ໃນວາລະດຳເນີນ ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 21 ພະຈິກ 2024 ນີ້, ທ່ານ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໄດ້ຕາງໜ້າລັດຖະບານ ລາຍງານການຈັດຕັ້ງປະຕິບັດວຽກງານ 3 ສ້າງ ຕາມມະຕິຂອງສະພາແຫ່ງຊາດ ສະບັບເລກທີ 02/ສພຊ, ລົງວັນທີ 28 ມັງກອນ 2016 ວ່າດ້ວຍການຈັດຕັ້ງປະຕິບັດວຽກງານ 3 ສ້າງ.
ທ່ານ ວິໄລວົງ ບຸດດາຄໍາ ໄດ້ໃຫ້ຮູ້ວ່າ: ບົນພື້ນຖານນິຕິກຳທີ່ສູນກາງພັກ ແລະ ລັດຖະບານໄດ້ຄົ້ນຄວ້າສ້າງ ເພື່ອເປັນບ່ອນອີງໃຫ້ບັນດາກະຊວງ, ອົງການຂັ້ນສູນກາງ ແລະ ອົງການປົກຄອງທ້ອງຖິ່ນ ໃນການຜັນຂະຫາຍ ແລະ ຈັດຕັ້ງປະຕິບັດວຽກງານ 3 ສ້າງ ເຂົ້າສູ່ລວງເລິກ ຊຶ່ງກະຊວງພາຍໃນ, ຄະນະປະເມີນຜົນວຽກງານ 3 ສ້າງຂັ້ນທ້ອງຖິ່ນ ກໍໄດ້ຈັດຕັ້ງການປະເມີນວຽກງານດັ່ງກ່າວ ໃນທົ່ວປະເທດ. ຜ່ານຂະບວນການປະເມີນສາມາດສັງລວມດັ່ງນີ້: ການສ້າງແຂວງເປັນຫົວໜ່ວຍຍຸດທະສາດ: ການປະເມີນໄລຍະປີ 2016-2020 ຈໍານວນດ້ານທີ່ບັນລຸຂອງແຕ່ລະແຂວງ ແມ່ນບັນລຸ 7 ດ້ານ ມີ 3 ແຂວງ (ນະຄອນຫລວງວຽງຈັນ, ສະຫວັນນະເຂດ ແລະ ແຂວງຈໍາປາສັກ), ບັນລຸ 6 ດ້ານ ມີ 4 ແຂວງ (ອຸດົມໄຊ, ວຽງຈັນ, ບໍ່ແກ້ວ ແລະ ບໍລິຄໍາໄຊ), ບັນລຸ 5 ດ້ານ ມີ 3 ແຂວງ (ຫລວງພະບາງ, ຫລວງນໍ້າທາ, ຊຽງຂວາງ), ບັນລຸ 4 ດ້ານ 0 ແຂວງ, ບັນລຸ 3 ດ້ານມີ 4 ແຂວງ (ອັດຕະປື, ເຊກອງ, ສາລະວັນ ແລະ ຄໍາມ່ວນ), ບັນລຸ 2 ດ້ານ ມີ 3 ແຂວງ (ຫົວພັນ, ໄຊຍະບູລີ ແລະ ໄຊສົມບູນ), ບັນລຸ 1 ດ້ານ ມີ 1 ແຂວງ (ຜົ້ງສາລີ); ການປະເມີນໃນປີ 2023 ບັນລຸ 7 ດ້ານ 0 ແຂວງ, ບັນລຸ 6 ດ້ານ ມີ 1 ແຂວງ (ບໍລິຄໍາໄຊ), ບັນລຸ 5 ດ້ານ ມີ 3 ແຂວງ (ບໍ່ແກ້ວ, ອຸດົມໄຊ ແລະ ຫລວງພະບາງ), ບັນລຸ 4 ດ້ານ ມີ 2 ແຂວງ (ຄໍາມ່ວນ ແລະ ເຊກອງ), ບັນລຸ 3 ດ້ານ ມີ 4 ແຂວງ (ຫລວງນໍ້າທາ, ຫົວພັນ, ໄຊຍະບູລີ ແລະ ໄຊສົມບູນ), ບັນລຸ 2 ດ້ານ 0 ແຂວງ, ບັນລຸ 1 ດ້ານ 1 ແຂວງ (ຜົ້ງສາລີ).
ພ້ອມດຽວກັນນີ້, ໃນແຕ່ລະດ້ານຂອງການສ້າງແຂວງເປັນຫົວໜ່ວຍຍຸດທະສາດ ໃນການປະເມີນປີ 2016-2020 ດ້ານພັກ-ພະນັກງານ ບັນລຸມີ: ນະຄອນຫລວງວຽງຈັນ ແລະ 10 ແຂວງ, ບໍ່ບັນລຸ 7 ແຂວງ; ດ້ານການປົກຄອງ ແລະ ການບໍລິຫານລັດ ບັນລຸມີ: ນະຄອນຫລວງວຽງຈັນ ແລະ 9 ແຂວງ, ບໍ່ບັນລຸ 8 ແຂວງ; ດ້ານການຊຸກດັນການຂະຫຍາຍເສດຖະກິດແຫ່ງຊາດ ບັນລຸມີນະຄອນຫລວງວຽງຈັນ ແລະ 13 ແຂວງ, ບໍ່ບັນລຸ 4 ແຂວງ; ດ້ານການເງິນ ບັນລຸ ມີ ນະຄອນຫລວງວຽງຈັນ ແລະ 16 ແຂວງ, ບໍ່ບັນລຸ 1 ແຂວງ; ດ້ານການຄຸ້ມຄອງ, ຂຸດຄົ້ນ ແລະ ນໍາໃຊ້ແຫລ່ງຊັບພະຍາກອນທໍາມະຊາດ ບັນລຸມີ ນະຄອນຫລວງວຽງຈັນ ແລະ 7 ແຂວງ, ບໍ່ບັນລຸ 10 ແຂວງ; ດ້ານວັດທະນະທໍາ-ສັງຄົມ ແລະ ການພັດທະນາຊັບພະຍາກອນມະນຸດ ບັນລຸມີ ນະຄອນຫລວງວຽງຈັນ ແລະ 9 ແຂວງ, ບໍ່ບັນລຸ 8 ແຂວງ; ດ້ານການປ້ອງກັນຊາດ, ປ້ອງກັນຄວາມສະຫງົບ ບັນລຸມີ ນະຄອນຫລວງວຽງຈັນ ແລະ 8 ແຂວງ, ບໍ່ບັນລຸ 9 ແຂວງ.
ການປະເມີນປີ 2023 ດ້ານພັກ-ພະນັກງານ ບັນລຸມີ 9 ແຂວງ, ບໍ່ບັນລຸ 2 ແຂວງ; ດ້ານການປົກຄອງ ແລະ ການບໍລິຫານລັດ ບັນລຸ 7 ແຂວງ, ບໍ່ບັນລຸ 4 ແຂວງ; ດ້ານການຊຸກດັນການຂະຫຍາຍຕົວເສດຖະກິດແຫ່ງຊາດ ບັນລຸ 9 ແຂວງ, ບໍ່ບັນລຸ 2 ແຂວງ; ດ້ານການເງິນ ບັນລຸ 10 ແຂວງ, ບໍ່ບັນລຸ 1 ແຂວງ; ດ້ານການຄຸ້ມຄອງ, ຂຸດຄົ້ນ ແລະ ນໍາໃຊ້ແຫລ່ງຊັບພະຍາກອນທໍາມະຊາດ ບັນລຸ 1 ແຂວງ, ບໍ່ບັນລຸ 10 ແຂວງ; ດ້ານວັດທະນະທໍາ-ສັງຄົມ ແລະ ການພັດທະນາຊັບພະຍາກອນມະນຸດ ບັນລຸ 4 ແຂວງ ບໍ່ບັນລຸ 7 ແຂວງ; ດ້ານການປ້ອງກັນຊາດ, ປ້ອງກັນຄວາມສະຫງົບ ບັນລຸ 2 ແຂວງ, ບໍ່ບັນລຸ 9 ແຂວງ.
ສ່ວນການສ້າງເມືອງເປັນຫົວໜ່ວຍເຂັ້ມແຂງຮອບດ້ານ: ການປະເມີນໄລຍະປີ 2016-2020 ຈໍານວນເມືອງທີ່ບັນລຸ 5 ດ້ານ ມີ 19 ເມືອງ, ບັນລຸ 4 ດ້ານ ມີ 21 ເມືອງ, ບັນລຸ 3 ດ້ານ ມີ 17 ເມືອງ, ບັນລຸ 2 ດ້ານ ມີ 27 ເມືອງ, ບັນລຸ 1 ດ້ານ ມີ 26 ເມືອງ, ບໍ່ບັນລຸຈັກດ້ານມີ 38 ເມືອງ; ການປະເມີນປີ 2023 ຈໍານວນເມືອງທີ່ບັນລຸ 5 ດ້ານ ມີ 3 ເມືອງ, ບັນລຸ 4 ດ້ານມີ 12 ເມືອງ, ບັນລຸ 3 ດ້ານ ມີ 12 ເມືອງ, ບັນລຸ 2 ດ້ານ ມີ 19 ເມືອງ, ບັນລຸ 1 ດ້ານ ມີ 15 ເມືອງ, ບໍ່ບັນລຸຈັກດ້ານມີ 16 ເມືອງ. ພ້ອມນີ້, ຈໍານວນເມືອງທີ່ບັນລຸໃນແຕ່ລະດ້ານ ຊຶ່ງການປະເມີນໄລຍະປີ 2016-2020 ໃນດ້ານພັກ-ພະນັກງານ ບັນລຸ 3 ນະຄອນ ແລະ 82 ເມືອງ, ບໍ່ບັນລຸ 63 ເມືອງ; ດ້ານການປົກຄອງ ແລະ ບໍລິຫານລັດ ບັນລຸ 3 ນະຄອນ ແລະ 34 ເມືອງ, ບໍ່ບັນລຸ 111 ເມືອງ; ດ້ານການຊຸກຍູ້ການຂະຫຍາຍຕົວເສດຖະກິດ, ການເງິນ, ຊັບພະຍາກອນທໍາມະຊາດ ແລະ ສິ່ງແວດລ້ອມ ບັນລຸ 3 ນະຄອນ ແລະ 38 ເມືອງ, ບໍ່ບັນລຸ 107 ເມືອງ; ດ້ານການຄຸ້ມຄອງວັດທະນະທຳ-ສັງຄົມ ບັນລຸ 3 ນະຄອນ ແລະ 78 ເມືອງ, ບໍ່ບັນລຸ 67 ເມືອງ; ດ້ານປ້ອງກັນຊາດ, ປ້ອງກັນຄວາມສະຫງົບ ບັນລຸ 3 ນະຄອນ ແລະ 63 ເມືອງ, ບໍ່ບັນລຸ 82 ເມືອງ. ໃນການປະເມີນປີ 2023 ດ້ານພັກ-ພະນັກງານ ມີ 1 ນະຄອນ ແລະ 48 ເມືອງ, ບໍ່ບັນລຸ 28 ເມືອງ; ດ້ານການປົກຄອງ ແລະ ບໍລິຫານລັດ ບັນລຸ 1 ນະຄອນ ແລະ 11 ເມືອງ, ບໍ່ບັນລຸ 65 ເມືອງ; ດ້ານການຊຸກຍູ້ການຂະ ຫຍາຍຕົວເສດຖະກິດ, ການເງິນ, ຊັບພະຍາກອນທໍາມະຊາດ ແລະ ສິ່ງແວດລ້ອມ ບັນລຸ 1 ນະຄອນ ແລະ 23 ເມືອງ, ບໍ່ບັນລຸ 53 ເມືອງ; ດ້ານການຄຸ້ມຄອງວັດທະນະທໍາ-ສັງຄົມ ບັນລຸ 1 ນະຄອນ ແລະ 35 ເມືອງ, ບໍ່ບັນລຸ 41 ເມືອງ; ດ້ານປ້ອງກັນຊາດ, ປ້ອງກັນຄວາມສະຫງົບ ບັນລຸ 1 ນະຄອນ ແລະ 30 ເມືອງ, ບໍ່ບັນລຸ 46 ເມືອງ. ສໍາລັບ ການສ້າງບ້ານເປັນຫົວໜ່ວຍພັດທະນາ, ນັບແຕ່ປີ 2016 ເຖິງປັດຈຸບັນ ສ້າງບ້ານເປັນຫົວໜ່ວຍພັດທະນາໄດ້ 3.618 ບ້ານ.
ທ່ານ ວິໄລວົງ ບຸດດາຄໍາ ຍັງໃຫ້ຮູ້ວ່າ: ໄລຍະປີ 2021-2022 ບັນດາອົງການປົກຄອງທ້ອງຖິ່ນໃນທົ່ວປະເທດ ໄດ້ຢຸດເຊົາການປະເມີນການຈັດຕັ້ງປະຕິບັດນະໂຍບາຍ 3 ສ້າງ, ເນື່ອງຈາກສະພາບພາຍໃນທົ່ວປະເທດມີຄວາມຫຍຸ້ງຍາກ ຍ້ອນການແພ່ລະບາດຂອງພະຍາດໂຄວິດ-19; ປີ 2023 ກໍມີພຽງ 11 ແຂວງທີ່ສົ່ງຜົນການປະເມີນ (7 ແຂວງທີ່ບໍ່ສົ່ງຜົນການປະເມີນ); ປີ 2024 ນະຄອນຫລວງວຽງຈັນ, ບັນດາແຂວງ ກຳລັງສະຫລຸບສັງລວມການປະເມີນ.
