ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ຜ່ານມານີ້, ພິທີເປີດງານວັນບຸນ ກາເຟ – ຊາ ຫວຽດນາມ ປີ 2024 ໄດ້ຈັດຂຶ້ນຢູ່ ຖູດຶກ ນະຄອນໂຮ່ຈິມິນ. ນີ້ແມ່ນບັນດາເຫດການເພື່ອແນໃສ່ໂຄສະນາເຄື່ອງໝາຍການຄ້າ, ເຊື່ອມຕໍ່ການແລກປ່ຽນຄ້າຂາຍຜະລິດຕະພັນກາເຟ, ຊາ ຫວຽດນາມ ໂດຍໜັງສືພິມຊາວຜູ້ອອກແຮງງານ ໄດ້ປຸກລະດົມແຕ່ປີ 2023.
ຂ່າວລະບຸວ່າ: ບັນດາການເຄື່ອນໄຫວໃນວັນບຸນ ກາເຟ – ຊາ ຫວຽດນາມ ປີ 2024 ໄດ້ຈັດຂຶ້ນຫຼາຍຮູບຫຼາຍແບບ ແລະ ອຸດົມສົມບູນ, ດຶງດູດການເຂົ້າຮ່ວມຂອງວິສາຫະກິດຫຼາຍແຫ່ງ ແລະ ໄດ້ຮັບການແນະນຳ, ໂຄສະນາໃນວົງກວ້າງ ຜ່ານຫຼາຍຊ່ອງທາງ; ໃນນັ້ນຈຸດສຸມຂອງວັນບຸນແມ່ນ ກອງປະຊຸມສຳມະນາວິທີແກ້ໄຂເພື່ອສົ່ງອອກກາເຟໃຫ້ບັນລຸ 5 ຕື້ໂດລາ.
ໃນພິທີ, ບັນດານັກຊ່ຽວຊານ, ສະມາຄົມ ໄດ້ປຶກສາຫາລືວິທີການແກ້ໄຂເພື່ອການເຕີບໂຕດ້ານການສົ່ງອອກກາເຟແບບຍືນຍົງ, ສ້າງມູນຄ່າສິນຄ້າໃຫ້ຫຼາຍຂຶ້ນກວ່າເກົ່າ. ໃນຂອບເຂດຂອງງານ, ລາຍການ Coffee Talk ກໍມີນັກຊ່ຽວຊານຫຼາຍທ່ານໄດ້ແບ່ງປັນກັບຊາວໜຸ່ມ ບັນດາບົດຮຽນປະສົບການອັນລ້ຳຄ່າກ່ຽວກັບທຸລະກິດ Startup ແລະ ຄຸ້ມຄອງການເງິນ.
