ອົງຄະນະພັກກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ໄດ້ດໍາເນີນກອງປະຊຸມຄົບຄະນະບໍລິຫານງານພັກກະຊວງ ຄັ້ງທີ 10 (ເປີດກວ້າງ) ສະໄໝທີ II ຂຶ້ນໃນວັນທີ 5 ກໍລະກົດ ນີ້ ໂດຍການເປັນ ປະທານ ຂອງສະຫາຍ ນາງ ບຸນຄໍາ ວໍລະຈິດ ກຳມະການສູນກາງພັກ ເລຂາຄະນະພັກ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ມີຄະນະປະຈຳພັກ, ຄະນະພັກກະຊວງ, ຫົວໜ້າກົມ ແລະ ປະທານ 3 ອົງການຈັດຕັ້ງມະຫາຊົນ ຂອງ ກຊສ ເຂົ້າຮ່ວມ.
ກອງປະຊຸມຄົບຄະນະບໍລິຫານງານພັກ ກຊສ ຄັ້ງທີ 10 (ເປີດກວ້າງ) ສະໄໝທີ II, ໃນກອງປະຊຸມຄັ້ງນີ້ ໄດ້ຮັບຟັງລາຍງານທົບທວນຄືນການຈັດຕັ້ງປະຕິບັດ ມະຕິກອງປະຊຸມຄົບຄະນະບໍລິຫານງານພັກກະຊວງ ຄັ້ງທີ 9 ຜ່ານມາ ແລະ ໄດ້ຮັບຟັງລາຍງານ, ຄົ້ນຄວ້າ ແລະ ພິຈາລະນາຮັບຮອງເອົາບັນດາເອກະສານທີ່ສໍາຄັນ ເປັນຕົ້ນແມ່ນ 1. ລາຍງານສະຫຼຸບການເຄື່ອນໄຫວ ນໍາພາ-ຊີ້ນໍາ ວຽກງານກໍ່ສ້າງພັກ, ພະນັກງານ ແລະ ປັບປຸງກົງຈັກການຈັດຕັ້ງ ໄລຍະ 6 ເດືອນຕົ້ນປີ 2024 ແລະ ທິດທາງແຜນການ ໄລຍະ 6 ເດືອນທ້າຍປີ 2024, 2. ລາຍງານການຈັດຕັ້ງປະຕິບັດພັນທະ ດ້ານສິ່ງແວດລ້ອມ ຂອງໂຄງການລົງທຶນ ປະຈຳປີ 2024 ແລະ ການນນໍາໃຊ້ເຕັກໂນໂລຊີສະອາດ ແລະ ເປັນມິດ ກັບສິ່ງແວດລ້ອມ, 3. ລາຍງານຄວາມຄືບໜ້າກ່ຽວກັບການຜັນຂະຫຍາຍຍຸດທະສາດການຄຸ້ມຄອງ, ການນໍາໃຊ້ນໍ້າ ແລະ ຊັບພະຍາກອນນໍ້າແຫ່ງຊາດ ແລະ ແຜນຄຸ້ມຄອງອ່າງຮັບນໍ້າໃນຂອບເຂດທົ່ວປະເທດ; 4. ລາຍງານການຕິດຕາມກວດກາຄຸນນະພາບນໍ້າ ແລະ ຄຸນນະພາບອາກາດ ແລະ ຂະຫຍາຍເຄື່ອຂ່າຍໃນຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ, 5. ຮ່າງບົດລາຍງານຂອງຫ້ອງວ່າການສູນກາງພັກ ກ່ຽວກັບການຈັດຕັ້ງປະຕິບັດວຽກງານເສນາທິການໃຫ້ແກ່ຄະນະພັກ, ຄະນະນໍາ, 6. ຮ່າງບົດສະຫຼຸບຂາດຕົວ ການນຈັດຕັ້ງປະຕິບັດ ມະຕິຕົກລົງ ຂອງລັດຖະບານ ເລກທີ 014/ລບ, ລົງວັນທີ 26 ທັນວາ 2022.
ຜ່ານການຮັບຟັງ ແລະ ສະເໜີເອກະສານແລ້ວ ທີ່ປະຊຸມໄດ້ມີການປະກອບຄໍາຄິດຄໍາເຫັນຢ່າງກົງໄປກົງມາ ແລະ ມີຄວາມຮັບຜິດຊອບສູງ ໃນການເບິ່ງບັນຫາໃຫ້ຖືກກັບຄວາມເປັນຈິງ ຍົກໃຫ້ເຫັນອັນໃດທີ່ເຮັດໄດ້, ອັນໃດທີ່ເປັນບົດຮຽນ ແລະ ອັນໃດທີ່ຍັງອ່ອນຄົງຄ້າງ ກໍຄືການແກ້ໄຂບັນຫາຕົວຈິງໃຫ້ຖືກຕ້ອງຕາມລະບຽບການ ໂດຍສະເພາະແມ່ນວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ຕິດພັນກັບການກະກຽມກອງປະຊຸມໃຫຍ່ 3 ຂັ້ນຂອງພັກ ພາຍໃນອົງຄະນະພັກກະຊວງ ແລະ ຮັບປະກັນໃຫ້ແກ່ການກຳນົດແຜນວຽກຈຸດສຸມໃນຕໍ່ໜ້າ ແທດເໝາະກັບສະພາບຕົວຈິງຂອງວຽກງານຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ ເພື່ອເຮັດໃຫ້ດ້ານເນື້ອໃນຂອງເອກະສານຕ່າງໆ ຄົບຖ້ວນສົມບູນ, ກ້າວໄປເຖິງການຮັບຮອງ ແລະ ເປັນບ່ອນອີງໃນການຈັດຕັ້ງປະຕິບັດວຽກງານໃນຕໍ່ໜ້າ ທັງເປັນການນໍາພາ-ຊີ້ນໍາ ວຽກງານຮອບດ້ານ ຂອງບັນດາສະຫາຍ ຄະນະພັກກະຊວງ, ຫົວໜ້າກົມ ທີ່ຮັບຜິດຊອບຢູ່ໃນແຕ່ລະຂົງເຂດວຽກງານໃຫ້ສໍາເລັດຕາມແຜນການທີ່ວາງໄວ້.
ຂ່າວ: ກຊສ, ພາບ: ແສງຈັນ
