ສຳລັບ ແນວຄິດ ໄກສອນ ພົມວິຫານ ກ່ຽວກັບຈັນຍາບັນ ຂອງຖັນແຖວພະນັກງານຖະແຫຼງຂ່າວ, ທ່ານ ຄຳຫຼ້າ ຍອຍສາຍຄຳ ຫົວໜ້າສະຖາບັນ ສື່ມວນຊົນ, ວັດທະນະທຳ ແລະ ທ່ອງທ່ຽວ ໄດ້ກ່າວຕໍ່ກອງປະຊຸມ ສຳມະນາວິທະຍາສາດ ແນວຄິດໄກສອນ ພົມວິຫານ ເມື່ອບໍ່ດົນມານີ້ວ່າ:
ພະນັກງານຖະແຫຼງຂ່າວ ເປັນກະບອກສຽງທີ່ສຳຄັນ ໃນການນຳເອົາແນວທາງນະໂຍບາຍຕ່າງໆຂອງພັກ-ລັດວາງອອກ ໄປໂຄສະນາເຜີຍແຜ່ໃຫ້ພໍ່ແມ່ປະຊາຊົນໄດ້ຮັບຮູ້, ໄດ້ເຫັນ, ໄດ້ເຂົ້າໃຈ, ກຳໄດ້ ແລະ ນໍາໄປຈັດຕັ້ງປະຕິບັດໃຫ້ເກີດດອກອອກຜົນເປັນຮູບປະທຳ. ດ້ວຍເຫດນັ້ນ, ພະນັກງານຖະແຫຼງຂ່າວ ນອກຈາກເຄົາລົບນັບຖື ແລະ ປະຕິບັດຕາມລັດຖະທຳມະນູນ ແລະ ກົດໝາຍຕ່າງໆແລ້ວຍັງຕ້ອງປະຕິບັດຕາມຈັນຍາບັນຂອງສື່ມວນຊົນອີກ, ຄຽງຄູ່ກັບການຈັດຕັ້ງປະຕິບັດໜ້າທີ່ຂອງຕົນ ດ້ວຍຄວາມສັດຊື່ບໍລິສຸດ. ໃນນັ້ນ, ການໂຄສະນາຖະແຫຼງຂ່າວຕ້ອງຢືນຢູ່ບົນພື້ນຖານຄວາມຖືກຕ້ອງ ແລະ ຄວາມຈິງເປັນຫຼັກ ເພາະຄວາມຖືກຕ້ອງ ແລະ ຄວາມເປັນຈິງນັ້ນເປັນສິ່ງທີ່ທຸກໆຄົນໃນສັງຄົມໃຫ້ຄວາມສົນໃຈ. ສະນັ້ນ, ການທີ່ຈະເຮັດໃຫ້ຄວາມຈິງປະກົດຂຶ້ນນັ້ນ ພະນັກງານຖະແຫຼງຂ່າວສື່ມວນຊົນ ຕ້ອງມີທັດສະນະຫຼັກໝັ້ນ, ຄຸນສົມບັດສິນທຳປະຕິວັດ, ມີສັດຈະວິພາກ, ຖືເອົາຄວາມຖືກຕ້ອງ ແລະ ຄວາມຈິງເປັນຫຼັກ. ປາສະຈາກອະຄະຕິ ຫຼື ຄວາມລຳອຽງໃດໆທັງສິ້ນຈຶ່ງເຮັດໃຫ້ປະຊາຊົນມີຄວາມເຄົາລົບນັບຖື ແລະ ເຊື້ອໝັ້ນໄວ້ວາງໃຈ ທັງຕໍ່ຕົນເອງ ແລະ ການຈັດຕັ້ງກໍຄືທິດທາງ, ແນວ ທາງຂອງພັກ-ລັດວາງອອກຢ່າງມີຄຸນນະພາບ.
ພ້ອມນັ້ນ, ແນວຄິດ ໄກສອນ ພົມວິຫານ ຍັງໄດ້ຊີ້ໃຫ້ເຫັນຢ່າງຈະແຈ້ງຄຸນລັກສະນະພະນັກ ງານຖະແຫຼງຂ່າວດັ່ງນີ້: 1) ຜູ້ເຮັດວຽກແນວຄິດ ມີກຽດທີ່ໄດ້ເປັນນັກຮົບໂຄສະນາອົບຮົມລັດທິມາກ-ເລນິນ ແລະ ແນວທາງນະໂຍບາຍຂອງພັກ. ພ້ອມນັ້ນ, ຍັງເປັນນັກຮົບເວນຍາມປ້ອງກັນທັດສະນະແນວທາງຂອງພັກ. ດັ່ງນັ້ນ, ຮຽກຮ້ອງໃຫ້ພວກເຮົາ ຝຶກຝົນຫຼໍ່ຫຼອມຄຸນສົມບັດ ແລະ ຍົກສູງຄວາມສາມາດເພື່ອໃຫ້ສົມເປັນນັກຮົບໃນແນວຮົບແຖວໜ້າຢ່າງແທ້ຈິງ; 2) ຜູ້ທີ່ເຮັດວຽກແນວຄິດ ຕ້ອງຮໍ່າຮຽນຢ່າງບໍ່ຢຸດຢັ້ງ, ຍົກລະດັບທິດສະດີມາກ-ເລນິນໃຫ້ສູງຂຶ້ນ, ກຳແໜ້ນແນວທາງນະໂຍບາຍຂອງພັກຢ່າງມີພື້ນຖານທິດສະດີ, ຮັບປະກັນການເຜີຍແຜ່ແນວທາງ, ທັດສະນະຂອງພັກຢ່າງຊັດເຈນ, ຕໍ່ສູ້ຢ່າງບໍ່ປານີປານອມກັບທັດສະນະແນວຄິດທີ່ຝືນກັບແນວທາງຂອງພັກ. ນອກຈາກນັ້ນ, ໃນແບບແຜນດຳລົງຊີວິດ ກໍເປັນຜູ້ດຸໝັ່ນພາກພຽນ ແລະ ປອດໃສ. ສຳລັບແບບແຜນວິທີເຮັດວຽກ: ຕ້ອງຕິດແທດກັບມະຫາຊົນ, ກິ້ງເກືອກລີເລືອນຳມະຫາຊົນ ເພື່ອເຂົ້າໃຈແນວຄິດຈິດໃຈ, ຄວາມມຸ່ງມາດປາຖະໜາຂອງເຂົາເຈົ້າ ຕ້ອງຕິດແທດກັບຊີວິດຕົວຈິງທີ່ມີຊີວິດຊີວາ.
ທ່ານ ຄໍາຫຼ້າ ຍອຍສາຍຄຳ ຍັງກ່າວຕື່ມວ່າ: ເນື້ອໃນການເສີມຂະຫຍາຍຄຸນຄ່າ ແນວຄິດ ໄກສອນ ພົມວິຫານ ກ່ຽວກັບການກໍ່ສ້າງຖັນແຖວ ພະນັກງານຖະແຫຼງຂ່າວ ໃນຕໍ່ໜ້າວ່າ: 1. ຄົ້ນຄວ້າ, ເຊື່ອມຊຶມ, ຈັດຕັ້ງຜັນຂະຫຍາຍ ແນວຄິດ ໄກສອນ ພົມວິຫານ ກ່ຽວກັບການກໍ່ສ້າງ ພະນັກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຕ່ສູນກາງລົງຮອດທ້ອງຖິ່ນ ໃນທົ່ວປະເທດ ໃຫ້ ກວ້າງຂວາງ ແລະ ເລິກເຊິ່ງເຖິງຖອງ; 2. ຄະນະພັກແຕ່ລະຂັ້ນ ຂອງກະຊວງ, ຂອງພະແນກ, ຫ້ອງການ ຖວທ ໃນທົ່ວປະເທດ ຕ້ອງຖືເອົາວຽກງານກໍ່ສ້າງພະນັກງານຖະແຫຼງຂ່າວ ເປັນຄວາມຮັບຜິດຊອບໂດຍກົງຂອງຕົນ, ອີງໃສ່ແຜນກຳນົດພະນັກງານ, ສອດຄ່ອງກັບຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່ ແລະ ຖືເອົາຄຸນນະພາບເປັນກົກ; 3. ເອົາໃຈໃສ່ສ້າງແຜນບຳລຸງ-ກໍ່ສ້າງພະນັກງານຖະແຫຼງຂ່າວ ດ້ວຍການຝຶກອົບຮົມຢ່າງລຽນຕິດ ແລະ ສົ່ງໄປຍົກລະດັບໃຫ້ສູງຂຶ້ນ ຢູ່ພາຍໃນ ແລະ ຕ່າງປະເທດ; 4. ການກໍ່ສ້າງຖັນແຖວພະນັກງານຖະແຫຼງຂ່າວ ຄວນຖືເປັນສຳຄັນໃນການກໍ່ສ້າງດ້ານຄຸນທາດການເມືອງ, ຄຸນສົມບັດສິນທໍາປະຕິວັດເປັນກົກ, ເນື່ອງຈາກວ່າ ປັດຈຸບັນ ພວກເຮົາຢູ່ໃນຍຸກຂໍ້ມູນຂ່າວສານ ທີ່ບໍ່ມີພົມແດນ. ສະນັ້ນ, ຕ້ອງສຸມໃສ່ການຍົກລະດັບຄວາມຮູ້ທາງດ້ານທິດສະດີມາກ-ເລນິນ, ແນວຄິດໄກສອນ ພົມວິຫານ, ແນວທາງແຜນນະໂຍບາຍຂອງພັກ ເພື່ອແນໃສ່ສ້າງໃຫ້ພະນັກງານຖະແຫຼງຂ່າວ ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດຢ່າງແທ້ຈິງ; 5. ເພີ່ມທະວີການກໍ່ສ້າງພັກພະນັກງານຖະແຫຼງຂ່າວດ້ານວິຊາສະເພາະ, ສ້າງໃຫ້ເປັນຊ່ຽວຊານສະເພາະດ້ານກ່ຽວກັບວຽກງານຖະແຫຼງຂ່າວ ເຊັ່ນ: ນັກຂຽນ, ນັກຂ່າວ, ນັກປາຖະກະຖາ, ນັກໂຄສະນາທາງດ້ານວິທະຍຸ, ໂທລະພາບ ແລະ ອື່ນໆ.
ໂດຍ: ວັນເພັງ
