານປິ່ນປົວຢູ່ໃນທົ່ວປະເທດໃຫ້ສຳເລັດ,ສະພາຄຸ້ມຄອງວິຊາຊີບປິ່ນປົວ ຈື່ງໄດ້ສືບຕໍ່ເຜີຍແຜ່ບົດແນະນຳເລກທີ 0182/ສວປ ແລະອອກແຈ້ງການໃຫ້ແຕ່ລະພາກສ່ວນໂຮງໝໍສູນກາງ ແລະພະແນກສາທາລະນະສຸກແຂວງ, ນະຄອນຫຼວງ ແຕ່ງຕັ້ງຄະນະສະເພາະກິດໜຶ່ງຂຶ້ນ ເພື່ອຄົ້ນຄວ້າຢັ້ງຢືນເປົ້າໝາຍຜູ້ປະກອບວິຊາຊີບປິ່ນປົວທີ່ມີເງື່ອນໄຂຈະຂຶ້ນທະບຽນ ແລະອອກໃບອະນຸຍາດເຄື່ອນໄຫວວິຊາຊີບປິ່ນປົວ ໃຫ້ໂດຍບໍ່ຜ່ານການສອບເສັງລະດັບຊາດ ສຳລັບຜູ້ປະກອບວິຊາຊີບປິ່ນປົວ ທີ່ຈົບການສືກສາການແພດກ່ອນປີ 2020.

ສໍາລັບແຂວງ ຫຼວງພະບາງ ໄດ້ສຳເລັດການສັງລວມເປົ້າໝາຍຜູ້ປະກອບວິຊາຊີບປິ່ນປົວທີ່ມີເງື່ອນໄຂຂຶ້ນທະບຽນ ແລະອອກໃບອະນຸຍາດໃຫ້ ໂດຍບໍ່ໄດ້ສອບເສັງລະດັບຊາດພາຍໃນແຂວງ,ໄດ້ຄົ້ນຄ້ວາຕາມຂັ້ນຕອນຕ່າງໆທີ່ກຳນົດໄວ້ໃນບົດແນະນຳເລກທີ 0182/ສວປ ແລະຕາມເນື້ອໃນແຈ້ງການຂອງສະພາຄຸ້ມຄອງວິຊາຊີບປິ່ນປົວ ກ່ຽວກັບການກະກຽມຂັ້ນຕອນການຄົ້ນຄວ້າຢັ້ງຢືນການຂຶ້ນທະບຽນ ແລະອອກໃບອະນຸຍາດເຄື່ອນໄຫວວິຊາຊີບປິ່ນປົວ. ຜ່ານການຄົ້ນຄວ້າຢັ້ງຢືນຈາກຄະນະສະເພາະກິດຄຸ້ມຄອງວິຊາຊີບປິ່ນປົວຂອງແຂວງຫຼວງພະບາງ ແລະສົ່ງໃຫ້ຄະນະກຳມະການວິຊາຊີບປິ່ນປົວຂອງສະພາຄຸ້ມຄອງວິຊາຊີບປິ່ນປົວສືບຕໍ່ຄົ້ນຄວ້າຢັ້ງຢືນ,ຈື່ງສາມາດຄົ້ນຄ້ວາຢັ້ງຢືນ ແລະອອກໃບອະນຸຍາດເຄື່ອນໄຫວວິຊາຊີບປິ່ນປົວໃຫ້ຜູ້ປະກອບວິຊາຊີບປິ່ນປົວທີ່ເຄື່ອນໄຫວວຽກງານປິ່ນປົວຢູ່ທົ່ວແຂວງ ຫຼວງພະບາງ ໃນຊຸດທີ 1 ນີ້ ໄດ້ທັງໝົດ 398 ທ່ານ,ທ່ານໝໍ 138 ທ່ານ, ທັນຕະແພດ 22 ທ່ານ, ພະຍາບານ 184 ທ່ານ ແລະ ຜະດຸງຄັນ 54 ທ່ານ,ຜູ້ປະກອບວິຊາຊີບປິ່ນປົວທີ່ໄດ້ຮັບໃບອະນຸຍາດຄັ້ງນີ້ແມ່ນເຮັດວຽກງານປິ່ນປົວຄົນເຈັບໂດຍກົງຢູ່ທີ່ໂຮງໝໍແຂວງ, ໂຮງໝໍຊຸມຊົນ, ໂຮງໝໍນ້ອຍ ໃນທົ່ວແຂວງ ຫຼວງພະບາງ. ໃບອະນຸຍາດເຄື່ອນໄຫວວິຊາຊີບປິ່ນປົວທີ່ມອບໃຫ້ໃນມື້ນີ້ ມີອາຍຸການ 5 ປີ, ເມື່ອໄດ້ຮັບໃບອະນຸຍາດນີ້ແລ້ວ ຜູ້ປະກອບວິຊາຊີບປິ່ນປົວຈະໄດ້ເຄື່ອນໄຫວວຽກງານປິ່ນປົວຖືກຕ້ອງຕາມລະບຽບກົດໝາຍ ແລະຜູ້ປະກອບວິຊາຊີບປິ່ນປົວຈະໄດ້ສືບຕໍ່ຍົກລະດັບຄວາມຮູ້, ຄວາມສາມາດ ແລະປະສົບການປິ່ນປົວຂອງຕົນຢູ່ຕະຫຼອດເວລາ, ສະສົມຄະແນນ ແລະ ຜົນງານດ້ານການປິ່ນປົວ ຕາມຂະບວນການພັດທະນາວິຊາຊີບປິ່ນປົວຕໍ່ເນື່ອງ ຫຼື ພາສາສາກົນເອີ້ນວ່າ continuing professional development (CPD) ທີ່ທາງສະພາຄຸ້ມຄອງວິຊາຊີບປິ່ນປົວກຳນົດໄວ້ ເພື່ອເປັນເງື່ອນໄຂໃຫ້ສະພາຄຸ້ມຄອງວິຊາຊີບປິ່ນປົວໃນການຄົ້ນຄ້ວາຢັ້ງຢືນການຕໍ່ອາຍຸຂອງໃບອະນຸຍາດເຄື່ອນໄຫວວິຊາຊີບປິ່ນປົວດັ່ງກ່າວໃຫ້ໃນທຸກໆ 5 ປີ.

ຈາກນັ້ນ ກໍໄດ້ມີການມອບໃບຢັ້ງຢືນດັ່ງກ່າວນີ້ ໃຫ້ບັນດາຜູ້ປະກອບການທ່ານໝໍ,ທັນຕະແພດ ແລະຜະດຸງຄັນຢ່າງສົມກຽດ ໂດຍໃຫ້ກຽດມອບມີ: ທ່ານ ສາດສະດາຈານ ດຣ. ປອນເມກ ດາລາລອຍ ປະທານສະພາຄຸ້ມຄອງວິຊາຊີບປິ່ນປົວ ກະຊວງສາທາລະນະສຸກ,ທ່ານ ປະລິນຍາເອກ ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ກະຊວງສາທາລະນະສຸກ,ທ່ານ ຮອງສາດສະດາຈານ ດຣ. ບຸນກອງ ສິີຫາວົງ ອະດີດລັດຖະມົນຕີກະຊວງສາທາລະນະສຸກ,ທ່ານ ສາດສະດາຈານ ດຣ. ຈັນເພັງ ທຳມະວົງ ຮອງປະທານສະພາຄຸ້ມຄອງວິຊາຊີບປິ່ນປົວ ກະຊວງສາທາລະນະສຸກ,ທ່ານ ຮອງສາດສະດາຈານ ດຣ. ຈັນພົມມາ ວົງສໍາພັນ ຮອງປະທານສະພາຄຸ້ມຄອງວິຊາຊີບປິ່ນປົວ ກະຊວງສາທາລະນະສຸກ,ທ່ານ ດຣ. ພູທອນ ວັງກອນວິໄລ ຮອງປະທານສະພາຄຸ້ມຄອງວິຊາຊີບປິ່ນປົວ ກະຊວງສາທາລະນະສຸກ.

ຂ່າວ: ເພັດສາຄອນ ສິມມະວົງ

#Medialaos MMD  (ແຫຼ່ງຂໍ້ມູນຈາກ: ນັກຂ່າວແຂວງຫຼວງພະບາງ)

ໃນລະຫວ່າງວັນທີ 7-9 ມິຖຸນາ 2022 ຄະນະຈັດຕັ້ງແຂວງໄຊສົມບູນ ໄດ້ຈັດກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງ ຂັ້ນສູນກາງຄຸ້ມຄອງ ຂອງແຂວງໄຊສົມບູນຂຶ້ນ ໂດຍການເປັນປະທານຮ່ວມຂອງທ່ານ ພອຍຄຳ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ ແລະ ທ່ານ ທອງຈັນ ໂຂງພູຄຳ ຄະນະປະຈຳພັກ, ຮອງຫົວໜ້າຄະນະຈັດຕັ້ງສູນກາງພັກ, ມີຮອງເລຂາພັກແຂວງ, ຮອງເຈົ້າແຂວງ, ຄະນະປະຈຳພັກແຂວງ, ປະທານ-ຮອງປະທານ ສະພາປະຊາຊົນແຂວງ, ສະມາຊິກສະພາແຫ່ງຊາດປະຈຳແຂວງ ພ້ອມດ້ວຍຫົວໜ້າ-ຮອງຫົວໜ້າພະແນກການ, ກົມກອງ, ອົງການອ້ອມຂ້າງແຂວງ, ຄະນະຮັບຜິດຊອບຈາກຄະນະຈັດຕັ້ງສູນກາງພັກ ຕະຫລອດຮອດເຈົ້າເມືອງ 5 ເມືອງ ເຂົ້າຮ່ວມ.

ໃນໂອກາດກ່າວເປີດກອງປະຊຸມ ທ່ານ ພອຍຄຳ ຮຸ່ງບຸນຍວງ ໄດ້ມີຄຳເຫັນຊີ້ນຳຕໍ່ກອງປະຊຸມ ຊຶ່ງທ່ານໄດ້ເນັ້ນໜັກໃຫ້ເອົາໃຈໃສ່ນຳໃຊ້ສິດຂອງຕົນ ເຂົ້າໃນການຄົ້ນຄວ້າ, ທາບທາມ ແລະ ໃຫ້ຄະແນນ ໂດຍອີງຕາມມາດຖານ, ເງື່ອນໄຂ ທີ່ໄດ້ກຳນົດໄວ້ ເພື່ອກຳນົດເອົາເປົ້າໝາຍພະນັກງານນຳພາ-ຄຸ້ມຄອງ ກໍຄືເລຂາພັກແຂວງ, ຮອງເລຂາພັກແຂວງ, ຮອງເຈົ້າແຂວງ, ຄະນະປະຈຳພັກແຂວງ, ກຳມະການພັກແຂວງ, ປະທານ-ຮອງປະທານສະພາປະຊາຊົນແຂວງ ຜູ້ທີ່ມີຄວາມຮູ້-ຄວາມສາມາດ, ມີຄຸນທາດການເມືອງໜັກແໜ້ນ, ສາມາດນຳພາວຽກງານການເມືອງຂອງພັກ ໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນແຕ່ລະໄລຍະ ແນ່ໃສ່ຮັບປະກັນລັກສະນະສືບທອດປ່ຽນແທນແບບຕໍ່ເນືອງ ໃນສະເພາະໜ້າ ແລະ ຍາວນານ, ກະກຽມບຸກຄະລາກອນໃນລັກສະນະເປີດກວ້າງ ເພື່ອໃຫ້ມີແຫລ່ງເລືອກເຟັ້ນພະນັກງານນຳພາ-ຄຸ້ມຄອງແຕ່ລະຂັ້ນ.

ຈາກນັ້ນ ທ່ານ ທອງວັນ ທຳມະວົງ ຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານບົດສະຫລຸບຫຍໍ້ໃນການຈັດຕັ້ງປະຕິບັດແຜນກຳນົດພະນັກງານ ໃນໄລຍະຜ່ານມາ ແລະ ທິດທາງໃນຕໍ່ໜ້າ. ພ້ອມທັງໄດ້ຮັບຟັງການຜ່ານມະຕິ 032/ກມສພ ວ່າດ້ວຍວຽກງານສ້າງແຜນກຳນົດພະນັກງານນຳພາຄຸ້ມຄອງ ແລະ ຜ່ານມະຕິ 030/ກມສພ ວ່າດ້ວຍມາດຖານຂອງພະນັກງານນຳພາ-ຄຸ້ມຄອງ ແລະ ຄຳແນະນຳຂອງຄະນະຈັດຕັ້ງສູນກາງພັກ ຈາກທ່ານ ພົຕ ວົງສອນ ອິນປານພິມ ຮອງເລຂາພັກແຂວງ ໃນການດຳເນີນການທາບທາມ ແຜນກຳນົດພະນັກງານ ຮອບທີ 1, ຮອບທີ 2 ແລະ ຮອບທີ 3 ໂດຍອີງຕາມມາດຖານ ເງືອນໄຂ ດ້ານຄຸນທາດການເມືອງ, ດ້ານຄຸນສົມບັດສິນທຳປະຕິວັດ, ແບບແຜນການດຳລົງຊີວິດ, ດ້ານຄວາມຮູ້-ຄວາມສາມາດ, ດ້ານແບບແຜນການນຳພາ ແລະ ວິທີເຮັດວຽກ. ຈາກນັ້ນກອງປະຊຸມ ໄດ້ດຳເນີນການທາບທາມ, ສັງລວມຄະແນນທາບທາມ ແລະ ລາຍງານຜົນຂອງການທາບທາມ ແຜນກຳນົດພະນັກງານນຳພາ-ຄຸ້ມຄອງ ໄປຕາມແຕ່ລະຂັ້ນຕອນ. ກອງປະຊຸມດຳເນີນເປັນເວລາ 3 ວັນ ຈຶ່ງສຳເລັດ.