ໜັງສືພິມ Rodong ຂອງພັກແຮງງານ ສປປ ເກົາຫລີ ໄດ້ພິມເຜີຍແຜ່ຈົດໝາຍ ຂອງ ທ່ານ ວາລາດີເມຍ ປູຕິນ (Vladimir Putin) ປະທານາທິບໍດີຣັດເຊຍ ທີ່ໃຫ້ຄຳໝັ້ນສັນຍາວ່າ: ຣັດເຊຍຈະສ້າງລະບົບການຄ້າ ແລະ ຄວາມໝັ້ນຄົງກັບ ສປປ ເກົາຫລີ ຊຶ່ງບໍ່ໄດ້ຖືກ ຄວບຄຸມໂດຍ ປະເທດ ຕາເວັນຕົກແລະໃຫ້ຄຳໝັ້ນສັນຍາ ຈະສືບຕໍ່ໃຫ້ການສະໜັບສະໜຸນຕໍ່ ສປປ ເກົາຫລີ ຢ່າງບໍ່ມີການປ່ຽນແປງໃນຕໍ່ໜ້າ ຫລັງຈາກທັງສອງປະເທດໄດ້ພັດທະນາຄວາມສຳພັນອັນດີຕໍ່ກັນ ແລະ ເປັນຫຸ້ນສ່ວນກັນມາຢ່າງຍາວນານ ໃນໄລຍະ 70 ປີຜ່ານມາ ໂດຍບົນພື້ນຖານຄວາມສະເໝີພາບເຄົາລົບ ແລະ ໄວ້ວາງໃຈ ເຊິ່ງກັນ ແລະ ກັນ. ຜູ້ນຳ ຣັດເຊຍ ໄດ້ກ່າວຂອບໃຈ ສປປ ເກົາຫລີ ທີ່ໃຫ້ການສະໜັບສະໜຸນ ຕໍ່ການປະຕິບັດງານ ພິເສດ ຂອງຣັດເຊຍ ໃນອູແກຣນ. ພ້ອມດຽວກັນນີ້ຣັດເຊຍ ຍັງຈະສະໜັບສະໜູນຄວາມພະຍາຍາມ ຂອງ ສປປ ເກົາຫລີ ໃນການປົກປ້ອງ ຜົນປະໂຫຍດ ອງຕົນໃນທ່າມກາງ ຄວາມກົດດັນ ແລະ ໄພຂົ່ມຂູ່ ຂອງ ສ.ອາເມລິກາ. ການເຜີຍແຜ່ ຈົດໝາຍດັ່ງກ່າວ ມີຂຶ້ນໃນໂອກາດ ທ່ານ ວາລາດີເມຍ ປູຕິນ ເດີນທາງມາ ຢ້ຽມຢາມ ສປປ ເກົາຫລີ ຢ່າງເປັນທາງການ ໃນວັນທີ18-19ມິຖຸນານີ້ ເພື່ອຍົກລະດັບ ການຮ່ວມມື ສອງຝ່າຍ ແລະ ປຶກສາຫາລືຫລາຍບັນຫາສຳຄັນ ທີ່ພົ້ນເດັ່ນໃນໂລກ ຈາກນັ້ນ ທ່ານ ວາລາດີເມຍ ປູຕິນ ຈະເດີນທາງ ຢ້ຽມຢາມ ສສ ຫວຽດນາມ ຢ່າງເປັນທາງການ ໃນລະຫວ່າງ ວັນທີ19-20ມິຖຸນານີ້ ເພື່ອຣັດແໜ້ນ ຄວາມສຳພັນ ການຮ່ວມມືສອງຝ່າຍ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
