ຄະນະການນຳຂັ້ນສູງ ແຂວງສະຫວັນນະເຂດ ນຳໂດຍ ສະຫາຍ ບຸນໂຈມ ອຸບົນປະເສີດ ກຳມະການສຸນກາງພັກ, ເລຂາພັກແຂວງ, ເຈົ້າແຂວງສະຫວັນນະເຂດ ໄດ້ເຄື່ອນໄຫວຢ້ຽມຢາມ-ພົບປະ ແລະເຮັດວຽກຮ່ວມກັບນະຄອນໂຮ່ຈິມິນ ສສ ຫວຽດນາມ ໃນວັນທີ 18 ພະຈິກ 2024 ໂດຍໄດ້ຮັບກຽດໃຫ້ການຕ້ອນຮັບ ຈາກສະຫາຍ ຟານ ວັນ ໝາຍ, ກໍາມະການສູນກາງພັກ, ປະທານຄະນະກໍາມະການປະຊາຊົນນະຄອນໂຮ່ຈີມິນ, ສະຫາຍ ວັນໄຊ ແກ້ວວິໄລ; ຕາງໜ້າກົງສຸນໃຫຍ່ ແຫ່ງ ສປປ ລາວ ປະຈໍານະຄອນໂຮ່ຈີມິນ ພ້ອມດ້ວຍຄະນະນຳຂອງນະຄອນໂຮ່ຈິມິນ ໃຫ້ກຽດຕ້ອນຮັບ.
ໃນຕອນເຊົ້າ ຄະນະການນຳຂັ້ນສູງຂອງແຂວງສະຫວັນນະເຂດ ສປປ ລາວ ໄດ້ຢ້ຽມຢາມສູນຜະລິດພັນເຂົ້າ ແລະ ພັນພືດ ຂອງບໍລິສັດ ແນວພັນພືດ ພາກໃຕ້(SSC) ເຊິ່ງເປັນບໍລິສັດທີ່ມີຊື່ສຽງ ແລະ ໄດ້ຮັບການສ້າງຕັ້ງຂຶ້ນໃນປີ 1976 ແລະ ໃນປີ 2002 ໄດ້ມີການປັບປຸງ ຈາກເງິນລົງທຶນ 60 ລ້ານດົງ ປັດຈຸບັນ ມີມູນຄ່າສູງເຖິງ 150 ລ້ານດົງ, ບໍລິສັດດັ່ງກ່າວ ມີຄວາມຊຳນິຊຳນານ ໃນການຄົ້ນຄວ້າ ວິໄຈ, ຜະລິດ ແລະ ຈຳໜ່າຍແນວພັນພືດຫຼາຍຊະນິດ ໃນບັນດາແຂວງພາກໃຕ້, ພາກກາງລຽບຕາມຊາຍຝັ່ງທະເລ ແລະ ເຂດພູພຽງ ຢູ່ ສສ ຫວຽດນາມ, ການສົ່ງອອກຕ່າງປະເທດ ແມ່ນລາວ, ກຳປູເຈຍ ແລະ ປະເທດອື່ນໆໃນພາກພື້ນ. ນອກຈາກນີ້ ບໍລິສັດດັ່ງກ່າວ ຍັງນອນຢູ່ໃນໂຄງການຮ່ວມມືລະຫວ່າງ ແຂວງ ແລະ ນະຄອນ ໃນການຄົ້ນຄວ້າວິໄຈ ແນວພັນເຂົ້າຢູ່ແຂວງສະຫວັນນະເຂດອີກດ້ວຍ. ໃນຕອນບ່າຍຂອງວັນດຽວກັນ, ທັງສອງຄະນະກໍ່ໄດ້ເຂົ້າຮ່ວມພິທີ ພົບປະກັນຢ່າງເປັນທາງການ. ໃນການພົບປະ, ສະຫາຍ ບຸນໂຈມ ອຸບົນປະເສີດ ກຳມະການສູນກາງ ພັກເລຂາພັກແຂວງ ເຈົ້າແຂວງສະຫວັນນະເຂດ ແລະ ສະຫາຍ ຟານ ວັນ ໝາຍ, ກໍາມະການສູນກາງພັກ, ປະທານຄະນະກໍາມະການປະຊາຊົນນະຄອນໂຮ່ຈີມິນ ກໍ່ໄດ້ທົບທວນຄືນການຮ່ວມມືຮອບດ້ານ ແລະ ຄວາມສາມັກຄີແບບພິເສດ ລະຫວ່າງສອງພັກ, ສອງລັດ ແລະປະຊາຊົນທັງສອງຊາດ ລາວ-ຫວຽດນາມ ໃນໄລຍະຜ່ານ ມາເວົ້າລວມ, ເວົ້າສະເພາະກໍ່ແມ່ນ ຄະນະການນຳຂັ້ນສູງຂອງແຂວງ ສະຫວັນນະຂດ ສປປ ລາວ ແລະ ຄະນະການນຳຂັ້ນສູງຂອງນະຄອນໂຮ່ຈີມິນ ສສ ຫວຽດນາມ, ເຊິ່ງໄດ້ມີ ຄວາມເປັນເອກະພາບທາງດ້ານເນື້ອໃນການຮ່ວມມື ໃນນີ້: ສອງຝ່າຍເຫັນດີສືບຕໍ່ ຜັນຂະຫຍາຍສາຍພົວພັນຮ່ວມມືຕາມເນື້ອ ໃນບົດບັນທຶກຊ່ວຍຈຳທີ່ໄດ້ລົງນາມຮ່ວມກັນ, ສອງຝ່າຍສ້າງເງື່ອນໄຂອຳນວຍ ຄວາມສະດວກໃຫ້ແກ່ບັນດາ ອົງການຈັດຕັ້ງພັກ, ອົງການປົກຄອງ, ພະແນກການ, ຂະແໜງການ ແລະ ບັນດາອົງການຈັດຕັ້ງມະຫາຊົນຂອງແຕ່ລະຝ່າຍມີການ ເດີນທາງໄປ-ມາ, ຢ້ຽມຢາມ, ແລກປ່ຽນບົດຮຽນເຊິ່ງກັນ ແລະ ກັນ, ນະຄອນໂຮ່ຈິມິນຍິນດີຊ່ວຍກໍ່ສ້າງຊັບພະຍາກອນມະນຸດເພີ່ມຕື່ມ ຈາກທີ່ມອບທຶນການສຶກສາ ໃຫ້ແຂວງສະຫວັນນະເຂດ 30 ທຶນຕໍ່ປີ ໃນລະດັບປະລິນຍາຕີ, ປະລິນຍາໂທ ແລະປະລິນຍາເອກ, ພ້ອມດຽວກັນນີ້ ນະຄອນໂຮ່ຈິມິນຈະສະໜັບສະໜູນ ໃນການຝຶກອົບຮົມພະນັກງານວິຊາການໃນຂະແໜງການຕ່າງໆ ທັງໄລຍະສັ້ນ ແລະ ໄລຍະຍາວ ເປັນຕົ້ນ ຂົງເຂດກະສິກຳ, ສຶກສາ ແລະ ສາທາລະນະສຸກ ໂດຍສະເພາະແມ່ນການຊ່ວຍເຫຼືອດ້ານວິຊາການໃນການຜ່າຕັດຫົວໃຈ. ໃນດ້ານການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນຢູ່ບໍລິເວນຊາຍແດນ ລາວ-ຫວຽດນາມ ແຂວງສະຫວັນນະເຂດໄດ້ສະເໜີໃຫ້ຊ່ວຍໃນການປັບປຸງຍົກລະດັບການເຂົ້າເຖິງການບໍລິການດ້ານສາທາລະນະສູກ ແລະ ລະບົບການສື່ສານໂທລະຄົມມະນາຄົມ. ໃນຂະນະດຽວກັນ ເນື່ອງໃນໂອກາດການສະເຫຼີມສະຫຼອງ 3 ວັນປະຫວັດສາດໃນປີ 2025 ທີ່ຈະມາເຖິງນີ້ ນະຄອນໂຮ່ຈີມິນຍິນດີທີ່ຈະໃຫ້ການຊ່ວຍເຫຼືອຮ່ວມມືສ້າງຟີມສາລະຄະດີ ກ່ຽວກັບຄວາມໝາຍຄວາມສຳຄັນຂອງວັນດັ່ງກ່າວ ແລະ ໃນຕອນທ້າຍ ນະຄອນໂຮ່ຈີມິນ ໄດ້ສະເໜີໃຫ້ນະຄອນໄກສອນ ພົມວິຫານ ແຮກສ່ຽວກັບເມືອງໃດໜຶ່ງຂອງນະຄອນໂຮ່ຈີມິນ ເຊິ່ງການນຳທັງສອງຝ່າຍໄດ້ມອບໝາຍໃຫ້ ຂະແໜງວິຊາການປຶກສາຫາລືກັນໃນລາຍລະອຽດຕໍ່ໄປ.
