ແຫລ່ງຂ່າວຈາກແຂວງຫລວງພະບາງ ໃຫ້ຮູ້ວ່າ: ການນຳແຂວງຫລວງພະບາງ, ເຊິ່ງນຳໂດຍ ທ່ານ ຄໍາຂັນ ຈັນທະວີສຸກ ເຈົ້າແຂວງໆຫລວງພະບາງ ໄດ້ເຂົ້າວາງກະຕ່າດອກໄມ້ ຢູ່ອະນຸສາລະລີ ປະທານ ສຸພານຸວົງ ໃນວັນທີ 12 ກໍລະກົດ 2024 ເນື່ອງໂອກາດວັນເກີດ ຂອງປະທານສຸພານຸວົງ ຄົບຮອບ 115 ປີ ເພື່ອເປັນການຈາລຶກເຖິງຄຸນງາມຄວາມດີ, ກະຕັນຍູຮູ້ບຸນຄຸນ, ຜົນງານອັນໃຫຍ່ຫລວງ ທີ່ໄດ້ອຸທິດຕະຫລອດຊີວິດເພື່ອຊາດ ແລະ ການປະຕິວັດຂອງປະທານ. ປະທານສຸພານຸວົງ ແມ່ນປັນຍາຊົນຜູ້ຍິ່ງໃຫຍ່, ເປັນຜູ້ໜຶ່ງທີ່ມີນໍ້າໃຈຮັກຊາດອັນດູດດື່ມ ທີ່ໄດ້ເອົາຊີວິດຕິດພັນກັບການປະຕິວັດຢ່າງສຸດກົກສຸດປາຍ ເຊິ່ງເປັນແບບຢ່າງອັນດີເລີດ ໃນການເຕົ້າໂຮມຄວາມສາມັກຄີບັນດາເຜົ່າ ປະທານກາຍເປັນຜູ້ນໍາທີ່ດີເດັ່ນ ຂອງພັກປະຊາຊົນປະຕິວັດລາວ ທີ່ໄດ້ນໍາພາປວງຊົນລາວບັນດາເຜົ່າ ຕໍ່ສູ້ຕີສັດຕູຜູ້ຮຸກຮານຈົນໄດ້ຮັບໄຊຊະນະຢ່າງສົມບູນ ແລະສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975.
ໂອກາດນີ້, ການນຳແຂວງຫລວງພະບາງ ໄດ້ປະຕິຍານຕໍ່ໜ້າຮູບຫລໍ່ຂອງປະທານວ່າ: ຈະເປັນສະມາຊິກພັກ-ພະນັກງານຮຸ່ນສືບທອດທີ່ດີ ສັດຊື່ ບໍລິສຸດ ຈົ່ງຮັກພັກດີຕໍ່ອຸດົມການຂອງພັກ ປົກປັກຮັກສາມູນເຊື້ອອັນດີງາມ ແລະ ຄວາມສາມັກຄີ ເປັນແບບຢ່າງໃນການປະຕິບັດມະຕິຄຳສັ່ງ, ກົດລະບຽບ ແລະລັດຖະທຳມະນູນວາງອອກຢ່າງເຂັ້ມງວດ ເດັດດ່ຽວຕອບຕ້ານ ແລະ ສະກັດກັ້ນ ທຸກກົນອຸບາຍຫັນປ່ຽນໂດຍສັນຕິຂອງສັດຕູ, ຖືເອົາຜົນປະໂຫຍດສ່ວນລວມສູງກວ່າຜົນປະໂຫຍດສ່ວນຕົວສະເໝີ, ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງກ້າວໜ້າຢ່າງບໍ່ຢຸດຢັ້ງ, ຈະຕັ້ງໜ້າຮໍ່າຮຽນເອົາຄຸນສົມບັດ, ສິນທຳປະຕິວັດແບບແຜນການດຳລົງຊີວິດ, ທີ່ຖະໜອມ, ຖ່ອມຕົວ, ງ່າຍດາຍ, ປອດໃສຂາວສະອາດ, ດຸໝັ່ນ, ຊື່ສັດ, ປະຢັດ ແລະອົດທົນເຊິ່ງເປັນແບບຢ່າງອັນດີເລີດ ທີ່ ປະທານໄດ້ສ້າງໄວ້ໃຫ້ຄົນຮຸ່ນຫລັງໄດ້ ສືບທອດ.
