ອ້າງຕາມຂ່າວວິທະຍຸ ກະຈາຍສຽງແຫ່ງຊາດ ຫວຽດນາມ, ເມື່ອບໍ່ດົນມານີ້, ທ່ານ ໂດນັນທຣຳ ປະທານາທິບໍດີ ສ.ອາເມລິກາ ໄດ້ມີການໂອ້ລົມ ທາງໂທລະສັບ ກັບ ທ່ານ ນະເຣນດຣາ ໂມດີ ນາຍົກ ລັດຖະມົນຕີ ອິນເດຍ, ໂດຍທັງສອງຝ່າຍ ໄດ້ປຶກສາຫາລື ກ່ຽວກັບ ການເປີດກວ້າງ ແລະ ປັບປຸງການຮ່ວມມື ລະຫວ່າງ ສ.ອາເມລິກາ ແລະ ອິນເດຍ. ໃນນັ້ນ ສອງຝ່າຍ ໄດ້ປຶກສາຫາລື ບັນຫາຕ່າງໆ ໃນພາກພື້ນ ເປັນຕົ້ນ ຄວາມໝັ້ນຄົງ ຢູ່ ມະຫາສະໝຸດ ອິນເດຍ – ປາຊີຟິກ, ຕາເວັນອອກກາງ ແລະ ເອີຣົບ. ສ່ວນ ທ່ານ ໂດນັນທຣຳ ໄດ້ເນັ້ນໜັກເຖິງ ຄວາມສຳຄັນຂອງ ອິນເດຍ ກ່ຽວກັບ ການເກັບຊື້ ບັນດາ ອຸປະກອນ ປ້ອງກັນ ຄວາມປອດໄພ ເພີ່ມຂຶ້ນ ໂດຍສ.ອາເມລິກາ ຜະລິດ ເພື່ອໃຫ້ການຄ້າ ສອງຝ່າຍ ມີຄວາມຍຸຕິທຳ. ນອກນີ້ ຍັງເນັ້ນຫນັກວ່າ: ກຳລັງແຮງ ຂອງ ການພົວພັນ ຍຸດທະສາດ ລະຫວ່າງສອງປະເທດ ແລະ ຄຳໝັ້ນສັນຍາ ເພື່ອຊຸກຍູ້ ການພົວພັນຄູ່ຮ່ວມມື ຍຸດທະສາດ ສ.ອາເມລິກາ ແລະ ອິນເດຍ ອີກດ້ວຍ.
