ສະຫະພັນບານເຕະເອີຣົບ (UEFA) ໄດ້ສັ່ງລົງໂທດຫ້າມ ຢູເວນຕຸສ ເຂົ້າຮ່ວມການແຂ່ງຂັນ ຢູໂຣປາ ຄອນເຟີເຣນ ລີກ ໃນລະດູການ 2023-24 ແລະ ສັ່ງປັບໃໝເງິນອີກ 10 ລ້ານເອີໂຣ ຈາກຄວາມຜິດການປອມແປງເອກະສານທາງດ້ານການເງິນ.
ຢູເວນຕຸສ ທີມດັງຂອງອີຕາລີ ຖືກເຄາະຊໍ້າກໍາຕາມອີກຮອບ ຫຼັງກ່ອນໜ້ານີ້, ໄດ້ຖືກສານອິຕາລີ ສັ່ງລົງໂທດຕັດ 10 ຄະແນນໃນ ເຊເຣຍ ອາ ເມື່ອລະດູການທີ່ຜ່ານມາ ເຮັດໃຫ້ພວກເຂົາຫຼົ່ນລົງໄປຈົບອັນດັບ 7 ໄດ້ໄປຫຼິ້ນ UEFA Conference League.
ແຕ່ຫຼ້າສຸດ ສະຫະພັນບານເຕະເອີຣົບ ກໍບໍ່ປ່ອຍໃຫ້ ຢູເວນຕຸສ ລອຍນວນໄປງ່າຍໆ ເພາະພວກເຂົາເອງກໍມີບົດລົງໂທດ ທີມຢູເວນຕຸສເຊັ່ນກັນ ນັ້ນຄືຈະຕັດສິດຈາກການລົງຫຼິ້ນຊີງຂັນສະໂມສອນເອີຣົບ ແລະ ປັບໃໝເງິນອີກ 10 ລ້ານເອີໂຣ ເພາະເຮັດຜິດກົດລະບຽບຍຸຕິທໍາທາງການເງິນ.
ພ້ອມດຽວກັນນັ້ນ ຢູຟ່າ ຍັງຄາດໂທດ ຢູເວນຕຸສ ຫາກຍັງບໍ່ຍອມປະຕິບັດຕາມກົດລະບຽບອີກເທື່ອໜຶ່ງໃນລະດູການໜ້າ ກໍຈະຖືກປັບໃໝເງິນອີກ 10 ລ້ານເອີໂຣ.
ໂດຍມີລາຍງານວ່າ ຢູເວນຕຸສ ຈະບໍ່ຍື່ນອຸທອນຄໍາສັ່ງໂທດຂໍ້ຫ້າມຂອງ ຢູຟ່າ ໃນຄັ້ງນີ້ ເພາະພວກເຂົາກໍບໍ່ມີເຈດຕະນາ ທີ່ຈະໄປຫຼິ້ນຊີງຂັນ Europa Conference League ຢູ່ແລ້ວ.
ການຕັດສິດ ຢູເວນຕຸສ ໃນຄັ້ງນີ້ ຈະເຮັດໃຫ້ ຟິອໍເຣນຕີນ່າ ທີ່ຈົບອັນດັບ 8 ຂອງລີກອີຕາລີ ໄດ້ສິດເຂົ້າຮ່ວມການແຂ່ງຂັນແທນ.
