ແຫລ່ງຂ່າວຈາກ ເມືອງທຸລະຄົມ ແຂວງວຽງຈັນ ໃຫ້ຮູ້ວ່າ: ເນື່ອງໃນໂອກາດວັນປ່ອຍປາ ແລະ ສັດນໍ້າແຫ່ງຊາດ 13 ກໍລະກົດ 2024 ຫ້ອງການກະສິກໍາ-ປ່າໄມ້ ເມືອງທຸລະຄົມ ໄດ້ສົມທົບກັບອົງການປົກຄອງບ້ານຕານປ່ຽວ ຜູ້ປະກອບການດ້ານການລ້ຽງປາ ແລະ ນັກທຸລະກິດພາຍໃນເມືອງ ໄດ້ປ່ອຍປາລົງສູ່ວັງສະຫວນ (ແມ່ນໍ້າງື່ມຈໍານວນ 30.000 ໂຕ ໃນນີ້, ຫ້ອງການກະສິກໍາ-ປ່າໄມ້ເມືອງ ປ່ອຍປາ 5.000 ໂຕ, ກົມປ່າໄມ້ອຸທິຍານແຫ່ງຊາດພູເຂົາຄວາຍ 5.000 ໂຕ.
ພິທີປ່ອຍປາ ດັ່ງກ່າວ ຈັດຂຶ້ນໃນວັນທີ 12 ກໍລະກົດ 2024 ທີ່ບ້ານຕານປ່ຽວ ເມືອງທຸລະຄົມ ແຂວງວຽງຈັນ ໂດຍການເຂົ້າຮ່ວມຂອງ ທ່ານ ບຸນເລີດ ສີຫາປັນຍາ ຜູ້ປະຈໍາການແທນເຈົ້າເມືອງໆທຸລະຄົມ, ທ່ານ ນາງ ອຸລາພອນ ພົງສະຫວັດ ຮອງຫົວໜ້າກົມຈັດຕັ້ງ-ພະນັກງານ ກະຊວງກະສິກໍາ-ປ່າໄມ້, ທ່ານ ຄໍາສອນ ກຸນນະວົງ ຮັກສາການ ຫົວໜ້າຫ້ອງການກະສິກໍາ ແລະ ປ່າໄມ້ ເມືອງທຸລະຄົມ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຄໍາສອນ ກຸນນະວົງ ໄດ້ລາຍງານ ວ່າ: ໂດຍຜັນຂະຫຍາຍ ແລະ ປະຕິບັດ ຕາມມາດຕາ 69 ຂອງກົດໝາຍວ່າດ້ວຍການປະມົງ, ປະຕິບັດຕາມການຊີ້ນໍາຂອງທາງຂັ້ນເທິງ ແລະ ການມອບໝາຍຂອງຄະນະພັກ-ການປົກຄອງເມືອງທຸລະຄົມ ກ່ຽວກັບການອະນຸລັກສັດປ່າ ແລະ ສັດນໍ້າ ແນໃສ່ບັນຫາຕົ້ນຕໍ ຄື: ເພື່ອປະຕິບັດຕາມແນວທາງຂອງພັກ-ລັດ ກ່ຽວກັບແຜນການຜະລິດສະບຽງອາຫານ ແລະ ຜະລິດເປັນສິນຄ້າ ສະກັດກັ້ນການລັກລອບການຈັບປາ, ສັດນໍ້າປະເພດຫວງຫ້າມ ແລະ ຄຸ້ມຄອງ ໂດຍສະເພາະໃນລະດູປາວາງໄຂ່; ຕິດຕາມບຸກຄົນທີ່ສວຍໂອກາດລ່າປາ ແລະ ສັດນໍ້າປະເພດຫວງຫ້າມ; ຊຸກຍູ້ການລ້ຽງປາຂອງທຸກພາກສ່ວນເສດຖະກິດ ໂດຍລ້ຽງປາ-ສັດນໍ້າຕ່າງໆໃສ່ໜອງ, ອ່າງເກັບນໍ້າ, ວັງສະຫງວນ, ລ້ຽງໃສ່ກະຊັງ ແລະ ອື່ນໆໃຫ້ນັບມື້ສູງຂຶ້ນ.
ໃນໜຶ່ງປີຜ່ານມາຫ້ອງການກະສິກໍາ ແລະ ປ່າໄມ້ ເມືອງທຸລະຄົມ (ໜ່ວຍງານລ້ຽງສັດ ແລະ ການປະມົງ) ໄດ້ຊຸກຍູ້-ສົ່ງເສີມ ຂະບວນການລ້ຽງປາຢ່າງກວ້າງຂວາງ ທັງປະລິມານ ແລະ ຄຸນນະພາບທີ່ດິີຂຶ້ນ. ໃນປີ 2024 ນີ້ໄດ້ສົ່ງເສີມຂະບວນການລ້ຽງປາຢູ່ແຕ່ລະບ້ານ, ຫົວໜ່ວຍທຸລະກິດຄອບຄົວຕ່າງໆ ເຊັ່ນ: ກຸ່ມລ້ຽງປາບ້ານໂພນຄໍາ (ໜອງນົກ) 90.000 ໂຕ, ໜອງເລັກ 10.000 ໂຕ, ກຸ່ມລ້ຽງປາບ້ານຖິ່ນຄໍາ (ໜອງສໍາຮອກ) 40.000 ໂຕ, ສະມາຄົມບໍານານຜູ້ສູງອາຍຸ (ໜອງໜາມ) 60.000 ໂຕ, ວັງສະຫງວນບ້ານຫລິ່ງຊັນ-ບ້ານນາຄອງ (ນໍ້າງື່ມ) 15.000 ໂຕ, ວັງສະຫງວນບ້ານບຸ່ງພ້າວ (ນໍ້າງື່ມ) 17.000 ໂຕ, ວັງສະຫງວນອ່າງນໍ້າປອດ-ນໍ້າຫາງ 10.000 ໂຕ, ວັງສະຫງວນຫາດສ້ຽວ (ນໍ້່າງື່ມ) 30.000 ໂຕ ແລະ ຍັງມີບັນດາຄອບຄົວຕົວແບບດ້ານການລ້ຽງປາໃນແຕ່ລະບ້ານ ລວມຈໍານວນປາທີ່ປ່ອຍທັງໝົດ 5,6 ລ້ານກວ່າໂຕ. ນອກນັ້ນຍັງມີຄອບຄົວຕົວແບບການລ້ຽງປາປະສົມປະສານກັບການລ້ຽງໄກ່ພັນໄຂ່ ຈໍານວນ 21 ຄອບຄົວ ປ່ອຍປາລ້ຽງ 2.156.000 ໂຕ ແລະ ຍັງມີຄອບຄົວລ້ຽງປາໃນໜອງແຕ່ 10.000-30.000 ໂຕຂຶ້ນໄປໃນຂອບເຂດທົ່ວເມືອງ ລວມປາປ່ອຍທັງໝົດ 8.028.000 ໂຕ.
ໃນພິທີຍັງໄດ້ປະກາດສ້າງຕັ້ງວັງສະຫງວນ ຢູ່ບ້ານຕານປ່ຽວ ພ້ອມທັງສ້າງກິດຈະກໍາ, ສ້າງບັນຍາກາດ ເບີກບານມ່ວນຊື່ນໃຫ້ຜູ້ເຂົ້າຮ່ວມໄດ້ມີສ່ວນຮ່ວມຕອບຄໍາຖາມ ກ່ຽວກັບວຽກງານຄຸ້ມຄອງ ແລະ ອະນຸລັກສັດນໍ້າ, ສັດປ່າ ແລະ ປ່າໄມ້ຕື່ມອີກ.
ໂອກາດນີ້, ທ່ານ ບຸນເລີດ ສີຫາປັນຍາ ໄດ້ຍົກໃຫ້ເຫັນຄວາມໝາຍຄວາມສໍາຄັນຂອງວັນປ່ອຍປາ ແລະ ສັດນໍ້າແຫ່ງຊາດ, ຊຶ່ງພັກ-ລັດຖະບານ ໄດ້ນໍາພາຈັດຕັ້ງປະຕິບັດໃນແຕ່ລະປີ ເພື່ອຄືນຄວາມອຸດົມສົມບູນໃຫ້ທໍາມະຊາດ, ແມ່ນໍ້າລໍາເຊ ແນໃສ່ເຮັດໃຫ້ປາທີ່ປ່ອຍແຕ່ລະປີໄດ້ເຕີບໃຫຍ່ຂະຫຍາຍຕົວ ອອກແມ່ແຜ່ລູກ ທົດແທນປາທີ່ປະຊາຊົນໄດ້ຫາຢູ່ຫາກິນລ້ຽງຊີບປະຈໍາວັນ. ສໍາລັບການສ້າງຕັ້ງວັງສະຫງວນພັນປາຂຶ້ນຢູ່ບ້ານຕານປ່ຽວ ເພື່ອກໍານົດເຂດຫວງຫ້າມ, ເຂດອະນຸລັກ, ຈໍາກັດການຫາປາແບບຊະຊາຍ ທີ່ມີຄວາມສ່ຽງເຮັດໃຫ້ປາດັບສູນ ແລະ ເປັນປະໂຫຍດແກ່ສ່ວນລວມ ໃຫ້ປາຊະນິດຕ່າງໆຢູ່ຄູ່ສາຍນະທີອຸດົມສົມບູນຂຶ້ນ ເພື່ອໃຫ້ພໍ່ແມ່ປະຊາຊົນ, ລູກຫລານໄດ້ຫາຢູ່ຫາກິນ ແກ້ໄຂຊີວິດການເປັນຢູ່ຕໍ່ໄປໃນອະນາຄົດ ພ້ອມທັງ ຮຽກຮ້ອງໃຫ້ອົງການປົກຄອງບ້ານຕານປ່ຽວ, ບ້ານອ້ອມຂ້າງ ຜັນຂະຫຍາຍກົດລະບຽບຄຸ້ມຄອງວັງສະຫງວນໃຫ້ເລິກເຊິ່ງ ກວ້າງຂວາງທົ່ວເຖິງ, ປຸກລະດົມປະຊາຊົນມີສ່ວນຮ່ວມຕໍ່ວຽກງານດັ່ງກ່າວຢ່າງແຂງແຮງ, ເນື່ອງຈາກວັງສະຫງວນທີ່ສ້າງຂຶ້ນຜ່ານມາແມ່ນມີປະໂຫຍດຫລາຍ, ປະຊາກອນປາກໍມີເພີ່ມຂຶ້ນທຽບໃສ່ເມື່ອກ່ອນ ເປັນຕົ້ນວັງຂອງບ້ານສະຫງວນຫລິ່ງຊັນ, ບຸ່ງພ້າວ, ຫາດສ້ຽວ, ນໍ້າປອດ-ນໍ້າຫາງ, ຊຶ່ງການປະກາດສ້າງຕັ້ງວັງສະຫງວນຂຶ້ນທີ່ທ່ານໍ້າງື່ມຫາດຕານປ່ຽວເທື່ອນີ້ ເປັນແຫ່ງທີ 5 ຂອງເມືອງ ຊຶ່ງຈະກາຍເປັນບ່ອນລິເລີ່ມ ແລະ ເປັນພື້ນຖານສໍາຄັນໃຫ້ບ້ານອື່ນໆທີ່ເຫັນວ່າມີເງື່ອນໄຂເໝາະສົມ ສືບຕໍ່ສ້າງວັງສະຫງວນຂຶ້ນອີກ.
ຂ່າວ-ພາບ: ບ່າວຫາດໄຊ
