ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ (ສສກ) ພ້ອມດ້ວຍຄະນະຕິດຕາມ ໄດ້ລົງເຄື່ອນໄຫວຊຸກຍູ້ວຽກງານການສຶກສາ ແລະ ກິລາ ທີ່ແຂວງສະຫວັນນະເຂດ ເມື່ອບໍ່ດົນມານີ້ ໂດຍມີທ່ານ ປອ ສຸກສົມພອນ ອະໂນໄທ ຫົວໜ້າພະແນກສຶກສາທິການ ແລະ ກິລາ ພ້ອມດ້ວຍຄະນະ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຕ້ອນຮັບ.
ການລົງເຄື່ອນໄຫວຊຸກຍູ້ວຽກງານໃນຄັ້ງນີ້, ທ່ານ ລັດຖະມົນຕີ ສສກ ໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານການສຶກສາ-ກິລາ ທີ່ພະແນກສຶກສາທິການ ແລະ ກິລາ ແຂວງສະຫວັນນະເຂດ. ໂອກາດດຽວກັນ, ທ່ານ ລັດຖະມົນຕີ ໄດ້ນໍາເອົາຄວາມຢ້ຽມຢາມຖາມຂ່າວຂອງຄະນະພັກ-ຄະນະນຳ ກະຊວງສຶກສາທິການ ແລະ ກິລາ ມາຍັງຄະນະນໍາຂອງພະແນກ ທີ່ໄດ້ເອົາໃຈໃສ່ບຸກບືນ ປະຕິບັດວຽກສຶກສາ, ວິທະຍາສາດ ແລະ ກິລາຕະຫຼອດ 1 ປີຜ່ານມາ ຊຶ່ງມີທັງອຸປະສັກ ແລະ ຂໍ້ຫຍຸ້ງຍາກຫຼາຍຢ່າງ. ພ້ອມກັນນີ້, ທ່ານຍັງໄດ້ຊີ້ນໍາໃຫ້ຜູ້ບໍລິຫານແຕ່ລະຂັ້ນຈົ່ງໄດ້ ເອົາໃຈໃສ່ຄວາມຮັບຜິດຊອບ ແລະ ຄວາມເປັນເຈົ້າການຕໍ່ໜ້າທີ່ການເມືອງຂອງຕົນ, ກະກຽມການສອບເສັງຈົບມັດທະຍົມສຶກສາຕອນຕົ້ນ ແລະ ຕອນປາຍໃຫ້ປະສົບຜົນສຳເລັດ, ກະກຽມຝຶກອົບຮົມຄູໃນຍາມພັກສິ້ນປີຮຽນ, ເຮັດວຽກຮ່ວມກັບອົງການປົກຄອງ ລົງຊຸກຍູ້ປະຊາຊົນ ສົ່ງລູກຫຼານກັບເຂົ້າຮຽນ, ພິເສດໃຫ້ຈັດສັນຄູໄປເຂດທີ່ມີຄວາມຫຍຸ້ງຍາກ ຫ່າງໄກສອກຫຼີກ ໃນສົກຮຽນທີ່ຈະມານີ້.
ໂອກາດເຄື່ອນໄຫວຄັ້ງນີ້, ທ່ານ ລັດຖະມົນຕີ ຍັງໄດ້ໂອ້ລົມຜູ້ບໍລິຫານ ແລະ ພະນັກງານຫຼັກແຫຼ່ງ ວິທະຍາໄລ ເຕັກນິກ ແຂວງສະຫວັນນະເຂດ, ຢ້ຽມຢາມວິທະຍາເຂດ ຫຼັກ 8 ແລະ ວິທະຍາເຂດ ເຊໂປນ ໂດຍໄດ້ຮັບຟັງສະພາບການລາຍງານການປະຕິບັດການຮຽນການສອນໃນໄລຍະຜ່ານມາ. ພ້ອມກັນນີ້, ທ່ານ ລັດຖະມົນຕີ ໄດ້ສະແດງຄວາມຂອບໃຈ ແລະ ມີບາງຄໍາໂອ້ລົມ ເປັນຕົ້ນແມ່ນ ໃຫ້ຜູ້ບໍລິຫານ ພະນັກງານ ແລະ ຄູອາຈານ ເພີ່ມທະວີຄວາມຮັບຜິດຊອບ, ເສີມຂະຫຍາຍຄວາມສາມັກຄີ ແລະ ເພີ່ມຄວາມເປັນເຈົ້າການຢ່າງມີຫົວຄິດປະດິດສ້າງ; ພັດທະນາວິທະຍາໄລໃຫ້ມີການພັດທະນາຮອບດ້ານ ທັງພັດທະນາຄົນ-ພັດທະນາຄວາມຮູ້ທາງດ້ານວິຊາການ ແລະ ການບໍລິການທີ່ມີຄຸນນະພາບແກ່ສັງຄົມ; ການພັດທະນາຄົນໃຫ້ເນັ້ນຄຸນທາດການເມືອງ-ແນວຄິດ, ຄວາມຮູ້ຄວາມສາມາດ ແລະ ຄວາມສາມັກຄີ; ຂໍໃຫ້ວິທະຍາໄລເສີມຂະຫຍາຍສາຍພົວພັນການຮ່ວມມືກັບພາກຜູ້ປະກອບການ, ໂຮງຈັກ, ໂຮງງານ, ສະພາການຄ້າ-ອຸດສະຫາກຳແຂວງ ເພື່ອຈັດການຮຽນການສອນແບບຄວບຄູ (DCT: Dual Coorperative Training) ແນ່ໃສ່ສ້າງແຮງງານໃຫ້ຕອບສະໜອງກັບຄວາມຕ້ອງການການໃຊ້ແຮງງານ ແລະ ນໍາໃຊ້ສະຖານປະກອບການເປັນສະພາບແວດລ້ອມໜຶ່ງຂອງສະຖານການສຶກສາ; ໃຫ້ສະຖານອາຊີວະສຶກສາ ເປັນແຫຼ່ງການຄົ້ນຄວ້າ ສ້າງຜະລິດຕະພັນໃໝ່ ແລະ ນະວັດຕະກຳ (ຕົ້ນແບບ) ອອກຮັບໃຊ້ສັງຄົມ.
ສໍາລັບວິທະຍາໄລ ເຕັກນິກ ສະຫວັນນະເຂດ ມີ 4 ວິທະຍາເຂດ, ມີພະນັກງານຄູອາຈານ 137 ທ່ານ, ມີ 3 ພະແນກການ ແລະ 9 ພາກວິຊາ, ມີນັກຮຽນ 1.036 ຄົນ, ປະລະການຮຽນ 38 ຄົນ.
ນອກຈາກນີ້, ທ່ານ ລັດຖະມົນຕີ ສສກ ຍັງໄດ້ລົງຢ້ຽມຢາມ ບໍລິສັດ ຊັນເປເປີ ເພື່ອສະແດງຄວາມຂອບໃຈ ທີ່ບໍລິສັດຊ່ວຍສ້າງຊັບພະຍາກອນມະນຸດຮ່ວມກັບວິທະຍາໄລ ແລະ ກໍາລັງຈະສົ່ງນັກຮຽນລາວທີ່ເປັນລູກຫຼານຂອງຊາວແຂວງສະຫວັນນະເຂດ ໄປສຶກສາຕໍ່ທີ່ ສປ ຈີນ ຈຳນວນ 60 ທຶນ ເພື່ອກັບມາເປັນພະນັກງານສືບທອດຂອງບໍລິສັດ.
ຂໍ້ມູນໂດຍ ຄະນະກອງເລຂາລັດຖະມົນຕີ
ຮຽບຮຽງໂດຍ ດາວຫວຽດ
