ກອງປະຊຸມສຳມະນາ ລະຫວ່າງ 4 ສະຖາບັນສຳຄັນ ຂອງສອງປະເທດ ລາວ ແລະ ຫວຽດນາມ ໄດ້ຈັດຂຶ້ນເປັນຄັ້ງທີ 5 ຊຶ່ງຄັ້ງນີ້ຈັດໂດຍ ສະຖາບັນການເມືອງ ແລະ ການປົກຄອງແຫ່ງຊາດ (ສມປຊ) ເປັນເຈົ້າພາບ ໂດຍຈັດໃຫ້ເປັນ ກອງປະຊຸມວິທະຍາສາດສາກົນ ພາຍໃຕ້ຫົວຂໍ້ “ບົດຮຽນ 40 ປີ ແຫ່ງການປ່ຽນແປງໃໝ່ ແລະ ການພັດທະນາຂອງ ສປປ ລາວ ແລະ ສສ ຫວຽດນາມ” ໃນວັນທີ 27 ມິຖຸນານຜ່ານມາ ທີ່ ແຂວງຫຼວງພະບາງ ໂດຍໄດ້ມີບົດນໍາກອງປະຊຸມຂອງການນໍາ 4 ບົດ ແລະ ຈັດໃຫ້ມີ 3 ວາລະສຳມະນາ ຊຶ່ງປະກອບມີ 12 ຫົວຂໍ້ ພາຍໃຕ້ຫົວຂໍ້ສຳມະນາ ອັນເປັນການແລກປ່ຽນບົດຮຽນ ທີ່ສຳຄັນຂອງສອງປະເທດ.
ກອງປະຊຸມວິທະຍາສາດສາກົນຄັ້ງນີ້, ມີບັນດາທ່ານຫົວໜ້າຄະນະຜູ້ແທນຈາກ 4 ສະຖາບັນເປັນປະທານຮ່ວມຄື ສະຫາຍ ພູວົງ ອຸ່ນຄໍາແສນ ກຳມະການສູນກາງພັກ ເລຂາຄະນະບໍລິຫານງານພັກ ຫົວໜ້າ ສມປຊ, ສະຫາຍ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກ ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ (ສວສສຊ), ສະຫາຍ ຟານ ຈີ້ ຫ້ຽວ ເລຂາຄະນະພັກ ປະທານສະຖາບັນ ບັນດິດ ວິທະຍາສາດສັງຄົມຫວຽດນາມ ແລະ ສະຫາຍ ເລ ວັນ ເລີ້ຍ ຄະນະປະຈໍາພັກ ຮອງຫົວໜ້າສະຖາບັນການເມືອງແຫ່ງຊາດ ໂຮ່ຈິມິນ; ພ້ອມນີ້, ມີ ທ່ານ ຄໍາຂັນ ຈັນທະວີສຸກ ກຳມະການສູນກາງພັກ ເລຂາຄະນະພັກ ເຈົ້າແຂວງຫຼວງພະບາງ ພ້ອມດ້ວຍຄະນະ ແລະ ພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ພູວົງ ອຸ່ນຄໍາແສນ ໄດ້ກ່າວວ່າ: ນັບແຕ່ປີ 2017 ເປັນຕົ້ນມາ, ພາຍໃຕ້ບົດບັນທຶການຮ່ວມມື ລະຫວ່າງ 4 ອົງການ (ສະຖາບັນ) ຂອງພວກເຮົາ ທີ່ໄດ້ລົງນາມນໍາກັນໃນປີ 2016, ສາມາດຈັດກອງປະຊຸມສໍາມະນາຮ່ວມກັນທັງແບບເຊິ່ງໜ້າ ແລະ ທາງໄກ ໄດ້ 4 ຄັ້ງ ຊຶ່ງຄັ້ງນີ້ ກໍເປັນຄັ້ງທີ 5 ທີ່ໄດ້ຜັດປ່ຽນການເປັນເຈົ້າພາບ. ການຈັດກອງປະຊຸມສໍາມະນາລະຫວ່າງ 4 ອົງການ ເປັນການເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມື ຮອບດ້ານລາວ-ຫວຽດນາມ, ຫວຽດນາມ – ລາວ ເວົ້າລວມ, ເວົ້າສະເພາະ ແມ່ນ 4 ອົງການ ຂອງພວກເຮົາ ໃຫ້ຮັບມື້ນັບແຕກດອກອອກຜົນ ແລະ ຈະເລີນງອກງາມຢ່າງບໍ່ຢຸດຢັ້ງ. “ບົດຮຽນ 40 ປີ ແຫ່ງການປ່ຽນແປງໃໝ່ ແລະ ການພັດທະນາ ຂອງ ສປປ ລາວ ແລະ ສສ ຫວຽດນາມ” ເປັນຫົວຂໍ້ໃຫຍ່ ມີຄວາມໝາຍທາງດ້ານທິດສະດີ ແລະ ພຶດຕິກຳສູງ, ເປັນບັນດາບັນຫາທີ່ສັງຄົມໃຫ້ຄວາມສົນໃຈ. ກອງປະຊຸມຄັ້ງນີ້, ໄດ້ຈັດຕັ້ງຂຶ້ນໃນບັນຍາກາດທີ່ພັກກອມມູນິດຫວຽດນາມ ພວມຜັນຂະຫຍາຍມະຕິກອງປະຊຸມໃຫຍ່ຄັ້ງທີ XIII ຂອງຕົນຢ່າງມີປະສິດທິຜົນ ແລະ ກະກຽມໃຫ້ແກ່ການດຳເນີນກອງປະຊຸມໃຫຍ່ຄັ້ງທີ XIV ຂອງພັກ ແລະ ກະກຽມສະຫຼຸບ 40 ປີແຫ່ງການນໍາພາດຳເນີນພາລະກິດປ່ຽນແປງໃໝ່ຂອງພັກ ແລະ ພັກປະຊາຊົນປະຕິວັດລາວ ພວມຜັນຂະຫຍາຍ ກອງປະຊຸມໃຫຍ່ຄັ້ງທີ XI ແລະ ພວມຫ້າງຫາກະກຽມ ໃຫ້ແກ່ການດຳເນີນກອງປະຊຸມໃຫຍ່ XII ຂອງພັກ, ກະກຽມສະຫຼຸບທິດສະດີ ແລະ ພຶດຕິກຳໃນຫຼາຍບັນຫາ ເປັນຕົ້ນແມ່ນ ການສະຫຼຸບທິດສະດີ ແລະ ພຶດຕິກຳ ການຈັດຕັ້ງປະຕິບັດເນື້ອໃນ 9 ປະຖົມປັດໄຈເພື່ອກ້າວເດີນສູ່ຈຸດໝາຍສັງຄົມນິຍົມ; ພວມດຳເນີນການສະຫຼຸບ 40 ປີ ແຫ່ງການປະຕິບັດພາລະກິດການປ່ຽນແປງໃໝ່ຮອບດ້ານ ແລະ ມີຫຼັກການຂອງພັກ.
ບົດຮຽນ 40 ປີ ແຫ່ງການປ່ຽນແປງໃໝ່ ແລະ ພັດທະນາ ຢູ່ ສປປ ລາວ ແລະ ສສ ຫວຽດນາມ ມີເນື້ອໃນກວ້າງຂວາງ, ເລິກເຊິ່ງ ແລະ ກວມລວມເອົາທຸກຂົງເຂດ, ຕ້ອງໄດ້ມີການຄົ້ນຄວ້າ, ວິໄຈໃຫ້ຊັດເຈນ ແລະ ມີການເບິ່ງບັນຫາຢ່າງພາວະວິໄສ.
ສະຫາຍ ສະຫາຍ ກອງແກ້ວ ໄຊສົງຄາມ ກ່າວວ່າ: ຫົວຂໍ້ກອງປະຊຸມສຳມະນາຄັ້ງນີ້, ມີຄວາມໝາຍຄວາມສຳຄັນເປັນຢ່າງຍິ່ງ ສຳລັບສອງພັກ, ສອງລັດ ແລະ ປະຊາຊົນສອງຊາດຂອງພວກເຮົາ; ຈະເປັນໂອກາດດີໃຫ້ພວກເຮົາໄດ້ທົບທວນຄືນກ່ຽວກັບການຈັດຕັ້ງຜັນຂະຫຍາຍແນວທາງປ່ຽນແປງໃໝ່ຂອງພວກເຮົາໃນໄລຍະ 40 ປີ ຜ່ານມາ ເພື່ອຖອດຖອນບົດຮຽນ ແລະ ແລກປ່ຽນຄຳຄິດຄຳເຫັນຊຶ່ງກັນ ແລະ ກັນ. ພ້ອມດຽວກັນນີ້, ກໍໄດ້ມີບາງຄໍາເຫັນກ່ຽວກັບ: (1) ປະຫວັດຄວາມເປັນມາ, ສາເຫດ ແລະ ຈຸດພິເສດຂອງການປ່ຽນແປງໃໝ່ ຢູ່ ສປປ ລາວ (2) ຕີລາຜົນສຳເລັດ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຈາກການຈັດຕັ້ງຜັນຂະຫຍາຍແນວທາງການປ່ຽນແປງໃໝ່ດັ່ງກ່າວ ຢູ່ ສປປ ລາວ ໃນໄລຍະ 40 ປີ ໂດຍສັງເຂບ ເພື່ອເປັນຂໍ້ມູນພື້ນຖານໃຫ້ແກ່ການສົນທະນາ, ປຶກສາຫາລື ແລະ ແລກປ່ຽນຄວາມຄິດຄວາມເຫັນ ຊຶ່ງກັນ ແລະ ກັນ ໃນກອງປະຊຸມສຳມະນາວິທະຍາສາດໃນຄັ້ງນີ້.
ການດຳເນີນກອງປະຊຸມໃນທຸກວາລະ, ພາຍຫຼັງທີ່ໄດ້ມີການສະເໜີຫົວຂໍ້ຕ່າງໆແລ້ວ ບັນດາສະຫາຍທີ່ເຂົ້າຮ່ວມກອງປະຊຸມ ໄດ້ມີການສົນທະນາ, ແລກປ່ຽນບົດຮຽນຊຶ່ງກັນ ແລະ ກັນ; ພ້ອມນີ້, ກໍມີການສະຫຼຸບແຕ່ລະວາລະ. ກອງປະຊຸມຄັ້ງນີ້, ໄດ້ດໍາເນີນໄປດ້ວຍບັນຍາກາດຟົດຟື້ນ, ມີເນື້ອໃນອຸດົມສົມບູນ ແລະ ມີຄວາມຮັບຜິດຊອບສູງ. ບັນດາສະຫາຍທີ່ເຂົ້າຮ່ວມກອງປະຊຸມ ໄດ້ສຸມຈິດສຸມໃຈຮັບຟັງ ແລະ ພ້ອມກັນປະກອບຄໍາຄິດຄໍາເຫັນ, ສົນທະນາແລກປ່ຽນບົດຮຽນ ແຕ່ລະບັນຫາດ້ວຍຄວາມຈິງໃຈ ແລະ ກົງໄປກົງມາ ຊຶ່ງໄດ້ສ້າງຄວາມກະຈ່າງແຈ້ງ ທັງໃນແງ່ທິດສະດີ ແລະ ພຶດຕິກໍາ ທີ່ມີຊີວິດຊີວາ, ມີຄວາມໝາຍສໍາຄັນທາງດ້ານທິດສະດີ ແລະ ພຶດຕິກໍາໃຫ້ແກ່ສອງພັກ, ສອງລັດ ແລະ ປະຊາຊົນສອງຊາດ. ບັນດາເນື້ອໃນທີ່ນໍາສະເໜີຕໍ່ກອງປະຊຸມ ແມ່ນມີຄວາມອຸດົມສົມບູນ, ເລິກເຊິ່ງ, ມີຊີວິດຊີວາ, ສ້າງຄວາມກະຈ່າງແຈ້ງໃນຫຼາຍບັນຫາ, ການວິເຄາະວິໄຈ, ໄຈ້ແຍກ, ອະທິບາຍ ແຕ່ລະບັນຫາເຫັນວ່າ ມີວິທີວິທະຍາທີ່ຊັດເຈນ ແລະ ໄດ້ຮັບຜົນສຳເລັດໂດຍພື້ນຖານ.
(ຂ່າວ: ສຸກສະຫວັນ, ພາບ-ຂໍ້ມູນ: ສວສສຊ)
