ໂດຍຕອບສະໜອງຕາມໜັງສືເຊີນຈາກຄະນະກຳມະການປະຊາຊົນແຂວງ ຮ່າຕິ່ງ ສສ ຫວຽດນາມ ໃນລະຫວ່າງວັນທີ 10-12 ມິຖຸນາ 2022 ສະຫາຍ ວົງເພັດ ຈິດປັນຍາ ຮອງເລຂາພັກແຂວງຄຳມ່ວນ ຜູ້ຊີ້ນຳຂົງເຂດວຽກງານພັກ-ພະນັກງານ ພ້ອມຄະນະ ໄດ້ເດີນທາງເຂົ້າຮ່ວມພິທີລະນຶກ 65 ປີ ວັນປະທານ ໂຮ່ຈິມິນ ມາຢ້ຽມຢາມແຂວງຮາຕິ່ງ (15/06/1957-15/06/2022) ແລະ ຄົບຮອບ 15 ປີ ວັນສ້າງຕັ້ງນະຄອນຮາຕິ່ງ (28/05/2007-28/05/2022).

ໃນຕອນຄໍ່າວັນທີ 11 ມິຖຸນາ 2022 ທີ່ສະໜາມຫຼວງນະຄອນຮ່າຕິ່ງ ໄດ້ຮັບຟັງການກ່າວປາໄສເປີດງານຈາກການນຳຂັ້ນສູງຂອງສູນກາງພັກ ຄອມມູນິດຫວຽດນາມ ແລະ ຮ່ວມຊົມການສະແດງສີລະປະປະກອບສຽງຂອງປະທານໂຮ່ຈິມິນ ດັງກ້ອງກັງວານຕະຫຼອດກາລະນານ.

ທັງນີ້ກໍ່ເພື່ອສ້າງຂະບວນການຕ້ອນຮັບ 2 ວັນປະຫວັດສາດ ແຫ່ງສາຍພົວພັນຮ່ວມມື ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ (18 ກໍລະກົດ 1977-18 ກໍລະກົດ 2022) ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ (05 ກັນຍາ 1962- 05 ກັນຍາ 2022) ໃຫ້ເຕັມໄປດ້ວຍເນື້ອໃນ ເລິກເຊິ່ງ ແລະ ໜັກແໜ້ນ.

ຂ່າວ-ພາບ: ນັກຂ່າວແຂວງຄຳມ່ວນ

#Medialaos MMD #Khammouan Province

ພາຍຫລັງລັດຖະບານມີແຈ້ງການເປີດປະເທດແຕ່ວັນທີ 9 ພຶດສະພາ 2022 ເປັນຕົ້ນມາ, ພວກເຮົາສັງເກດໄດ້ວ່າ ຈຳນວນປະຊາຊົນທີ່ມາຂໍເຮັດຫນັງສືຜ່ານແດນແມ່ນມີຈຳນວນສູງຂຶ້ນ ແລະ ບວກກັບ ຫລາຍປະເທດກໍໄດ້ລຸດຜ່ອນມາດຕະການຕ່າງໆໃນການເຂົ້າ-ອອກເມືອງຂອງປະເທດຕົນ ແລະ ຫລາຍປະເທດກໍເລີ່ມເປີດປະເທດຢ່າງເປັນປົກກະຕິ ຈຶ່ງເຮັດໃຫ້ຈຳນວນປະຊາຊົນລັ່ງໄຫລມາຂໍຫນັງສືຜ່ານແດນມີຈຳນວນເພີ່ມຂຶ້ນຫລາຍ ແລະ ມີລັກສະນະຮີບດ່ວນ ຊຶ່ງທາງກົມກົງສຸນກໍໄດ້ລົງເກັບກຳຂໍ້ມູນ ເພື່ອຊອກຮູ້ສາເຫດທີ່ເຮັດໃຫ້ມີສະພາບປະຊາຊົນມາອັ່ງອໍກັນຢູ່ກົມກົງສຸນ ຢູ່ນະຄອນຫລວງວຽງຈັນ ດັ່ງນີ້:

❖ ປະຊາຊົນຈຳນວນຫລວງຫລາຍ ມີຄວາມຕ້ອງການນຳໃຊ້ຫນັງສືຜ່ານແດນ ເພື່ອກັບຄືນໄປອອກແຮງງານຢູ່ປະເທດໃກ້ຄຽງ. ໃນສອງສາມປີມານີ້ ນັກສຶກສາທີ່ຈົບຊັ້ນມັດທະຍົມປາຍ ມີຈໍານວນຫລາຍ ບໍ່ສາມາດເດີນທາງໄປຮຽນຕໍ່ຢູ່ຕ່າງປະເທດໄດ້ ແລະ ມາເຖິງປະຈຸບັນ ເຂົາເຈົ້າກໍຂຸ້ນຂ້ຽວຕ້ອງການຫນັງສືຜ່ານແດນ ເພື່ອປະກອບເອກະສານສະຫມັກເອົາທຶນສຶສາຕໍ່ຢູ່ຕ່າງປະເທດ.

❖ ປະຊາຊົນຈຳນວນຫລາຍມີຄວາມເຂົ້າໃຈວ່າ ຖ້າມາຍື່ນຄໍາຮ້ອງ ຢູ່ນະຄອນຫລວງວຽງຈັນ ຈະໄດ້ຮັບຫນັງສືຜ່ານ ແດນໄວ ຊຶ່ງຄວາມຈິງ ໂດຍປະຕິບັດຕາມ ກົດຫມາຍວ່າດ້ວຍການເຂົ້າ-ອອກເມືອງ ການອອກຫນັງສື ຜ່ານແດນຢູ່ນະຄອນຫລວງວຽງຈັນ ມີກຳຫນົດເວລາ 7 ວັນລັດຖະການ ແລະ ຢູ່ຕ່າງແຂວງ ແມ່ນ 10 ວັນລັດຖະການ.

❖ ຈາກສະພາບການທີ່ມີຄວາມຕ້ອງສູງໃນການນຳໃຊ້ຫນັງສືຜ່ານແດນ ເຮັດໃຫ້ເກີດມີກຸ່ມຄົນສວຍໂອກາດຈຳນວນຫນຶ່ງ ຫມູນໃຊ້ສະພາບການດັ່ງກ່າວນີ້ ຫາຜົນປະໂຫຍດໃຫ້ແກ່ຕົນ ໂດຍໄປໂຄສະນາໃຫ້ປະຊາຊົນຢູ່ແຂວງຕ່າງໆ ວ່າສາມາດພາໄປເຮັດຫນັງສືຜ່ານແດນຢູ່ວຽງຈັນໄດ້ໄວ ໂດຍຮຽກເກັບຄ່າລົດ ຄ່າພັກເຊົາ ແລະ ຄ່າບໍລິການພາໄປເຮັດ ແລະ ອື່ນໆອີກ.

❖ ເກີດມີກຸ່ມຄົນຈຳນວນຫນຶ່ງ ທີ່ອ້າງຕົນເອງວ່າເປັນນາຍຫນ້າ ອາສາພາແລ່ນເອກະສານຕ່າງໆ ແລະ ຮັບຈ້າງມາຢືນລໍຖ້າຄິວ ເພື່ອເຂົ້າຍື່ນເອກະສານໃຫ້ແທນກັນ ແລະ ຮຽກເກັບເງິນນຳປະຊາຊົນ.

ຈາກສາເຫດທີ່ກ່າວມາຂ້າງເທິງນັ້ນ ແລະ ເຖິງວ່າພວກເຮົາຈະມີຄວາມພ້ອມດ້ານລະບົບອອກຫນັງສືຜ່ານແດນ ທີ່ທັນສະໄຫມກໍ່ຕາມ ແຕ່ບັນຫາທີ່ປະຊາຊົນ ຈາກທຸກແຂວງ ເປັນຈຳນວນຫລວງຫລາຍ ພ້ອມພາກັນມາຍື່ນຄໍາຮ້ອງຂໍຫນັງສືຜ່ານແດນຢູ່ກົມກົງສຸນຈຸດດຽວ ຊຶ່ງມີຈຳນວນທີ່ເກີນຄວາມອາດສາມາດຕົວຈິງ ທີ່ພວກເຮົາຈະສາມາດຮັບບໍລິການໄດ້ໃນແຕ່ລະວັນ ຈຶ່ງເກີດມີສະພາບແອອັດ ແລະ ຄວາມບໍ່ພໍໃຈຂອງຜູ້ມາຍື່ນຄຳຮ້ອງ ດັ່ງທີ່ປະກົດຕາມສື່ສັງຄົມອອນລາຍນັ້ນ.

ຕໍ່ກັບສະພາບການດັ່ງກ່າວ, ກົມກົງສຸນ, ກະຊວງການຕ່າງປະເທດ ກໍຮັບຮູ້ໄດ້ບັນຫາ ແລະ ບໍ່ໄດ້ເສີຍເມີຍ ພ້ອມທັງໄດ້ຄົ້ນຄ້ວາເພື່ອຊອກຫາວິທີ ແລະ ມາດຕະການຕ່າງໆ ເພື່ອຮອງຮັບແລະແກ້ໄຂບັນຫາທີ່ເກີດຂຶ້ນ ດັ່ງນີ້:

❖ ມາດຕະການແກ້ໄຂບັນຫາສະເພາະຫນ້າ ຫລື ໄລຍະສັ້ນ:

– ອັນທີ່ຫນຶ່ງ ໄດ້ປຸກລະດົມຈິດໃຈພະນັກງານພາຍໃນກົມກົງສຸນ ໃຫ້ມີຄວາມເສຍສະຫລະເວລາຂອງຕົນ ເພື່ອມາບໍລິການຮັບໃຊ້ແກ່ປະຊາຊົນ ໂດຍໄດ້ຈັດຕັ້ງພະນັກງານຈຳນວນຫນຶ່ງ ມາຈັດຄວາມເປັນລະບຽບ ແລະ ກວດກາເອກະສານໃຫ້ປະຊາຊົນຢູ່ພາຍໃນກົມກົງສຸນ ກ່ອນໂມງລັດຖະການ. ຫລາຍຄົນກໍຄົງເຫັນວ່າ ຫົກໂມງເຄິ່ງຫາເຈັດໂມງເຊົ້າ ມີພະນັກງານພວກເຮົາ ໄດ້ເລີ່ມວຽກງານຂອງຕົນແລ້ວ. ຫລາຍຄົນອາດຈະມີຂໍ້ສົງໄສວ່າ ເປັນຫຍັງການແຈກບັດຄິວຢູ່ສະຖານທີ່ເຮັດຫນັງສືຜ່ານແດນ ຈຶ່ງແຕກຕ່າງຈາກສະຖານທີ່ອື່ນ ຊຶ່ງໃຫ້ຜູ້ມາໃຊ້ບໍລິການກົດເອົາບັດຄິວເອງ ແຕ່ ຢູ່ກົມພວກເຮົາແມ່ນພະນັກງານເປັນຜູ້ແຈກໃຫ້. ຄຳຕອບກໍຄື ພວກເຮົາບໍ່ຢາກໃຫ້ປະຊາຊົນທີ່ມາລໍນັ່ງຖ້າຄິວເປັນການເສຍເວລາ ໃນກໍລະນີເອກະສານຂອງເຂົາເຈົ້າບໍ່ຄົບຖ້ວນ, ພະນັກງານພວກເຮົາຈະຊ່ວຍກວດກາເອກະສານໃຫ້ກ່ອນ ແລະ ເຫັນວ່າຄົບຖ້ວນ ຈຶ່ງເອົາຄິວໃຫ້ເຂົ້າໄປສຳພາດ. ອີກບັນຫາຂອງການກວດຄິວ ກໍເພື່ອຄົ້ນຫາບັນດານາຍຫນ້າທີ່ຮັບຈ້າງມາຢືນເອົາຄິວໃຫ້ກັນ ຖ້າພົບເຫັນກໍລະນີ ບໍ່ແມ່ນເຈົ້າຂອງເອກະສານ ແລະ ບໍ່ມີສ່ວນກ່ຽວຂ້ອງກັບຜູ້ມາຍື່ນຄຳຮ້ອງແທ້ ພວກເຮົາກໍຈະບໍ່ພິຈາລະນາໃຫ້ຄິວສຳພາດ.

– ອັນທີ່ສອງ ໄດ້ເພີ່ມຈຳນວນການຮັບເອກະສານຄຳຮ້ອງ ຂອງແຕ່ລະວັນຫລາຍຂຶ້ນກ່ວາເກົ່າ ເຊັ່ນຈາກສະພາບປົກກະຕິທີ່ມີຄວາມສາມາດຮັບພິຈາລະນາໄດ້ ປະມານສູງສຸດ 300 ຄົນ ກໍເພີ່ມມາເປັນ 500 ກ່ວາຄົນ ຫລື ຫລາຍກ່ວານັ້ນ ໂດຍໃຫ້ພະນັກງານພວກເຮົາດຳເນີນການສຳພາດໃຫ້ຫມົດທຸກຄົນ ເຖິງວ່າຈະກາຍໂມງເລີກວຽກລັດຖະການແລ້ວກໍຕາມ ຊຶ່ງຕົວຈິງບາງມື້ພວກເຮົາກໍ ດໍາເນີນການສໍາພາດຈົນເຖິງເວລາ 6 ໂມງແລງ ແລະ ບາງສູນຮັບຄຳຮ້ອງຂໍຫນັງສືຜ່ານແດນທີ່ຕ່າງແຂວງ ກໍອາດເລີກຄຳ່ກ່ວານັ້ນ ແລະ ຫນ່ວຍງານການຜະລິດຫນັງສື ຜ່ານແດນກໍເຊັ່ນດຽວກັນ ພ້ອມກັນເສຍສະຫລະເວລາມາປະຕິບັດຫນ້າທີ່ທັງວັນເສົາ ແລະ ອາທິດ ໂດຍປາສະຈາກເງິນລວງເວລາ ຫລື ເງິນອຸດຫນູນນອກໂມງການໃດໆ.

– ມີແຜນການນຳສົ່ງພະນັກງານສຳພາດເພີ່ມຕື່ມ ລົງໄປປະຈໍາຢູ່ແຕ່ລະສູນຮັບຄຳຮ້ອງຂໍຫນັງສືຜ່ານແດນທີ່ຕ່າງແຂວງ ເພື່ອເພີ່ມຂີດຄວາມສາມາດຮັບຄຳຮ້ອງໃນແຕ່ລະວັນໃຫ້ໄດ້ຫລາຍຂຶ້ນຕື່ມອີກ.

– ເພີ່ມທະວີ ການເຜີຍແຜ່ຂໍ້ມູນກ່ຽວກັບການປະກອບເອກະສານ ແລະ ຂັ້ນຕອນການຍື່ນຄໍາຮ້ອງດ້ວຍຕົນເອງ ໃຫ້ປະຊາຊົນຮັບຮູ້ ແລະ ບໍ່ຫລົງເຊື່ອບັນດາກຸ່ມນາຍຫນ້າ ທີ່ອ້າງວ່າສາມາດຊ່ວຍແລ່ນເອກະສານໃຫ້ໄດ້.

– ຕໍ່ກັບສະພາບຄວາມແອອັດ, ຄວາມບໍ່ເປັນລະບຽບຮຽບຮ້ອຍ ແລະ ກີດຂວາງການສັນຈອນຢູ່ບໍລິເວນດ້ານຫນ້າກົມກົງສຸນ ຊຶ່ງມີແມ່ຄ້າມາຂາຍເຄື່ອງຕາມແຄມທາງ ແລະ ບັນດານາຍຫນ້າທັງຫລາຍມາຕັ້ງໂຕະຮັບເອກະສານຕ່າງໆນັ້ນ ເຫັນວ່າບໍ່ຖືກຕ້ອງຕາມລະບຽບກົດຫມາຍ ຊຶ່ງພວກເຮົາກໍໄດ້ຂຶ້ນປ້າຍຫ້າມຂາຍເຄື່ອງຢູ່ບໍລິເວນນັ້ນ ແລະ ໄດ້ລົງຕັກເຕືອນພ້ອມທັງຂໍຄວາມຮ່ວມມືນຳ ແຕ່ກໍ່ບໍ່ມີໃຜໃຫ້ການຮ່ວມມືນໍາພວກເຮົາ. ຕໍ່ກັບບັນຫານີ້ ກົມກົງສຸນ ກໍໄດ້ສົ່ງຫນັງສືໄປຍັງ ອໍານາດການປົກຄອງຂອງເມືອງຈັນທະບູລີແລ້ວ ເພື່ອສະເຫນີໃຫ້ເພິ່ນລົງມາຊ່ວຍຈັດສັນຄວາມເປັນລະບຽບຮຽບຮ້ອຍຢູ່ບໍລິເວນດ້ານຫນ້າກົມກົງສຸນ, ກະຊວງການຕ່າງປະເທດ.

❖ ມາດຕະການແກ້ໄຂບັນຫາໃນອານາຄົດ ຫລື ໄລຍະຍາວ:

– ເພື່ອປັບປຸງການບໍລິການໃຫ້ໄດ້ດີຂຶ້ນກ່ວາເກົ່າໃນອານາຄົດ, ປະຈຸບັນກົມກົງສຸນ ກຳລັງຄົ້ນຄ້ວາ ແລະ ອອກແບບລະບົບແຈກບັດຄິວນັດສຳພາດໂດຍຜ່ານລະບົບອອນລາຍ.

– ປະຈຸບັນ ກະຊວງການຕ່າງປະເທດ ໄດ້ສຳເລັດການຮ່າງ ກົດຫມາຍວ່າດ້ວຍຫນັງສືຜ່ານແດນ ແລະ ຜ່ານຂັ້ນຕອນການລົງທາບທາມຄຳເຫັນ ຢູ່ຂັ້ນສູນກາງ, ຢູ່ບັນດາແຂວງພາກເຫນືອ ແລະ ແຂວງພາກກາງແລ້ວ ແລະ ພາຍໃນອາທິດນີ້ກໍຈະໄດ້ລົງທາບທາມຄຳເຫັນຢູ່ບັນດາແຂວງພາກໃຕ້ ແລະຄາດວ່າຈະສົ່ງໃຫ້ສະພາແຫ່ງຊາດພິຈາລະນາໃນທ້າຍປີ 2022 ນີ້. ກົດຫມາຍສະບັບນີ້ແມ່ນມີຄວາມສໍາຄັນຫລາຍ ເພື່ອກຳນົດຫລັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ ແລະ ຕິດຕາມ ກວດກາ ວຽກງານຫນັງສືຜ່ານແດນ ຂອງປະເທດເຮົາ ແລະ ເພື່ອເຮັດໃຫ້ການປະຕິບັດວຽກງານດັ່ງກ່າວມີຄວາມຖືກຕ້ອງ, ຊັດເຈນ, ວ່ອງໄວ, ທັນສະໄຫມ ແລະ ເປັນລະບົບ ແນໃສ່ປົກປ້ອງສິດ ແລະ ຜົນປະໂຫຍດຂອງພົນລະເມືອງລາວ, ອໍານວຍຄວາມສະດວກໃຫ້ພົນລະເມືອງລາວໃນການເດີນທາງເຂົ້າ-ອອກປະເທດ, ພັກເຊົາ ຫລື ອາໄສຢູ່ຕ່າງປະເທດ.

– ຕາມແຜນການຂອງໂຄງການອອກຫນັງສືຜ່ານແດນໃນອານາຄົດ ໃນເມື່ອພວກເຮົາມີຄວາມພ້ອມທາງດ້ານງົບປະມານ ແລະ ດ້ານອື່ນໆ ກໍຈະໄດ້ຂະຫຍາຍສູນຮັບຄຳຮ້ອງຂໍຫນັງສືຜ່ານແດນຢູ່ຕ່າງແຂວງ ໄປຍັງບັນດາແຂວງອື່ນໆຕື່ມອີກ.

ຕໍ່ກັບສະພາບການທີ່ເກີດຂຶ້ນ ທາງກົມກົງສຸນ ຂໍສະແດງຄວາມຂໍໂທດ ແລະ ຂໍອະໄພ ມາຍັງປະຊາຊົນ ທີ່ມາໃຊ້ບໍລິການ ທີ່ພວກເຮົາບໍ່ສາມາດຕອບສະຫນອງໄດ້ຕາມຄວາມຕ້ອງການຂອງທຸກຄົນ ອັນເນື່ອງມາຈາກ ກະແສການລັ່ງໄຫລຂອງປະຊາຊົນເປັນຈຳນວນຫລວງຫລາຍມາຍື່ນຄຳຮ້ອງຢູ່ນະຄອນຫລວງວຽງຈັນ ຊຶ່ງມີປະລິມານທີ່ເກີນຂີດຄວາມສາມາດຮັບຮອງຕົວຈິງ ທາງດ້ານເຕັກນິກ ແລະ ບຸກຄະລາກອນຂອງພວກເຮົາທີ່ມີຈຳກັດ ແລະຂໍຮຽກຮ້ອງ ແລະ ຂໍຄວາມຮ່ວມມືມາຍັງທ່ານໃນບັນຫາຕ່າງໆດັ່ງນີ້:

– ຂໍແຈ້ງໃຫ້ຊາບວ່າ ນອກຈາກຢູ່ກົມກົງສຸນ ທີ່ນະຄອນຫລວງວຽງຈັນ, ພວກເຮົາຍັງມີສູນຮັບຄໍາຮ້ອງຂໍຫນັງສືຜ່ານແດນຢູ່ ແຂວງອຸດົມໄຊ, ແຂວງຊຽງຂວາງ, ແຂວງໄຊຍະບູລີ, ແຂວງຄຳມ່ວນ, ແຂວງສະຫວັນນະເຂດ ແລະ ແຂວງຈຳປາສັກ. ໃນໄລຍະນີ້ ຂໍຄວາມຮ່ວມມືມາຍັງປະຊາຊົນທີ່ຢູ່ແຂວງເຫລົ່ານີ້ ຫລືຢູ່ບັນດາແຂວງໃກ້ຄຽງ ໃຫ້ເຂົ້າໄປໃຊ້ບໍລິການຢູ່ບັນດາສູນຮັບຄຳຮ້ອງດັ່ງກ່າວ ເພື່ອເປັນການລຸດຜ່ອນຄວາມແອອັດຂອງປະຊາຊົນ ຢູ່ນະຄອນຫລວງວຽງຈັນ. ຂໍໃຫ້ມີສະຕິ ຢ່າຫລົງເຊື່ອບັນດານາຍຫນ້າ ທີ່ອ້າງຕົນວ່າຈະສາມາດພາໄປເຮັດ ຫລື ຊ່ວຍແລ່ນເອກະສານ ພ້ອມທັງເລັ່ງລັດຂັ້ນຕອນການອອກຫນັງສືຜ່ານແດນໃຫ້ຕົນໄດ້ໄວຢູ່ນະຄອນຫລວງວຽງຈັນ (ເຈົ້າຫນ້າທີ່ຈະພິຈາລະນາອຳນວຍຄວາມສະດວກອອກດ່ວນໃຫ້ສະເພາະກໍລະນີສຸກເສີນ ເຊັ່ນຄົນເຈັບ ທີ່ມີຄວາມຈໍາເປັນຕ້ອງເດີນທາງດ່ວນໄປຮັກສາປິ່ນປົວຢູ່ຕ່າງປະເທດ ໂດຍມີເອກະສານຢັ້ງຢືນຈາກໂຮງຫມໍເທົ່ານັ້ນ).

– ຂໍໃຫ້ປະຊາຊົນ ມາຍື່ນຄຳຮ້ອງດ້ວຍຕົນເອງ ມີບັນຫາທາງດ້ານເອກກະສານ ກໍໃຫ້ເຂົ້າປຶກສານໍາພະນັກງານຂອງສູນບໍລິການຂອງພວກເຮົາໄດ້ ຊຶ່ງຈະເປັນຜູ້ໃຫ້ຂໍ້ມູນທີ່ຖືກຕ້ອງແກ່ບັນດາທ່ານ. ຜ່ານມາພວກເຮົາກໍສັງເຫດເຫັນວ່າ ມີຫລາຍຄົນ ໄປປຶກສານໍານາຍຫນ້າຢູ່ແຄມທາງພຸ້ນໃນການປະກອບເອກະສານຕ່າງໆ ສຸດທ້າຍກໍບໍ່ມີຄວາມຖືກຕ້ອງ ແລະ ຕ້ອງໄດ້ເຮັດຄືນອີກຫລາຍຄັ້ງຈຶ່ງຖືກຕ້ອງ, ຊຶ່ງເຫັນວ່າເປັນຊ່ອງວ່າງໃຫ້ນາຍຫນ້າຮຽກເອົາເງິນຄ່າແລ່ນເອກະສານຂອງພວກທ່ານໄປໂດຍໄຮ້ເຫດຜົນ.

– ຂໍຖືໂອກາດນີ້, ຂໍຄວາມເຫັນໃຈ ຈາກປະຊາຊົນ ແລະ ທຸກພາກສ່ວນຂອງສັງຄົມ ໃຫ້ມີຄວາມເຂົ້າໃຈວ່າ ລະບົບການອອກຫນັງສືຜ່ານແດນແມ່ນມີຄວາມລະອຽດອ່ອນ ແລະ ຕິດພັນກັບບັນຫາຄວາມຫມັ້ນຄົງທັງພາຍໃນ ແລະ ຕ່າງປະເທດ. ທຸກຂັ້ນຕອນຕ້ອງໃຫ້ມີຄວາມຖືກຕ້ອງຕາມມາດຖານ ແລະ ເງື່ອນໄຂຂອງສາກົນ ເພື່ອນາໆປະເທດຈະໄດ້ໃຫ້ການຍອມຮັບ, ໃຫ້ຄວາມເຊື່ອຖືຕໍ່ຫນັງສືຜ່ານແດນຂອງປະເທດເຮົາ ແລະ ເວລານໍາໃຊ້ເດີນທາງໄປຕ່າງປະເທດ ກໍຈະໄດ້ຮັບຄວາມສະດວກດີ. ສະນັ້ນ ຕໍ່ກັບຫລາຍຄໍາເຫັນຂອງສັງຄົມທີ່ວ່າ ເປັນຫຍັງບໍ່ໃຫ້ແຂວງອື່ນອອກໃຫ້ໆທົ່ວເຖິງທຸກແຂວງ ກໍ່ດັ່ງທີ່ໄດ້ກ່າວມາຂ້າງເທິງນັ້ນ ພວກເຮົາກໍມີແຜນທີ່ຈະຂະຫຍາຍ ສູນບໍລິການຮັບຄໍາຮ້ອງຂໍຫນັງສືຜ່ານແດນ ໄປຍັງແຂວງອື່ນໆຕື່ມອີກໃນອານາຄົດ.

ບັນຫາສຸດທ້າຍ, ຂໍໃຫ້ປະຊາຊົນຮັບຮູ້ວ່າ ຫນັງສືຜ່ານແດນ ແມ່ນຊັບສົມບັດຂອງຊາດ ທີ່ອະນຸຍາດໃຫ້ພົນລະເມືອງລາວ ນຳໃຊ້ໃນການເດີນທາງເຂົ້າ-ອອກປະເທດ ແລະ ເດີນທາງໄປຕ່າງປະເທດ, ຈຶ່ງສະເຫນີໃຫ້ທຸກຄົນ ຕ້ອງປົກປັກຮັກສາໃຫ້ດີ ບໍ່ໃຫ້ຕົກເຮ່ຍເສຍຫາຍ ແລະ ອີກເທື່ອຫນຶ່ງ ຂໍຄວາມຮ່ວມມືມາຍັງຜູ້ທີ່ໄດ້ຮັບຫນັງສືຜ່ານແດນທຸກໆຄົນ ນໍາໃຊ້ຫນັງສືຜ່ານແດນໃຫ້ຖືກກັບຈຸດປະສົງ ຖືກຕ້ອງຕາມລະບຽບກົດຫມາຍ ແລະ ປະຕິບັດລະບຽບການເຂົ້າ-ອອກເມືອງໃຫ້ຖືກຕ້ອງ, ນໍາໃຊ້ຫນັງສືຜ່ານແດນຂອງພວກທ່ານ ຢ່າງມີຄວາມຮັບຜິດ ຊອບສູງ ຕາມສິດນຳໃຊ້ຂອງຕົນເອງ.

#Medialaos MMD (ແຫຼ່ງຂໍ້ມູນຈາກ: ກະຊວງການຕ່າງປະເທດ)

ໃນວັນທີ 14 ມິຖຸນາ 2022 ກະຊວງສາທາລະນະສຸກ, ຮ່ວມກັບ ກະຊວງຖະເເຫຼງຂ່າວ, ວັດທະນະທຳ ເເລະ ທ່ອງທ່ຽວ ເເລະ ອົງການຢູນິເຊັບ ໄດ້ຈັດກອງປະຊຸມເຜິຍເເຜ່ວຽກງານສັກວັກຊີນໃນ ສປປລາວ ໃຫ້ແກ່ບັນດາບັນນາທິການຂ່າວ ເພື່ອປືກສາຫາລື ກ່ຽວກັບວິທີການທີ່ສື່ມວນຊົນໃນທົ່ວປະເທດ ຈະສາມາດຊ່ວຍປັບປຸງອັດຕາປົກຄຸມການສັກວັກຊີນກັນພະຍາດໂຄວິດ-19 ແລະ ວັກຊີນຮອບປົກກະຕິ ໃນ ສປປ ລາວ.

ໂດຍການເປັນປະທານ ຂອງ ທ່ານ ສົມສະຫວາດ ພົງສາ, ຫົວໜ້າກົມສື່ມວນຊົນ ຂອງກະຊວງຖະເເຫຼງຂ່າວ, ວັດທະນະທຳ ເເລະ ທ່ອງທ່ຽວ, ດຣ ພອນປະເສີດ ອຸນາພົມ, ຫົວໜ້າກົມອະນາໄມ ແລະ ສົ່ງເສີມສຸຂະພາບ ຂອງກະຊວງສາທາລະນະສຸກ, ພ້ອມດ້ວຍ ທ່ານ Bisrat Abiy, ວ່າການເເທນຫົວໜ້າພະເເນກສຸຂະພາບ ຂອງອົງການຢູນິເຊັບ ປະຈຳ ສປປ ລາວ.

ໃນກອງປະຊຸມເຜີຍເເຜ່ຄັ້ງນີ້ໄດ້ມີການນຳສະເໜີລາຍງານຫລ້າສຸດ ກ່ຽວກັບວຽກງານສັກວັກຊີນໃນ ສປປ ລາວ ໂດຍສະເພາະໃນແຂວງພາກເໜືອ: ເເຂວງຫຼວງພະບາງ, ຜົ້ງສາລີ, ຫຼວງນໍ້າທາ, ອຸດົມໄຊ, ໄຊຍະບູລີ, ບໍ່ແກ້ວ ແລະ ນະຄອນຫຼວງວຽງຈັນ, ພາຍຫຼັງການຄົ້ນພົບວ່າອັດຕາການປົກຄຸມການສັກວັກຊີນກັນພະຍາດໃນແຂວງເຫຼົ່ານີ້ຍັງບໍ່ສາມາດບັນລຸເປົ້າໝາຍທີ່ວາງໄວ້ສຳລັບປີ 202.

“ການສັກວັກຊີນເປັນກຸນເເຈອັນສຳຄັນສຳລັບການຟື້ນຕົວຂອງ ສປປ ລາວ ຈາກຜົນກະທົບຂອງພະຍາດໂຄວິດ-19 ເຖີງເເມ່ນວ່າຍັງມີສິ່ງທ້າທາຍໃນວຽກງານສັກວັກຊີນໃນ 32 ເມືອງ ທີ່ມີອັດຕາສັກຢາຕຳກວ່າ 50% ໃນປີ 2021 ເເຕ່ໃນຂະນະດຽວກັນນັ້ນ ກໍ່ຍັງມີໂອກາດສຳລັບການເພີ່ມທະວີການຈັດຕັ້ງປະຕິບັດວຽກງານຂອງພວກເຮົາໃຫ້ຫຼາຍຂຶ້ນ ເເລະ ສືບຕໍ່ຊຸກຍູ້ສົ່ງເສີມການສັກວັກຊີນໃຫ້ບັນດາພໍ່ເເມ່ພີ່ນ້ອງໃນຊຸມຊົນຂອງພວກເຮົາໃຫ້ບັນລຸໄດ້ຫລາຍກວ່າ 80% ໃນປີ 2022” ກ່າວໂດຍ ທ່ານ ດຣ ພອນປະເສີດ ອຸນາພົມ, ຫົວໜ້າກົມອະນາໄມ ແລະ ສົ່ງເສີມສຸຂະພາບ ຂອງກະຊວງສາທາລະນະສຸກ.

ຜູ້ເຂົ້າຮ່ວມຍັງໄດ້ສົນທະນາກັນກ່ຽວກັບວິທີການຕ່າງໆ ເພື່ອປັບປູງການໃຫ້ບໍລິການສັກວັກຊີນໃຫ້ເເກ່ຊຸມຊົນ ເພື່ອບັນລຸເປົ້າໝາຍອັດຕາປົກຄຸມການສັກວັກຊີນຂອງປະເທດ, ບົດບາດຂອງສື່ມວນຊົນໃນການເຜີຍເເຜ່ໂຄສະນາການສັກວັກຊີນທົ່ວປະເທດ ເເລະ ແຜນການສັກວັກຊີນໃນອະນາຄົດ ໂດຍສະເພາະໃນບັນດາກຸ່ມເດັກນ້ອຍ.

“ສື່ມວນຊົນ ເຊິ່ງສາມາດເຂົ້າເຖິງຈຳນວນຄົນຢ່າງກວ້າງຂວາງ, ມີບົດບາດອັນສໍາຄັນໃນການເຜີຍແຜ່ຂໍ້ມູນທີ່ຖືກຕ້ອງ ແລະ ເຊື່ອຖືໄດ້ກ່ຽວກັບພະຍາດໂຄວິດ-19 ໃຫ້ແກ່ສາທາລະນະຊົນ. ດັ່ງນັ້ນ ມັນເປັນສິ່ງສໍາຄັນທີ່ສື່ມວນຊົນໃນທົ່ວປະເທດ ຄວນເພີ່ມທະວີຄວາມພະຍາຍາມໃນວຽກງານສື່ສານກັບປະຊາຊົນລາວ ເພື່ອໃຫ້ສາມາດບັນລຸເປົ້າໝາຍອັດຕາການປົກຄຸມການສັກວັກຊີນຂອງປະເທດ” ກ່າວໂດຍ ທ່ານ ສົມສະຫວາດ ພົງສາ, ຫົວໜ້າກົມສື່ມວນຊົນ ຂອງກະຊວງຖະເເຫຼງຂ່າວ, ວັດທະນະທຳ ເເລະ ທ່ອງທ່ຽວ.

ນອກຈາກນີ້ ທ່ານ Bisrat Abiy, ວ່າການເເທນຫົວໜ້າພະເເນກສຸຂະພາບ ຂອງອົງການຢູນິເຊັບ ປະຈໍາ ສປປ ລາວ ຍັງໄດ້ໃຫ້ຄໍາເຫັນດັ່ງກ່າວ: “ວັກຊີນຍັງຄົງເປັນເຄື່ອງມືອັນສຳຄັນທີ່ຂາດບໍ່ໄດ້ສຳລັບພວກເຮົາ ໃນການຮັບມືກັບພະຍາດໂຄວິດ-19 ແລະ ມັນເປັນສິ່ງສຳຄັນທີ່ທຸກຄົນໃນຊຸມຊົນພວກເຮົາໄດ້ຮັບການສັກວັກຊີນ, ບໍ່ວ່າຈະເປັນເດັກນ້ອຍ ຫຼື ຜູ້ສູງອາຍຸ. ອົງການຢູນີເຊັບ ຍັງຄົງໃຫ້ຄຳໝັ້ນສັນຍາທີ່ຈະສືບຕໍ່ໃຫ້ການຮ່ວມມືກັບລັດຖະບານເເຫ່ງ ສປປ ລາວ ໃນການສົ່ງເສີມວຽກງານສັກວັກຊີນກັນພະຍາດໂຄວິດ-19 ແລະ ສ້າງຄວາມເຊື່ອໝັ້ນໃນປະສິດທິພາບ ແລະ ຄວາມປອດໄພ ຂອງວັກຊີນໃນຊຸມຊົນ.”

ໃນມື້ທີ 2 ຂອງການດຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 14 ມິຖຸນາ 2022 ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ບັນດາສະ​ມາຊິກສະພາແຫ່ງຊາດ ປະຈຳເຂດເລືອກຕັ້ງຕ່າງໆ ໄດ້ສືບຕໍ່ສຸມໃສ່ ປະກອບຄຳຄິດຄຳເຫັນ ຕໍ່ບົດລາຍງານຂອງບັດຖະບານ ກ່ຽວກັບແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ 6 ເດືອນຕົ້ນປີ ແລະ 6 ເດືອນທ້າຍປີ 2022 ທີ່ສະເໜີໂດຍທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ.

ບັນດາສະມາຊິກສະພາແຫ່ງຊາດ ໄດ້ສຸມໃສ່ປະກອບຄຳເຫັນໃສ່ຫລາຍບັນຫາສຳຄັນ ເຊິ່ງໂດຍລວມແລ້ວແມ່ນເຫັນດີເປັນເອກະພາບຕໍ່ບົດລາຍງານດັ່ງກ່າວ, ພ້ອມທັງສະແດງຄວາມຊົມເຊີຍຕໍ່ລັດຖະບານ ທີ່ໄດ້ຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ ໃນ 6 ເດືອນຜ່ານມາ ໃນເງື່ອນໄຂທີ່ສະພາບການສາກົນ ແລະ ພາຍໃນປະເທດ ຂອງພວກເຮົາ ມີທັງຂໍ້ສະດວກ, ກາລະໂອກາດ ແລະ ຂໍ້ຫຍຸງຍາກຫລາຍປະການ ທີ່ສົ່ງຜົນກະທົບ ຕໍ່ການຈັດຕັ້ງປະຕິ ບັດ ຢ່າງໜັກໜ່ວງ ແຕ່ລັດຖະບານ ກໍໄດ້ມີຄວາມພະຍາຍາມຢ່າງຕັ້ງໜ້າ ເພື່ອແກ້ໄຂບັນຫາລວມຂອງຊາດ ຈຶ່ງສາມາດປະຄັບປະຄອງເສດຖະກິດຂອງປະເທດ ບໍ່ໃຫ້ຕົກເຂົ້າສູ່ວິກິດໜັກໜ່ວງ, ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍໂດຍພື້ນ ຖານ ແລະ ອື່ນໆ.

ພ້ອມດຽວກັນນັ້ນ, ສສຊ ບາງທ່ານ ຍັງໄດ້ສະເໜີໃຫ້ລັດຖະບານ ເລັ່ງປັບປຸງແກ້ໄຂບາງບັນຫາສຳຄັນທີ່ເຫັນວ່າຍັງບໍ່ທັນສອດຄ່ອງເທົ່າທີ່ຄວນ ເປັນຕົ້ນບັນຫາດ້ານການສຶກສາ, ບັນຫາລາຄານ້ຳມັນ, ບັນຫາເງິນກີບອ່ອນຄາ, ເງິນຕາຕ່າງປະເທດແຂງຄ່າ ແລະ ອື່ນໆ.

ຂ່າວ: ທະນູທອງ

ໃນວັນທີ 13 ມິຖຸນາ 2022 ນີ້, ສະຖານທູດຝຣັ່ງ ປະຈຳ ລາວ ໄດ້ຊ່ວຍເຫລືອລ້າ ຈໍານວນ 8 ​ໂຄງການ​ໃຫ້​ແກ່ ອົງການຈັດຕັ້ງຂອງລາວ ທີ່ຖືກຄັດເລືອກ ແລະ ຈັດຕັ້ງປະຕິບັດ ໂດຍແຜນງານ ທຶນສະໜັບສະໜູນ ໂຄງການທີ່ສ້າງສັນ ຂອງອົງການຈັດຕັ້ງທາງສັງຄົມ (PISCCA) ພາຍໃນປີ 2022 ແລະ 2023 ຫລາຍກວ່າ 500.000 ໂດລາສະຫະລັດ ເພື່ອສະໜັບສະໜູນ ບັນດາຂໍ້ລິເລີ່ມຂອງອົງການ ຈັດຕັ້ງທາງສັງຄົມ ໃນຂະແໜງ ການພັດທະນາ ກະສິກຳແບບຍືນຍົງ ຢູ່ແຂວງຫົວພັນ, ຄຳມ່ວນ, ຫລວງນ້ຳທາ, ຫລວງພະບາງ, ຜົ້ງສາລີ, ສະຫວັນນະເຂດ ແລະ ​ແຂວງຊຽງຂວາງ ​ໂດຍ​ການ​ຮ່ວມ​ລົງ​ນາມ ​ມອບ-ຮັບ ​ການ​ຊ່ວຍ​ເຫລືອ​ຄັ້ງ​ນີ້, ມີ ທ່ານ ນາງ ຊີວ-ແລັງ ຊູອອກ ເອກອັກຄະລັດ ຖະທູດຝຣັ່ງ ປະຈຳ ສປປ ລາວ ​ແລະ ຜູ້​ຕ່າງ​ໜ້າ​ຈາກ 8 ພາກສ່ວນ ດັ່ງກ່າວ.

ສຳລັບ 8 ອົງການ ທີ່ໄດ້ຮັບທຶນ ປະມານ 3,5 ຕື້ກີບ (260.000 ໂດລາສະຫະ ລັດ) ໃນປີ 2022, ໃນນີ້, ມີ ສະມາຄົມພັດທະນາ ການທ່ອງທ່ຽວ ອະນຸລັກແບບປະຊາຊົນ ມີສ່ວນຮ່ວມ ຖໍ້າກອງລໍ-ນາຕານ ແຂວງຄຳມ່ວນ ໄດ້ຮັບທຶນມູນຄ່າ 500 ລ້ານກີບ ເພື່ອສົ່ງເສີມສະມາຄົມດັ່ງກ່າວ ໃນການເຮັດກະສິກຳ ປອດສານພິດ ພາຍໃນບ້ານກອງລໍ ແລະ ບ້ານນາຕານ ເພື່ອສະໜອງໃຫ້ແກ່ ຕະຫລາດພາຍໃນທ້ອງຖິ່ນ ແລະ ສະໜອງໃຫ້ແກ່ ຮ້ານອາຫານພາຍໃນທ້ອງຖິ່ນ ເພື່ອໃຫ້ເຂົາເຈົ້າສາມາດ ປຸງແຕ່ງອາຫານ ທີ່ເປັນເອກະລັກ ພິເສດຂອງຮ້ານ; ສະມາຄົມພັດທະນາໄມ້ປ່ອງ ແລະ ເຄື່ອງປ່າຂອງດົງ 500 ລ້ານກີບ ເພື່ອຝຶກອົບຮົມໃຫ້ແມ່ຍິງ ແລະ ຊາວໜຸ່ມ ພາຍໃນແຂວງຫົວພັນ; ບໍລິສັດ ພູດອຍ ກະສິກຳສະອາດ ຈຳກັດ 496 ລ້ານກີບ ເພື່ອພັດທະນາເຄື່ອງມື ໃນການລ້ຽງຊີບຂອງຊຸມຊົນ ໃນເຂດຊົນນະບົດ ດ້ວຍການແນະນໍາ ການປູກກາເຟໃນປ່າ ຢູ່ແຂວງຫລວງນໍ້າທາ; ມູນນິທິ ຊ່ວຍເຫລືອຄົນທຸກຍາກ ແຫ່ງ ສປປ ລາວ 470 ລ້ານກີບ ເພື່ອປະກອບສ່ວນ ພັດທະນາກະສິກໍານິເວດ ໃນແຂວງຊຽງຂວາງ ດ້ວຍການສົ່ງເສີມ ແລະ ສ້າງໃຫ້ກະສິກອນຮຸ່ນໃໝ່ ມີຄວາມຮັບຜິດຊອບສູງ ຕໍ່ຂະແໜງການດັ່ງກ່າວ.

ນອກຈາກນີ້, ຍັງມີສະມາຄົມຮ່ວມມື ເພື່ອການພັດທະນາ ແລະ ສົ່ງເສີມພູມປັນຍາທ້ອງຖິ່ນ 445 ລ້ານກີບ ເພື່ອຈັດຕັ້ງປະຕິບັດ ໂຄງການສ້າງຄວາມເຂັ້ມແຂງ ແລະ ການມີສ່ວນຮ່ວມຂອງຊຸມຊົນ ແນໃສ່ການມີສ່ວນຮ່ວມ ຂອງຊຸມຊົນດ້ານເສດຖະກິດ ແລະ ປູກຈິດສຳນຶກ ໃຫ້ພວກເຂົາໃນການ ຄຸ້ມຄອງສິ່ງແວດລ້ອມ ແລະ ການປັບຕົວທີ່ດີ ໃນການຕ້ານການປ່ຽນແປງ ຂອງດິນຟ້າອາກາດ ຢູ່ເມືອງຍອດອູ ແລະ ບຸນເໜືອ ແຂວງຜົ້ງສາລີ; ສະມາ ຄົມເພື່ອນຜາຕັດແກ້ 443 ລ້ານກີບ ເພື່ອພັດທະນາ ການລ້ຽງຈິ່ງຫລີດ ຢູ່ເມືອງຈອມເພັດ ແຂວງຫລວງພະບາງ ເພື່ອປັບປຸງຄວາມສາມາດ ໃນການກຸ້ມຕົນເອງ ຂອງແມ່ຍິງ ແລະ ການຄໍ້າປະກັນ ດ້ານສະບຽງອາຫານ ຂອງທຸກຄອບຄົວທີ່ກ່ຽວຂ້ອງ; ສະມາຄົມ ພັດທະນາຊຸມຊົນ ແຂວງສະຫວັນນະເຂດ 364 ລ້ານກີບ ເພື່ອສົ່ງເສີມປະຊາຊົນ ພາຍໃນເມືອງຊົນນະບູລີ ໃນການເຮັດກະສິກຳ ປອດສານພິດ ແລະ ກຸ່ມຜູ້ຜະລິດ ຝຸ່ນບົ່ມຊີວະພາບ ບ້ານພັ້ນ ເມືອງແປກ ແຂວງຊຽງຂວາງ ໄດ້ຮັບທຶນຫລາຍກວ່າ 200 ລ້ານກີບ ເພື່ອເຮັດໃຫ້ກະສິກອນ ເຂົ້າເຖິງຕະຫລາດຝຸ່ນຊີວະພາບ ແລະ ຫລຸດຜ່ອນການນໍາໃຊ້ ສານເຄມີ.

ຂ່າວ: ມະນີທອນ

ຂ່າວສານຊີອາໄອລາຍງານ ເມື່ອວັນທີ 12 ມິຖຸນາທີ່ຜ່ານມານີ້, ກອງປະຊຸມລະດັບລັດຖະມົນຕີຂອງອົງການການຄ້າໂລກຄັ້ງທີ 12 ໄດ້ໄຂຂຶ້ນຢູ່ນະຄອນເຊີແນວ ປະເທດສະວິສ ໂດຍຈະດຳເນີນໄປຈົນຮອດວັນທີ 15 ມິຖຸນານີ້. ກອງປະຊຸມຄັ້ງນີ້ຕົ້ນຕໍຈະສຸມໃສ່ປຶກສາຫາລືໃນ 4 ຫົວຂໍ້ຄື: ການເກື້ອກູນດ້ານຂະແໜງການປະມົງ, ກະສິກຳ, ການຮັບມືກັບສະພາບພະຍາດໂຄວິດ-19 ຊຶ່ງລວມທັງການຍົກເວັ້ນຊັບສິນທາງປັນຍາ ຕາມສັນຍາວ່າດ້ວຍຊັບສິນທາງປັນຍາທີ່ກ່ຽວກັບການຄ້າ ແລະ ການປະຕິຮູບອົງການການຄ້າໂລກ ເພື່ອພະຍາຍາມສູ້ຊົນໃຫ້ສາມາດບັນລຸສັນຍາຫຼາຍຝ່າຍໃນຂົງເຂດເຫຼົ່ານີ້.

ປັດຈຸບັນ, ອົງການການຄ້າໂລກໄດ້ແຈກຢາຍຮ່າງສັນຍາຫຼາຍສະບັບໄປໃຫ້ບັນດາຄະນະຜູ້ແທນເພື່ອນຳໄປຄົ້ນຄວ້າພິຈາລະນາ. ທ່ານນາງ ອັນໂກຊີ ໂອຄອນໂຈ ອີເວລາ ຜູ້ອຳນວຍການໃຫຍ່ອົງການການຄ້າໂລກໄດ້ກ່າວຢືນຢັນກ່ອນໄຂກອງປະຊຸມວ່າ: ບັນດາຝ່າຍຍັງມີຄວາມເຫັນທີ່ບໍ່ກົງກັນຫຼາຍສົມຄວນ. ທ່ານໄດ້ເລັ່ງໃຫ້ບັນດາຝ່າຍພະຍາຍາມຈົນສຸດຄວາມສາມາດ ເພື່ີອບັນລຸຄວາມເຫັນທີ່ເປັນເອກະພາບກັນໃນຫົວຂໍ້ຕົ້ນຕໍ ເພື່ອເຮັດໃຫ້ກອງປະຊຸມລະດັບລັດຖະມົນຕີຄັ້ງທີ 12 ໄດ້ຮັບໝາກຜົນຕົວຈິງ.

ໃນວາລະກອງປະຊຸມ ສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX  ວັນທີ 14 ມິຖຸນາ 2022 ພາຍໃຕ້ການເປັນ ປະທານ ຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ບັນດາສະມາຊິກ​ສະພາ​ແຫ່ງ​ຊາດ (ສສຊ) ໄດ້ພ້ອມກັນປະກອບ ຄຳຄິດຄຳເຫັນໃສ່ຫລາຍບັນຫາ ໂດຍສະເພາະບັນຫາເງິນເຟີ້, ເງິນກີບອ່ອນຄ່າ, ອັດຕາເງິນຕ່າງປະເທດ ສູງຂຶ້ນເລື້ອຍໆ ເຊິ່ງ ສສຊ ຫລາຍ ທ່ານສະເໜີ ໃຫ້ລັດຖະບານ ເລັ່ງແກ້ໄຂບັນຫາດັ່ງກ່າວ ເພື່ອໃຫ້ກັບຄືນ ສູ່ສະພາບປົກກະຕິໂດຍໄວ.

 ທ່ານ ບຸນມີ ພິມມະສອນ ສະມາຊິກສະພາແຫ່ງຊາດ ເຂດເລືອກຕັ້ງທີ 12 ແຂວງຄຳມ່ວນ ສະເໜີໃຫ້ລັດຖະບານ ຄຸ້ມຄອງການ ແລກປ່ຽນ ເງິນຕາ ແລະ ຄຸ້ມຄອງບັນດາ ຮ້ານແລກປ່ຽນເງິນຕາຕ່າງໆ ຢູ່ຂອບເຂດທົ່ວປະເທດ, ພ້ອມທັງໃຫ້ຊອກຫາວິທີທາງ ດຶງເອົາເງິນຕາຕ່າງປະເທດ ທີ່ເຄື່ອນ ໄຫວຢູ່ນອກລະບົບ ໃຫ້ເຂົ້າສູ່ລະບົບ ທະນາຄານ ທັງນີ້, ກໍເພື່ອແກ້ໄຂບັນຫາ ອັດຕາເງິນເຟີ້ (ເງິນກີບອ່ອນຄ່າ) ເນື່ອງຈາກປັດຈຸບັນ ອັດຕາການແລກປ່ຽນອ່ອນຄ່າ ເກີນລະດັບດຸນຍະພາບ ເສດກິດ-ເງິນຕາ ທີ່ຄວນຈະເປັນ.

ພ້ອມດຽວກັນນັ້ນ, ຕໍ່ກັບການພັດທະນາ ເສດຖະກິດ-ສັງຄົມ 6 ເດືອນທ້າຍປີ ສະມາຊິກສະພາແຫ່ງຊາດ ຫລາຍທ່ານສະເໜີ ໃຫ້ລັດຖະບານ ສຸມໃສ່ແກ້ໄຂບັນຫາທີ່ພົ້ນເດັ່ນ ພ້ອມທັງສືບຕໍ່ສົ່ງເສີມ, ສ້າງຄວາມເຂັ້ມແຂງ ການຜະລິດສິນຄ້າ ເພື່ອທົດແທນການນໍາເຂົ້າ, ຂະນະດຽວກັນ ຕ້ອງສົ່ງເສີມໃຫ້ຜະລິດສິນຄ້າ ເພື່ອການສົ່ງອອກຫລາຍຂຶ້ນ. ນອກຈາກນີ້, ຍັງສະເໜີໃຫ້ສ້າງຄວາມເຂັ້ມແຂງ ​ແກ່ບຸກຄະລາກອນຂັ້ນເມືອງ ໂດຍສະເພາະ ຂະແໜງການເງິນ ທີ່ຍັງຂາດເຂີນ, ພ້ອມພັດທະນາລະບົບການເງິນ ໃຫ້ສົມຄູ່ກັບ ການພັດທະນາລະບົບອື່ນໆ.

ແຫຼ່ງຂ່າວ: ສຳນັກຂ່າວສານປະເທດລາວ

ພິທີມອບ-ຮັບນາມມະຍົດໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2021 ໃຫ້ 7 ໜ່ວຍພັກຄື: ໜ່ວຍພັກຫ້ອງການ ປກສ,ສັນຕິບານ, ສໍາມະໂນຄົວ-ກໍ່ສ້າງຮາກຖານ,ຕໍາຫຼວດ,ພະແນກເສນາ ປກຊ,ພະແນກພາລາ ແລະໜ່ວຍພັກສູນ 598 ເມືອງນານ ໄດ້ຈັດຂຶ້ນໃນວັນທີ 10 ມິຖຸນາ 2022 ຢູ່ທີ່ຫ້ອງປະຊຸມຂອງສູນ 598, ໂດຍການໃຫ້ກຽດເປັນປະທານຂອງສະຫາຍ ບຸນທີ ມະນີວົງ ຮອງເລຂາພັກເມືອງ, ມີກໍາມະການພັກເມືອງ,ເລຂາຄະນະພັກຮາກຖານຂອງ 2 ກອງບັນຊາການ ປກສ ແລະ ປກຊ, ແຂກຮັບເຊີນ ພ້ອມດ້ວຍສະມາຊິກພັກສົມບູນ-ສໍາຮອງພາຍໃນ 7 ໜ່ວຍພັກເຂົ້າຮ່ວມ.

ໃນພິທີສະຫາຍ ພັນໂທ ມະນີວອນ ສີລິສົມບັດ ເລຂາໜ່ວຍພັກຫ້ອງການ ປກສ ກໍ່ໄດ້ຕາງໜ້າໃຫ້ 7 ໜ່ວຍພັກຂຶ້ນຜ່ານບົດສະຫຼຸບການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2021 ແລະ ທິດທາງແຜນການໃນຕໍ່ໜ້າ ເຊິ່ງໄດ້ໃຫ້ຮູ້ວ່າ: 7 ໜ່ວຍພັກເປັນໜ່ວຍພັກເຄື່ອນໄຫວພາຍໃຕ້ການຊີ້ນໍາຂອງຄະນະພັກຮາກຖານ ປ້ອງກັນຊາດ-ປ້ອງກັນຄວາມສະຫງົບເມືອງ ມີສິດນໍາເອົາແນວທາງນະໂຍບາຍ ມະຕິຄໍາສັ່ງຂອງພັກ-ລັດ ໄປຈັດຕັ້ງເຜີຍແຜ່ ເຊື່ອມຊືມພ້ອມທັງຫັນເປັນແຜນການລະອຽດໃນການຈັດຕັ້ງປະຕິບັດເຂົ້າໃນວຽກງານໃຫ້ມີຜົນສໍາເລັດໃນແຕ່ລະໄລຍະ ໜ່ວຍພັກປ້ອງຊາດ-ປ້ອງກັນຄວາມສະຫງົບ, ມີສະມາຊິກພັກທັງໝົດ 96 ສະຫາຍ, ຍິງ 10 ສະຫາຍ, ສະມາຊິກພັກສົມບູນ 92 ສະຫາຍ, ຍິງ 10 ສະຫາຍ, ສະມາຊິກພັກສໍາຮອງ 4 ສະຫາຍ.

ຕະຫຼອດໄລຍະຜ່ານມາຄະນະໜ່ວຍພັກ ແລະ ສະມາຊິກພັກໄດ້ເປັນເຈົ້າການໃນການຈັດຕັ້ງ, ເຊື່ອມຊືມ ບັນດາເອກະສານ ແນວທາງ ມະຕິ ຄໍາສັ່ງ, ບັນດານິຕິກໍາຕ່າງໆຂອງພັກ-ລັດ ລະບຽບຂອງພັກ, ກົດໝາຍຂອງລັດ ແລະ ກົດໝາຍຂອງກໍາລັງປ້ອງກັນຊາດ, ປ້ອງກັນຄວາມສະຫງົບ ລວມທັງບັນດາຂໍ້ຫ້າມຂອງນາຍ ແລະພົນທະຫານ, ນາຍແລະ ພົນຕໍາຫຼວດ ມາເຜີຍແຜ່ເຊື່ອມຊືມໃຫ້ສະມາຊິກພັກເຂົ້າໃຈຕໍ່ແນວທາງ, ສຸມໃສ່ການປະຕິບັດວຽກງານ ຕາມແນວທາງ ແລະລະບຽບ 5 ຫຼັກການ 3 ທິດນໍາ ,ເອົາໃຈໃສ່ເພີ້ມທະວີການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ຢ່າງຕໍ່ເນື່ອງ, ອັນໄດ້ເຮັດໃຫ້ສະມາຊິກພັກມີຄວາມເຊື່ອໝັ້ນຕໍ່ອຸດົມການ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີນໍ້າໃຈເສຍສະຫຼະເພື່ອຊາດ, ເພື່ອປະຊາຊົນຢ່າງແທ້ຈິງ, ມີຕີລາຄາຄຸນນະພາບຂອງບັນດາສະມາຊິກພັກ,ເລື່ອນຊັ້ນ ແລະ ຍ້ອງຍໍສັນລະເສີນຜູ້ມີຜົນງານດີເດັ່ນຈາກຂັ້ນເທິງເປັນປົກກະຕິ.

ຈາກນັ້ນສະຫາຍ ເທ່ຊົ່ງ ເຢ່ຍເຮີ່ ຮອງຄະນະຈັດຕັ້ງເມືອງກໍ່ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການອານຸມັດຮັບຮອງເອົາ ໜ່ວຍພັກ ປອດໃສ ເຂັ້ມແຂງ ໜັກແໜ້ນ ປະຈໍາປີ 2021 ໂອກາດດຽວກັນນີ້ພິທີສະຫາຍ ບຸນທີ ມະນີວົງ ຮອງເລຂາພັກເມືອງ ກໍ່ໄດ້ມອບໃບຢັ້ງຢືນນາມມະຍົດໜ່ວຍພັກປອດໃສ ເຂັ້ມແຂງ ໜັກແໜ້ນ ໃຫ້ກັບ 7 ໜ່ວຍພັກຢ່າງສົມກຽດ, ນອກນີ້ພິທີຍັງໄດ້ປະດັບຊັ້ນໃຫ້ນາຍຕໍາຫຼວດຈາກຊັ້ນ ຮ້ອຍຕີ ເລື່ອນຂຶ້ນຊັ້ນຮ້ອຍໂທ 1 ສະຫາຍ ຕື່ມອີກ.ຕອນທ້າຍ ຍັງໄດ້ຮັບຟັງຄໍາໂອ້ລົມຕໍ່ພິທີຂອງສະຫາຍ ບຸນທີ ມະນີວົງ ຮອງເລຂາພັກເມືອງ ຕື່ມອີກ.

ຂ່າວ-ພາບ: ຫຸມແພງ ສີດາໄລ

#Medialaos MMD

ໃນຕອນເຊົ້າວັນທີ 10 ມິຖຸນາ 2022 ສະຫະພັນແມ່ຍິງຮາກຖານ ຫ້ອງການ ສຶກສາທິການແລະກິລານະຄອນ ໄກສອນ ພົມວິຫານໄດ້ເປີດກອງປະຊຸມໃຫຍ່ ຄັ້ງທີ Xl ຂຶ້ນ ໂດຍການເປັນກຽດເຂົ້າຮ່ວມຂອງ ທ່ານ ນາງ ດວງຈັນ ແສນວິເສດ ຄະນະບໍລິຫານງານສະຫະພັນແມ່ຍິງແຂວງ ປະທານສະຫະພັນແມ່ຍິງນະຄອນ ໄກສອນ ພົມວິຫານ,ທ່ານ ນາງ ພອນໄຊ ຊະນະວົງໄຊ ເລຂາພັກຮາກຖານ ຫົວໜ້າຫ້ອງການສຶກສາທິການ ແລະ ກິລາ ນະຄອນ, ມີບັນດາທ່ານຜູ້ຕາງໜ້າອົງການຈັດຕັ້ງມະຫາຊົນ, ຄະນະສະຫະພັນແມ່ຍິງໜ່ວຍ-ຮາກຖານໂຮງຮຽນອ້ອມຂ້າງ, ມີແຂກຖືກເຊີນ, ຕະຫຼອດຮອດສະມາຊິກສະຫະພັນແມ່ຍິງພາຍໃນຮາກຖານ ເຂົ້າຮ່ວມ.

ໃນກອງປະຊຸມ ທ່ານ ນາງ ບຸນຍົງ ສີວົງໄຊ ປະທານສະຫະພັນແມ່ຍິງຮາກຖານຫ້ອງການສຶກສາ ທິການແລະກິລາ ນະຄອນ ໄດ້ຜ່ານບົດລາຍງານການເມືອງ ແລະ ທິດທາງແຜນການໃນຕໍ່່ໜ້າ ໃຫ້ຮູ້ວ່າ: ສະຫະພັນແມ່ຍິງຮາກຖານຫ້ອງການສຶກສາທິການ ແລະ ກິລາ ນະຄອນ, ປະກອບມີໂຮງຮຽນ ປະຖົມທ່າແຮ່, ສູນການສຶກສານອກໂຮງຮຽນ,ໂຮງຮຽນປະຖົມໂນນສະຫວາດ, ປະຖົມສະໜາມໄຊ ແລະ ໂຮງຮຽນມັດ ທະຍົມຕົ້ນສະໜາມໄຊ ມີສະມາຊິກທັງໝົດ 61 ທ່ານ, ,ຜ່ານມາໄດ້ຖືເອົາວຽກງານສຶກສາອົບຮົມ ການເມືອງ-ແນວຄິດເປັນວຽກສຳຄັນຕົ້ນຕໍ ໂດຍໄດ້ນຳເອົາແນວທາງນະໂຍບາຍ, ມະຕິຄຳສັ່ງຂອງພັກ, ບັນດາຂໍ້ກໍານົດກົດໝາຍ ແລະ ມູນເຊື້ອຕ່າງໆມາເຜີຍແຜ່ເຊື່ອມຊຶມໃຫ້ສະມາຊິກແມ່ຍິງພາຍໃນຮາກຖານຮັບຮູ້ ເຂົ້າໃຈ , ຜ່ານພຶດຕິກຳຕົວຈິງສາມາດຕີລາຄາໄດ້ວ່າ ພະນັກງານເຮົາຍັງມີແນວຄິດຍຶດໝັ້ນຕໍ່ອຸດົມການຂອງພັກ, ມີສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງສັດຕູ, ມີຫຼັກໝັ້ນຊົນຊັ້ນຈະແຈ້ງ, ມີຄວາມເຊື່ອໝັ້ນໜັກແໜ້ນຕໍ່ອຸດົມການຂອງພັກ ເຊິ່ງໄດ້ສະແດງອອກ ແຕ່ລະສະຫາຍທີ່ໄດ້ເຮັດສໍາເລັດໜ້າທີ່ວຽກງານທີ່ການຈັດຕັ້ງມອບໝາຍໃຫ້ຢ່າງມີປະສິດທິພາບ ແລະ ມີປະສິດທິຜົນ, ສະມາຊິກສະຫະພັນແມ່ຍິງສ່ວນຫຼາຍຮັກສາໄດ້ມູນເຊື້ອອັນດີງາມຂອງແມ່ຍິງລາວບັນດາເຜົ່າ, ນັບຖືຮີດຄອງປະເພນີອັນດີງາມຂອງຊາດ, ຮັກສາກຽດສັກສີຂອງແມ່ຍິງລາວ, ຕັ້ງໜ້າປະກອບສ່ວນເຂົ້າໃນການແກ້ໄຂປະກົດການຫຍໍ້ທໍ້ຕ່າງໆໃນຄອບຄົວ ແລະ ສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ.

ນອກຈາກນັ້ນສະມາຊິກແມ່ຍິງພາຍໃນຮາກຖານຍັງໄດ້ຮັບໃບຍ້ອງຍໍລະດັບຂັ້ນຕ່າງເຊັ່ນ:ຂັ້ນນະຄອນ 05 ໃບ, ຂັ້ນແຂວງ 02ໃບ,ໄດ້ຈັດກອງປະຊຸມເປີດບັ້ນເຊັນຮັບຂໍ້ແຂ່ງຂັນ 3 ດີໄດ້ 5 ຄັ້ງ,ມີສະມາຊິກສະຫະພັນແມ່ຍິງເຊັນຮັບທັງໜົດ 61 ທ່ານ,ກວມເອົາ 100% ຂອງຈຳນວນສະມາຊິກທັງໜົດ ແລະ ສາມາດປະເມີນໄດ້ສະມາຊິກສະຫະພັນແມ່ຍິງ 3 ດີ ປະເພດ l ມີ 58 ຄົນ,ປະເພດ ll ມີ 03 ຄົນ,ໄດ້ຮັບການຢັ້ງຢືນເປັນສະຫະພັນແມ່ຍິງຮາກຖານ 3 ດີ ຂັ້ນສູນກາງ,ຂັ້ນແຂວງ ແລະ ຂັ້ນນະຄອນ .

ກອງປະຊຸມໃຫຍ່ໃນຄັ້ງນີ້ ຍັງໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະສະຫະພັນແມ່ຍິງຮາກຖານຊຸດໃໝ່, ເຊິ່ງມີຜູ້ລົງສະໝັກ 05 ທ່ານ ເລືອກເອົາ 03 ທ່ານ, ຜົນຂອງກອງປະຊຸມຄັ້ງປະຖົມມະລຶກ ໄດ້ເປັນເອກະສັນກັນເລືອກເອົາ ທ່ານນາງ ວາດສະໜາ ລັດກະສິງ ເປັນປະທານສະຫະພັນແມ່ຍິງຮາກຖານຫ້ອງການສຶກສາທິການ ແລະ ກິລາ ນະຄອນ ໄກສອນ ພົມວິຫານ, ທ່ານນາງ ໄພລິນ ຊະນະວົງໄຊ ເປັນຮອງປະທານ ແລະ ທ່ານນາງ ພັນທະພອນ ເປັນຄະນະ ທັງເປັນຜູ້ເຮັດວຽກກວດກາ.

ແລະພ້ອມນັ້ນກໍຍັງໄດ້ບົ່ງຕົວແຕ່ງຕັ້ງຄະນະບໍລິຫານງານສະຫະພັນແມ່ຍິງຮາກຖານໂຮງຮຽນປະຖົມໂນນສະຫວາດແລະປະຖົມ- ມຕ ສະໜາມໄຊ ເຊີ່ງປະກອບມີ: 03 ທ່ານຄື:ທ່ານ ນາງ ແວວມະນີ ດວງເກສອນ ເປັນປະທານ,ທ່ານ ນາງ ພູສະໄຫວ ເກດຕະວົງ ເປັນຮອງປະທານ ທັງເປັນຜູ້ເຮັດວຽກກວດກາ ແລະ ທ່ານ ນາງ ໃຈສະຫວັນ ເປັນຄະນະ ທັງເປັນຜູ້ຮັບຜິດຊອບວຽກງານເສດຖະກິດ ແລະ ຮາກຖານໂຮງຮຽນປະຖົມທ່າແຮ່+ສູນການສຶກສານອກໂຮງຮຽນ ເຊີ່ງປະກອບມີ: 03 ທ່ານ ຄື ທ່ານນາງ ສີຟອງ ຈັນທະວົງ ເປັນປະທານ,ທ່ານ ນາງ ແກ້ວຕາ ແກ້ວມີ ເປັນຮອງປະທານ ທັງເປັນຜູ້ເຮັດວຽກກວດກາ ແລະ ທ່ານ ນາງ ຟອງສະຫວັນ ອຸ່ນວົງຄຳເພັງ ເປັນຄະນະ ທັງເປັນຜູ້ບຜິດຊອບວຽກງານເສດຖະກິດ ແລະ ໃນນັ້ນກໍຍັງໄດ້ສຶບຕໍ່ອອກຈັບມືເປີດບັ້ນເຊັ່ນຮັບຂໍ້ແຂ່ງຂັນ 03 ດີໃນປີ 2022ຕື່ມອີກ.

ຂ່າວ-ພາບ: ນັກຂ່າວວິທະຍຸກະຈາຍສຽງ ແຂວງສະຫວັນນະເຂດ

#Medialaos MMD #Savannakhet Province

ຕາມການລາຍງານຈາກ https://www.facebook.com/lnrlao ຂອງ ສະຖານີວິທະຍຸແຫ່ງຊາດ ໃຫ້ຮູ້ວ່າ ໃນຕອນເຊົ້າວັນທີ 13 ມິຖຸນາ 2022 ທີ່ຫໍປະຊຸມສະພາແຫ່ງຊາດ, ນະຄອນຫລວງວຽງຈັນ ກອງປະຊຸມສະໄຫມສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໄຂຂຶ້ນຢ່າງເປັນທາງການ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິ ຫານ, ປະທານສະພາແຫ່ງຊາດລາວ ໂດຍການໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ, ເລຂາທິ ການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ, ທ່ານ ພັນຄໍາ ວິພາວັນ, ນາຍົກລັດຖະມົນຕີ, ພ້ອມດ້ວຍການນໍາພັກ-ລັດ, ແຂກຮັບເຊີນ ແລະ ສະມາຊິກສະພາແຫ່ງຊາດຈາກແຕ່ລະເຂດເລືອກຕັ້ງທົ່ວປະເທດ.

ກອງປະຊຸມສະພາແຫ່ງຊາດຄັ້ງນີ້ ຈະໄດ້ພິຈາລະນາຮັບຮອງບັນດາເນື້ອໃນທີ່ສໍາຄັນ ດັ່ງນີ້:

1) ລາຍງານໂດຍສັງເຂບຂອງ ທ່ານນາຍົກລັດຖະມົນຕີ ກ່ຽວກັບສະພາບພົ້ນເດັ່ນໃນການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022;

2) ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022;

3) ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022;

4) ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນເງິນຕາ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022;

5) ບົດລາຍງານຂອງລັດຖະບານ ກ່ຽວກັບຄວາມຄືບຫນ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ;

6) ບົດລາຍງານຂອງລັດຖະບານ ກ່ຽວກັບຄວາມຄືບຫນ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ;

7) ບົດລາຍງານຂອງລັດຖະບານ ກ່ຽວກັບການປະເມີນຜົນການຈັດຕັ້ງປະຕິບັດກົດຫມາຍ 4 ສະບັບ ຄື: ກົດຫມາຍວ່າດ້ວຍທີ່ດິນ, ກົດຫມາຍວ່າດ້ວຍການສົ່ງເສີມການລົງທຶນ, ກົດຫມາຍວ່າດ້ວຍຊັບສິນຂອງລັດ ແລະ ກົດຫມາຍວ່າດ້ວຍແຮ່ທາດ;

ບົດລາຍງານຂອງລັດຖະບານ ກ່ຽວກັບທິດທາງການປະຕິຮູບລັດວິສາຫະກິດ ລວມທັງການປັບປຸງໂຄງສ້າງຂອງທະ ນາຄານທຸລະກິດລັດ;

9) ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດຕິດພັນກັບການປ້ອງກັນ ແລະ ຮັບມືການແຜ່ລະ ບາດຂອງພະຍາດໂຄວິດ-19;

10) ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດບັນດາຄາດຫມາຍໃນຂົງເຂດສຶກສາທິ ການ ແລະ ກິລາ ເປັນຕົ້ນ ການປັບປຸງຄຸນນະພາບລະບົບການຮຽນ-ການສອນທຸກຊັ້ນທຸກສາຍ ໃນໄລຍະໃຫມ່ ແລະ ການຄຸ້ມຄອງວຽກງານກິລາ-ກາຍະກໍາ.

11) ບົດລາຍງານຂອງອົງການໄອຍະການປະຊາຊົນສູງສຸດ ກ່ຽວກັບການຈັດຕັ້ງຜັນຂະຫຍາຍວາລະ ແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕາມມະຕິ ກອງປະຊຸມສະພາແຫ່ງຊາດ ສະບັບເລກທີ 04/ ສພຊ, ລົງວັນທີ 10 ສິງຫາ 2021 ແລະ ການຕິດຕາມກວດກາການນໍາໃຊ້ 7 ມາດຕະການສະກັດກັ້ນ ຂອງ ອົງການສືບ ສວນ-ສອບສວນ ຕາມທີ່ກໍານົດໄວ້ໃນມາດຕາ 136 ຂອງກົດຫມາຍວ່າດ້ວຍການດໍາເນີນຄະດີອາຍາ ໂດຍສະເພາະການແກ້ໄຂການລະເມີດກົດຫມາຍ ໃນການພາຕົວ, ກັກຕົວ, ຈັບຕົວ ແລະ ການກັກຂັງພາງທີ່ບໍ່ຖືກຕ້ອງຕາມກົດຫມາຍ.

12) ບົດລາຍງານຂອງຄະນະປະຈໍາສະພາແຫ່ງຊາດ ກ່ຽວກັບການເຄື່ອນໄຫວວຽກງານ ໃນໄລຍະແຕ່ ກອງປະຊຸມສະໄຫມສາມັນ ເທື່ອທີ 2 ຫາ ກອງປະຊຸມສະໄຫມສາມັນ ເທື່ອທີ 3 ແລະ ແຜນການຮອດກອງປະຊຸມສະໄຫມສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX;

13) ບົດລາຍງານຂອງຄະນະປະຈໍາສະພາແຫ່ງຊາດ ກ່ຽວກັບຜົນການຕິດຕາມກວດກາວາລະແຫ່ງຊາດ ໃນໄລຍະຜ່ານມາ ແລະ ແຜນການຕິດຕາມກວດກາ ຂອງສະພາແຫ່ງຊາດ ກ່ຽວກັບການປະຕິບັດວາລະແຫ່ງຊາດໃນ ຕໍ່ຫນ້າ,

14) ພິຈາລະນາ ແລະ ຮັບຮອງເອົາ ກົດຫມາຍໃຫມ່ ແລະ ປັບປຸງ 9 ສະບັບ ດັ່ງນີ້:

ຮ່າງກົດຫມາຍສ້າງໃຫມ່ 3 ສະບັບ ຄື: ຮ່າງກົດຫມາຍວ່າດ້ວຍວິຈິດສິນ; ຮ່າງກົດຫມາຍວ່າດ້ວຍຄວາມປອດໄພຂອງເຂື່ອນ; ຮ່າງກົດຫມາຍວ່າດ້ວຍການຄຸ້ມຄອງອາວຸດ ແລະ ວັດຖຸລະເບີດ ແລະ ກົດຫມາຍປັບປຸງ 6 ສະບັບ ຄື: ກົດຫມາຍວ່າດ້ວຍຊັບສິນຂອງລັດ, ກົດຫມາຍວ່າດ້ວຍການຄຸ້ມຄອງເງິນຕາຕ່າງປະເທດ, ກົດຫມາຍວ່າ ດ້ວຍການສົ່ງເສີມຈຸນລະວິສາຫະກິດ, ວິສາຫະກິດຂະຫນາດນ້ອຍ ແລະ ກາງ, ກົດ

ຫມາຍວ່າດ້ວຍການປັບປຸງບາງ ມາດຕາ ຂອງກົດຫມາຍວ່າດ້ວຍສານປະຊາຊົນ; ກົດຫມາຍວ່າດ້ວຍການແກ້ໄຂຄໍາຮ້ອງທຸກ ແລະ ກົດຫມາຍວ່າ ດ້ວຍການປັບປຸງບາງມາດຕາ ຂອງກົດຫມາຍວ່າດ້ວຍນໍ້າ ແລະ ຊັບພະຍາກອນນໍ້າ.

ນອກຈາກນີ້, ຍັງຈະໄດ້ຮັບຟັງການລາຍງານຂອງຄະນະປະຈໍາສະພາແຫ່ງຊາດ ກ່ຽວກັບການຍົກຍ້າຍ, ແຕ່ງຕັ້ງຮອງປະທານກໍາມາທິການຈໍານວນຫນຶ່ງຂອງສະພາແຫ່ງຊາດ ແລະ ການເລືອກຕັ້ງແທນສະມາຊິກສະພາແຫ່ງຊາດ ທີ່ວ່າງລົງ, ພ້ອມກັນນັ້ນ, ຍັງຈະໄດ້ຮັບຟັງການຊີ້ແຈງຂອງພາກສ່ວນກ່ຽວຂ້ອງຈໍານວນຫນຶ່ງ ຕໍ່ຄໍາຊັກຖາມຂອງບັນດາສະມາຊິກສະພາແຫ່ງຊາດ.

ໃນໂອກາດກ່າວໄຂກອງປະຊຸມຄັ້ງນີ້ ທ່ານ ໄຊສົມພອນ ພົມວິຫານ, ປະທານສະພາແຫ່ງຊາດລາວ ໄດ້ຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງ ສືບຕໍ່ໃຫ້ການຮ່ວມມື ແລະ ສະຫນອງຂໍ້ມູນຕໍ່ບັນດາເນື້ອໃນທີ່ຈະນໍາເຂົ້າພິຈາລະນາໃນກອງປະຊມຄັ້ງນີ້, ຮຽກຮ້ອງມາຍັງບັນດາທ່ານສະມາຊິກສະພາແຫ່ງຊາດ ຈົ່ງໄດ້ນໍາໃຊ້ສິດປະຊາທິປະໄຕ ແລະ ເຊີດ ຊຄວາມຮັບຜິດຊອບການເມືອງຂອງຕົນ ໃນການຄົ້ນຄວ້າ, ປະກອບຄໍາເຫັນ ຕໍ່ທຸກບັນຫາຢ່າງຖີ່ຖ້ວນ, ພາວະວິໄສ ແລະ ເລິກເຊິ່ງ ບົນພື້ນຖານແນວທາງນະໂຍບາຍຂອງພັກ, ກົດຫມາຍ ແລະ ສະພາບຄວາມເປັນຈິງທາງ ດ້ານເສດຖະກິດ-ສັງຄົມຂອງປະເທດເຮົາໃນປັດຈຸບັນ ເພື່ອເຮັດໃຫ້ເນື້ອໃນທີ່ນໍາມາພິຈາລະນາ, ຮັບ ຮອງຄັ້ງນີ້ມີ ຄຸນນະພາບ ແລະ ສາມາດນໍາໄປຈັດຕັ້ງປະຕິບັດຢ່າງເປັນຮູບປະທໍາ.

ສໍາລັບກອງປະຊຸມ ສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ຈະດໍາເນີນໄປຮອດວັນທີ 8 ກໍລະກົດ 2022 ຈິ່ງຈະສໍາເລັດ, ເຊີ່ງຄະນະເລຂາທິການສະພາແຫ່ງຊາດໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນເພື່ອຮັບເອົາຄຳຄິດຄຳເຫັນແລະຄຳສະເໜີໂດຍກົງຈາກປະຊາຊົນທີ່ຈະສົ່ງໄປຍັງກອງປະຊຸມໄດ້ຕາມວິທີລຸ່ມນີ້:

– ສາຍດ່ວນ: ໂທລະສັບ ໝາຍເລກ 156

– ອີເມວ: [email protected]

ຂ່າວ: ບຸນຕຽງ ຈັນທະວົງ