ຂ່າວຕ່າງປະເທດລາຍງານ ໃນວັນທີ 3 ກໍລະກົດ ຜ່ານມາວ່າ: ອິນໂດເນເຊຍ ໜຶ່ງໃນຜູ້ຜະລິດນິກເກິລລາຍໃຫຍ່ທີ່ສຸດຂອງໂລກ ໄດ້ເປີດໂຮງງານຜະລິດແບັດເຕີຣີລົດຍົນໄຟຟ້າແຫ່ງທຳອິດຂອງອາຊີຕາເວັນອອກສ່ຽງໃຕ້ ທີ່ເມືອງກາຣາວັງ ແຂວງຊະວາຕາເວັນຕົກ. ໂຮງງານດັ່ງກ່າວເປັນຂອງ ບໍລິສັດ HLI Green Power ຊຶ່ງເປັນການຮ່ວມລົງທຶນລະຫວ່າງ ບໍລິສັດ Indonesia Battery Corporation, Hyundai ແລະ ບໍລິສັດ LG Energy Solution.
ທ່ານ ໂຈໂກ ວິໂດໂດ ປະທານາທິບໍດີອິນໂດເນເຊຍ ກ່າວໃນພິທີເປີດວ່າ: ໂຮງງານແຫ່ງນີ້ຄືໂຮງງານຜະລິດ Cell Battery ໄຟຟ້າແຫ່ງທຳອິດ ແລະ ມີຂະໜາດໃຫຍ່ທີ່ສຸດໃນອາຊີຕາເວັນ ອອກສ່ຽງໃຕ້ ຊຶ່ງຈະເຮັດໃຫ້ອິນໂດເນເຊຍມີຂີດຄວາມສາມາດເທົ່າທຽມປະເທດອື່ນໆ.
ອິນໂດເນເຊຍ ມີແຫຼ່ງສຳຮອງນິກເກິລ ບອກໄຊ ແລະ ທອງ ຈຳນວນຫຼາຍ, ອີກທັງຍັງມີອຸດສາຫະກຳຫຼອມ ແລະ ວັດສະດຸກໍ່ສ້າງຄົບວົງຈອນ ຈຶ່ງມີເປົ້າໝາຍທີ່ຈະກ້າວຂຶ້ນມາມີບົດບາດສຳຄັນໃນຕະຫຼາດລົດຍົນໄຟຟ້າ. ການລົງທຶນເບືອງຕົ້ນມູນຄ່າ 1 ຕື້ໂດລາ ຈະຜະລິດ Cell Battery 10 ກິໂລວັດໂມງ ຊຶ່ງພຽງພໍສຳລັບຂັບເຄື່ອນລົດຍົນໄຟຟ້າ 150.000 ຄັນ, ໂດຍມີແຜນຈະຂະຫຍາຍເປັນ 20 ກິໂລວັດໂມງໃນອະນາຄົດ.
ທ່ານ ລູຮັດ ບິນຊາ ປັນໄຈຕັນ ລັດຖະມົນຕີປະສານງານກິດຈະການທາງທະເລ ແລະ ການລົງທຶນຂອງອິນໂດເນເຊຍ ລະບຸວ່າ: ອິນໂດເນເຊຍ ມີຄວາມພ້ອມທີ່ຈະເປັນຫຼັກໃນການສະໜອງລະດັບໂລກສຳລັບລົດຍົນໄຟຟ້າ ແລະ ພຽບພ້ອມດ້ວຍລະບົບນິເວດໃນການເຊື່ອມໂຍງລະດັບສາກົນ, ພ້ອມທັງກ່າວຕື່ມວ່າ: ຄວາມພະຍາຍາມນີ້ມຸ່ງເນັ້ນຫຼຸດການປ່ອຍກາກບອນ ລວມທັງປັບປຸງຄຸນນະພາບອາກາດ ແລະ ຄຸນນະພາບຊີວິດ.
