ພິທີສະເຫລີມສະຫລອງ ວັນສ້າງຕັ້ງອົງການໄອຍະການປະຊາຊົນ ຄົບຮອບ 35 ປີ (09/01/1990-09/01/2025) ຈັດໃນວັນທີ 8 ມັງກອນ 2025 ຢູ່ນະຄອນຫລວງວຽງຈັນ ໂດຍເປັນກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ມີຄະນະພັກ, ຄະນະນຳຂອງອົງການໄອຍະການປະຊາຊົນສູງສຸດ ພ້ອມດ້ວຍພະນັກງານ ອົງການໄອຍະການປະຊາຊົນ ເຂົ້າຮ່ວມ.
ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ໄດ້ຍົກໃຫ້ເຫັນບັນ ດາຜົນສຳເລັດ ຫລາຍດ້ານໃນໄລຍະ 35 ປີທີ່ຜ່ານມາ, ກອງປະຊຸມສະໄໝສາມັນ ຂອງສະພາປະຊາຊົນສູງສຸດ ຊຸດທີ II ໃນວັນທີ 23 ພະຈິກ 1989 ໄດ້ຮັບຮອງເອົາ ກົດໝາຍວ່າດ້ວຍ ອົງການໄອຍະການປະຊາຊົນແຫ່ງ ສປປ ລາວ ສະບັບທຳອິດ ແລະ ປະກາດໃຊ້ໂດຍດຳລັດຂອງປະທານປະເທດເລກທີ 05 ລົງວັນທີ 9 ມັງກອນ 1990 ເຊິ່ງເປັນຂີດໝາຍປະຫວັດສາດ ສຳຄັນຂອງອົງການໄອຍະການປະຊາ ຊົນ ແລະ ໄດ້ກາຍເປັນວັນສ້າງຕັ້ງ ອົງການໄອຍະການປະຊາຊົນລາວ ເຊິ່ງເປັນອົງການອຳນາດລັດ, ມີພາລະບົດບາດກວດກາການປະຕິບັດກົດໝາຍໃຫ້ຖືກຕ້ອງ ແລະ ເປັນເອກະພາບ ໃນທຸກກະຊວງ, ຄະ ນະກຳມະການແຫ່ງລັດ, ສຳນັກງານ, ວິສາຫະກິດ, ອົງການຈັດຕັ້ງອື່ນໆ ຂອງລັດ ແລະ ສັງຄົມ, ຄະນະກຳມະການປົກຄອງທ້ອງຖິ່ນ, ລັດຖະກອນ ແລະ ພົນລະເມືອງ. ນັບແຕ່ນັ້ນມາ, ອົງການໄອຍະການປະຊາຊົນ ໄດ້ຜ່ານໄລະຍະແຫ່ງການທົດສອບ ແລະ ເຕີບໃຫ່ຍຂະຫຍາຍຕົວມາຮອດປັດຈຸບັນນີ້ ພໍດີ 35 ປີ (09/01/1990-09/01/2025). ບົນເສັ້ນທາງແຫ່ງການກໍາເນີດ ເຕີບໃຫຍ່ຂະຫຍາຍຕົວ, ອົງ ການໄອຍະການປະຊາຊົນ ໄດ້ຜ່ານຜ່າຄວາມຫຍຸ້ງຍາກ, ສັບສົນ ແລະ ໄດ້ຜະເຊີນໜ້າກັບສິ່ງທົດສອບ ແລະ ທ້າທາຍຫລາຍປະການ. ດ້ວຍຄວາມເອົາໃຈໃສ່ນຳພາ-ຊີ້ນໍາ ຢ່າງໃກ້ຊິດຈາກກົມການເມືອງສູນກາງພັກ, ສະພາແຫ່ງຊາດ, ລັດຖະບານ ແລະ ດ້ວຍຄວາມບຸກບືນຫ້າວຫັນ, ດ້ວຍຄວາມຮັບຜິດຊອບສູງ ຂອງຄະນະພັກ ຕະຫລອດຮອດສະມາຊິກພັກ, ພະນັກງານ-ລັດຖະກອນ ອົງການໄອຍະການປະ ຊາຊົນທັງໝົດໃນແຕ່ລະຮຸ່ນ, ອົງການໄອຍະການປະຊາຊົນ ສາມາດເຮັດລ້ອນໜ້າທີ່ ທີ່ພັກ, ປະຊາຊົນມອບໝາຍໃຫ້ ສາມາດປັບປຸງ ແລະ ພັດທະນາຕົນເອງ ໃຫ້ກາຍເປັນອົງການທີ່ເຂັ້ມແຂງທາງດ້ານການ ເມືອງ, ການຈັດຕັ້ງ ແລະ ບຸກຄະລາກອນໄດ້ໂດຍພື້ນຖານເປັນການປະກອບສ່ວນອັນສຳຄັນ, ມີຄວາມ ພາກພູມໃຈຕໍ່ຜົນສຳເລັດອັນຍິ່ງໃຫຍ່ ຂອງອົງການໄອຍະການປະຊາຊົນໃນໄລ ຍະ 35 ປີຜ່ານມາ, ແຕ່ສິ່ງດັ່ງກ່າວນັ້ນ ຈະບໍ່ຢຸດເຊົາໃນແນວຄວາມຄິດໃໝ່ ເພື່ອພັດທະນາຕົນເອງ ແລະ ຈະສືບຕໍ່ສ້າງອົງການໄອຍະການປະຊາຊົນ ບົນພື້ນຖານບົດຮຽນ ແລະ ຜົນສໍາເລັດທີ່ຍາດມາໄດ້ ແລະ ເພີ່ມທະວີການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍຕາມແນວທາງຂອງພັກ ເຊິ່ງໄດ້ກາຍມາເປັນມູນເຊື້ອອັນດີງາມຂອງອົງການໄອຍະການປະຊາຊົນ ໃນການປົກປ້ອງກົດໝາຍ ແລະ ຄວາມຍຸຕິທຳໃນສັງຄົມ.
ໂອກາດນີ້, ທ່ານ ທອງລຸນ ສີສຸລິດ ໄດ້ໃຫ້ກຽດມີຄໍາເຫັນບາງເນື້ອໃນສໍາຄັນວ່າ: ອົງການໄອຍະການປະຊາຊົນ ແມ່ນອົງການຕິດຕາມກວດກາຂອງລັດ ມີພາລະບົດບາດ ຕິດ ຕາມ ແລະ ກວດກາການເຄົາລົບ ແລະ ປະຕິບັດກົດໝາຍ ຂອງບັນດາກະຊວງ, ອົງການລັດທຽບເທົ່າກະຊວງ, ແນວລາວສ້າງຊາດ, ອົງການຈັດຕັ້ງມະຫາຊົນ, ອົງການຈັດຕັ້ງທາງສັງຄົມ, ອົງການປົກຄອງທ້ອງຖິ່ນ, ວິສາຫະກິດ, ພົນລະເມືອງ ເພື່ອໃຫ້ມີຄວາມຖືກຕ້ອງ, ເປັນເອກະພາບ ແລະ ສັ່ງຟ້ອງຜູ້ຖືກຫາຂຶ້ນສານຕາມກົດໝາຍ ຢູ່ ສປປ ລາວ ແມ່ນມີແຕ່ ອົງການໄອຍະການປະຊາຊົນເທົ່ານັ້ນ ເປັນຜູ້ຕາງໜ້າໃຫ້ລັດ ປະຕິບັດສິດສັ່ງຟ້ອງຜູ້ຖືກຫາຂຶ້ນສານ. ດັ່ງນັ້ນ, ວຽກງານໄອຍະການ ເປັນວຽກງານໜຶ່ງທີ່ສຳຄັນ, ປະກອບສ່ວນເຂົ້າໃນການຄຸ້ມຄອງລັດ, ຄຸ້ມຄອງ ເສດຖະກິດ-ສັງຄົມ ເພື່ອປົກປັກຮັກສາຜົນປະໂຫຍດຂອງລັດ, ສັງຄົມ, ສິດ ແລະ ຜົນປະໂຫຍດອັນຊອບທຳຂອງພົນລະເມືອງ, ຮັບປະກັນໃຫ້ສັງຄົມມີຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຍຸຕິທຳ. ສະນັ້ນ, ຈຶ່ງຖືໄດ້ວ່າ ອົງການໄອຍະການປະຊາຊົນ ແມ່ນເຄື່ອງມືອັນສໍາຄັນຂອງ ຊົນຊັ້ນກໍາມະກອນ-ຊາວນາ, ປະຊາຊົນ ຕະຫລອດຮອດພົນລະເມືອງລາວທັງໝົດ ທີ່ຮັກຊາດ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ, ປົກປ້ອງ ສິດຜົນປະໂຫຍດອັນຊອບທຳ ຂອງປະຊາຊົນ, ພົນລະເມືອງ ແລະ ປົກປ້ອງຄວາມຍຸຕິທຳໃນສັງຄົມລາວ ແນໃສ່ປົກປ້ອງໝາກຜົນຂອງການປະຕິວັດ, ຮັບປະກັນຄວາມໝັ້ນຄົງ ໃຫ້ລະບອບ ປະຊາທິປະໄຕ ປະຊາຊົນລາວ ໂດຍມີພັກປະຊາຊົນປະຕິວັດລາວ ເປັນຜູ້ນຳພາ.
ພາບ: ອ່າຍຄຳ
