ເມືອງຫ້ວຍຊາຍ ສົມທົບກັບອົງການກາແດງ ປະຈຳແຂວງບໍ່ແກ້ວ ຢ້ຽມຍາມເພື່ອອົບອຸ່ນຈິດໃຈ ແລະ ໃຫ້ການຊ່ວຍເຫລືອເບື້ອງຕົ້ນ ຄອບຄົວທີ່ຖືກອັກຄີໄພຢູ່ບ້ານຝາຍ ກຸ່ມບ້ານຫ້ວຍຊາຍນ້ອຍ ໃນວັນທີ 31 ທັນວາ 2024 ເຊິ່ງນຳໂດຍທ່ານ ສຸວັດ ເພັງພະຈັນ ຮອງເຈົ້າເມືອງໆຫ້ວຍຊາຍ, ທ່ານ ດຣ ນາງ ບົວຄຳ ສຸວັນນະຄຳ ຮອງຫົວໜ້າ ອົງການກາແດງ ປະຈຳແຂວງບໍ່ແກ້ວ ພ້ອມດ້ວຍຫ້ອງການທີ່ກ່ຽວຂ້ອງ.
ເຫດການໄຟໄໝ້ເຮືອນຄັ້ງນີ້ ເປັນເຮືອນຂອງທ້າວ ວ່າຕົວ ວາງ ເຫດການດັ່ງກ່າວໄດ້ເກີດຂຶ້ນໃນວັນທີ 15 ທັນວາ 2024 ຜ່ານມາ ເຮັດໃຫ້ເຄື່ອງໃຊ້ຂອງສອຍ ຊັບສິນພາຍໃນເຮືອນ ໄດ້ຖືກເຜົາທຳລາຍເສຍຫາຍຢ່າງໜັກໜ່ວງ ຕໍ່ສະພາບການດັ່ງກ່າວ ຄະນະພັກ, ອຳນາດການປົກຄອງບ້ານປຸກລະດົມປະຊາຊົນ ຊ່ວຍກັນປະກອບສ່ວນຊ່ວຍເຫລືອຢ່າງທັນການ ແລະ ເພື່ອສືບຕໍ່ໃຫ້ການຊ່ວຍເຫລືອບັນເທົາທຸກ ຈຶ່ງໄດ້ນຳເອົາ ສັງກະສີ 50 ແຜ່ນ, ເຫລັກຕາປູ 5 ກິໂລກຣາມ, ເຄື່ອງໃຊ້ໃນຄົວເຮືອນທີ່ຈຳເປັນ, ມຸ້ງ 5 ດາງ, ເຂົ້າສານ 2 ຖົງ, ນ້ຳດື່ມ, ອາຫານແຫ້ງ ແລະ ເຄື່ອງນຸ່ງອີກຈຳນວນໜຶ່ງ ລວມມູນຄ່າ 6 ລ້ານກວ່າກີບ.
ທ່ານ ສຸວັດ ເພັງພະຈັນ ໄດ້ກ່າວສະແດງຄວາມເສຍໃຈກັບຄອບຄົວ ຂອງຜູ້ຖືກເຄາະຮ້າຍ ພ້ອມທັງຮຽກຮ້ອງໃຫ້ພາກສ່ວນກ່ຽວຂ້ອງ ແລະ ອຳນາດການປົກຄອງບ້ານ ຈົ່ງຮີບຮ້ອນຄົ້ນຄວ້າວັດຖຸປັດໄຈອັນພື້ນຖານ ໃຫ້ຊ່ວຍເຫລືອຄອບຄົວດັ່ງກ່າວ ເປັນສຳຄັນ ຕິດພັນກັບການສ້າງຄວາມອົບອຸ່ນ ປົວແປງຈິດໃຈຄອບຄົວດັ່ງກ່າວໃຫ້ດີຂຶ້ນ ຈົນກັບຄືນສູ່ສະພາບປົກກະຕິໂດຍໄວ.
ທ່ານ ວິໄຊ ປາກີຈິງວ່າງ ນາຍບ້ານ ບ້ານຝາຍ ໃນນາມຕາງໜ້າຄອບຄົວດັ່ງກ່າວ ໄດ້ສະແດງຄວາມຮູ້ບຸນຄຸນ, ຂອບໃຈ ແລະ ດີໃຈເປັນຢ່າງຍິ່ງ ທີ່ຍາມໃດຄະນະພັກຂັ້ນເທິງ ກໍຄືການຈັດຕັ້ງທີ່ກ່ຽວຂ້ອງ ແມ່ນມີຄວາມເປັນຫວ່ງເປັນໃຍ ໃຫ້ການຊ່ວຍເຫລືອປະຊາຊົນ ໃນຍາມທຸກຍາກລຳບາກ ແລະ ໃຫ້ສືບຕໍ່ພິຈາລະນາສູ້ຊົນ ໃຫ້ການຊ່ວຍເຫລືອຄອບຄົວດັ່ງກ່າວ ໃນໄລຍະຍາວຕື່ມອີກ.
