ວິທະຍຸສາກົນແຫ່ງ ສປ ຈີນ, ວັນທີ 25 ພຶດສະພານີ້, ຄຽງຄູ່ກັບຂະບວນລົດໄຟໂດຍສານ T8701 ອອກເດີນທາງຈາກສະຖານີນະຄອນນານນີງ ເຂດປົກຄອງຕົນເອງ ເຜົ່າຈ້ວງ ກວາງຊີຂອງ ສປ ຈີນ ໄປສູ່ ນະຄອນຫລວງຮ່າໂນຍຂອງ ສສ ຫວຽດນາມ, ລົດໄຟໂດຍສານສາກົນ ລະຫວ່າງ ສປ ຈີນ-ສສ ຫວຽດນາມ ໄດ້ຟື້ນຟູ ການບໍລິການຄືນໃໝ່. ຂະບວນລົດໄຟໂດຍສານດັ່ງກ່າວ ແມ່ນອອກເດີນທາງ ຈາກສະຖານີນານນີງ ຂອງ ສປ ຈີນ ເວລາ 18 ໂມງ 05 ນາທີ ຕາມເວລາປັກກິ່ງ ໃນແຕ່ລະມື້ ແລະຮອດສະຖານີ ຢ່າເລິ່ມ ຢູ່ນະຄອນຫລວງຮ່າໂນຍ ຂອງ ສສ ຫວຽດນາມ ໃນເວລາ 6 ໂມງ 30 ນາທີ ໃນມື້ຕໍ່ໄປ, ອອກເດີນທາງຈາກສະຖານີ ຢ່າເລິ່ມ ຢູ່ນະຄອນຫລວງຮ່າໂນຍ ຂອງ ສສ ຫວຽດນາມ ໃນເວລາ 22 ໂມງ ຕາມເວລາປັກກິ່ງ ໃນແຕ່ລະມື້ ແລະ ໄປຮອດສະຖານີ ນາມນີງຂອງ ສປ ຈີນ ໃນເວລາ 10 ໂມງ 06 ນາທີ ຂອງມື້ຕໍ່ໄປ.ປີນີ້ ແມ່ນປີທີ່ ສປ ຈີນ-ຫວຽດນາມ ສ້າງຕັ້ງສາຍພົວພັນ ທາງການທູດ ຮ່ວມກັນ ຄົບຮອບ 75 ປີ ແລະ ເປັນປີແລກປ່ຽນ ວັດທະນະທຳ ລະຫວ່າງ ສປ ຈີນ-ສສ ຫວຽດນາມ, ສອງຝ່າຍ ຈະເສີມຂະຫຍາຍ ບົດບາດ ຂອງກົນໄກການຮ່ວມມື ດ້ານທາງລົດໄຟຈີນ-ຫວຽດນາມ ແລະ ຊຸກຍູ້ ການເຊື່ອມຈອດກັນ ຂອງທາງລົດໄຟ ຂະໜາດ ມາດຕະຖານ ຂ້າມຊາດ ລະຫວ່າງ ສປ ຈີນ-ສສ ຫວຽດນາມ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
