ພິທີເຊັນບົດບັນທຶກຄວາມເຂົ້າໃຈວ່າດ້ວຍການຈັດສົ່ງຜູ້ອອກແຮງງານລາວໄປເຮັດວຽກຢູ່ ສ.ເກົາຫຼີ ຕາມລະດູການ ລະຫວ່າງ ກົມການຈັດຫາງານ ກະຊວງແຮງງານ ແລະ ສະຫວັດດີການສັງຄົມ ແລະ ເມືອງ ໂບອຶນ, ສ.ເກົາຫຼີ ໃນວັນທີ 01 ເມສາ 2025. ຕາງໜ້າເຊັນໂດຍ ທ່ານ ນາງ ອານຸສອນ ຄຳສິງສະຫວັດ ຫົວໜ້າກົມການຈັດທາງານ ກະຊວງຮສສ ແລະ ທ່ານ Choi Jae-Hyeong, ເຈົ້າເມືອງ ເມືອງ ໂບອຶນ, ແຂວງ ຊຸງຊອງບຸກ, ສ ເກົາຫຼີ , ໂດຍມີ ທ່ານ ປະທານສະພາ ເມືອງ ໂບອຶນ, ແຂວງ ຊຸງຊອງບຸກ, ສ ເກົາຫຼີ ; ຫົວໜ້າກົມ, ພ້ອມຄະນະວິຊາການທັງສອງງ່າຍເຂົ້າຮ່ວມ.
ທ່ານ ນາງອານຸສອນ ຄຳສິງສະຫວັດ ໄດ້ມີຄຳເຫັນວ່າ: ສປປ ລາວ ມີປະຊາກອນທັງໝົດປະມານ 7 ລ້ານກວ່າຄົນ, ໃນນີ້ມີກໍາລັງແຮງງານ 2,5 ລ້ານຄົນ ຊຶ່ງ 56 %ຂອງກໍາລັງແຮງງານ ແມ່ນປະກອບອາຊີບໃນຂະແໜງ ກະສິກໍາ ອາໄສການຜະລິດແບບທໍາມະຊາດ ແລະ ເຄິ່ງທໍາມະຊາດ ເຮັດໃຫ້ຜົນຜະລິດກະສິກໍາຍັງບໍ່ທັນສູງເທົ່າທີ່ຄວນ.
ສະນັ້ນ ເພື່ອເປັນການຍົກສູງຄຸນະພາບຂອງການຜະລິດກະສິກໍາ ເພື່ອສະໜອງພາຍໃນປະເທດໃຫ້ພຽງພໍ ແລະ ກ້າວໄປເຖິງການສົ່ງອອກຜະລິດຕະພັນກະສິກໍາໄປປະເທດຕ່າງໆ, ລັດຖະບານ ສປປ ລາວ ມີນະໂຍບາຍ ແລະ ໃຫ້ຄວາມສໍາຄັນ ໃນການສົ່ງເສີມປະຊາຊົນຜູ້ທີ່ປະກອບອາຊີບກະສິກໍາ ໂດຍສະເພາະຜູ້ທີ່ອາໃສໃນຂົງເຂດຊົນນະບົດ ໃຫ້ມີໂອກາດໃນການເຂົ້າເຖິງການພັດທະນາສີມືແຮງງານ ແລະ ນໍາໃຊ້ເຕັກໂນໂລຊີ ທີ່ທັນສະໄໝເຂົ້າໃນການຜະລິດກະສິກໍາ ຊຶ່ງແນ່ນອນວ່າ ສ.ເກົາຫຼີ ກໍ່ແມ່ນເປົ້າໝາຍໜຶ່ງທີ່ສໍາຄັນທີ່ລັດຖະບານ ສປປ ລາວ ມີເຈດຈໍານົງໃນການຮ່ວມມືໃນຫຼາຍໆດ້ານ ລວມທັງການຈັດສົ່ງແຮງງານລາວໄປເຮັດວຽກໃນຂົງເຂດກະສິກໍາ ເພື່ອຖ່າຍທອດເອົາຄວາມຮູ້ ແລະ ປະສົບການ ຂອງຊາວກະສິກອນ ສ.ເກົາຫຼີ ເພື່ອມາພັດທະນາບ້ານເກີດເມືອງນອນຂອງເຂົາເຈົ້າ.
ນັບແຕ່ປີ 2022 ມາຮອດປະຈຸບັນ ກະຊວງແຮງງານ ແລະ ສະຫວັດດີການສັງຄົມ ໄດ້ລົງນາມສັນຍາຮ່ວມມືດ້ານການຈັດສົ່ງແຮງງານໄປເຮັດວຽກຕາມລະດູການ ຮ່ວມກັບ 73 ເມືອງ ແລະ 2 ແຂວງ ຂອງ ສ.ເກົາຫຼີ ແລະ ສາມາດຈັດສົ່ງແຮງງານລາວໄປເຮັດວຽກຕາມລະດູການໄດ້ຫຼາຍກວ່າ 8.000 ຄົນ, ໃນນັ້ນ ເພດຍິງ ກວມສັດສ່ວນຫຼາຍກ່ວາ 40 ເປີເຊັນ.
ເພື່ອເປັນການຂະຫຍາຍການຮ່ວມມືດ້ານການຈັດສົ່ງແຮງງານລາວໄປເຮັດວຽກຕາມລະດູການທີ່ເມືອງຕ່າງໆ ຂອງ ສ.ເກົາຫຼີ ໃຫ້ຫຼາຍຂຶ້ນ ກົມການຈັດຫາງານ ໄດ້ປະສານງານກັບຜູ້ຮັບຜິດຊອບ ວຽກງານການຈັດສົ່ງແຮງງານຕາມລະດູການ ຂອງ ເມືອງ ໂບອຶນ ໂດຍຜ່ານລະບົບເອເລັກໂຕນິກ ຊຶ່ງທັງສອງຝ່າຍໄດ້ແລກປ່ຽນຄໍາຄິດຄໍາເຫັນ ຕໍ່ຮ່າງບົດບັນທຶກການຮ່ວມມື ແລະ ສາມາດເປັນເອກະພາບຕໍ່ເນື້ອໃນຂອງຮ່າງບົດບັນທຶກການຮ່ວມມື ຮ່ວມກັນ ຊຶ່ງນໍາມາສູ່ພິທີການເຊັນສັນຍາຮ່ວມກັນໃນມື້ນີ້.
ສະນັ້ນ ການຮ່ວມມືກັນ ລະຫວ່າງ ກົມການຈັດຫາງານ ແລະ ເມືອງ ໂບອຶນ ໃນການຈັດສົ່ງແຮງງານລາວໄປເຮັດວຽກຕາມລະດູການ ໃນຄັ້ງນີ້ ຈະເປັນບາດກ້າວສໍາຄັນ ແລະ ສ້າງຜົນປະໂຫຍດໃຫ້ແກ່ສອງຝ່າຍ. ສໍາລັບ ແຮງງານຂອງ ສປປ ລາວ ກໍ່ຈະໄດ້ຮັບໂອກາດໃນການພັດທະນາສີມືແຮງງານ, ສ້າງລາຍຮັບ ແລະ ຮຽນຮູ້ທາງດ້ານພາສາ ແລະ ວັດທະນາທຳ ເພື່ອໝູນໃຊ້ເຂົ້າໃນການດໍາລົງຊີວິດໃນເວລາກັບຄືນປະເທດ ຊຶ່ງຈະຊ່ວຍໃຫ້ການພັດທະນາເສດຖະກິດ-ສັງຄົມຂອງ ສປປ ລາວ ມີຄວາມເຂັ້ມແຂງຂຶ້ນ. ຄຽງຄູ່ກັນນັ້ນ, ສ.ເກົາຫຼີ ໂດຍສະເພາະ ເມືອງໂບອຶນ ກໍ່ຈະຫຼຸດຜ່ອນບັນຫາການຂາດແຄນແຮງງານ ໂດຍຈະເຮັດໃຫ້ການຜະຫຼິດກະສິກຳ ຕອບສະໜອງກັບຄວາມຕ້ອງການຂອງຕະຫຼາດພາຍໃນ ແລະ ພາຍນອກໄດ້.
ພ້ອມທັງ ໄດ້ຕາງໜ້າກົມການຈັດຫາງານ, ກະຊວງແຮງງານ ແລະ ສະຫວັດດີການສັງຄົມ ຕີລາຄາສູງຕໍ່ການຮ່ວມມືກັບ ເມືອງ ໂບອຶນ ໃນຄັ້ງນີ້ ແລະ ໃຫ້ສັນຍາວ່າ ຈະສຶກສາອົບຮົມແຮງງານລາວໃຫ້ມີລະບຽບວິໄນໃນການເຮັດວຽກ, ປະຕິບັດກົດລະບຽບຂອງເມືອງ ໂບອຶນ ກໍ່ຄື ສ.ເກົາຫຼີ ຢ່າງເຂັ້ມງວດ ໂດຍສະເພາະການປ້ອງກັນການໂຕນໜີຂອງແຮງງານ ຊຶ່ງພວກຂ້າພະເຈົ້າຈະມີການດໍາເນີນການຢ່າງລະອຽດ ແລະ ຮັດກຸມ ໂດຍການມີສ່ວນຮ່ວມຂອງພາກສ່ວນກ່ຽວຂ້ອງຕ່າງໆ ເພື່ຶອຮັບປະກັນໃຫ້ຜູ້ອອກແຮງງານລາວປະຕິບັດຕາມລະບຽບວິໄນ ຂອງ ສ.ເກົາຫຼີ ຢ່າງເຂັ້ມງວດ.
(ຂ່າວສານ ຮສສ)
