ໃນວັນທີ 19 ທັນວາ 2024 ທີ່ ນະຄອນຫຼວງວຽງຈັນ, ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ແຫ່ງ ສາທາລະນະລັດ ໂບລີວາຣຽນ ເວ ເນຊູເອລາ ໄດ້ຈັດກອງປະຊຸມປຶກສາຫາລືທາງການເມືອງ (Political Consultation) ຄັ້ງທີ 2 ໂດຍການເປັນປະທານຮ່ວມຂອງ ທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ນາງ ຕາຕີອານາ ພຸກ ໂມເຣໂນ (Tatiana Pugh Moreno) ຮອງລັດຖະມົນຕີກະຊວງການຕ່າງປະເທດ ແຫ່ງ ສ ໂບລິວາຣຽນ ເວເນຊູເອລາ ພ້ອມດ້ວຍຄະນະຜູ້ແທນທີ່ກ່ຽວ ຂ້ອງຂອງທັງສອງຝ່າຍເຂົ້າຮ່ວມ.
ກອງປະຊຸມປຶກສາຫາລືທາງດ້ານການເມືອງຄັ້ງນີ້ ແມ່ນເພື່ອສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີມາແຕ່ດົນນານ ລະຫວ່າງ ສອງຊາດ ລາວ ແລະ ເວເນຊູເອລາ, ເພື່ອເປັນການສົ່ງເສີມຄວາມເຂົ້າອົກເຂົ້າໃຈ, ແລກປ່ຽນຂໍ້ມູນຂ່າວສານ ທັດສະນະເຊິ່ງກັນ ແລະ ກັນ ທັງເປັນການສັງເກດຕີລາຄາຄືນສະພາບການພົວພັນຮ່ວມມືສອງຝ່າຍ ໃນໄລຍະຜ່ານມາ ເພື່ອຖອດຖອນບົດຮຽນ ປຶກສາຫາລືດ້ານຍຸດທະສາດ ແລະ ການກໍານົດທິດທາງການຮ່ວມມືກັນໃນຕໍ່ໜ້າ ລະຫວ່າງ ສອງປະເທດ ລາວ ແລະ ເວເນຊູເອລາ ເວົ້າລວມ ເວົ້າສະເພາະ ລະຫວ່າງ ສອງກະຊວງການຕ່າງປະເທດ ໃຫ້ກ້າວເຂົ້າສູ່ລວງເລິກ.
ໃນກອງປະຊຸມ ສອງຝ່າຍໄດ້ແຈ້ງສະພາບພົ້ນເດັ່ນພາຍໃນປະເທດໃຫ້ກັນຊາບ ແລກປ່ຽນຄໍາຄິດຄໍາເຫັນຕໍ່ກັບສະພາບການພົ້ນເດັ່ນໃນພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ ແລະ ໄດ້ຕີລາຄາສູງຕໍ່ການພົວພັນສອງຝ່າຍ ລາວ-ເວເນຊູເອລາ, ຊຶ່ງເປັນການພົວພັນຮ່ວມມືແບບເພື່ອນມິດທີ່ດີນໍາກັນຕະຫຼອດມາ ມີການແລກປ່ຽນການຢ້ຽມຢາມເຊິ່ງກັນ ແລະ ກັນ ລະຫວ່າງ ການນໍາຂັ້ນສູງຂອງສອງປະເທດ ແລະ ມີການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ພ້ອມທັງມີການຕິດຕໍ່ພົວພັນກັນ ຢ່າງເປັນປົກກະຕິ ທັງສາຍພັກ-ສາຍລັດ.
ໃນຕົ້ນເດືອນທັນວາ 2024 ຜ່ານມາ, ສອງຝ່າຍ ໄດ້ລົງນາມບົດບັນທຶກຄວາມເຂົ້າໃຈ ວ່າດ້ວຍ ການພົວພັນຮ່ວມມື ລະຫວ່າງ ສອງພັກ ໄລຍະ 5 ປີ (2024-2029) ໃນໂອ ກາດນີ້ ສອງຝ່າຍ ຢືນຢັນຈະສືບຕໍ່ຊຸກຍູ້ການຮ່ວມມືໃນຕໍ່ໜ້າ ໂດຍໄດ້ເຫັນດີຮ່ວມ ກັນ ໃນການສືບຕໍ່ຊຸກຍູ້ການຢ້ຽມຢາມເຊິ່ງກັນ ແລະ ກັນ ຂອງການນໍາຂັ້ນສູງ ລະ ຫວ່າງ ສອງປະເທດ; ສືບຕໍ່ສົ່ງເສີມການຮ່ວມມືດ້ານເສດຖະກິດ ການຄ້າ ແລະ ການລົງທຶນ ຫຼື ໃນຂະແໜງການຮ່ວມມືດ້ານອື່ນໆ ທີ່ສອງຝ່າຍມີທ່າແຮງ ແລະ ມີຄວາມສົນໃຈຮ່ວມກັນ ໂດຍສະເພາະດ້ານພະລັງງານ ກະສິກໍາ ແລະ ການທ່ອງທ່ຽວ ຊຸກຍູ້ສົ່ງເສີມການໄປມາຫາສູ່ກັນ ລະຫວ່າງ ປະຊາຊົນສອງຊາດ ຈະຮ່ວມກັນຈັດກິດຈະກໍາຕ່າງໆ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ເວເນຊູເອລາ ຄົບຮອບ 20 ປີ ໃນປີ 2025 ນີ້ (05 ຕຸລາ 2005-05 ຕຸລາ 2025) ໃຫ້ເປັນຂະບວນຟົດຟື້ນ ພ້ອມທັງຈະສືບຕໍ່ສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.
ໃນໂອກາດຈັດກອງປະຊຸມປຶກສາຫາລືດ້ານການເມືອງຄັ້ງນີ້, ສອງຝ່າຍໄດ້ຮ່ວມກັນລົງນາມ ໃນສັນຍາ ວ່າດ້ວຍ ການຍົກເວັ້ນວີຊາ ສຳລັບຜູ້ຖືໜັງສືຜ່ານແດນການທູດ ແລະ ລັດຖະການ ລະຫວ່າງ ສປປ ລາວ ແລະ ສ. ໂບລີວາຣຽນ ເວເນຊູເອລາ ໂດຍຕາງໜ້າໃຫ້ລັດຖະບານ ແຫ່ງ ສປປ ລາວ ແມ່ນ ທ່ານ ໂພໄຊ ໄຂຄຳພິທູນ ຮອງລັດ ຖະມົນຕີກະຊວງການຕ່າງປະເທດ ແລະ ຕາງໜ້າລັດຖະບານ ສ ໂບລີວາຣຽນ ເວເນ ຊູເອລາ ແມ່ນ ທ່ານ ນາງ ຕາຕິອານາ ພຸກ ໂມເຣໂນ ຮອງລັດຖະມົນຕີກະຊວງການຕ່າງປະເທດ.
ການລົງນາມໃນສັນຍາສະບັບນີ້ ເປັນຂີດໝາຍອັນສຳຄັນໃນການເສີມຂະຫຍາຍການພົວພັນຮ່ວມມືລະຫວ່າງສອງປະເທດໃຫ້ມີບາດກ້າວໃໝ່ ໂດຍສະເພາະ ການອຳນວຍຄວາມສະດວກໃຫ້ແກ່ການໄປມາຫາສູ່ກັນ ລະຫວ່າງ ພະນັກງານການທູດ ແລະ ເຈົ້າ ໜ້າທີ່ລັດຖະການຂອງສອງປະເທດ.
