ສຳນັກຂ່າວບລູມເບີຣກ ເມື່ອບໍ່ດົນມານີ້ລັດຖະບານການາດາ ກຽມປັບຂຶ້ນພາສີ ນຳເຂົ້າ ຊຸດໃໝ່ ສຳລັບ ລົດໄຟຟ້າ(EV)ທີ່ຜະລິດໂດຍ ບໍລິສັດຈີນ ໃຫ້ສອດຄ່ອງກັບ ມາດຕະການ ຂອງ ສ.ອາເມລິກາ ແລະ ສະຫະພາບ ເອີຣົບ(EU) ໂດຍໃນຂະນະນີ້ ລັດຖະບານ ພວມພິຈາລະນາ ຕັດສິນໃຈ ໃນຂັ້ນສຸດທ້າຍ ທີ່ກ່ຽວຂ້ອງກັບ ການດຳເນີນ ມາດຕະການ ດັ່ງກ່າວ ໃນໄວໆນີ້ ຫລັງຈາກ ສ.ອາເມລິກາ ປະກາດ ຂຶ້ນພາສີ ນຳເຂົ້າ ລົດໄຟຟ້າ ທີ່ຜະລິດໃນ ສປ ຈີນ ໃນອັດຕາ 102,5%ໃນເດືອນ ພືດສະພາ ຜ່ານມາ ແລະ ສະຫະພາບ ເອີຣົບ ມີແຜນ ປັບຂຶ້ນ ພາສີ ນຳເຂົ້າ ລົດໄຟຟ້າ ຈາກ ສປ ຈີນ ສູງເຖິງ 48% ສຳລັບ ບາງລຸ້ນ ຫລັງຈາກ ປະເທດ ຕາເວັນຕົກ ມີຄວາມເປັນຫ່ວງ ຫລາຍຂຶ້ນ ກັບການຜະລິດ ສິນຄ້າ ລາຍການ ສຳຄັນ ທີ່ຫລາຍ ເກີນໄປ ຂອງ ສປ ຈີນ ແລະ ພະຍາຍາມ ຕີຕະຫລາດ ຕາເວັນຕົກ ໂດຍສະເພາະ ລົດໄຟຟ້າ ພະລັງງານ ແບດເຕີລີ(BEV)ເປັນເປົ້າໝາຍຫລັກ. ຂະນະທີ່ ຜູ້ຜະລິດລົດ ຈາກ ສປ ຈີນ ເຊັ່ນ BYD ໄດ້ກ້າວໄປໜ້າ ຢ່າງແຂງແຮງ ເຂົ້າສູ່ ຕະຫລາດລົດ ໃນທົ່ວໂລກ ຢ່າງຈິງຈັງ. ສຳລັບ ຍອດມູນຄ່າ ການນຳເຂົ້າ ລົດໄຟຟ້າ ຂອງການາດາ ຈາກ ສປ ຈີນ ໃນປີ 2023ໄດ້ເພີ່ມຂຶ້ນເປັນ 2,2ຕື້ໂດລາ ການາດາ (1,6ຕື້ໂດລາ ສະຫະລັດ) ຈາກຕ່ຳກວ່າ 100ລ້ານໂດລາ ການາດາ ໃນປີ 2022.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
