ສຳນັກຂ່າວຕ່າງປະເທດ, ວັນທີ 1 ມັງກອນ 2025, ມະຕິຕົກລົງການເຂົ້າເປັນສະມາຊິກເຊງເກນຂອງຣູມານີ ແລະ ບູນກາລີ ມີຜົນຢ່າງເປັນທາງການ, ຊຶ່ງຈະຊ່ວຍອຳນວຍຄວາມສະດວກ ໃຫ້ກັບການເດີນທາງລະຫວ່າງສະມາຊິກ ໂດຍບໍ່ຈຳເປັນຕ້ອງມີການຂໍວີຊາ.
ຣູມານີ ແລະ ບູນກາລີ ເປັນສະມາຊິກຂອງ ເອີຣົບ(ອີຢູ) ຕັ້ງແຕ່ປີ 2007 ເຂົ້າສູ່ຂະບວນການ ບູລະນະການຂອງ ເຊງເກນ ເມື່ອເດືອນມີນາ ປີຜ່ານມາ ເປີດຊາຍແດນທາງອາກາດ ແລະ ທາງທະເລ ຍົກເວັ້ນການກວດ ຈໍ້າກາໃຫ້ກັບຜູ້ຖືໜັງສືເດີນທາງຂອງກຸ່ມເຊງເກນ.
ຢ່າງໃດກໍ່ຕາມ ຕະຫລອດໄລຍະເວລາທີ່ຜ່ານມາ ໂອຕຣິດ ເປັນປະເທດດຽວ ທີ່ມີທ່າທີຄັດຄ້ານ ການເຂົ້າຮ່ວມການຕົກລົງໃນ ເຊງເກນ ຂອງຣູມານີ ແລະ ບູນກາລີ ໂດຍໃຫ້ເຫດຜົນວ່າ ກ່ຽວກັບຄວາມກັງວົນ ເລື່ອງສະຖານະການຜູ້ອົບພະຍົບ ທີ່ທັງສອງປະເທດ ຍັງບໍ່ສາມາດຈັດການໄດ້ ຢ່າງມີປະສິດທິພາບ.
