ສຳເລັດກິດຈະກຳສຳພາດຕາມເສັ້ນທາງລົດໄຟລາວ-ຈີນ ສື່ມວນຊົນລາວ-ຈີນ ຮ່ວມຈັດກິດຈະກຳລາຍງານຂ່າວຕາມເສັ້ນທາງລົດໄຟ ລາວ-ຈີນ ລະຫວ່າງວັນທີ 25-29 ພຶດສະພາ 2023 ພາຍໃຕ້ຫົວຂໍ້ ‘ດອກຈຳປາບານ’ ຄະນະສື່ມວນຊົນເຄື່ອນໄຫວຄັ້ງນີ້ ມີທັງ ໝົດ 10 ທ່ານ ປະກອບມີ ນັກຂ່າວລາວຈາກ 3 ສຳນັກຄື: ສະຖານີວິທະຍຸແຫ່ງຊາດ, ໜັງສືພິມປະຊາຊົນ, ໜັງສືພິມວຽງຈັນໃໝ່ ແລະ ພະນັກງານກະຊວງ ຖວທ (ກົມສື່ມວນຊົນ) ເປັນຜູ້ປະສານງານ ແລະ ຄຸ້ມຄອງ ນຳພາ, ຕົວແທນນັກຂ່າວຝ່າຍຈີນມີ 02 ສຳນັກ ຄື: ນັກຂ່າວຈາກໜັງສືພິມແຂວງຢຸນນານ ແລະ ໜັງສືພິມ ແຂວງຫູນນານ.
ເປົ້າໝາຍການຈັດລາຍງານຂ່າວຮ່ວມກັນຄັ້ງນີ້ ເພື່ອໂຄສະນາການຮ່ວມມືລາວ-ຈີນ ເພື່ອສ້າງປະຊາຄົມຮ່ວມຊາຕາກຳຂອງມວນມະນຸດ ໃຫ້ເຫັນເປັນຮູບປະທຳ ແລະ ຊັດເຈນ. ຕະຫຼອດໄລຍະການເຄື່ອນໄຫວສື່ມວນຊົນ ລາວ-ຈີນ ໄດ້ເກັບກຳຂ່າວ ການເຮັດກິດຈະກຳຊ່ວຍເຫຼືອສັງຄົມຂອງ ບໍລິສັດຕາຂ່າຍໄຟຟ້າຈີນພາກໃຕ້ ຢູ່ໂຮງຮຽນມືແຫ່ງຄວາມຫວັງ, ຜູ້ປະກອບການເຂດພັດທະນາເສດຖະກິດກວມລວມ ໄຊເສດຖາ, ສຳພາດສຳມະຊິກສະມາຄົມນັກທຸລະກິດແຂວງ ຫູນໜານ ປະຈຳ ສປປ ລາວ ແລະ ປະຊາຊົນ ແຂວງ ຫູນໜານ ທີ່ມາເປັນວິຊາການ ຢູ່ ສະຖານີທາງລົດໄຟ ລາວ-ຈີນ ແລະ ເຂົ້າມາດຳເນີນທຸລະກິດດ້ານຕ່າງໆ ຢູ່ ແຂວງພາກເໜືອຂອງລາວ.
ນອກຈາກນີ້ຄະນະສື່ມວນຊົນຍັງໄດ້ເຂົ້າພົບຄະນະບັນນາທິການ ພ້ອມດ້ວຍຄະນະພະແນກຂອງ ໜັງສືພິມປະຊາຊົນ ແລ້ວລາຍງານຂ່າວອອກທາງຊ່ອງທາງໜັງສືພິມ ແລະ ສື່ອອນລາຍ ເພື່ອໃຫ້ປະຊາຊົນທັງ 2 ຊາດ ລາວ-ຈີນ ຮັບຮູ້ໄດ້ເຖິງຜົນສຳເລັດການຮ່ວມມືກັນລະຫວ່າງລັດຖະບານລາວ ແລະ ລັດຖະບານ ສປ ຈີນ.
