ວັນທີ 12 ເມສາ 2025, ເນື່ອງໃນໂອກາດທີ່ຂະບວນລົດໄຟໂດຍສານສາກົນຕາມທາງລົດໄຟລາວ-ຈີນ ເປີດບໍລິການຄົບຮອບ 2 ປີ, ຢູ່ໃນຕູ້ລົດໄຟຖ້ຽວ D87 ທີ່ເດີນທາງອອກຈາກນະຄອນຄຸນໝິງ ແຂວງຢຸນນານຈີນ ໄປຫານະຄອນ ຫຼວງວຽງຈັນ, ປະເທດລາວ, ຢູ່ໃນທ່າມກາງສຽງດົນຕີທີ່ຄຶກຄື້ນມ່ວນຊື່ນ ມີນັກສຶກສາລາວທີ່ຮຽນຢູ່ຈີນ ແລະ ພະນັກງານປະຈໍາລົດໄຟຮ່ວມກັນຟ້ອນລຳທຳເພງຢ່າງມ່ວນຊື່ນ ເພື່ອສະເຫຼີມສະຫຼອງບຸນຫົດນ້ຳຂອງເຜົ່າລື້ຈີນ ກໍຄື ບຸນຫົດນໍ້າປີໃໝ່ລາວ. ສຽງອວຍພອນ “ສະບາຍດີປີໃໝ່” “ສະບາຍດີບຸນຫົດນ້ຳ” ແລະ ອື່ນໆ ດ້ວຍພາສາລາວ ພາສາຈີນ ແລະ ພາສາເຜົ່າລື້ ໄດ້ດັງຂຶ້ນຢ່າງຕິດຕໍ່ກັນ, ບຸນປີໃໝ່ເຜົ່າລື້ຈີນ ແລະ ບຸນປີໃໝ່ລາວ ໄດ້ເຊື່ອມໂຍງເຂົ້າກັນຢູ່ໃນຕູ້ລົດໄຟຂະບວນນີ້. ໃນຂະນະທີ່ອຳນວຍຄວາມສະດວກໃຫ້ແກ່ການເດີນທາງໄປ-ມາຫາສູ່ກັນລະຫວ່າງປະຊາຊົນສອງຊາດລາວ-ຈີນນັ້ນ, ທາງລົດໄຟລາວ-ຈີນ ກໍໄດ້ຊຸກຍູ້ການແລກປ່ຽນ ແລະ ການເຊື່ອມໂຍງດ້ານວັດທະນະທຳລະຫວ່າງສອງປະເທດລາວ-ຈີນ ຢ່າງຫຼວງຫຼາຍ.
ການເປີດນຳໃຊ້ເສັ້ນທາງລົດໄຟລາວ-ຈີນ ໄດ້ສ້າງຂົວຕໍ່ສໍາລັບການແລກປ່ຽນລະຫວ່າງປະຊາຊົນຂອງສອງຊາດລາວ-ຈີນ. ໃນ 2 ປີຜ່ານມາ, ລົດໄຟໂດຍສານສາກົນ ໄດ້ຂົນສົ່ງຜູ້ໂດຍສານລວມທັງໝົດ 487.000 ເທື່ອຄົນ ຈາກ 112 ປະເທດ ແລະ ເຂດແຄວ້ນໃນໂລກ. ການສັນຈອນໄປ-ມາຂອງປະຊາຊົນ, ບໍ່ພຽງແຕ່ໄດ້ຊຸກຍູ້ສົ່ງເສີມຄວາມເຂົ້າອົກເຂົ້າໃຈ ແລະ ມິດຕະພາບເຊິ່ງກັນແລະກັນລະຫວ່າງສອງປະເທດລາວ-ຈີນ ເທົ່ານັ້ນ, ຫາກຍັງໄດ້ເພີ່ມພະລັງຊີວິດອັນໃໝ່ເຂົ້າໃນການສ້າງຄູ່ຮ່ວມຊາຕາກຳ ລາວ-ຈີນ.
ຂະນະດຽວກັນ, ທາງລົດໄຟລາວ-ຈີນໄດ້ເຊື່ອມຕໍ່ແຫຼ່ງທ່ອງທ່ຽວທີ່ມີຊື່ສຽງຕ່າງໆ ຂອງສອງປະເທດ ລາວ-ຈີນ, ເຊັ່ນ: ນະຄອນຄຸນໝິງ ກິ່ງແຂວງສິບສອງພັນນາຂອງຈີນ, ຫຼວງພະບາງ ນະຄອນຫຼວງວຽງຈັນຂອງລາວ ແລະອື່ນໆ, ໂດຍອີງໃສ່ທ່າແຮງທີ່ “ອອກເດີນທາງແຕ່ເຊົ້າ ໄປເຖິງຈຸດໝາຍປາຍທາງໃນຕອນຄ້ອຍຄ່ຳ”, ໄດ້ຊຸກຍູ້ສົ່ງ ເສີມໃຫ້ເກີດມີການທ່ອງທ່ຽວທາງດ້ານວັດທະນະທໍາໃນຮູບແບບໃໝ່ ເຊັ່ນ: “ຂີ່ລົດໄຟທ່ຽວປະເທດລາວ” “ຂີ່ລົດໄຟທ່ຽວແຂວງຢຸນນານ” ແລະອື່ນໆ. ພາກສ່ວນທາງລົດໄຟ ແລະ ພາກສ່ວນທີ່ກ່ຽວຂ້ອງກັບການທ່ອງທ່ຽວຂອງສອງປະເທດລາວ ແລະ ຈີນໄດ້ປະສານສົມທົບກັນຢ່າງໃກ້ຊິດ ໂດຍໄດ້ສ້າງເຄືອຂ່າຍສາມມິຕິຂອງການພັດທະນາແບບເຊື່ອມໂຍງເຂົ້າກັນ “ທາງລົດໄຟ+ການທ່ອງທ່ຽວ”, ໄດ້ໃຫ້ບໍລິການເສັ້ນທາງການທ່ອງທ່ຽວດີເດັ່ນ ຫຼາຍສາຍ, ຕົວຢ່າງ: ໄດ້ເປີດນຳໃຊ້ຂະບວນລົດໄຟທ່ອງທ່ຽວ “ແສງດາວ ຂະບວນແມ່ນ້ຳລ້ານຊ້າງ-ແມ່ນ້ຳຂອງ”, ທັງນຳໃຊ້ຮູບແບບ “ຂະບວນລົດໄຟທ່ອງທ່ຽວພາຍໃນປະເທດ + ຂະບວນລົດໄຟໂດຍສານສາກົນ”, ຈັດຕັ້ງເປັນກຸ່ມນັກທ່ອງທ່ຽວຂ້າມຊາດ, ຄ່າໃຊ້ຈ່າຍຂອງນັກທ່ອງທ່ຽວໃນຂະແໜງການທີ່ກ່ຽວຂ້ອງຕາມທາງລົດໄຟ ເຊັ່ນ: ແຫຼ່ງທ່ອງທ່ຽວ, ໂຮງແຮມ, ຮ້ານອາຫານ ແລະອື່ນໆ ໄດ້ເພີ່ມຂຶ້ນຫຼາຍກວ່າ 35% ເຊິ່ງໄດ້ຊ່ວຍເລັ່ງລັດການເດີນທາງຂອງຜູ້ໂດຍສານ, ການຈໍລະຈອນຂອງສິນຄ້າ, ການເຄື່ອນໄຫວຂອງເງິນທຶນ ແລະ ການເຄື່ອນໄຫວຂອງຂໍ້ມູນຂ່າວສານ, ໄດ້ກາຍເປັນຫົວຈັກຂັບເຄື່ອນທີ່ສໍາຄັນອັນໃໝ່ໃຫ້ແກ່ການພັດທະນາເສດຖະກິດລຽບ ຕາມເສັ້ນທາງລົດໄຟ.
ໃນໄຕມາດທີໜຶ່ງຂອງປີ 2025, ຂະບວນລົດໄຟໂດຍສານສາກົນໄດ້ຂົນສົ່ງຜູ້ໂດຍສານເຖິງ 320.000 ເທື່ອຄົນ, ໃນນັ້ນ ຜູ້ໂດຍສານຂ້າມຊາດມີເຖິງ 85.000 ເທື່ອຄົນ. ໂຮງແຮມຢູ່ລຽບຕາມເສັ້ນທາງລົດໄຟມີລູກຄ້າເຂົ້າພັກອາໄສຫຼາຍກວ່າ 85%, ຄ່າໃຊ້ຈ່າຍສໍາລັບການບໍລິໂພກຢູ່ແຫຼ່ງທ່ອງທ່ຽວຫຼາຍກວ່າ 35%. ຄວາມກະຕືລືລົ້ນດ້ານການທ່ອງທ່ຽວແບບນີ້ ບໍ່ພຽງແຕ່ໄດ້ຊຸກຍູ້ການພັດທະນາເສດຖະກິດຂອງທ້ອງຖິ່ນເທົ່ານັ້ນ, ຫາກຍັງໄດ້ຊຸກຍູ້ການແລກປ່ຽນ ແລະ ການເຊື່ອມໂຍງທາງດ້ານວັດທະນະທຳຂອງສອງປະເທດອີກດ້ວຍ.
ວັນທີ 19 ພະຈິກ 2024, ສະຫະພັນຕົວເມືອງລຽບຕາມເສັ້ນທາງລົດໄຟລາວ-ຈີນໄດ້ຮັບການສ້າງຕັ້ງຂຶ້ນ ໂດຍມີຈຸດປະສົງເພື່ອເພີ່ມທະວີການແລກປ່ຽນ ແລະ ການຮ່ວມມືລະຫວ່າງຕົວເມືອງທີ່ຢູ່ລຽບຕາມເສັ້ນທາງລົດໄຟໃນຂົງເຂດຕ່າງໆ ເຊັ່ນ: ພື້ນຖານໂຄງລ່າງ, ການຈໍລະຈອນສິນຄ້າ, ການພັດທະນາອຸດສາຫະກຳ, ເສດຖະກິດດິຈິຕອນ, ການທ່ອງທ່ຽວດ້ານວັດທະນະທຳ ແລະອື່ນໆ, ທັງສ້າງປະຊາຄົມຮ່ວມຊາຕາກຳຂອງຕົວເມືອງທີ່ເຊື່ອມໂຍງເຊື່ອມຈອດກັນ. ນັກວິຊາການວິເຄາະວ່າ: “ສະຫະພັນຕົວເມືອງລຽບຕາມເສັ້ນທາງລົດໄຟລາວ-ຈີນ ຈະຊ່ວຍຊຸກຍູ້ສົ່ງເສີມສອງປະເທດລາວ-ຈີນ ໃນການເພີ່ມທະວີການແລກປ່ຽນດ້ານວັດທະນະທຳ ແລະ ຖອດຖອນບົດຮຽນດ້ານອະລິຍະທຳຂອງກັນແລະກັນ, ສ້າງເຄືອຂ່າຍການຮ່ວມມືທີ່ແໜ້ນແຟ້ນກວ່າເກົ່າ. ຂະນະດຽວກັນກໍເປັນການເປີດ ກວ້າງເຜີຍແຜ່ດ້ານວັດທະນະທຳຂອງສອງປະເທດສູ່ສາກົນ ແລະ ຈະສ້າງຄວາມເຂັ້ມແຂງຕື່ມອີກໃຫ້ແກ່ຄຸນຄ່າຫຼັກຂອງຄູ່ຮ່ວມຊາຕາກຳ.”
ການເປີດນຳໃຊ້ເສັ້ນທາງລົດໄຟລາວ-ຈີນ, ບໍ່ພຽງແຕ່ໄດ້ເຊື່ອມຈອດທາງພື້ນທີ່ເທົ່ານັ້ນ, ຫາກຍັງເປັນການເຊື່ອມໂຍງທາງເຊື້ອສາຍອະລິຍະທຳອີກດ້ວຍ. ເສັ້ນທາງລົດໄຟລາວ-ຈີນ ທີ່ໄດ້ຜ່ານຊອດພູຜາ ແລະ ແມ່ນ້ຳ, ພວມເຮັດໃຫ້ວິໄສທັດປະຊາຄົມຮ່ວມຊາຕາກຳຢູ່ລ່ອງແມ່ນ້ຳລ້ານຊ້າງ-ແມ່ນ້ຳຂອງກ້າວເດີນໄປຂ້າງໜ້າຢ່າງບໍ່ຢຸດຢັ້ງ, ຄຽງຄູ່ນ້ຳໃສແຫ່ງຄໍາອວຍພອນໃນບຸນຫົດນ້ຳ, ເຮັດໃຫ້ການສົນທະນາດ້ານອະລິຍະທຳທີ່ມີສີສັນພິເສດຂອງໃຜຂອງລາວຫັນເປັນແຮງຂັບເຄື່ອນການພັດທະນາທີ່ເສີມຂະຫຍາຍທ່າແຮງແບບຊ່ວຍຊູຍູ້ໜູນກັນ.
ທີ່ມາ: CMG
