ວິທະຍຸກະຈາຍສຽງຫວຽດນາມລາຍງານ, ໃນບົດລາຍງານອັບເດດເສດຖະກິດມະຫາພາກ ຫວຽດນາມ, ທະນາຄານໂລກ (WB) ໃຫ້ຂໍ້ສັງເກດວ່າ: ຫວຽດນາມ ມີສັນຍານຕັ້ງໜ້າຫຼາຍຢ່າງ. ດັດຊະນີການຜະລິດອຸດສາຫະກຳ (IIP) ໃນເດືອນພຶດສະພາ ເພີ່ມຂຶ້ນ 2,6% ເມື່ອທຽບໃສ່ເດືອນເມສາ. ໃນຂະນະນັ້ນ, ການດຶງດູດເງິນລົງທຶນໂດຍກົງຈາກຕ່າງປະເທດ (FDI) ສືບຕໍ່ມີສັນຍານຕັ້ງໜ້າ. ໄລ່ຮອດທ້າຍເດືອນພຶດສະພາ ປີ 2024, ຄຳໝັ້ນສັນຍາ FDI ບັນລຸ 11,07 ຕື້ໂດລາ, ສູງກວ່າ 2% ເມື່ອທຽບໃສ່ໄລຍະດຽວກັນຂອງປີ 2023.
ຂ່າວລະບຸວ່າ: ໃນຂະນະນັ້ນ, ບົດລາຍງານອັບເດດເສດຖະກິດຫຼ້າສຸດຂອງທະນາຄານ Standard Chartered ໄດ້ຄາດຄະເນຍອດຜະລິດຕະພັນພາຍໃນ (GDP) ຂອງ ຫວຽດນາມ ຈະບັນລຸລະດັບ 5,3% ໃນໄຕມາດທີ 2 ປີ 2024. ຕາມບັນດານັກຊ່ຽວຊານແລ້ວ, ການເຕີບໂຕໃນການຂາຍຍ່ອຍໄດ້ຮັບການຄາດຄະເນຢູ່ໃນລະດັບ 8,2% ເມື່ອທຽບໃສ່ໄລຍະດຽວກັນຂອງປີ 2023, ໃນເດືອນກໍລະກົດ, ການເຕີບໂຕໃນການສົ່ງອອກແມ່ນໃນລະດັບ 14,2%. ການສົ່ງອອກເຄື່ອງເອເລັກໂຕຣນິກສືບຕໍ່ໄດ້ຮັບການປັບປຸງໃນປີນີ້.
ເມື່ອໃຫ້ຂໍ້ສັງເກດກ່ຽວກັບເສດຖະກິດຫວຽດນາມ, ທ່ານ ເປົາໂລ ເມດາສ ຫົວໜ້າຄະນະຮັບຜິດຊອບ ຫວຽດນາມ ທີ່ກອງທຶນເງິນຕາສາກົນ (IMF) ຄາດວ່າ, ການເຕີບໂຕເສດຖະກິດ ຫວຽດນາມ ຈະຟື້ນຟູຢູ່ລະດັບເກືອບ 6% ໃນປີ 2024.
