ວິທະຍຸສາກົນແຫ່ງ ສປ ຈີນ, ກອງປະຊຸມການຄ້າ ແລະ ການພັດທະນາ ອົງການສະຫະປະຊາຊາດ ໄດ້ເປີດເຜີຍບົດລາຍງານ ເມື່ອບໍ່ດົນມານີ້ວ່າ: ຍ້ອນໄດ້ຮັບຜົນກະທົບຈາກສະຖານະການເຄັ່ງຕຶງຮ້າຍແຮງຂຶ້ນ ແລະ ຄວາມບໍ່ແນ່ນອນເພີ່ມຂຶ້ນ, ຈັງຫວະການເຕີບໂຕ ຂອງເສດຖະກິດທົ່ວໂລກໃນປີ 2025 ຈະຊ້າລົງຮອດ 2,3%. ຫລັງຈາກມາດຕະການພາສີ ຂອງ ສ.ອາເມລິກາ ພວມສົ່ງຜົນກະທົບ ຕໍ່ຕ່ອງໂສ້ ການສະໜອງ ແລະ ທຳລາຍ ການຄາດຄະເນ ໄດ້ຂອງສະພາບແວດລ້ອມ ເສດຖະກິດການຄ້າ ແລະ ຄວາມບໍ່ແນ່ນອນ ຂອງນະໂຍບາຍ ການຄ້າເພີ່ມຂຶ້ນ ຢ່າງຈະແຈ້ງ ເຊິ່ງໄດ້ເຮັດໃຫ້ການຕົກລົງນະໂຍບາຍ ດ້ານການລົງທຶນມີຄວາມຊັກຊ້າ ແລະ ການຮັບສະໝັກ ພະນັກງານ ຂອງວິສາຫະກິດຫລຸດລົງ.ເກືອບທຸກປະເທດ ຈະໄດ້ຮັບຜົນກະທົບ ຈາກການເຕີບໂຕ ຊ້າລົງຂອງເສດຖະກິດ ໂດຍສະເພາະແມ່ນປະເທດກຳລັງພັດທະນາ ແລະ ປະເທດ ຫລື ເຂດແຄວ້ນ ທີ່ມີເສດຖະກິດ ອ່ອນແອທີ່ສຸດ, ຫລາຍປະເທດ ທີ່ມີລາຍໄດ້ຕ່ຳ ພວມຜະເຊີນໜ້າກັບ ສິ່ງທ້າທາຍຕ່າງໆ ເຊັ່ນ: ສະພາບແວດລ້ອມ ທາງດ້ານການທະນາຄານ ຊຸດໂຊມລົງ, ໜີ້ສິນບໍ່ມີຄວາມຍືນຍົງ, ການເຕີບໂຕພາຍໃນປະເທດ ຫລຸດລົງ ແລະອື່ນໆ. ແຕ່ໃນຂະນະດຽວກັນ, ການເຕີບໂຕ ຂອງການຄ້າໃຕ້-ໃຕ້ ແລະ ການພັດທະນາ ແບບເຊື່ອມໂຍງເຂົ້າກັນ ຂອງເສດຖະກິດ ພາກພື້ນ ໄດ້ສ້າງໂອກາດ ແລະ ຄວາມໜຽວແໜ້ນ ໃຫ້ແກ່ ເສດຖະກິດທົ່ວໂລກ. ການຄ້າໃຕ້-ໃຕ້ ໄດ້ກວມເອົາ ປະມານ 1/3 ຂອງການຄ້າທົ່ວໂລກ, ການພັດທະນາຂອງ ສປ ຈີນ ໄດ້ຊຸກຍູ້ການເຕີບໂຕຂອງການຄ້າໃຕ້-ໃຕ້ຢ່າງໝັ້ນທ່ຽງ ແລະ ການເຊື່ອມໂຍງ ດ້ານເສດຖະກິດ ຂອງປະເທດ ເຂດໂລກໃຕ້ ໄດ້ສ້າງກາດໃຫ້ແກ່ ຫລາຍປະເທດ ພວມພັດທະນາ./.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
