ເນື່ອງໃນໂອກາດ ທີ່ໄດ້ລົງເຄື່ອນໄຫວວຽກງານ ພົບປະຢ້ຽມຢາມປະຊາຊົນ ຢູ່ເຂດເມືອງລ້ອງແຈ້ງ ຕາມແຜນເຄື່ອນໄຫວຂອງສະພາປະຊາຊົນ ແຂວງໄຊສົມບູນ ເພື່ອລົງເຜີຍແຜ່ຜົນສໍາເລັດກອງປະຊຸມສະ ໄໝສາມັນເທື່ອທີ3 ຂອງສະພາແຫ່ງຊາດ ຊຸດທີ IX ແລະ ຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນ ແຂວງໄຊສົມບູນ ຊຸດທີ II ໃນວັນທີ 9 ສິງຫາ 2022 ຜ່ານມານີ້ ທ່ານ ທັນຕາ ກອງພາລີ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ພ້ອມດ້ວຍຄອບຄົວ-ຍາດຕິພີ້ນ້ອງ ແລະ ປະຊາຊົນ ບ້ານລ້ອງແຈ້ງ ໄດ້ຮ່ວມກັນມາສົມໂພດຂັ້ນໄດຂຶ້ນອາລາມວັດ ສາມທາງ ໃຫ້ແກ່ວັດບ້ານລ້ອງແຈ້ງ, ເມືອງລ້ອງແຈ້ງ, ແຂວງໄຊສົມບູນ ໂດຍແມ່ນ ທ່ານ ທັນຕາ ກອງພາລີ ແລະ ຄອບຄົວ ເປັນເຈົ້າສັດທາອອກທຶນກໍ່ສ້າງ ໃນມູນຄ່າທັງໝົດ 21 ລ້ານກວ່າກີບ ທີ່ໄດ້ກໍ່ສ້າງສໍາເລັດແລ້ວ ຕັ້ງແຕ່ເດືອນ ພຶດສະພາ ປີ 2021 ທີ່ຜ່ານມາ ໃນການລົງມາສົມໂພດຂັ້ນໄດ ສາມທາງ ຂຶ້ນອາລາມວັດບ້ານລ້ອງແຈ້ງ ໃນຄັ້ງນີ້ ທ່ານ ໄດ້ນໍາພາຄອບຄົວ ແລະ ຍາດຕິພີ່ນ້ອງ ເຮັດຕົ້ນເງິນມາຖວາຍສົມທົບທຶນກໍ່ສ້າງວັດ ເພື່ອປະຕິສັງຂອນວັດແຫ່ງນີ້ ໃຫ້ຮຸ່ງເຮືອງເຫຼືອງເຫຼື້ອມ ເປັນສະຖານທີ່ສັກສິດ ສັກກະລະບູຊາ ພ້ອມທັງເປັນມິ່ງຂວັນສູນລວມຈິດໃຈ ຂອງພຸດທະສາສະນິກະຊົນ ຊາວເມືອງລ້ອງແຈ້ງ ຊົ່ວກາລະນານ. ໃນໂອກາດນີ້ ທ່ານ ຍັງໄດ້ກ່າວ ຮຽກຮ້ອງໃຫ້ພໍ່ແມ່ປະຊາຊົນ ພາຍໃນເມືອງລ້ອງແຈ້ງ ຈົ່ງພ້ອມກັນປົກປັກຮັກສາ ທໍາມະຊາດອັນສວຍສົດງົດງາມຂອງເມືອງ ແລະ ຈົ່ງພາກັນອະນຸລັກປົກປັກຮັກສາ ທະນຸບໍາລຸງ, ສົ່ງເສີມສາສະໜາພຸດຂອງພວກເຮົາ ໃຫ້ຍືນຍົງຄູ່ຟ້າກາລະນານ ເພື່ອເຮັດໃຫ້ພະພຸດທະສາສະໜາຈະເລີນຮຸ່ງເຮືອງໃນຂອບເຂດເມືອງລ້ອງແຈ້ງ ຄືກັນກັບໃນອະດີດ. ເຂົ້າຮ່ວມໃນພິທີສົມໂພດຂັ້ນໄດໃນເທື່ອນີ້ ມີທ່ານ ຄໍາໄພ ສົມຊະນະ ປະທານບໍລິສັດ ກຸ່ມຄໍາໄພຊະນະ, ທ່ານ ທົງສະຫວັນ ໂພທິສະລາດ, ຮັກສາການຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຂວງໄຊສົມບູນ ມີການນໍາເມືອງ ພ້ອມດ້ວຍພະນັກງານບໍານານ ຕະຫຼອດປະຊາຊົນຜູ້ມີຈິດໃຈເຫຼື້ອມໃສສັດທາ ໃນພຸດທະສາສະໜາ ພາຍໃນບ້ານລ້ອງແຈ້ງ ເຂົ້າຮ່ວມ.
ຂ່າວ: ສຸກສັນ ອ້ວນລິທິກຸນ
