ໃນວັນທີ 5 ກໍລະກົດ ນີ້ ທີ່ ກະຊວງການຕ່າງປະເທດ ໄດ້ມີພິທີມອບ-ຮັບຜະລິດຕະພັນຊາສຳເລັດຮູບເພື່ອນຳໃຊ້ເຂົ້າໃນວຽກງານ ການເປັນປະທານອາຊຽນ ຂອງ ສປປ ລາວ ໃນປີ 2024 ຈໍານວນ 200 ກ່ອງ ມູນຄ່າ 190.800.000 ກີບ (ໜຶ່ງຮ້ອຍເກົ້າສິບລ້ານແປດແສນກີບ) ຈາກ ບໍລິສັດ ລາວທີຊິກມາເນີ ການຄ້າ ຂາເຂົ້າ-ຂາອອກ ຈໍາກັດ, ໂດຍຕາງໜ້າໃຫ້ລັດຖະບານ ສປປ ລາວ ແມ່ນ ທ່ານ ບຸນເຫຼືອ ພັນດານຸວົງ ຮອງລັດຖະມົນຕີກະຊວງການຕ່າງປະເທດໃນນາມຮອງຫົວໜ້າອະນຸກໍາມະການຂົນຂວາຍການຊ່ວຍເຫຼືອສໍາລັບປະທານອາຊຽນ ຂອງ ສປປ ລາວ ໃນປີ 2024 ເປັນຜູ້ຮັບ ແລະ ທ່ານ ນາງ ຢວນທຽນ ຜູ້ອໍານວຍການບໍລິສັດ ລາວທີຊິກມາເນີ ການຄ້າ ຂາເຂົ້າ-ຂາອອກ ຈໍາກັດ ໄດ້ຕາງໜ້າບໍລິສັດມອບຜະລິດຕະພັນຊາສໍາເລັດຮູບດັ່ງກ່າວ.
ຜະລິດຕະພັນຊາສຳເລັດຮູບດັ່ງກ່າວແມ່ນຈະນຳເອົາໄປເປັນຂອງທີ່ລະນຶກມອບໃຫ້ຫົວໜ້າຄະນະຜູ້ແທນກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມອື່ນໆທີ່ກ່ຽວຂ້ອງ ໃນເດືອນກໍລະກົດ 2024 ແລະ ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ ໃນເດືອນ ຕຸລາ 2024.
ຂ່າວ: ກະຊວງການຕ່າງປະເທດ
