ວັນທີ 28 ສິງຫາ ນີ້ ທີ່ກະຊວງປ້ອງກັນປະເທດ ສະຫາຍ ພົນຕີ ປະສິດ ທ່ຽງທໍາ ຮອງລັດຖະມົນກະຊວງປ້ອງກັນປະເທດ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມພົບປະ ຂອງສະຫາຍ ພັນເອກ ຕີໂມເຟບ ນີໂກລາຍ ເວິລາດີມີໂຣວິດ ຮອງຫົວໜ້າກົມ 6, ກົມໃຫຍ່ຮ່ວມມືສາກົນດ້ານການທະຫານ ກະຊວງປ້ອງກັນປະເທດ ແຫ່ງ ສ ຣັດເຊຍ ພ້ອມດ້ວຍຄະນະ ໃນໂອກາດທີ່ເດີນທາງມາເຮັດວຽກຢູ່ ສປປ ລາວ.
ໃນໂອກາດນີ້, ສະຫາຍ ພົນຕີ ປະສິດ ທ່ຽງທໍາ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຊົມເຊີຍຕໍ່ ສະຫາຍ ພັນເອກ ຕີໂມເຟບ ນີໂກລາຍ ເວິລາດີມີໂຣວິດ ພ້ອມດ້ວຍຄະນະ ທີ່ໄດ້ເຂົ້າພົບປະ ພ້ອມທັງທົບທວນຜົນຂອງການພົວພັນຮ່ວມມືຊ່ວຍເຫຼືອ ຊຶ່ງກັນ ແລະ ກັນ ລະຫ່ວາງ ສອງກອງທັບ ລາວ-ຣັດເຊຍ, ຣັດເຊຍ-ລາວ ໃນໄລຍະຜ່ານມາ, ສາຍພົວພັນມິດຕະພາບ ແລະ ການຮ່ວມມືທີ່ມີມູນເຊື້ອມາແຕ່ດົນນານ ລະຫວ່າງສອງຊາດ, ສອງກອງທັບ ລາວ-ຣັດເຊຍ, ຣັດເຊຍ-ລາວ ໄດ້ມີການພັດທະນາ ແລະ ສືບຕໍ່ຂະຫຍາຍຕົວຢ່າງໜັກແໜ້ນ ໂດຍສະເພາະໃນຂົງເຂດການທະຫານກໍໄດ້ມີການສືບຕໍ່ພົວພັນຮ່ວມມືກັນຫຼາຍຂຶ້ນ, ເປັນຕົ້ນແມ່ນການແລກປ່ຽນຄະນະຜູ້ແທນນໍາກັນໃນຫຼາຍລະດັບ, ນັບແຕ່ຂັ້ນລັດຖະມົນຕີລົງຮອດຂັ້ນວິຊາການເຫຼົ່າຮົບວິຊາສະເພາະ; ການຮ່ວມມືດ້ານຄວາມໝັ້ນຄົງ, ການຮ່ວມມືໃນຂົງເຂດວຽກງານເກັບກູ້ລະເບີດເພື່ອມະນຸດສະທຳ, ກະຊວງປ້ອງກັນປະເທດ ສ ຣັດເຊຍ ໄດ້ໃຫ້ການຊ່ວຍເຫຼືອໃນການກໍ່ສ້າງຊັບພະຍາກອນມະນຸດ, ພາຫະນະເຕັກນິກ ທາງດ້ານການທະຫານ ແລະ ການນຳເອົາໜ່ວຍງານເກັບກູ້ລະເບີດສາກົນຂອງກຳລັງປະກອບອາວຸດແຫ່ງ ສ ຣັດເຊຍ ມາຊ່ວຍ ກວດກູ້ລະເບີດທີ່ຕົກຄ້າງຢູ່ ສປປ ລາວ ການຊ່ວຍເຫຼືອດັ່ງກ່າວນີ້ເປັນການປະກອບສ່ວນທີ່ສໍາຄັນເຂົ້າໃນການປັບປຸງກໍ່ສ້າງກອງທັບປະຊາຊົນລາວ ໃຫ້ມີຄວາມເຂັ້ມແຂງ ແລະ ທັນສະໄໝ ເພື່ອຮັບປະກັນເຮັດສຳເລັດໜ້າທີ່ໃນການປົກປັກຮັກສາເອກະລາດ, ອຳນາດອະທິປະໄຕຂອງ ສປປ ລາວ.
ສະຫາຍ ພັນເອກ ຕີໂມເຟບ ນີໂກລາຍ ເວິລາດີມີໂຣວິດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງສະຫາຍຮອງລັດຖະມົນຕີ ໃນຄັ້ງນີ້ ເປັນໂອກາດທີ່ດີໃນການເສີມສ້າງສາຍພົວພັນມິດຕະພາບ, ການຮ່ວມມື ລະຫວ່າງ ກະຊວງປ້ອງກັນປະເທດແຫ່ງ ສປປ ລາວ ແລະ ກະປ້ອງກັນປະເທດ ແຫ່ງ ສ ຣັດເຊຍ ພ້ອມທັງລາຍງານຈຸດປະສົງການມາເຮັດວຽກໃນຄັ້ງນີ້ໃຫ້ສະຫາຍຮອງລັດຖະມົນຕີຮັບຊາບ.
ໃນມື້ດຽວກັນ ສະຫາຍພັນເອກ ຕີໂມເຟບ ນີໂກລາຍ ເວິລາດີມີໂຣວິດ ພ້ອມດ້ວຍຄະນະ ຍັງໄດ້ເຂົ້າພົບປະ ສະຫາຍ ພົນຈັດຕະວາ ບຸນເດືອງ ພັນສົດໃສ ຫົວໜ້າກົມພົວພັນຕ່າງປະເທດ ກະຊວງປ້ອງກັນປະເທດ ຕື່ມອີກ.
