Saturday, July 13, 2024
Homeຂ່າວໜ້າໜຶ່ງ"ສະຫຼອງວັນສ້າງຕັ້ງສະມາຄົມ 67 ຊ່ວຍເຫຼືອກັນແລະກັນພັດທະນາສັງຄົມ"

“ສະຫຼອງວັນສ້າງຕັ້ງສະມາຄົມ 67 ຊ່ວຍເຫຼືອກັນແລະກັນພັດທະນາສັງຄົມ”

ສະມາຄົມ 67 ຊ່ວຍເຫຼືອກັນແລະກັນພັດທະນາສັງຄົມ ໄດ້ສະຫຼອງວັນສ້າງຕັ້ງສະມາຄົມ ຄົບຮອບ 1 ປີ ແລະ ສະຫຼຸບແຜນການເຄື່ອນໄຫວວຽກງານ ໃນໄລຍະຜ່ານມາ ໃນວັນທີ 6 ກໍລະກົດ 2024 ທີ່ນະຄອນຫຼວງວຽງຈັນ, ເຂົ້າຮ່ວມໂດຍ ທ່ານ ສອນໄຊ ສີພັນດອນ ນາຍົກລັດຖະມົນຕີ, ທ່ານ ນາງ FANG HONG ເອກອັກຄະລັດຖະທູດ ສປ ຈີນ ປະຈຳ ສປປ ລາວ, ມີລັດຖະມົນຕີ, ປະທານ-ຮອງປະທານສະມາຄົມ, ພາກສ່ວນທຸລະກິດ ແລະ ສະມາຊິກສະມາຄົມ ເຂົ້າຮ່ວມ.

ທ່ານ ນາງ ສົມສະນິດ ແກ້ວດວງດີ ປະທານສະມາຄົມ 67 ຊ່ວຍເຫຼືອກັນແລະກັນພັດທະນາສັງຄົມ ກ່າວວ່າ: ສະມາຄົມ 67 ຊ່ວຍເຫຼືອກັນແລະພັດທະນາສັງຄົມ ປະກອບມີ ປະທານ 1 ທ່ານ, ຮອງປະທານ 2 ທ່ານ ແລະ ກຳມະການ 2 ທ່ານ, ອະດີດພະນັກງານຄູ ແລະ ນັກຮຽນນ້ອງນ້ອຍ ໂຮງຮຽນ 67 ທັງໝົດທີ່ໄດ້ໄປຮຽນຢູ່ໜານໜິງ ກວາງຊີ ສປ ຈີນ ນັບແຕ່ປີ 1967-1976 ມີຈໍານວນ 1.074 ຄົນ; ປັດຈຸບັນ, ສາມາດຕິດຕໍ່ໄດ້ 387 ທ່ານ ຍິງ 194 ຄົນ, ມີສະມາຊິກລຸ້ນສືບທອດໄດ້ 80 ຄົນ ປະກອບເປັນສະມາຊິກໃໝ່.

ໄລຍະປີ 2023, ສະມາຄົມ 67 ໃນການຊ່ວຍເຫຼືອໃນຍາມເຈັບເປັນ, ເສຍຊີວິດ ແລະ ພົບຄວາມຫຍຸ້ງຍາກອື່ນໆ ໃນໄລຍະຜ່ານມາ ໄດ້ໄປຢ້ຽມຢາມຖາມຂ່າວອະດີດພະນັກງານໂຮງຮຽນ 67 ຈໍານວນ 11 ເທື່ອຄົນ ມູນຄ່າ 9,900,000 ກີບ, ໄປຢ້ຽມຢາມອະດີດນັກຮຽນໂຮງຮຽນ 67 ທີ່ເຈັບເບົາ 7 ເທື່ອຄົນ, ມູນຄ່າ 2,100,000 ກີບ, ຊ່ວຍເຫຼືອຜູ້ເຈັບໜັກ 22 ເທື່ອ, ມູນຄ່າ 11,000,000 ກີບ, ຊ່ວຍເຫຼືອຜູ້ເສຍຊິວິດ ຈໍານວນ 11 ເທື່ອຄົນ, ມູນຄ່າ 14,000,000 ກີບ, ຊ່ວຍເຫຼືອຜູ້ປະສົບອັກຄີໄພ 6 ເທື່ອຄົນ ແລະ ຄອບຄົວທີ່ຂາດເຂີນ ລວມ 30,400,000 ກີບ, ລວມເງິນທັງໝົດທີ່ຊ່ວຍເຫຼືອ 67,000,000 ກີບ.

ດ້ານການສຶກສາ, ສະມາຄົມ 67 ໄດ້ຮັບທຶນຊ່ວຍເຫຼືອລ້າ ຈາກເຂດປົກຄອງຕົນເອງເຜົ່າຈ້າງກວາງຊີ ໃຫ້ ລູກ-ຫຼານອະດີດພະນັກງານ ແລະ ນັກຮຽນນ້ອງນ້ອຍ ໂຮງຮຽນ 67 ໜານໜິງ ໄປສຶກສາຮໍ່າຮຽນຕໍ່ຊັ້ນປະລິຍາຕີ ແລະ ປະລິຍາໂທ ຢູ່ແຂວງກວາງຊີ ສປ ຈີນ ປີລະ 5 ທຶນ, ລວມ 15 ທຶນ; ນອກຈາກນັ້ນ, ສະມາຄົມ 67 ໄດ້ຮ່ວມກັບ ສະມາຄົມຄົນຈີນກວາງຊີ ປະຈຳ ສປປ ລາວ ລົງຊ່ວຍອຸປະກອນການສຶກສາ ຢູ່ 2 ໂຮງຮຽນ ຂອງເມືອງ ອະນຸວົງ ແລະ ເມືອງລ້ອງແຈ້ງ ແຂວງໄຊສົມບູນ ມູນຄ່າ 20,000,000 ກີບ ແລະ ມອບອຸປະກອນການສຶກສາ ຢູ່ 5 ໂຮງຮຽນ ຄື: ນາເຂັ້ຍ, ນາຄາວ, ຊຽງລວງ, ຊຽງແມນ ແລະ ໂຮງຮຽນຊົນເຜົ່າ ເມືອງວຽງໄຊ ແຂວງຫົວພັນ ມູນຄ່າ 217,500,000 ກີບ, ລວມເປັນເງິນທັງໝົດ 237,550,000 ກີບ.

ທິດທາງແຜນການໃນຕໍ່ໜ້າ ຈະສືບຕໍ່ຊ່ວຍເຫຼືອເບິ່ງແຍງສະມາຊິກສະມາຄົມ 67 ທີ່ເຈັບປ່ວຍ, ເສຍຊີວິດ ແລະ ພົບຄວາມຫຍຸ້ງຍາກອື່ນໆ ຕາມກົດລະບຽບຂອງສະມາຄົມ 67, ຊ່ວຍເຫຼືອສັງຄົມ ເປັນຕົ້ນແມ່ນ ບັນດາໂຮງຮຽນທີ່ຫ່າງໄກຊອກຫຼີກ, ຂາດເຂີນອຸປະກອນການສຶກສາ ແລະ ຄອບຄົວທີ່ທຸກຍາກ, ຜູ້ຖືກກະທົບຈາກໄພທຳມະຊາດ, ຂະຫຍາຍສະມາຊິກສະມາຄົມ 67 ໃຫ້ກວ້າງຂວາງ, ຂໍທຶນໃຫ້ລູກ-ຫຼານໄດ້ໄປຮໍ່າຮຽນສຶກສາຢູ່ແຂວງກວາງຊີ, ສືບຕໍ່ພົວພັນຮ່ວມມືກັບພາກສ່ວນຕ່າງໆທັງພາຍໃນ ແລະ ຕ່າງປະເທດທາງດ້ານທຶນຮອນ, ການ ຝຶກອົບຮົມ, ການແລກປ່ຽນບົດຮຽນ, ການທັດສະນະສຶກສາ ແລະ ອື່ນໆ ເພື່ອຊ່ວຍເຫຼືອສັງຄົມ.

(ຂ່າວ: ຄໍາໂຖ)

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments