ເວລາ 6:00 ໂມງເຊົ້າ ຂອງວັນທີ 1 ທັນວາ ທີ່ບຶງທາດຫຼວງ ບໍລິສັດທາງລົດໄຟລາວ-ຈີນໄດ້ຈັດງານແລ່ນມາລາທອນຄັ້ງທຳອິດຂຶ້ນ. ໃຫ້ກຽດເຂົ້າຮ່ວມພັກລັດຫຼາຍກວ່າ 20 ພາກສ່ວນເຊັ່ນ: ກະຊວງໂຍທາທິການ ແລະ ຂົນສົ່ງ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ສະຖານທູດຈີນປະຈຳ ສປປ ລາວ, ອົງການຕ່າງໆ ແລະ ບັນດາກະຊວງທີ່ກ່ຽວຂ້ອງອື່ນໆ ລວມໄປເຖິງນັກກິລາ ແລະ ປະຊາຊົນຈາກທຸກແຫ່ງໃນນະຄອນຫຼວງວຽງຈັນຈຳນວນ 1,500 ກວ່າຄົນໄດ້ເຂົ້າຮ່ວມການແຂ່ງຂັນ ເພື່ອສະເຫຼີມສະຫຼອງວັນຊາດລາວ ຄົບຮອບ 48 ປີ ແລະ ວັນຄົບຮອບເປີດດຳເນີນງານທາງລົດໄຟລາວ-ຈີນຄົບຮອບ 2 ປີ.
ການແຂ່ງຂັນແລ່ນມິນິມາລາທອນມີຄວາມຍາວ 10 ກິໂລແມັດ, ປະກອບມີຫຼາກຫຼາຍລາງວັນໄດ້ແກ່ ເງິນລາງວັນລາງວັນຜູ້ຊະນະເລີດ 10 ລາງວັນ, ໂມເດວລົດໄຟ EMU, ຫຼຽນໄຊ, ຂັນລາງວັນ ແລະ ລາງວັນອື່ນໆ.ໃນນັ້ນເງິນລາງວັນແບ່ງເປັນດັ່ງນີ້: ອັນດັບທີ 1 (8,880,000ກີບ), ອັນດັບທີ 2 (6,880,000 ກີບ), ອັນດັບທີ 3 (3,880,000 ກີບ), ອັນດັບທີ 4-10 (2,880,000 ກີບ), ນອກນັ້ນ ຍັງມີລາງວັນຂວັນໃຈ ແລະ ລາງວັນທູດມິດຕະພາບທາງລົດໄຟລາວ-ຈີນ, ສຳລັບນັກກິລາທີ່ແລ່ນຄົບຕາມໄລຍະທາງຈະໄດ້ຮັບລາງວັນຊົມເຊີຍເປັນຫຼຽນທີ່ລະນຶກ.
ໄດ້ມີການກ່າວເປີດງານໂດຍ ທ່ານງາມປະສົງ ເມືອງມະນີ ລັດຖະມົນຕີກະຊວງໂຍທາທິການ ແລະ ຂົນສົ່ງ: ງານແລ່ນມາລາທອນທີ່ບໍລິສັດທາງລົດໄຟລາວ-ຈີນຈັດຂຶ້ນເປັນງານທີ່ອົບອຸ່ນເພື່ອກຽມຕ້ອນຮັບປີທ່ອງທ່ຽວຂອງລາວ ປີ2024, ຫວັງວ່າທາງລົດໄຟລາວ-ຈີນຈະໃຫ້ການສະໜອງການບໍລິການຕໍ່ຂົນສົ່ງຜູ້ໂດຍສານທີ່ດີ ແລະ ດຶງດູດນັກທ່ອງທ່ຽວມາທ່ອງທ່ຽວລາວເພີ່ມຂຶ້ນອີກ. ເພິ່ນຍັງໄດ້ຢັ້ງຢືນຕໍ່ຜົນງານທີ່ດີຂອງທາງລົດໄຟລາວ-ຈີນໃນດ້ານຄວາມປອດໄພ, ການເຝົ້າລະວັງຕິດຕາມໄພທາງທຳມະຊາດ, ການຂົນສົ່ງຜູ້ໂດຍສານ ແລະ ສິນຄ້າ, ການຝຶກອົບຮົມພະນັກງານລາວ, ການປະຕິບັດໜ້າທີ່ຮັບຜິດຊອບຕໍ່ສັງຄົມໃນສອງປີທີ່ຜ່ານມາ ແລະ ຍັງກ່າວຕື່ມວ່າ: “ລົດໄຟ EMU ຂະບວນລ້ານຊ້າງ ເປັນນາມບັດອັນສວຍງາມຂອງປະເທດລາວ, ທາງລົດໄຟລາວ-ຈີນໄດ້ກາຍເປັນເສັ້ນທາງອັນສຳຄັນທີ່ເຊື່ອມຕໍ່ອາຊີຕາເວັນອອກສຽງໃຕ້ກັບຈີນ, ອາຊີແລະເອີຣົບ ແລະ ເປັນເສັ້ນທາງແຫ່ງຄວາມຜາສຸກ,ເສັ້ນທາງແຫ່ງການພັດທະນາ ແລະ ເສັ້ນທາງແຫ່ງມິດຕະພາບທີ່ມສ້າງຜົນປະໂຫຍດໃຫ້ແກ່ປະຊາຊົນລາວ-ຈີນບັນດາເຜົ່າ.”
ທ່ານ ຫຼິວ ຫົງ ຜູ້ອຳນວຍການໃຫຍ່ບໍລິສັດທາງລົດໄຟລາວ-ຈີນໄດ້ກ່າວວ່າ: ຮັບໃຊ້ວຽກງານການພັດທະນາເສດຖະກິດ-ສັງຄົມຂອງລາວ ແລະ ປະຊາຊົນລາວບັນດາເຜົ່າ, ຊຸກຍູ້ວຽກງານດ້ານການກິລາ, ສົ່ງເສີມໂຄສະນາການທ່ອງທ່ຽວ ແລະ ວັດທະນະທຳ, ເສີມສ້າງສຸຂະພາບຂອງປະຊາຊົນໃຫ້ແຂງແຮງ ແລະ ສ້າງກຳລັງໃຈຄວາມເບີກບານໃຫ້ແກ່ປະຊາຊົນ ແມ່ນຄວາມມຸ່ງຫວັງໃນການການຮັບໃຊ້ສັງຄົມຂອງບໍລິສັດທາງລົດໄຟລາວ-ຈີນ.
ມາຮອດວັນທີ 30 ພະຈິກນີ້, ການແລ່ນລົດໄຟຂົນສົ່ງຜູ້ໂດຍສານບັນລຸ 5.412 ຖ້ຽວ, ບັນທຸກຜູ້ໂດຍສານໄດ້ 3.728.000 ເທື່ອຄົນ, ສະເລ່ຍແລ້ວ 5.116 ເທື່ອຄົນຕໍ່ມື້. ນັບຕັ້ງແຕ່ເປີດນຳໃຊ້ລົດໄຟຂ້າມແດນເປັນຕົ້ນມາ, ໄດ້ມີການຂົນສົ່ງຜູ້ໂດຍສານຂ້າມແດນທັງໝົດ 78.581 ເທື່ອຄົນ, ໃນນັ້ນມີຜູ້ໂດຍສານຂາອອກ 46.794 ເທື່ອຄົນ ແລະ ຂາເຂົ້າ 46.480 ເທື່ອຄົນ, ໃຊ້ເວລາຜ່ານດ່ານພາສີສາກົນບໍ່ເຕ່ນພຽງແຕ່ 40 ນາທີ ສັ້ນກວ່າເວລາເບື້ອງຕົ້ນເກືອບ 1 ຊົ່ວໂມງ.
ລົດໄຟຂົນສົ່ງສິນຄ້າໄດ້ມີການຂົນສົ່ງ 7.744 ຖ້ຽວ, ໃນນັ້ນມີລົດໄຟຂົນສົ່ງສິນຄ້າຂ້າມແດນ 7.372 ຖ້ຽວ, ຂົນສົ່ງສິນຄ້າ 5.990.000 ໂຕນ, ປະລິມານການຂົນສົ່ງສິນຄ້າແມ່ນໄດ້ເພີ່ມຂຶ້ນຢ່າງບໍ່ຢຸດຢັ້ງ.
