ໃນລະຫວ່າງວັນທີ 29-30 ເມສາ 2024 ນີ້ຢູ່ທີສະໂມສອນເມືອງໃໝ່ ແຂວງຜົ້ງສາລີ ໂຄງການອາຫານໂລກ WFP (world food programme) ໄດ້ຈັດ ກອງປະຊຸມເຜີຍແຜ່ກິດຈະກຳສ້າງຊັບສິນ ແລະ ຝຶກອົບຮົມການເປັນຄູຝຶກກ່ຽວກັບການຈັດຕັ້ງປະຕິບັດ ແລະ ການຄຸ້ມຄອງກິດຈະກຳສ້າງຊັບສິນ ໂຄງການສ້າງຄວາມເຂັ້ມແຂງໃຫ້ຊຸມຊົນຫຼຸດຜ່ອນໄພທິບັດ ແລະ ຄ້ຳປະກັນສະບຽງອາຫານ ໂດຍພາຍໃຕ້ການເປັນປະທານຂອງ ທ່ານ ບຸນເພັງ ພຸດກັນຍາ ຮອງຫົວໜ້າພະແນກ ແຮງງານ ແລະ ສະຫວັດດີການສັງຄົມແຂວງ ແລະ ທ່ານ ພຸດທາ ຫົວໜ້າໂຄງການອາຫານໂລກ ປະຈຳແຂວງ ຜົ້ງສາລີ ມີບັນດາທ່ານການນຳ ຜູ້ຊີ້ນຳວຽກງານໂຄງການ, ມີພະນັກງານໂຄງການປະຈຳ ແຂວງ, ເມືອງ ແລະ ພາກສ່ວນຮັບຜິດຊອກທີ່ກ່ຽວຂ້ອງໂຄງການ ເມືອງຂວາ ແລະ ເມືອງໃໝ່ ເຂົ້າຮ່ວມ. ໃນກອງປະຊຸມ ທ່ານ ບຸນເພັງ ພຸດກັນຍາ ຮອງຫົວໜ້າພະແນກ ແຮງງານ ແລະ ສະຫວັດດີການສັງຄົມແຂວງ ໄດ້ຂື້ນມີຄຳເຫັນ ແລະ ກ່າວເປີດກອງປະຊຸມຢ່າງເປັນທາງການ ພ້ອມທັງຊີ້ນຳກອງປະຊຸມ ຈາກນັ້ນຜູ້ແທນກອງປະຊຸມໄດ້ຮັບການນຳສະເໜີໂດຍຫຍໍ້ກ່ຽວກັບໂຄງການ ເຊິ່ງໃຫ້ຮູ້ເຖິງຈຸດປະສົງ, ເປົ້າໝາຍ, ຄວາມຄືດໜ້າໃນການຈັດຕັ້ງປະຕິບັດ ແລະ ພາລະບົດບາດຂອງແຕ່ລະພາກສ່ວນໃນການຈັດຕັ້ງປະຕິບັດໂຄງການ, ນຳສະເໜີກິດຈະກຳການສ້າງຊັບສິນຂອງແຕ່ລະບ້ານທີ່ໄດ້ຮັບການຂັດເລືອກ, ການຈັດຕັ້ງປະຕິບັດຕ້ອງໄດ້ແຈ້ງໃຫ້ຊຸມຊົນຮັບຮູ້ເພື່ອຄວາມເປັນເອກະພາບ ແລະ ສະເໜີການຝຶກອົບຮົມທີ່ຈະໄດ້ຝຶກໃຫ້ກັບຊຸມຊົນໃນຕໍ່ໜ້າ ໂດຍສະເພາະແມ່ນຄະນະກຳມະການຄຸ້ມຄອງຊັບສິນຂອງບ້ານ ເຊິ່ງຄະນະກຳມະການຄຸ້ມຄອງຊັບສິນຂອງບ້ານມີໜ້າທີ່ວາງແຜນການດຳເນີນງານ, ຄຸ້ມຄອງອຸປະກອນ-ເຄື່ອງມືໃນການກໍ່ສ້າງ, ນຳພາການຈັດຕັ້ງປະຕິບັດກິດຈະກຳ, ຕິດຕາມບັນທຶກວັນງານຜູ້ເຂົ້າຮ່ວມກິດຈະກຳ, ຮັບປະກັນຄວາມປອດໄພໃນການເຮັດວຽກ, ນຳໃຊ້ ບຳລຸງຮັກສາ/ສ້ອມແປງ, ແບ່ງປັນຜົນປະໂຫຍດ ແລະ ຮັບປະກັນຄວາມຍືນຍົງ, ປະສານງານ ແລະ ລາຍງານ ຢ່າງເປັນປົກກະຕິ ພ້ອມນັ້ນຍັງໄດ້ຮັບຟັງການນຳສະເໜີແບບຟອມຂອງຂໍ້ຕົກລົງ, ແບບຟອມລາຍການບັນທຶກອຸປະກອນ ແລະ ແບບຟອມການບັນທຶກວັນງານ ຂອງຄະນະກຳມະການຄຸ້ມຄອງຊັບສິນຂັ້ນບ້ານ ຈາກນັ້ນຜູ້ແທນກອງປະຊຸມກໍໄດ້ພ້ອມກັນປະກອບຄຳຄິດຄຳເຫັນໃສ່ບັນດາແບບຟອມຕ່າງໆ ຢ່າງກົງໄປກົງມາ ເພື່ອນຳເອົາໄປປັບປຸງ ແລະ ນຳເອົາໄປຈັດຕັ້ງປະຕິບັດເຂົ້າໃນວຽກງານຕົວຈິງໃນຕໍ່ໜ້າ ໃຫ້ໄດ້ຮັບຜົນປະໂຫຍດສູງສຸດ .
ໃນຕ້ອນທ້າຍກອງປະຊຸມຄະນະປະທານໄດ້ຂື້ນມີຄຳເຫັນ ຊີ້ແຈງຕໍ່ກອງປະຊຸມ ກອນອື່ນກໍໄດ້ສະແດງຄວາມຍ້ອງຍໍຊົມຊົມຕໍ່ຜູ້ແທນກອງປະຊຸມທີໄດ້ເອົາໃຈໃສ່ຮັບຟັງ ແລະ ພ້ອມກັນປະກອບຄຳຄິດຄຳເຫັນໃສ່ບັນດາແບບຂອງແຕ່ລະກິດຈະກຳການສ້າງຊັບສິນຂອງແຕ່ລະບ້ານ ນອກນັ້ນຍັງໄດ້ຮຽກຮ້ອງມາຍັງວິຊາການທີຈະຕ້ອງສືບຕໍ່ຝຶກອົບຮົມຢູ່ຂັ້ນບ້ານ ຈົ່ງພ້ອມກັນເອົາໃຈໃສ່ ນຳເອົາບັນດາເນື້ອໃນກອງປະຊຸມລົງໄປເຜີຍແຜ່, ຝຶກອົບຮົມໃຫ້ບ້ານເປົ້າໝາຍກ່ຽວກັບການຄຸ່ມຄອງຊັບສິນ ໃຫ້ມີຜັນສຳເລັດຕາມຄາດໝາຍທີ່ມີວາງໄວ້.
(ພາບ ຂ່າວ: ວັນວິໄລ ຖວທ)
