ຈົ່ງພ້ອມກັນປ່ອຍປາ ແລະ ສັດນໍ້າ ຄືນສູ່ທໍາມະຊາດ ໃຫ້ມີຄວາມອຸດົມສົມບູນຕະຫຼອດໄປ”

………..

ທ່ານ ລິນຄຳ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ຖະແຫຼງຕໍ່ສື່ມວນຊົນໃນວັນທີ 3 ກໍລະກົດ 2024 ເນື່ອງໃນໂອກາດ ວັນປ່ອຍປາ ແລະ ສັດນໍ້າ ແຫ່ງຊາດວັນທີ 13 ກໍລະກົດ 2024 ນີ້ວ່າ:

– ບັນດາທ່ານ ຜູ້ນໍາພັກ-ລັດ ທີ່ເຄົາລົບ ແລະ ນັບຖືຢ່າງສູງ.

– ພະນັກງານ, ທະຫານ, ຕໍາຫຼວດ, ນັກທຸລະກິດ

– ນັກຮຽນ, ນັກສຶກສາ ແລະ ປະຊາຊົນບັນດາເຜົ່າ ທີ່ຮັກແພງທັງຫຼາຍ.

ຂ້າພະເຈົ້າ ຂໍຕາງໜ້າໃຫ້ການນຳ ພັກ-ລັດ ກໍຄື ກະຊວງກະສິກຳ ແລະ ປ່າໄມ້ ຂໍແຈ້ງມາຍັງ ພະນັກງານ, ທະຫານ, ຕໍາຫຼວດ, ນັກທຸລະກິດ, ຊາວຄ້າຂາຍ, ນັກຮຽນ-ນັກສຶກສາ ແລະ ປະຊາຊົນຮ່ວມຊາດ ຊາບວ່າ: ພັກ ແລະ ລັດຖະບານ ຍາມໃດກໍເຫັນຄວາມສໍາຄັນ ແລະ ຖືເອົາການຄຸ້ມຄອງ, ການປົກປັກຮັກສາ, ການພັດທະນາ ແລະ ການນຳໃຊ້ປາ ແລະ ສັດນໍ້າ ເປັນວຽກສຳຄັນ ແລະ ມີຄວາມ ຈໍາເປັນ ສໍາລັບຊີວິດການເປັນຢູ່ ຂອງປະຊາຊົນລາວ ຊຶ່ງໄດ້ກຳນົດເອົາ ວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາ ແລະ ສັດນໍ້າ ແຫ່ງຊາດ ເພື່ອຄຸ້ມຄອງ, ປົກປັກຮັກສາ ແລະ ພັດທະນາສັດນໍ້າ ໃຫ້ອຸດົມສົມບູນ ແລະ ມີຄວາມຍືນຍົງ ຊຶ່ງວັນດັ່ງກ່າວ ຍັງກົງກັບ ວັນຄ້າຍວັນເກີດຂອງປະທານ ສຸພານຸວົງ ຜູ້ນໍາທີ່ແສນເຄົາລົບຮັກ ຂອງປວງຊົນລາວທັງຊາດ.

ດັ່ງທີ່ພວກເຮົາຮູ້ນໍາກັນແລ້ວວ່າ ສປປ ລາວ ເຮົາ ເປັນປະເທດທີ່ອຸດົມຮັ່ງມີ ເຕັມໄປດ້ວຍຊັບພະຍາກອນທໍາມະຊາດ, ຊັບໃນດິນ ສິນໃນນໍ້າ, ມີຊະນິດປາພື້ນເມືອງ ຫຼາຍກວ່າ 500 ຊະນິດ ໂດຍສະເພາະ ແມ່ນຊະນິດປາ ທີ່ຫາຍາກ ແລະ ໃກ້ຈະສູນພັນ ເຊັ່ນ: ປາບຶກ, ປາຝາໄລ, ປາກັງ ແລະ ຊະນິດອື່ນໆ. ຊະນິດປາດັ່ງກ່າວ ມີຄວາມສໍາຄັນ ຕໍ່ການຮັກສາຄວາມອຸດົມສົມບູນ ຂອງລະບົບນິເວດໃນທໍາມະຊາດ, ເປັນມໍລະດົກທາງທໍາມະຊາດອັນລໍ້າຄ່າ ຂອງຊາດລາວເຮົາ.

ໃນແຕ່ລະປີ ພວກເຮົາ ກໍໄດ້ພ້ອມກັນຈັດກິດຈະກໍາຕ່າງໆ ເພື່ອປູກຈິດສໍານຶກໃຫ້ແກ່ເຍົາວະຊົນ ແລະ ອະນຸຊົນຮຸ່ນຫຼັງ ກໍຄືທົ່ວສັງຄົມ ໃຫ້ເຫັນຄວາມສໍາຄັນຂອງການອະນຸລັກປາ ແລະ ສັດນໍ້າ ແນໃສ່ເພີ່ມຄວາມອຸດົມສົມບູນໃຫ້ກັບທໍາມະຊາດ, ປົກປັກຮັກສາລະບົບນິເວດແຫຼ່ງນໍ້າ ໃຫ້ມີຄວາມສົມດຸນ ແລະ ຍືນຍົງ. ພ້ອມທັງ ເປັນການຈາລຶກບຸນຄຸນ, ຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງ ປະທານ ສຸພານຸວົງ ທີ່ອຸທິດຕົນໃຫ້ແກ່ພາລະກິດແຫ່ງການຕໍ່ສູ້ກູ້ຊາດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ ຊຶ່ງໃນແຕ່ລະປີ ກໍມີມວນຊົນເຂົ້າຮ່ວມກິດຈະກໍາຕ່າງໆ ຢ່າງເປັນຂະບວນຟົດຟື້ນ.

ບັນດາທ່ານ ທີ່ຮັກແພງທັງຫຼາຍ

ເພື່ອຜັນຂະຫຍາຍເນື້ອໃນ ມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ, ມະຕິກອງປະຊຸມໃຫຍ່ ຂອງອົງຄະນະພັກກະຊວງກະສິກໍາ ແລະ ປ່າໄມ້ ຄັ້ງທີ VI ແລະ ແຜນພັດທະນາເສດຖະກິດ-ສັງຄົມ ຂອງລັດຖະບານ 5 ປີ ຄັ້ງທີ IX, ວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃຫ້ເປັນຮູບປະທໍາ, ກະຊວງກະສິກໍາ ແລະ ປ່າໄມ້ ໄດ້ຜັນຂະຫຍາຍອອກ ເປັນຄໍາສັ່ງ, ແຈ້ງການ ໃຫ້ບັນດາກົມກ່ຽວຂ້ອງ ໃນຂັ້ນສູນກາງ, ອົງການປົກຄອງຂັ້ນທ້ອງຖິ່ນ ຕະຫຼອດຮອດຜູ້ປະກອບການ ແລະ ພໍ່ແມ່ປະຊາຊົນໃນຂອບເຂດທົ່ວປະເທດ ເອົາໃຈໃສ່ຕໍ່ວຽກງານການພັດທະນາ, ການຄຸ້ມຄອງ, ນໍາໃຊ້ ແລະ ການອານຸລັກປາ ແລະ ສັດນໍ້າ ໃຫ້ມີຄວາມຍືນຍົງ ເພື່ອປະກອບສ່ວນເຂົ້າໃນການຄໍ້າປະກັນດ້ານສະບຽງອາຫານ ແລະ ໂພຊະນາການ ພ້ອມທັງສ້າງລາຍຮັບ ໃຫ້ປະຊາຊົນລາວ ໃຫ້ນັບມື້ຫຼາຍຂຶ້ນ.

ໃນປີ 2023 ທີ່ຜ່ານມາ ພວກເຮົາ ສາມາດຜະລິດປາ ແລະ ສັດນໍ້າ ໄດ້ 220.000 ກວ່າໂຕນ ຫຼື ເທົ່າກັບ 29 ກິໂລກຣາມຕໍ່ຄົນ ຊຶ່ງພຽງພໍກັບຄວາມຕ້ອງການບໍລິໂພກພາຍໃນ. ປັດຈຸບັນ ທົ່ວປະເທດ ມີສູນ, ສະຖານີ ທີ່ຜະລິດລູກປາຂອງລັດ ຈໍານວນ 50 ກວ່າແຫ່ງ, ຟາມຜະລິດລູກປາຂອງເອກະຊົນ ຫຼາຍກວ່າ 140 ແຫ່ງ ແລະ ການຜະລິດລູກປາແບບຄອບຄົວ ມີຫຼາຍກວ່າ 400 ແຫ່ງ ສາມາດສະໜອງແນວພັນປາ ໃຫ້ສັງຄົມໄດ້ໂດຍພື້ນຖານ ຈໍານວນ 290 ລ້ານກວ່າໂຕ ຫຼື ເທົ່າກັບ 73% ຂອງແຜນການ ແລະ ໃນທົ່ວປະເທດ ມີວັງສະຫງວນປາ ຫຼາຍກວ່າ 1.100 ວັງ ໃນນັ້ນ ມີຄະນະຄຸ້ມຄອງວັງສະຫງວນແລ້ວ 890 ວັງ. ບັນດາສູນ ແລະ ສະຖານີ ດັ່ງກ່າວ ໄດ້ຄົ້ນຄວ້າທົດລອງ ລ້ຽງ ແລະ ຂະຫຍາຍພັນປາ ແລະ ສັດນໍ້າພື້ນເມືອງ ໄດ້ຫຼາຍຊະນິດ ເປັນຕົ້ນແມ່ນ ປາເຄິງ, ປາກົດ, ປາເໝັ້ນ ແລະ ປາເຂັງ.

ໃນປີທີ່ຜ່ານມາ ກະຊວງກະສິກໍາ ແລະ ປ່າໄມ້ ໄດ້ສົມທົບກັບບັນດາອົງການປົກຄອງທ້ອງຖິ່ນຂອງແຂວງ ໃນຂອບເຂດທົ່ວປະເທດ ຈັດກິດຈະກໍາ ໃນວັນປ່ອຍປາ ແລະ ສັດນໍ້າແຫ່ງຊາດ ໂດຍມີ ປະຊາຊົນ, ພໍ່ຄ້າຊາວຂາຍ, ຜູ້ປະ ກອບການ ລວມທັງອົງການຈັດຕັ້ງສາກົນທີ່ກ່ຽວຂ້ອງ ເຂົ້າຮ່ວມ ແລະ ໃຫ້ການສະໜັບສະໜູນ ແນວພັນປາ ແລະ ແນວພັນສັດນໍ້າ ຢ່າງເປັນຂະບວນຟົດ ຟື້ນ ຊຶ່ງຈໍານວນປາ ແລະ ສັດນໍ້າ ທີ່ໄດ້ປ່ອຍ ທັງໝົດແມ່ນ 62 ລ້ານໂຕ.

ແຜນການປ່ອຍປາ ແລະ ສັດນໍ້າ ໃນວັນທີ 13 ກໍລະກົດ ປີ 2024 ນີ້ ຂະແໜງ ກະສິກໍາ ແລະ ປ່າໄມ້ ຂອງພວກເຮົາ ໄດ້ສົມທົບກັບ ຄະນະພັກ, ອົງການປົກຄອງທ້ອງ ຖິ່ນທົ່ວປະເທດ ກະກຽມແຜນການ ແລະ ຂະບວນການປ່ອຍປາ ແລະ ສັດນໍ້າ ເພື່ອຄືນຄວາມອຸດົມສົມບູນ ສູ່ທໍາມະຊາດ ແລະ ສູ່ແຫຼ່ງນໍ້າຕ່າງໆ ໂດຍມີແຜນປ່ອຍປາ ແລະ ສັດນໍ້າ ໃຫ້ໄດ້ຫຼາຍກວ່າ 64 ລ້ານໂຕ. ສໍາລັບ ຢູ່ນະຄອນຫຼວງວຽງຈັນ ກະຊວງກະສິກໍາ ແລະ ປ່າໄມ້ ມີແຜນຈັດພິທີປ່ອຍປາ ແລະ ສັດນໍ້າ ຢູ່ ບ້ານຮ່ອງສຸພາບ ເມືອງໄຊເສດຖາ ຄາດວ່າຈະປ່ອຍປາ ແລະ ສັດນໍ້າ ປະມານ 400.000 ໂຕ.

ການຈັດກິດຈະກໍາ ໃນວັນປ່ອຍປາ ແລະ ສັດນໍ້າ ໃນປີນີ້ ກະຊວງກະສິກຳ ແລະ ປ່າໄມ້ ຂໍເຊີນຊວນ ພາກສ່ວນກ່ຽວຂ້ອງ ທັງພາກລັດ, ເອກະຊົນ ແລະ ພໍ່ແມ່ປະຊາຊົນ ພ້ອມກັນຈັດພິທີ ໂດຍໃຫ້ອີງໃສ່ເງື່ອນໄຂຕົວຈິງຂອງແຕ່ລະທ້ອງຖິ່ນ ໃຫ້ເນັ້ນໃສ່ເນື້ອໃນປຸກລະດົມເປັນຕົ້ນຕໍ ບົນພື້ນຖານປະຢັດມັດທະຍັດ ແລະ ຕ້ານການຟຸ່ມເຟືອຍ, ບ່ອນໃດມີເງື່ອນໄຂກໍໃຫ້ເລີ່ມຈັດຕັ້ງປະຕິບັດແຕ່ດຽວນີ້ເປັນຕົ້ນໄປ ໂດຍບໍ່ໃຫ້ລໍຖ້າ ຮອດວັນທີ 13 ກໍລະກົດ.

ບັນດາທ່ານ ທີ່ນັບຖື ແລະ ຮັກແພງ

ເນື່ອງໃນໂອກາດ ວັນປ່ອຍປາ ແລະ ສັດນໍ້າ ແຫ່ງຊາດ ວັນທີ 13 ກໍລະກົດ 2024 ແລະ ກົງກັບວັນຄ້າຍວັນເກີດ ຂອງ ປະທານ ສຸພານຸວົງ ຜູ້ນໍາທີ່ແສນເຄົາລົບຮັກ ຂອງປວງຊົນລາວທັງຊາດ, ຂ້າພະເຈົ້າ ຕາງໜ້າໃຫ້ກະຊວງກະສິກໍາ ແລະ ປ່າໄມ້ ຂໍຮຽກຮ້ອງມາຍັງພາກສ່ວນຕ່າງໆ ທັງພາກລັດ ແລະ ເອກະຊົນ ໃນທົ່ວສັງຄົມ ຈົ່ງພ້ອມກັນ ຮ່ວມແຮງ ຮ່ວມໃຈ ຄຸ້ມຄອງ, ພັດທະນາ, ອະນຸລັກຮັກສາ ປາ ແລະ ສັດນໍ້າ ໃຫ້ຫຼາຍຂຶ້ນ, ໂດຍສະເພາະສຸມໃສ່ການປ່ອຍປາ ແລະ ສັດນໍ້າ ຄືນສູ່ແຫຼ່ງນໍ້າທໍາມະຊາດ ເພີ່ມຄວາມອຸດົມສົມບູນທາງດ້ານຊະນິດພັນ ແລະ ຈໍານວນປະຊາກອນຂອງປາ ແລະ ສັດນໍ້າ ທີ່ເປັນມໍລະດົກທາງທໍາມະຊາດ ຂອງຊາດ ໃຫ້ຊົມໃຊ້ແບບຍືນຍົງ ແລະ ໃຫ້ເປັນມໍລະດົກຕົກທອດ ຮອດເຊັ່ນລູກ ເຊັ່ນຫຼານ ຂອງພວກເຮົາຕະຫຼອດໄປ ແລະ ໃຫ້ຜູ້ປະກອບການ ແລະ ພໍ່ແມ່ປະຊາຊົນ ລ້ຽງປາ ແລະ ສັດນໍ້າ ໃຫ້ຖືກຕ້ອງຕາມກົດໝາຍ ເພື່ອເປັນການສ້າງເສດຖະກິດ, ສ້າງລາຍຮັບໃຫ້ຄອບຄົວ ແລະ ປະເທດຊາດໃຫ້ຫຼາຍຂຶ້ນ; ດັ່ງຄໍາຂວັນຂອງປີນີ້ ທີ່ວ່າ:

“ຈົ່ງພ້ອມກັນປ່ອຍປາ ແລະ ສັດນໍ້າ ຄືນສູ່ທໍາມະຊາດ ໃຫ້ມີຄວາມອຸດົມສົມບູນຕະຫຼອດໄປ”

“ການປົກປັກຮັກສາ ປາ ແລະ ສັດນໍ້າ ແມ່ນພັນທະຂອງປວງຊົນທັງຊາດ”

“ຊົມເຊີຍ ວັນປ່ອຍປາ ແລະ ສັດນໍ້າ ແຫ່ງຊາດ ວັນທີ 13 ກໍລະກົດ”

ຂ້າພະເຈົ້າ ຕາງໜ້າ ກະຊວງກະສິກໍາ ແລະ ປ່າໄມ້ ຂໍອວຍພອນໄຊ ມາຍັງການນໍາພັກ-ລັດ, ພະນັກງານ, ທະຫານ, ຕໍາຫຼວດ, ນັກທຸລະກິດ, ນັກຮຽນ-ນັກສຶກສາ ແລະ ປະຊາຊົນບັນດາເຜົ່າ ທີ່ຮັກແພງທັງຫຼາຍ, ຈົ່ງມີສຸຂະພາບ ແລະ ພາລະນາໄມສົມບູນ, ມີຄວາມສຸກກາຍສະບາຍໃຈ ແລະ ມີຜົນສໍາເລັດ ໃນໜ້າທີ່ການງານຂອງພວກທ່ານ.