ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ແຂວງຫລວງພະບາງ ຈະສືບຕໍ່ປັບປຸງພື້ນຖານໂຄງລ່າງ ແລະ ການເຊື່ອມຈອດພາກພື້ນ ເພື່ອສ້າງໂອກາດໃໝ່ແກ່ການຄ້າ, ການທ່ອງທ່ຽວ ແລະ ການຮ່ວມມືໃນອະນຸພາກພື້ນ, ສົ່ງເສີມການທ່ອງທ່ຽວແບບຍືນຍົງ ແລະ ການອະນຸລັກຮັກສາວັດທະນະທຳ, ເປັນມິດກັບສິ່ງແວດລ້ອມ ເພື່ອການເຕີບໂຕດ້ານເສດຖະກິດທີ່ຍືນຍົງ ພ້ອມທັງສຸມໃສ່ການປົກປັກຮັກສາສິ່ງແວດລ້ອມ ແລະ ຮັບມືກັບສະພາບການປ່ຽນແປງ ດິນຟ້າອາກາດທີ່ນັບມື້ນັບຮຸນແຮງຂຶ້ນ ກາຍເປັນສິ່ງທ້າທາຍ ແກ່ອະນຸພາກພື້ນ ເປັນຕົ້ນ ໄພພິບັດ, ມົນລະຜິດທາງອາກາດ ຫລື ຝຸ່ນລະອອງ, ສ້າງໂຄງການຮ່ວມມືດ້ານວິຊາການ ໂດຍສະເພາະ ການຝຶກອົບຮົມດ້ານທັກສະຕ່າງໆ, ການໃຫ້ຄວາມຮູ້ດ້ານເຕັກໂນໂລຢີດີຈິຕອນ ແລະ ທັກສະການເປັນຜູ້ປະກອບການ ໂດຍສະເພາະ ໃຫ້ຊາວໜຸ່ມ ແລະ ແມ່ຍິງ ທີ່ຈະຊ່ວຍສ້າງຄວາມເຂັ້ມແຂງ ແກ່ເສດຖະກິດຂອງອະນຸພາກພື້ນແມ່ນໍ້າຂອງ ແລະ ອື່ນໆ ທັງນີ້ ກໍເພື່ອເປັນການເພີ່ມທະວີການຮ່ວມມື ພາຍໃນອະນຸພາກພື້ນ ໃນຕໍ່ໜ້າ ຂອງ ສປປ ລາວ ກໍຄືແຂວງຫລວງພະບາງ.
ທ່ານ ບຸນເຫລືອ ສິນໄຊວໍຣະວົງ ໄດ້ກ່າວຕໍ່ກອງປະຊຸມ ສຸດຍອດບັນດາເຈົ້າແຂວງ ຕາມແລວທາງເສດຖະກິດ ອະນຸພາກພື້ນແມ່ນໍ້າຂອງ ປະຈຳປີ 2024 ເມື່ອບໍ່ດົນມານີ້ ທີ່ແຂວງຢຸນນານ ສປ ຈີນວ່າ: ໃນໄລຍະ 10 ເດືອນຜ່ານມາ, ມີນັກທ່ອງທ່ຽວ ເດີນທາງມາທ່ຽວຫລວງພະບາງ 1,7 ລ້ານຄົນ ແລະ ເມື່ອບໍ່ດົນມານີ້, Lonely Planet ກໄດ້ຈັດອັນດັບໃຫ້ ສປປ ລາວ ກໍຄື ຫລວງພະບາງ ຢູ່ອັນດັບທີ 4 ໃນ 30 ເມືອງທົ່ວໂລກ ເປັນເມືອງທີ່ໜ້າໄປທ່ອງທ່ຽວທີ່ສຸດໃນປີ 2025 ແລະ ອົງການ Green Destination ໄດ້ຈັດອັນດັບໃຫ້ເມືອງຫລວງພະບາງ ເປັນໜຶ່ງໃນເມືອງຍອດນິຍົມທ່ອງທ່ຽວສີຂຽວ ປີ 2024, ຊຶ່ງຄວາມສຳເລັດທີ່ຫລວງພະບາງ ຍາດມາໄດ້ຄືດັ່ງກ່າວນັ້ນ ເປັນໜຶ່ງໃນປັດໄຈທີ່ສຳຄັນ ກໍແມ່ນເສັ້ນທາງລົດໄຟ ລາວ-ຈີນ ທີ່ໄດ້ເປີດນໍາໃຊ້ໃນປີ 2021 ທີ່ຜ່ານມາ, ຊຶ່ງເສັ້ນທາງລົດໄຟດັ່ງກ່າວ ໄດ້ກາຍເປັນແຮງຂັບເຄື່ອນການຄ້າ-ການລົງທຶນ ຂອງສອງຝ່າຍ ລາວ-ຈີນ ແລະ ອະນຸພາກພື້ນ.
ນັບແຕ່ມື້ເປີດຈົນເຖິງປັດຈຸບັນ, ເສັ້ນທາງລົດໄຟ ລາວ-ຈີນ ໄດ້ຂົນສົ່ງໂດຍສານແລ້ວຫລາຍກວ່າ 6 ລ້ານຄົນ, ໄດ້ຂົນສົ່ງໂດຍສານຂ້າມແດນແລ້ວຫລາຍກວ່າ 2 ແສນຄົນ. ນອກນີ້, ຍັງໄດ້ຂົນສົ່ງສິນຄ້າຫລາຍກວ່າ 10 ລ້ານໂຕນ, ຊຶ່ງເຮັດໃຫ້ໃນໄລຍະ 9 ເດືອນຜ່ານມາ, ການຄ້າສອງຝ່າຍ ລາວ-ຈີນ ບັນລຸໄດ້ຫລາຍກວ່າ 4 ຕື້ໂດລາສະຫະລັດ.
