ຂປລ. ໃນໂອກາດຢ້ຽມຢາມລັດຖະກິດ ຢູ່ ສສ ຫວຽດນາມ, ຕອນບ່າຍວັນທີ 11 ກັນຍາ 2024, ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໄດ້ພົບປະກັບ ສະຫາຍ ນົງ ດຶກແມັງ ອະດີດເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ສະໄໝ 9, 10; ສະຫາຍ ເຈືອງ ເຕິນຊາງ ອະດີດປະທານປະເທດ ສສ ຫວຽດນາມ ແລະ ສະຫາຍ ຫງວຽນມິງຈຽດ, ອະດີດປະທານປະເທດ ສສ ຫວຽດນາມ ໂດນສະຫາຍໄດ້ສະແດງຄວາມປິຕິຊົມຊື່ນທີ່ໄດ້ພົບປະກັບບັນດາສະຫາຍອະດີດການນຳຫວຽດນາມ ຜູ້ເປັນມິດສະຫາຍອ້າຍນ້ອງອັນແທ້ຈິງຕະຫລອດມາຂອງພັກ, ລັດ ແລະ ປະຊາຊົນລາວບັນດາເຜົ່າ; ຕີລາຄາສູງຕໍ່ການສະໜັບສະໜູນ ແລະຄວາມຮັກແພງແບບມິດສະຫາຍອັນແທ້ຈິງຂອງບັນດາສະຫາຍອະດີດການນຳຂັ້ນສູງຂອງ ຫວຽດນາມ ໃຫ້ແກ່ ລາວກໍ່ຄື ນ້ຳໃຈເສຍຍສະຫລະ ແລະ ການປະກອບສ່ວນອັນໃຫຍ່ຫລວງຂອງບັນດາສະຫາຍໃນການປົກປັກຮັກສາ, ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ.
ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ນໍາເອົາຄຳຢື້ຢາມຖາມຂ່າວອັນສະໜິດສະໜົມ, ເຕັມໄປດ້ວຍໄມຕີຈິດມິດຕະພາບຖານມິດສະຫາຍອ້າຍນ້ອງຂອງບັນດາສະຫາຍອະດີດການນຳຂັ້ນສູງຂອງລາວ ມາຍັງບັນດາສະຫາຍອະດີດການນຳຫວຽດນາມມານະໂອກາດນີ້. ພ້ອມກັນນີ້, ສະຫາຍ ຍັງສະແດງຄວາມປິຕິຊົມຊື່ນ ແລະ ເຊື່ອໝັ້ນວ່າພາຍໃຕ້ການນຳພາອັນສະຫລາດສ່ອງໃສຂອງພັກກອມມູນິດຫວຽດນາມ, ປະເທດຊາດຫວຽດນາມຈະນັບມື້ນັບໄດ້ຮັບການພັດທະນາຢ່າງບໍ່ຢຸດຢັ້ງ, ເປັນເຈົ້າຕົນເອງ, ວັດທະນາຖາວອນເຮັດໃຫ້ ປະຊາຊົນຫວຽດນາມອ້າຍນ້ອງນັບມື້ ກິນອີ່ມນຸ່ງອຸ່ນ ແລະ ມີຄວາມຜາສຸກ; ສະຫາຍໄດ້ສະແດງຄວາມປິຕິຊົມຊື່ນຕໍ່ຜົນສຳເລັດໃນການສ້າງສາພັດທະນາປະເທດຊາດທີ່ພັກ, ລັດແລະປະຊາຊົນຫວຽດນາມອ້າຍນ້ອງຍາດມາໄດ້ໄລຍະຜ່ານມາ, ໃນນັ້ນແມ່ນການປະກອບສ່ວນຂອງບັນດາສະຫາຍອະດີດການນຳຂັ້ນສູງຂອງພັກ, ລັດຫວຽດນາມ.
ບັນດາສະຫາຍອະດີດການນຳຂັ້ນສູງຂອງຫວຽດນາມ ກໍໄດ້ສະແດງຄວາມຂອບໃຈ ຕໍ່ໄມຕີຈິດມິດຕະພາບເພື່ອນສະຫາຍອັນແທ້ຈິງຂອງ ສະຫາຍ ທອງລຸນ ສີສຸລິດ ແລະ ໄດ້ຝາກຄຳຢື້ຢາມຖາມຂ່າວເຖິງບັນດາສະຫາຍອະດີດການນຳຂັ້ນສູງຂອງພັກ, ລັດລາວ, ພ້ອມທັງຕິດຕາມ ແລະ ເອົາໃຈໃສ່ ໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງລາວ-ຫວຽດນາມໄລຍະຜ່ານມາ. ບັນດາສະຫາຍອະດີດການນຳຂັ້ນສູງຂອງຫວຽດນາມ ຍັງຈົດຈຳເຖິງນ້ຳໃຈໄມຕີຈິດ ອັນສະໜິດສະໜົມຕໍ່ກັບປະເທດຊາດ ກໍຄືປະຊາຊົນລາວອ້າຍນ້ອງ, ພ້ອມທັງສະແດງຄວາມຂອບໃຈຕໍ່ການສະໜັບສະໜູນອັນລ້ຳຄ່າຂອງພັກ, ລັດ ແລະ ປະຊາຊົນລາວບັນດາເຜົ່າທີ່ມີຕໍ່ຫວຽດນາມ ແລະ ສະເໜີໃຫ້ ສອງຝ່າຍສືບຕໍ່ເສີມຂະຫຍາຍ ສາຍພົວພັນມິດຕະພາບແບບພິເສດຫວຽດນາມ-ລາວໃຫ້ໄດ້ຮັບການຍົກສູງປະສິດທິພາບການຮ່ວມມື ກໍຄື ການຈັດຕັ້ງຜັນຂະຫຍາຍປະສິດທິພາບ ບັນດາຂໍ້ຕົກລົງ, ບົດບັນທຶກລະຫວ່າງສອງພັກ, ສອງລັດ, ພ້ອມທັງເນັ້ນໜັກເຖິງການສືບຕໍ່ເອົາໃຈໃສ່ໃນການສຶກສາ ແລະ ໂຄສະນາໃຫ້ປະຊາຊົນສອງປະເທດເປັນຕົ້ນແມ່ນໄວໜຸ່ມໃຫ້ຮັບຮູ້ເຖິງມູນເຊື້ອການພົວພັນແບບພິເສດທີ່ຫາຍາກແບບມີ 1 ບໍ່ມີ 2 ໄວ້ຕະຫລອດໄປ, ຊ່ວຍເຫລືອກັນພັດທະນາປະເທດຊາດຂອງຕົນໃຫ້ນັບມື້ນັບເຂັ້ມແຂງໃນເງື່ອນໄຂເຊື່ອມໂຍງສາກົນ, ເດີນຕາມແນວທາງຂອງພັກ, ລັດຂອງສອງປະເທດ ເພື່ອໃຫ້ສົມກັບການເສຍສະຫລະອັນສູງສົ່ງ, ໃຫຍ່ຫລວງຂອງບັນດາຮຸ່ນການນຳ ແລະ ບັນດານັກຮົບປະຕິວັດຂອງສອງຊາດພວກເຮົາ.
ພາບ: ຂັນໄຊ
