ທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ພ້ອມຄະນະ ໄດ້ເຂົ້າຮ່ວມງານມະຫາກຳທ່ອງທ່ຽວອາຊຽນ (ATF2025) ປະກອບມີກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 28 ກອງປະຊຸມ ລັດຖະມົນຕີ ທ່ອງທ່ຽວອາຊຽນ ບວກສາມ (ສປຈີນ ຢີ່ປຸ່ນ ສ ເກົາຫຼີ) ຄັ້ງທີ 24 ກອງປະຊຸມ ລັດຖະມົນຕີທ່ອງທ່ຽວ ອາຊຽນ-ອິນເດຍ ຄັ້ງທີ 12 ແລະ ກອງປະຊຸມ ລັດຖະມົນຕີ ທ່ອງທ່ຽວອາຊຽນ-ຣັດເຊຍ ຄັ້ງທີ 4 ແລະ ງານວາງສະແດງການທ່ອງທ່ຽວອາຊຽນ ໄດ້ຈັດຂຶ້ນລະຫວ່າງວັນທີ 19-20 ມັງກອນ 2025 ທີ່ ລັດຈໍຮໍ ປະເທດມາເລເຊຍ ພາຍໃຕ້ຄໍາຂວັນ “ສາມັກຄີໜຶ່ງດຽວ ສ້າງອະນາຄົດການທ່ອງທ່ຽວອາຊຽນດ້ວຍກັນ (Unity in Motion: Sharping ASEAN’s Tourism Tomorrow)” .
ກອງປະຊຸມໄດ້ທົບທວນຕີລາຄາການຈັດຕັ້ງປະຕິບັດບັນດາກິດຈະກໍາບູລິມະສິດ ໃນໄລຍະ 2016-2025 ແລະ ໄດ້ປຶກສາຫາລືປະກອບຄໍາເຫັນໃສ່ແຜນຍຸດທະສາດການທ່ອງທ່ຽວອາຊຽນ ສໍາລັບປີ 2026-2030 ໂດຍເນັ້ນເປົ້າໝາຍຍົກສູງຄຸນນະພາບ ການທ່ອງທ່ຽວທີ່ມີຄວາມຮັບຜິດຊອບ ຄວາມຍືນຍົງ ການມີສ່ວນຮ່ວມ ແລະ ຄວາມສາມາດໃນການປັບຕົວ ກອງປະຊຸມໄດ້ເນັ້ນໜັກເຖິງຄວາມສໍາຄັນຂອງການຮ່ວມມືຂອງບັນດາປະເທດສະມາຊິກອາຊຽນ ພາກສ່ວນຕ່າງໆທີ່ກ່ຽວຂ້ອງ ແລະ ພາກທຸລະກິດ ເພື່ອບັນລຸການພັດທະນາໃຫ້ມີຍືນຍົງ ກອງປະຊຸມໄດ້ຕີລາຄາຜົນສໍາເລັດຂອງການຮ່ວມມືທີ່ຕັ້ງໜ້າເຫັນໄດ້ຈາກໃນປີ 2024 ພາກພື້ນອາຊຽນໄດ້ຕ້ອນຮັບນັກທ່ອງທ່ຽວຕ່າງປະເທດ ເຖິງ 123 ລ້ານກວ່າຄົນ ເພີ່ມຂື້ນ 30,6% ຈາກປີ 2023 ເນື່ອງມາຈາກວ່າຫຼາຍປະເທດໄດ້ມີນະໂຍບາຍຕ່າງໆ ເປັນຕົ້ນ: ນະໂຍບາຍວີຊາ ແລະ ການພັດທະນາຜະລິດຕະພັນການທ່ອງທ່ຽວໃໝ່ທີ່ຫຼາກຫຼາຍ ພ້ອມດຽວກັນນີ້ ກອງປະຊຸມຍັງໄດ້ສະແດງຄວາມຍ້ອງຍໍຊົມເຊີຍຕໍ່ ສປປ ລາວ ທີ່ໄດ້ເປັນເຈົ້າການໃນສ້າງມາດຕະຖານການທ່ອງທ່ຽວອະນຸລັກອາຊຽນ (ASEAN Ecotourism Standard) ໃນໄລຍະທີ່ ສປປ ລາວ ເປັນປະທານອາຊຽນ ເຊິ່ງໄດ້ຮັບຮອງຢູ່ທີ່ກອງປະຊຸມສຸດຍອດອາຊຽນ ໃນເດືອນ ຕຸລາ 2024 ທີ່ນະຄອນຫຼວງວຽງຈັນ ສປປ ລາວ
ນອກຈາກນີ້ ກອງປະຊຸມຍັງໄດ້ເຫັນດີ ແລະ ເປັນເອກະພາບກັນ ສົ່ງເສີມ ແລະ ເພີ່ມທະວີຂອບການຮ່ວມມືດ້ານການທ່ອງທ່ຽວອາຊຽນໃຫ້ມີຄວາມເຂັ້ມແຂງຂຶ້ນຕື່ມ ໂດຍສະແດງພັນທະຢ່າງແຂງແຮງໃນການປະກອບສ່ວນ ແລະ ຈັດຕັ້ງປະຕິບັດບັນດາກິດຈະກຳທ່ອງທ່ຽວຢູ່ໃນພາກພື້ນອາຊຽນ ແລະ ພາຍໃນປະເທດຂອງຕົນໃຫ້ມີຄວາມເຂັ້ມແຂງ ແລະ ປະກົດຜົນເປັນຈິງ ແລະ ພ້ອມກັນເຂົ້າຮ່ວມປີທ່ອງທ່ຽວ ອາຊຽນ-ຈີນ 2025 ປີທ່ອງທ່ຽວອາຊຽນ-ອິນເດຍ 2025 ແລະ ກິດຈະກຳທ່ອງທ່ຽວອຶ່ນໆ ທີ່ປິ່ນອ້ອມຢ່າງຕັ້ງໜ້າ.
