ໃນວັນທີ 25 ມິຖຸນາ 2024 ນີ້, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະ ຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫລຽນໄຊແຮງງານ ຊັ້ນ III ໃຫ້ ທ່ານ ຟ້າມວັນ ກຽນ (Pham Van Kien) ຫົວໜ້າຫ້ອງການ ຜູ້ຕາງໜ້າສຳນັກຂ່າວສານຫວຽດນາມ ປະຈຳ ສປປ ລາວ ທີ່ມີຜົນງານດີເດັ່ນ ປະກອບສ່ວນເຂົ້າໃນການປະຕິບັດໜ້າທີ່ໂຄສະນາເຜີຍແຜ່ຂໍ້ມູນ, ຂ່າວສານ ເຫດການສຳຄັນຕ່າງໆ ຢູ່ ສປປ ລາວ ໃຫ້ຊາວຫວຽດນາມ ກໍຄື ໃຫ້ສັງຄົມ ໄດ້ຮັບຮູ້ ຕະຫລອດໄລຍະປີ 2019 ເຖິງປັດຈຸບັນ ໄດ້ຮັບຜົນສຳເລັດ ໃນຫລາຍດ້ານ ເຊິ່ງຜົນງານດັ່ງກ່າວ, ເປັນການປະກອບສ່ວນສຳຄັນເຂົ້າໃນການເສີມສ້າງສາຍພົວພັນມິດ ຕະພາບ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ. ໃຫ້ກຽດເຂົ້າຮ່ວມພິທີປະດັບຫລຽນດັ່ງກ່າວ, ມີບັນດາຫົວໜ້າກົມ, ຮອງກົມອ້ອມຂ້າງກະຊວງ ຖວທ, ຫົວໜ້າອົງການສື່ຫລັກຂອງລາວ, ຜູ້ຕາງໜ້າອົງການສື່ມວນຊົນຫວຽດນາມ ປະຈຳລາວ ແລະ ຜູ້ຕາງໜ້າຈາກກະຊວງທີ່ກ່ຽວຂ້ອງ, ຈາກສະຖານທູດຫວຽດນາມປະຈຳລາວ ເຂົ້າຮ່ວມ.
ໂອກາດນີ້, ທ່ານ ຄຳເຜີຍ ພິລາພາ ຜູ້ອຳນວຍການໃຫຍ່ສຳນັກຂ່າວສານປະເທດລາວ ໄດ້ຍົກໃຫ້ເຫັນຜົນງານການເຄື່ອນໄຫວວຽກງານສື່ມວນຊົນ ຢູ່ ສປປ ລາວ ຂອງທ່ານ ຟ້າມ ວັນ ກຽນ ໃນແຕ່ລະສະໄໝ ນັບແຕ່ສະໄໝທີ 1 ເລີ່ມແຕ່ເດືອນມັງກອນ ປີ 2008 ຫາເດືອນມັງກອນ 2011, ສະໄໝທີ 2 ເລີ່ມແຕ່ເດືອນທັນວາ 2014 ຫາ ເດືອນ ກັນຍາ 2019 ແລະ ສະໄໝທີ 3 ເລີ່ມແຕ່ເດືອນ ສິງຫາ 2019 ເຖິງປັດຈຸບັນ ເຊິ່ງເປັນເວລາ ກວ່າ 14 ປີ ທີ່ປະຕິບັດໜ້າທີ່ຢູ່ ສປປ ລາວ ທ່ານ ຟ້າມ ວັນ ກຽນ ໄດ້ຊຸກຍູ້ສົ່ງເສີມ, ໂຄສະນາການພັດທະນາເສດຖະກິດ-ສັງຄົມ ຂອງ ສປປ ລາວ, ການພົວພັນຮ່ວມມື ຊ່ວຍເຫລືອເຊິ່ງກັນ ແລະ ກັນ, ການຄ້າ-ການລົງທຶນ ຂອງຫວຽດນາມ ຢູ່ ສປປ ລາວ ເຊິ່ງ ສາມາດ ຜະລິດຂ່າວ ແລະ ບົດ ໄດ້ຫລາຍພັນຂ່າວ, ຫລາຍພັນບົດ, ລວມເຖິງສາລະຄະດີ, ຮູບພາບ. ໃນນັ້ນ, ຫລາຍພັນຂ່າວ, ຫລາຍພັນຮູບພາບ ກ່ຽວກັບສະພາບເສດຖະກິດ, ການເມືອງ, ວັດທະນະທຳ-ສັງຄົມ ຂອງລາວ ແລະ ການຮ່ວມມືຂອງລາວກັບບັນດາປະເທດອື່ນໆ ໄດ້ສົ່ງໄປອອກຂ່າວ ຢູ່ ສສ ຫວຽດນາມ ເຊິ່ງສ່ອງແສງໃຫ້ເຫັນແຈ້ງ ແລະ ມີຊີວິດຊີວາ ກ່ຽວກັບສາຍພົວພັນພິເສດ ລະຫວ່າງ ສອງຊາດ ລາວ-ຫວຽດນາມ. ນອກນີ້ ຍັງມີຫລາຍພັນຂ່າວ, ບົດ, ຮູບພາບ ແລະ ສາລະຄະດີໂທລະພາບ ກ່ຽວກັບຄວາມສາມາດບົ່ມຊ້ອນ ໃນການພັດທະນາເສດຖະກິດຂອງລາວ ຢູ່ໃນທຸກຂົງເຂດ ໂດຍສະເພາະຂົງເຂດການທ່ອງທ່ຽວ ແລະ ກະສິກຳ ເປັນຕົ້ນ ກ່ຽວກັບສະຖານທີ່ທ່ອງທ່ຽວທີ່ມີຊື່ສຽງ, ບັນດາຕົວແບບການພັດທະນາການທ່ອງທ່ຽວ ທີ່ດີຕິດພັນກັບການພັດທະນາແບບຍືນຍົງຂອງລາວ ຫລື ກ່ຽວກັບຮູບແບບການສ້າງເສດຖະກິດ ແບບມີຫົວຄິດປະດິດສ້າງ ແລະ ມີປະສິດທິຜົນຂອງລາວເຮົາ ກໍໄດ້ສົ່ງໄປອອກຂ່າວ ຢູ່ ສສ ຫວຽດນາມ ເຊັ່ນດຽວກັນ.
ທ່ານ ຟ້າມ ວັນ ກຽນ ໄດ້ປະຕິບັດໜ້າທີ່ ເປັນຂົວຕໍ່ໃຫ້ແກ່ການພົວພັນລະຫວ່າງສອງສຳນັກຂ່າວສານ ຂອງສອງປະເທດ ໄດ້ຊ່ວຍບັນດາຄະນະຜູ້ແທນສຳນັກຂ່າວສານຫວຽດນາມ ມາຢ້ຽມຢາມ ແລະ ເຮັດວຽກຢູ່ລາວ ແລະ ບັນດາຄະນະຜູ້ແທນສຳນັກຂ່າວສານປະເທດລາວ ໄປຢ້ຽມຢາມ, ເຮັດວຽກ ແລະ ຮ່ຳຮຽນຢູ່ຫວຽດນາມ, ທັງໄດ້ຊ່ວຍຄະນະເຕັກນິກຂອງສຳນັກຂ່າວສານຫວຽດນາມ ມາຕິດຕັ້ງເຄື່ອງອຸປະກອນ, ສ້າງເວັບໄຊ ຊ່ອຍເຫລືອສຳນັກຂ່າວສານປະເທດລາວ, ຊ່ວຍເຫລືອດ້ານອິນເຕີເນັດ, ຝຶກອົບຮົມການຂຽນຂ່າວ, ຂຽນບົດ ແລະ ຖ່າຍພາບນິ້ງ, ວິດີໂອ ແລະ ການຕັດຕໍ່ ຢູ່ຫວຽດນາມ ໃຫ້ແກ່ສຳນັກຂ່າວສານ ປະເທດລາວຫລາຍຄັ້ງ.
ທ່ານ ຄຳເຜີຍ ພິລາພາ ຍັງໃຫ້ຮູ້ຕື່ມວ່າ: ຄຽງຄູ່ກັບການເຮັດວຽກງານເປັນຂົວຕໍ່ການພົວພັນລະຫວ່າງ ສຳນັກຂ່າວສານປະເທດລາວ ແລະ ສໍານັກຂ່າວສານຫວຽດນາມແລ້ວ ທ່ານ ຟ້າມວັນ ກຽນ ຍັງມີການພົວພັນທີ່ດີ ກັບບັນດາອົງການສື່ມວນຊົນຂອງລາວ ແລະ ໄດ້ປະກອບສ່ວນຊ່ວຍເຫລືອສື່ມວນຊົນລາວ ພັດທະນາແບບຍືນຍົງ, ມີການພົວພັນທີ່ດີກັບບັນດາກະຊວງ, ຂະແໜງການອື່ນໆ ແລະ ທ້ອງຖິ່ນຢູ່ລາວ ໂດຍສະເພາະ ໄດ້ສ້າງຜົນງານປະກອບສ່ວນ ໃຫ້ແກ່ການພົວພັນ ລະຫວ່າງ ສຳນັກຂ່າວສານປະເທດລາວ ເເລະ ສຳນັກຂ່າວສານຫວຽດນາມ ແລະ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນ ສອງຊາດ ລາວ-ຫວຽດນາມ ໃຫ້ໄດ້ຮັບການພັດທະນາຂຶ້ນໄປເລື້ອຍໆ.
ພ້ອມນີ້, ທ່ານ ຟ້າມ ວັນ ກຽນ ຍັງໄດ້ສຸມໃສ່ປະຕິບັດໜ້າທີ່ ໂຄສະນາເຜີຍແຜ່ ຂໍ້ມູນຂ່າວສານ ກ່ຽວກັບເຫດການສຳຄັນຕ່າງໆ ຢູ່ ສປປ ລາວ ເຊັ່ນ: ກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ, ການເລືອກຕັ້ງສະພາແຫ່ງຊາດຊຸດທີ IX ຂອງລາວ, ບັນດາການຢ້ຽມຢາມຂອງຄະນະຜູ້ແທນຂັ້ນສູງສອງປະເທດ, ການມອບຮັບອາຄານຫລັງໃໝ່ຫໍສະພາແຫ່ງຊາດ, ຂອງຂວັນທີ່ພັກ, ລັດຫວຽດນາມ ມອບໃຫ້ພັກ, ລັດລາວ. ພິເສດໃນປີສາມັກຄີມິດຕະພາບ ລາວ-ຫວຽດນາມ 2022, ສຳນັກຂ່າວສານຫວຽດນາມ ໄດ້ພະຍາຍາມສຸດຄວາມສາມາດ, ປະຕິບັດການອອກຂ່າວ, ບົດກ່ຽວກັບການສະເຫລີມສະຫລອງປີສາມັກຄີ ມິດຕະພາບ ລາວ-ຫວຽດນາມ ຫລາກຫລາຍສີສັນ ຍົກໃຫ້ເຫັນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ລາວ-ຫວຽດນາມ ອ້າຍນ້ອງ.
