Wednesday, July 24, 2024
Homeຂ່າວການເມືອງຮອງປະທານສະພາແຫ່ງຊາດ ປາໄສໃນ ກອງປະຊຸມ ເວທີຄູ່ຮ່ວມມືເສດຖະກິດຮອບດ້ານ

ຮອງປະທານສະພາແຫ່ງຊາດ ປາໄສໃນ ກອງປະຊຸມ ເວທີຄູ່ຮ່ວມມືເສດຖະກິດຮອບດ້ານ

ວັນທີ 21 ມິຖຸນາ 2024 ຜ່ານມາ, ຄະນະຜູ້ແທນສະພາ ແຫ່ງຊາດລາວ ນໍາໂດ ທ່ານ ສົມມາດ ພົນເສນາ ຮອງປະທານສະ ພາແຫ່ງຊາດ ໄດ້ເຂົ້າຮ່ວມພິທີເປີດ ແລະ ກ່າວຄໍາປາໄສໃນກອງປະຊຸມເວທີຄູ່ຮ່ວມມືເສດຖະກິດຮອບດ້ານ (RCEP) 2024 ທີ່ເມືອງຫວາງຊານ ແຂວງອານຮຸຍ ສປ ຈີນ ໂດຍທ່ານໄດ້ມີຄຳເຫັນກ່ຽວກັບການຮ່ວມມື ລະຫວ່າງ ລັດຖະບານທ້ອງຖິ່ນບັນດາປະ ເທດ ແລະ ບັນດາຕົວເມືອງມິດຕະພາບ ເຊິ່ງໄດ້ເນັ້ນເຖິງຄວາມສໍາຄັນຂອງກອງປະຊຸມຄັ້ງນີ້, ເປັນການຊຸກຍູ້ການປະຕິ ບັດສັນຍາຄູ່ຮ່ວມມືເສດຖະກິດຮອບດ້ານໃນພາກພື້ນ RCEP ໃຫ້ມີຄຸນນະ ພາບສູງ, ຊຸກຍູ້ການເພີ່ມທະວີຄວາມເຂົ້າອົກເຂົ້າໃຈຕໍ່ບັນດາທ້ອງ ຖິ່ນຂອງບັນດາປະເທດສະມາຊິກ RCEP, ຄົ້ນຄວ້າກາລະໂອກາດໃນການດຳເນີນທຸລະກິດ, ຊອກຫາຄູ່ຮ່ວມມືທີ່ດີ, ຊຸກຍູ້ການພົວພັນຮ່ວມມືຢ່າງເລິກເຊິ່ງ ແລະ ກວ້າງຂວາງ ໃຫ້ບັນລຸໄດ້ໝາກຜົນ ໂດຍຕ່າງຝ່າຍຕ່າງມີຜົນປະໂຫຍດ ລະຫວ່າງບັນດາປະເທດໃນພາກພື້ນ RCEP ໂດຍສະເພາະ ສປປ ລາວ ກໍໄດ້ຮັບຜົນປະ ໂຫຍດໃນຖານະທີ່ເປັນສະມາຊິກ ແລະ ໄດ້ຮັບຜົນປະໂຫຍດໃນການຈັດຕັ້ງປະຕິບັດສັນຍາໃນຂອບນີ້ຈຳນວນໜຶ່ງ.

ນອກນັ້ນ, ທ່ານຍັງໄດ້ມີຄໍາເຫັນກ່ຽວກັບການຮ່ວມມືລະ ຫວ່າງ ສປປ ລາວ ກັບ ສປ ຈີນ ໃນໄລ ຍະຜ່ານມາ ທີ່ໄດ້ມີການພົວພັນກັນນັບມື້ນັບເລິກເຊິ່ງ ຕາມທິດ 4 ດີ (ເພື່ອນທີ່ດີ, ສະຫາຍທີ່ດີ, ບ້ານໃກ້ເຮືອນຄຽງທີ່ດີ ແລະ ຄູ່ຮ່ວມມືທີ່ດີ) ແລະ ສປປ ລາວ ຍາມໃດກໍສະໜັບສະໜູນນະໂຍບາຍ ຈີນດຽວ, ສະໜັບສະໜູນ ແລະ ຕັ້ງໜ້າເຂົ້າຮ່ວມຂໍ້ລິເລີ່ມຂອງ ສະຫາຍ ສີຈິ້ນຜິງ ປະທານປະເທດ ແຫ່ງ ສປ ຈີນ ກ່ຽວກັບໜຶ່ງແລວທາງໜຶ່ງເສັ້ນທາງ, ການພັດທະນາໂລກ, ຄວາມໝັ້ນຄົງໂລກ ແລະ ອະລິຍະທໍາໂລກ; ພິເສດ ແມ່ນໄດ້ມີການຈັດຕັ້ງຜັນຂະຫຍາຍແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ເຊິ່ງສອງປະເທດໄດ້ມີການຮ່ວມມືທາງດ້ານການພັດທະນາຊັບພະຍາ ກອນມະນຸດ, ດ້ານເສດຖະກິດ, ການຄ້າ, ການລົງທຶນ, ການທ່ອງ ທ່ຽວ ແລະ ອື່ນໆ. ໃນນັ້ນ, ລັດຖະບານຂອງສອງປະເທດ ໄດ້ເອົາໃຈໃສ່ຈັດຕັ້ງປະຕິບັດໂຄງການເສັ້ນທາງລົດໄຟ ລາວ-ຈີນ, ໂຄງການເສັ້ນທາງດ່ວນ ວຽງຈັນ-ວັງວຽງ, ເຂດພັດທະນາກວມລວມໄຊເສດຖາ, ໂຄງການປັບປຸງໂຮງໝໍມະໂຫສົດ, ໂຄງການຊ່ວຍເຫລືອແກ້ໄຂຄວາມທຸກຍາກຢູ່ທ້ອງຖິ່ນຂອງ ສປປ ລາວ ເຊິ່ງພວມນໍາເອົາຜົນສໍາເລັດ ແລະ ຜົນປະໂຫຍດມາສູ່ປະຊາຊົນລາວ ໂດຍສະເພາະເປັນການປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ.

ສໍາລັບ ການພົວພັນຢູ່ຂັ້ນທ້ອງຖິ່ນໃນໄລຍະຜ່ານມາ ກໍນັບມື້ນັບເລິກເຊິ່ງ ຫລາຍແຂວງໄດ້ມີການແຮກສ່ຽວກັບແຂວງຂອງ ສປ ຈີນ. ສະເພາະແຂວງອານຮຸຍ ກໍໄດ້ມີການເຊັນບົດບັນ ທຶກການພົວພັນຮ່ວມມືກັບແຂວງອັດຕະປື ແລະ ຜ່ານມາກໍໄດ້ມີບໍລິສັດຈາກແຂວງອານຮຸຍຈໍານວນໜຶ່ງ ເຂົ້າໄປລົງທຶນ ຢູ່ ສປປ ລາວ ຈຶ່ງໄດ້ສະເໜີໃຫ້ມີການຮ່ວມມືກັບແຂວງອື່ນໆຂອງ ສປປ ລາວ ເພີ່ມຕື່ມ ເພື່ອໃຫ້ບັນດາບໍລິສັດຂອງ ສປ ຈີນ ທີ່ມີຄວາມ ສາມາດ ແລະ ມີຄວາມສົນໃຈ ເຂົ້າມາລົງທຶນຢູ່ ສປປ ລາວ ຫລາຍຂຶ້ນ.

ນອກຈາກເຂົ້າຮ່ວມກອງປະຊຸມ ແລະ ກ່າວປາໄສແລ້ວ, ຄະ ນະຜູ້ແທນສະພາແຫ່ງຊາວລາວ ຍັງໄດ້ພົບປະໂອ້ລົມກັບກົງສຸນໃຫຍ່ປະຈຳກວາງໂຈ ແລະ ໄປຢ້ຽມຢາມ, ພົບປະໂອ້ລົມພະນັກງານສະ ຖານກົງສຸນໃຫຍ່ປະຈຳນະຄອນຊຽງໄຮ, ຢ້ຽມຊົມຫໍພິພິທະ ພັນປະຫວັດສາດ ແລະ ພິພິທະພັນຊາ ເຊັຍຫລົງຕ້າ ຂອງເມືອງຫວາງຊານ ແລະ ສະຖານທີ່ທ່ອງທ່ຽວທີ່ມີຊື່ສຽງຈຳນວນໜຶ່ງ ຂອງແຂວງອານຮຸຍ.

ຂ່າວ-ພາບ: ສະພາແຫ່ງຊາດ

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments