ແຂວງສະຫວັນນະເຂດ ກໍເປັນແຂວງໜຶ່ງທີ່ຕັ້ງຢູ່ພາກກາງ ຂອງ ສປປ ລາວ ເປັນແຂວງທີ່ມີເນື້ອທີ່ກວ້າງໃຫຍ່ ມີ 14 ເມືອງ 01 ນະຄອນ ແລະ ມີແຫຼ່ງທ່ອງທ່ຽວດ້ານວັດທະນະທໍາ ຫຼາຍແຫ່ງ ເຊິ່ງໃນຕອນບ່າຍວັນທີ 20 ພະຈິກ 2024 ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ໄດ້ໃຫ້ສໍາພາດຕໍ່ນັກຂ່າວວິທະຍຸແຂວງ ສະຫວັນນະເຂດ ໃນດ້ານການທ່ອງທ່ຽວແຂວງ ເຊິ່ງແຂວງສະຫວັນນະເຂດ ເປັນແຂວງໜຶ່ງທີ່ມີເສດຖະກິດຂະຫຍາຍຕົວ,ການພັດທະນາມີການຂະຫຍາຍຕົວຫຼາຍ,ພື້ນຖານໂຄງລ່າງປັດຈຸບັນມີໂຮງແຮມ49ແຫ່ງ, ເຮືອນພັກ172ແຫ່ງ,ຮ້ານອາຫານປະມານ119 ແຫ່ງ ແລະ ແຫຼ່ງທ່ອງທ່ຽວທາງດ້ານທຳມະຊາດ 29 ແຫ່ງ,ດ້ານວັດທະນະທຳ73 ແຫ່ງ, ດ້ານປະຫວັດຊາດ13ແຫ່ງ, ໃນການພັດທະນາແມ່ນໄດ້ເປີດປີທ່ອງທ່ຽວໃນຕົ້ນປີ 2024 ໄດ້ສ້າງຄໍາຂວັນມາສະຫວັນນະເຂດຕ້ອງໃຫ້ໄດ້ 03ໄຫວ້, 04ເບິ່ງ ແລະ 05ຊົມ ເຊິ່ງຕັ້ງເປັນສະໂລແກນດຶງດູດຈິດໃຈ 03ໄຫວ້ ເນັ້ນໃສ່ໄຫວ້ພຣະທາດອີງຮັງ,ໄຫວ້ພຣະທາດໂຜ່ນ ແລະ ໄຫວ້ຫໍພຣະໄຕປີດົກ ,04ເບິ່ງເນັ້ນໃສ່: ທ່ຽວເບິ່ງຫໍພິພິທະພັນແຂວງ, ທ່ຽວເບິ່ງຫໍພິພິທະພັນໄດໂນເສົາ, ທ່ຽວເບິ່ງຫໍພິພິທະພັນຮ່ວມສຳພັນສູ້ຮົບລາວ-ຫວຽດນາມ, ທ່ຽວເບິ່ງມໍລະດົກສະຖານໜອງເຮືອທອງ ແລະ 5 ຊົມຄື: ທ່ຽວຊົມຕົວເມືອງເກົ່າປະຫວັດສາດ-ໜອງຫຼົ່ມປ່າສະຫງວນດົງນາຕາດ ນະຄອນໄກສອນພົມວິຫານ, ທ່ຽວຊົມ ເບິ່ງລີງ-ປາຝາ-ຝາຍສູຍ ເມືອງຈຳພອນ, ທ່ຽວຊົມໂອງມັ່ງ-ນົກຍາງຂາວ-ແຫຼ່ງຂຸດຄົ້ນກະດູກໄດໂນເສົາ ເມືອງຊົນນະບູລີ, ທ່ຽວຊົມໂນນຫີນດ້າງ-ໂພນຊ້າງສານ-ສີສະເກດສວນຕານ-ຜາສາດຫີນ ເມືອງໄຊພູທອງ, ທ່ຽວຊົມພຣະທາດນາງລາວ-ພຣະເຈົ້າອົງແສນ-ຫີນສາມເສົ້າ-ນໍ້າເກົ້າແຄວ ເມືອງວິລະບູລີ.
ສໍາລັບທ່າແຮງດັ່ງກ່າວ ສາມາດຂຸດຄົ້ນ ພັດທະນາໃຫ້ເປັນແຫຼ່ງທ່ອງທ່ຽວທາງດ້ານວັດທະນະທໍາ, ການພັດທະນາພື້ນຖານໂຄງລ່າງໃນດ້ານທົ່ວໄປ ເຊິ່ງເນັ້ນໃສ່ເມືອງເກົ່າປະຫວັດສາດ ນະຄອນໄກສອນ ໄດ້ອະນຸລັກ ເຮືອນເກົ່າສະໄໝຝຣັ່ງ ເຂດຕົວເມືອງເກົ່າ ນັກທ່ອງທ່ຽວຕ່າງປະເທດມີຄວາມສົນໃຈຫຼາຍເຊິ່ງປັດຈຸບັັນແມ່ນກໍາລັງດໍາເນີນ ການປະຕິສັງຂອນ ຫໍພິພິຕະພັນ ກຽມເຮັດຫໍໄດໂນເສົາ ມີການຈັດສັນໃໝ່ໃນການເຂົ້າຢ້ຽມຊົມ , ພັດທະນາແຫຼ່ງທ່ອງທ່ຽວທໍາມະຊາດເຂດດົງນາຕາດ ໜອງບຶງວະ ແລະ ໜອງເຕົ່າ ຈະພັດທະນາເປັນບ່ອນທ່ອງທ່ຽວທໍາມະຊາດ, ສໍາລັບພຣະທາດອີງຮັງ ແມ່ນຈະໄດ້ຈັດສັນຄືນໃໝ່ ຈະມີບູດຂາຍອາຫານ, ມີບູດຂາຍເຄື່ອງທີ່ລະລຶກ, ມີສວນດອກໄມ້, ມີບ່ອນພັກຜ່ອນ, ພຣະທາດໂຜ່ນ ກໍໄດ້ອອກແບບພັດທະນາເຮັດສວນສຸຂະພາບ,ສວນທໍາມະ ປູກຕົ້ນໄມ້ໃຫຍ່ ມີບ່ອນຂາຍອາຫານ, ຂາຍເຄື່ອງທີ່ລະລຶກ, ຫໍພຣະໄຕປີດົກສ່ວນໃຫຍ່ຈະເປັນການອະນຸລັກທາງດ້ານວັດທະນະທໍາ, ສ່ວນວົງຈອນ 04 ເບິ່ງແມ່ນ ຈະປັບປຸງພື້ນຖານໂຄງລ່າງ ເນັ້ນໃສ່ ມາດຕະຖານໂຮງແຮມ-ເຮືອນພັກ ,ຮ້ານອາຫານ ,ສ່ວນເຂດ ຕະຝັ່ງກັນເຈື່ອນແຄມຂອງຈະເຮັດເປັນສວນວັດທະນະທໍາ,ສ້າງເຮືອນຈໍາລອງ 9 ເຜົ່າຂອງແຂວງ , ສ້າງສວນສຸຂະພາບ ປູກຕົ້ນໄມ້ໃຫຍ່ເປັນບ່ອນພັກຜ່ອນ, ພັດທະນາຕະຫຼາດກາງຄືນ ເຊິ່ງເປັນການເຄື່ອນຍ້າຍໄດ້ ສະເພາະກາງເວັນຈະເປັນເດີ່ນ ຫຼື ສະຖານທີ່ ເຊິ່ງເປັນບ່ອນເຮັດກິດຈະກໍາອື່ນໆໄດ້, ແລະ ມີແຜນຈະສ້າງພຣະພຸດທະຮູບໃຫຍ່ລວງສູງ 69 ແມັດ ທ່າແຮງຂອງເມືອງລຽບແຄມຂອງແມ່ນມີດອນໃຫຍ່ ,ທາງເມືອງໄຊພູທອງ ສາມາດທ່ຽວຊົມທໍາມະຊາດໄດ້, ສ່ວນເມືອງວິລະບູລີ ກໍກໍານົດທ່າແຮງເປັນເມືອງທ່ອງທ່ຽວ ທໍາມະຊາດ ,ມີວັດຖຸບູຮານເກົ່າແກ່ ມີພຣະທາດນາງລາວ, ພຣະເຈົ້າອົງແສນ ມີພູ ທີ່ເປັນຖໍ້າແຕ່ສະໄໝການຕໍ່ສູ້ປະຕິວັດ, ສໍາລັບບໍ່ຄໍາ-ທອງເຊໂປນທີ່ໄດ້ປິດບໍ່ຈະສ້າງເປັນບ່ອນທ່ອງທ່ຽວສໍາລັບຄົນທີ່ສົນໃຈໄປເບິ່ງການຂຸດຄົ້ນຄໍາ, ເຊິ່ງໃນຕົ້ນປີ 2025- 2026 ພື້ນຖານໂຄງລ່າງຂອງແຂວງສະຫວັນນະເຂດ ຈະໄດ້ຮັບການພັດທະນາໃຫ້ສໍເລັດ, ສໍາລັບການເຊື່ອມຈອດ ລະຫວ່າງປະເທດ ແມ່ນໄດ້ພົບປະກັບທາງກົງສູນໃຫຍ່ ສສ ຫວຽດນາມ ,ກົງສູນໃຫຍ່ ລາຊະອານາຈັກໄທ ປະຈໍາຢູ່ແຂວງສະຫວັນນະເຂດ ແມ່ນໄດ້ປຶກສາຫາລື ຫຼາຍດ້ານ ໂດຍສະເພາະ ເຮັດໃຫ້ແຂວງສະຫວັນນະເຂດ ເປັນໃຈກາງ ການບໍລິການນັກທ່ອງທ່ຽວ ໃຫ້ເຊື່ອມໂຍງຈອດກັນ.
