ທ່ານ ງາມປະສົງ ເມືອງມະນີ (H.E. Mr. NgampasongMuongmany) ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ພ້ອມດ້ວຍຄະນະ ໄດ້ເຂົ້າ ຮ່ວມກອງປະຊຸມລັດຖະມົນຕີຂົນສົ່ງອາຊຽນ (ATM) ຄັ້ງທີ 30 ເມື່ອບໍ່ດົນມານີ້ ທີ່ ກົວລາລໍາເປີ ປະເທດມາເລເຊຍ.
ໃນກອງປະຊຸມຄັ້ງນີ້, ໄດ້ມີບັນດາລັດຖະມົນຕີຂົນສົ່ງ ຈາກປະເທດອາຊຽນ, ຕີມໍແລັດສະເຕ ແລະ ບັນດາປະເທດຄູ່ຮ່ວມມືກັບອາຊຽນເຊັ່ນ: ສປ ຈີນ, ຍີ່ປຸ່ນ ແລະ ສ ເກົາຫຼີ ເຂົ້າຮ່ວມ ລວມທັງໝົດຫຼາຍກວ່າ 200 ທ່ານ.
ກອງປະຊຸມ ໄດ້ລາຍງານຜົນສໍາເລັດຂອງຂະແໜງຄົມມະນາຄົມຂົນສົ່ງອາຊຽນ ໃນໄລຍະ 1 ປີຜ່ານມາ ແລະ ຮັບຮອງເອົາຜົນສໍາເລັດຂອງກອງປະຊຸມ STOM ຄັ້ງທີ 57 ແລະ 58, ວຽກບຸລິມະສິດປະຈໍາປີ, ໝາກຜົນໃນປີ 2024 ຂອງຂະແໜງຄົມມະ ນາຄົມຂົນສົ່ງໃນອາຊຽນ ແລະ ບັນດາເອກະສານ ສໍາຄັນຈໍານວນໜຶ່ງຄື: ຄໍາແນະນຳກ່ຽວກັບລົດໄຟຟ້າຂະໜາດນ້ອຍ (Light Electric Vehicle “LEV”) ໃນອາຊຽນ ແລະ ຄໍາແນະນໍາອາຊຽນກ່ຽວກັບການຂົນສົ່ງສິນຄ້າໃນຕົວເມືອງ (UFT).
ນອກຈາກນັ້ນ, ບັນດາລັດຖະມົນຕີຂົນສົ່ງອາຊຽນໄດ້ຮັບຮອງ ແລະ ລົງນາມຂໍ້ຜູກພັນທີ 5 ວ່າດ້ວຍສິດທິຜູ້ໂດຍສານລົງຈອດ – ຢຸດພັກຖ້ຽວບິນ – ເດີນທາງຕໍ່ກັບສາຍການບິນເດີມ (Own Stopover Rights) ພາຍໃຕ້ຂອບພັນທະສົນທິສັນຍາພະຫຸພາຄີຕໍ່ກັບສິດສຳລັບການຂົນສົ່ງຜູ້ໂດຍສານທາງອາກາດອາຊຽນ (Multilateral Agreement on Full Liberalization on Air Passenger Services/MAFLPAS) ຊຶ່ງເປັນຜົນສໍາເລັດສໍາຄັນ ທັງເປັນບາດກ້າວໃໝ່ໃຫ້ແກ່ການເຊື່ອມຈອດທາງອາກາດໃນອາຊຽນ.
ຜົນສຳເລັດຂອງກອງປະຊຸມຄັ້ງນີ້ ແມ່ນສືບເນ່ື່ອງມາຈາກບັນດາແຜນງານຕ່າງໆທີ່ໄດ້ຕົກລົງກັນໃນກອງປະຊຸມລັດຖະມົນຕີຂົນສົ່ງອາຊຽນ ຄັ້ງທີ 29 ທີ່ໄດ້ຈັດຂຶ້ນ ຢູ່ ນະຄອນ-ຫຼວງພະບາງ ສປປ ລາວ ໃນເດືອນ ພະຈິກ 2023 ທີ່ຜ່ານມາ.
ຄຽງຄູ່ກັບກອງປະຊຸມລັດຖະມົນຕີຂົນສົ່ງອາຊຽນຄັ້ງທີ 30, ກະຊວງຄົມມະນາຄົມຂົນສົ່ງມາເລເຊຍ ໃນນາມເປັນເຈົ້າພາບໄດ້ຈັດກອງປະຊຸມພິເສດລະຫວ່າງລັດຖະມົນຕີຂົນສົ່ງອາຊຽນ ແລະ ຄູ່ຮ່ວມພັດທະນາຫຼັກທີ່ໄດ້ມີສ່ວນຮ່ວມໃນການພັດ ທະນາ ແລະ ກໍ່ສ້າງພື້ນຖານໂຄງລ່າງເພື່ອຮັບໃຊ້ການຂົນສົ່ງໃນອາຊຽນ ຄື: ADB, AIIB, WorldBank, UNESCAP ແລະ ITF ເພື່ອປືກສາຫາລືກ່ຽວກັບທິດທາງການພັດທະນາ ແລະ ການເຊື່ອມຈອດອາຊຽນໃນອະນາຄົດ.
ໃນໂອກາດນີ້, ທ່ານ ງາມປະສົງ ເມືອງມະນີ ຍັງໄດ້ພົບປະ 2 ຝ່າຍ ກັບກະຊວງ ຂົນສົ່ງແຫ່ງ ສປ ຈີນ ແລະ ກະຊວງ ຍທຂ ແຫ່ງຣາຊະອານະຈັກກຳປູເຈຍ ແລະ ຄູ່ຮ່ວມພັດທະນາຈໍານວນໜຶ່ງ ເພື່ອຕິດຕາມຊຸກຍູ້ບັນດາຂົງເຂດການຮ່ວມມືໃນຂອບ 2 ຝ່າຍ ເພື່ອການເຊື່ອມຈອດເຊື່ອມໂຍງໃຫ້ມີຄວາມຄືບໜ້າຕາມແຜນທີ່ວາງໄວ້.
ຂ່າວ-ພາບ: ຍທຂ
