ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 14 ສິງຫາ ຜ່ານມາ ກອງປະຊຸມບັນດາຫົວໜ້າອົງການຄຸ້ມຄອງການເຂົ້າ – ອອກເມືອງ ແລະ ກົງສູນບັນດາປະເທດ ອາຊຽນ ຄັ້ງທີ 27 (DGICM 27) ໄດ້ຈັດຂຶ້ນຢູ່ ຍາຈາງ ແຂວງແຄງຮວາ (ຫວຽດນາມ).
ຂ່າວລະບຸວ່າ: ກອງປະຊຸມ DGICM ແມ່ນເວທີປາໄສເພື່ອໃຫ້ບັນດາປະເທດອາຊຽນ ປຶກສາຫາລືກ່ຽວກັບບັນຫາທີ່ຕ່າງຝ່າຍຕ່າງມີຄວາມສົນໃຈ ແລະ ແບ່ງປັນບົດຮຽນໃນວຽກງານເຂົ້າ – ອອກເມືອງ ແລະ ກົງສູນ. ກອງປະຊຸມໄດ້ຍົກບັນດາຂໍ້ລິເລີ່ມ, ມາດຕະການ ແລະ ກົນໄກ ເພື່ອເພີ່ມທະວີການຮ່ວມມືໃນວຽກງານເຂົ້າ – ອອກເມືອງ ແລະ ນອກກຸ່ມ, ເພື່ອແນໃສ່ປະກອບສ່ວນສ້າງເງື່ອນໄຂສະດວກໃຫ້ແກ່ການໄປມາຂອງພົນລະເມືອງ ແລະ ການຕໍ່ສູ້, ປ້ອງກັນ, ຕ້ານການເຂົ້າເມືອງຢ່າງຜິດກົດໝາຍ. ກອງປະຊຸມປີນີ້ມີຫົວຂໍ້ວ່າ: “ຄວາມໝັ້ນຄົງຮອບດ້ານ, ເພີ່ມທະວີການເຊື່ອມຕໍ່, ມຸ່ງໄປເຖິງອະນາຄົດ”.
ໃນເວລາດຳເນີນກອງປະຊຸມ 3 ວັນ, ຈະດຳເນີນການປະຊຸມ, ເວທີປາໄສສຳຄັນ 6 ຄັ້ງ, ປຶກສາລືບັນດາບັນຫາ ຄື: ຄຸ້ມຄອງບັນດາດ່ານຊາຍແດນໃຫຍ່ໃນ ອາຊຽນ; ກົນໄກ, ມາດຕະການແລກປ່ຽນຂໍ້ມູນຂ່າວສານເຂົ້າ – ອອກເມືອງໃນກຸ່ມ ອາຊຽນ; ທ່າອ່ຽງ ແລະ ສິ່ງທ້າທາຍຂອງອາຊະຍາກຳ ສົ່ງຜູ້ອົບພະຍົບຢ່າງຜິດກົດໝາຍໃນພາກພື້ນ.
