ໃນວັນທີ 19 ທັນວາ 2024 ນີ້, ຢູ່ທີ່ສາງມິດຕະພາບ ກອງທັບປະຊາຊົນລາວ ໄດ້ຈັດພິທີສະຫຼຸບຜົນສໍາເລັດໄລຍະທີ 1 ແລະ ໄລຍະທີ 2 ໃນການປັບປຸງຍົກລະດັບໂຮງງານມິດຕະພາບ ກອງທັບປະຊາຊົນລາວ, ຝ່າຍລາວ ນໍາໂດຍ ສະຫາຍ ພົນຕີ ປະສິດ ທ່ຽງທຳ ຮອງລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ພ້ອມດ້ວຍຄະນະ ແລະ ຝ່າຍຣັດເຊຍ ນໍາໂດຍ ສະຫາຍ ພົນຕີ ອາເລັກຊານເດີ ເຄີຊິມມົບສະກີ ຫົວໜ້າກົມໃຫຍ່ຮ່ວມມືສາກົນດ້ານການທະຫານ ກະຊວງປ້ອງກັນປະເທດ ແຫ່ງ ສ ຣັດເຊຍ ພ້ອມດ້ວຍຄະນະ, ມີຜູ້ຕາງໜ້າບັນດາກົມໃຫຍ່ ກອງທັບປະຊາຊົນລາວ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທັງສອງຝ່າຍ ໄດ້ສະຫຼຸບວຽກງານໂດຍຫຍໍ້ ໂດຍປະຕິບັດຕາມສັນຍາ ວ່າດ້ວຍການຊ່ວຍເຫຼືອທາງດ້ານເຕັກນິກການທະຫານ ລະຫວ່າງ ກະຊວງປ້ອງກັນປະເທດ ແຫ່ງ ສ ຣັດເຊຍ ແລະ ກະຊວງປ້ອງກັນປະເທດ ແຫ່ງ ສປປ ລາວ ເພື່ອປະກອບສ່ວນເຮັດໃຫ້ກອງທັບປະຊາຊົນລາວ ເຕີບໃຫຍ່ ເຂັ້ມແຂງ ແລະ ທັນສະໄໝ ເວົ້າລວມ, ເວົ້າສະເພາະ ແມ່ນແຜນການຮ່ວມມືປັບປຸງຍົກລະດັບສະມັດຕະພາບ ຄວາມອາດສາມາດ ໃນການສ້ອມແປງ ຟື້ນຟູພາຫະນະອາວຸດຍຸດໂທປະກອນເຕັກນິກ ໃຫ້ແກ່ກອງທັປະຊາຊົນລາວ, ເພື່ອເປັນການເສີມສ້າງການພົວພັນຮ່ວມມື ລະຫວ່າງ ສອງກະຊວງປ້ອງກັນປະເທດ ແຫ່ງ ສປປ ລາວ ແລະ ສ ຣັດເຊຍ ໃຫ້ແໜ້ນແຟ້ນກວ່າເກົ່າ. ແຜນຮ່ວມມືປັບປຸງຍົກລະດັບໂຮງງານມິດຕະພາບ ໄລຍະທີ 3 ຈະສຸມໃສ່ປັບປຸງຂະຫຍາຍພື້ນຖານໂຄງລ່າງ ຂອງໂຮງງານ ເພື່ອຮັບປະກັນຄວາມພ້ອມກຽມຮັບເອົາບັນດາເຄື່ອງອຸປະກອນ ທີ່ຝ່າຍຣັດເຊຍຊ່ວຍເຫຼືອ ໃນຕໍ່ໜ້າ, ສ້າງໂຮງງານແຫ່ງນີ້ ເປັນໂຮງງານ ທີ່ສາມາດຮອງຮັບພາຫະນະການທະຫານ ເຂົ້າມາສ້ອມແປງ ແລະຮັບປະກັນດານເຕັກນິກ ໃຫ້ແກ່ກອງທັບປະຊາຊົນລາວ.
