ໃນໂອກາດຊີ້ແຈງຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ວັນທີ 14 ມິຖຸນາ 2014 ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ໃຫ້ຮູ້ກ່ຽວກກ່ຽວກັບການກຳນົດການເຄື່ອນໄຫວ ຮ້ານບັນເທີງຕ່າງໆ ໃນທົ່ວປະເທດວ່າ: ໂດຍອີງຕາມດໍາລັດ ວ່າດ້ວຍການບັນເທິງ ສະບັບເລກທີ 315/ລບ, ລົງວັນທີ 2 ຕຸລາ 2017, ມາດຕາ 21 ກ່ຽວກັບການ ຂໍອະນຸຍາດດໍາເນີນທຸລະກິດບັນເທິງ ບຸກຄົນ, ນິຕິບຸກຄົນ ພາຍໃນ ແລະ ຕ່າງປະເທດ ທີ່ມີຈຸດປະສົງຂໍອະນຸຍາດດໍາເນີນ ທຸລະກິດບັນເທິງ ປະເພດ ດິສໂກເທັກ, ໄນຄຣັບ, ພັບ ແລະ ສະເນັກບຣາ ແມ່ນໃຫ້ຍື່ນຄໍາຮ້ອງຢູ່ຫ້ອງການບໍລິການ ລົງທຶນປະຕູດຽວຂັ້ນສູນກາງ; ສໍາລັບທຸລະກິດບັນເທິງ ປະເພດ ບຣາ, ຄາຣາໂອເກະ ແລະ ຄອນເສີດ ໃຫ້ຍື່ນຄໍາຮ້ອງ ລົງທຶນປະຕູດຽວຢູ່ຂັ້ນແຂວງ ຫລື ນະຄອນຫລວງທີ່ກ່ຽວຂ້ອງ. ແຕ່ໃນການຈັດຕັ້ງປະຕິບັດຕົວຈິງ ກ່ຽວກັບການ ອະນຸຍາດ, ການຄຸ້ມຄອງ ແລະ ການຕິດ ຕາມກວດກາທຸລະກິດບັນເທິງທຸກປະເພດ ດັ່ງທີ່ໄດ້ກ່າວມາຂ້າງເທິງນັ້ນ, ກະຊວງ ຖວທ ໄດ້ມອບໃຫ້ອົງການປົກຄອງຂັ້ນທ້ອງ ຖິ່ນ ເປັນຜູ້ອະນຸຍາດ, ຄຸ້ມຄອງ ແລະ ຕິດຕາມກວດກາ ມາຕັ້ງແຕ່ປີ 2013 ກະຊວງ ຖວທ ໄດ້ມອບວຽກ 3 ສ້າງ ຊຶ່ງໃນນັ້ນ ລວມທັງກິດຈະການບັນເທິງ ທັງຫມົດ ໃຫ້ອົງການປົກຄອງ ທ້ອງຖິ່ນເປັນຜູ້ຮັບຜິດ ຊອບໂດຍກົງ ສືບເນື່ອງມາຈົນຮອດປັດຈຸບັນນີ້. ຕໍ່ມາໃນປີ 2017 ລັດຖະບານ ໄດ້ອອກດໍາລັດວ່າ ດ້ວຍການບັນເທິງ ສະບັບເລກທີ 315/ລບ, ລົງວັນທີ 2 ຕຸລາ 2017 ເຖິງວ່າດຳລັດດັ່ງກ່າວຈະກໍານົດການແບ່ງຂັ້ນຄຸ້ມ ຄອງ ລະຫວ່າງ ສູນກາງ ແລະ ທ້ອງຖິ່ນ ແລ້ວກໍ່ຕາມ ແຕ່ພາກຈັດຕັ້ງປະຕິບັດຕົວຈິງ ຍັງແມ່ນອົງການປົກຄອງຂັ້ນ ທ້ອງຖິ່ນ ເປັນຜູ້ອະນຸມັດໂດຍກົງ.
ຕໍ່ກັບສະພາບການດັ່ງກ່າວ ຖືວ່າກິດຈະການ ດັ່ງກ່າວ ແມ່ນຂຶ້ນກັບຄວາມຮັບຜິດຊອບ ຂອງອົງການປົກຄອງຂັ້ນທ້ອງ ຖິ່ນ ຊຶ່ງເຫັນວ່າສອດຄ່ອງກັບແນວທາງນະໂຍບາຍຂອງລັດຖະ ບານໃນໄລຍະໃໝ່ ໂດຍ ສະເພາະ ແຈ້ງການສະບັບເລກທີ 200/ຫສນຍ, ລົງວັນທີ 30 ມັງກອນ 2024 ຂອງ ຫສນຍ ຊຶ່ງໄດ້ມອບກິດຈະການ ບັນເທິງທັງຫມົດໃຫ້ອົງການປົກຄອງທ້ອງຖິ່ນເປັນຜູ້ຮັບຜິດຊອບໂດຍກົງ ແລະ ຍັງຮັກສາກິດຈະການບັນເທິງ ທັງຫມົດ ຕໍ່ໄວ້ຢູ່ໃນບັນຊີຄວບຄຸມຂອງລັດຖະບານ. ກັບສະພາບ ການດັ່ງກ່າວ, ໃນໄລຍະຜ່ານມາເຖິງວ່າກິດຈະການ ດັ່ງກ່າວນີ້ຈະນອນຢູ່ໃນບັນຊີຄວບຄຸມ ຂອງລັດຖະບານ ແລະ ຢູ່ໃນການຄຸ້ມ ຄອງຂອງອົງການປົກຄອງຂັ້ນທ້ອງຖິ່ນແລ້ວກໍຕາມ ແຕ່ບັນຫາຕ່າງໆທີ່ມີຄວາມລະອຽດອອນຕໍ່ວັດທະນະທໍາ-ສັງຄົມ ກໍ່ຍັງມີປະກົດໃຫ້ເຫັນ ໂດຍສະເພາະ ການມົ້ວສຸມສິ່ງເສບຕິດ, ການຄ້າປະເວນີ, ການອາລະວາດ-ຕີກັນ, ສຽງເນື່ອງນັ້ນ, ການເປີດການບໍລິການບັນເທິງ ກາຍໂມງເວລາທີ່ກຳນົດ ແລະ ບັນຫາອື່ນໆ.
ບັນຫາຕ່າງໆນັ້ນ ຍັງບໍ່ທັນຖືກແກ້ໄຂຢ່າງເປັນຮູບປະທໍາ ແລະ ຍິ່ງມີບັນຫາເພີ່ມຂຶ້ນ ເຖິງວ່າກິດຈະການບັນເທິງ ຈະນອນຢູ່ໃນບັນຊີຄວບຄຸມ ແລະ ການຄຸ້ມຄອງຂອງອົງການປົກຄອງຂັ້ນທ້ອງຖິ່ນແລ້ວກໍ່ຕາມ. ເພື່ອແກ້ໄຂ ແລະ ຮັບມືກັບສະພາບການດັ່ງກ່າວ ລັດຖະບານໄດ້ສຸມໃສ່ການປັບປຸງກົດໝາຍທີ່ກ່ຽວຂ້ອງ ໂດຍສະເພາະ ກົດໝາຍວ່າດ້ວຍການທ່ອງທ່ຽວ,ກົດໝາຍວ່າດ້ວຍສິລະປະການສະແດງ ແລະ ນິຕິກຳລຸ່ມກົດໝາຍທີ່ກ່ຽວຂ້ອງ ຊຶ່ງການປັບປຸງກົດໝາຍ ແລະ ນິຕິກຳເຫລົ່ານີ້ ກໍ່ແມ່ນເພື່ອໃຫ້ສອດຄ່ອງກັບ ແນວທາງການປ່ຽນແປງໃໝ່ ຂອງລັດຖະບານ ໂດຍສະເພາະ ແຈ້ງການຂອງຫ້ອງວ່າການສໍານັກງານນາຍົກລັດ ຖະມົນຕີ ສະບັບ ເລກທີ 200/ຫສນຍ, ລົງວັນທີ 30 ມັງກອນ 2024.
ທ່ານ ນາງ ສວນສະຫວັນ ວິຍະເກດ ໃຫ້ຮູ້ຕື່ມວ່າ: ລັດ ຖະບານ ກໍຄືກະຊວງ ຖວທ ຈະໄດ້ສືບຕໍ່ ແລະ ລົງເລິກໃນການຄົ້ນຄວ້າການຜັນຂະຫຍາາຍນິຕິກຳໃຕ້ກົດໝາຍຕື່ມ ເພື່ອແບ່ງໜ້າທີ່ຄວາມຮັບຜິດຊອບ, ການຄຸ້ມຄອງ ແລະ ການປະສານສົມທົບກັນ ລະຫວ່າງສູນກາງ ແລະ ທ້ອງຖິ່ນໃຫ້ລະອຽດ ແລະຊັດເຈນ ເພື່ອສາມາດແກ້ໄຂບັນຫາດັ່ງກ່າວໃຫ້ຂາດຕົວໄປເລື້ອຍໆ.ເວົ້າລວມແລ້ວ ຕໍ່ກັບປະກົດການຫຍໍ້ທໍ້ຕ່າງໆທີ່ເກີດຂື້ນ ກໍມີຫລາຍສາເຫດທັງໃນຕົວ ແລະ ນອກຕົວ. ໃນນັ້ນ, ບັນຫາໜື່ງທີ່ພວກເຮົາຍັງພົບຄວາມຫຍຸ້ງຍາກແມ່ນຍ້ອນງົບປະມານໃນກາອະນຸລັກ ປົກປັກຮັກສາ ແລະ ເສີມຂະຫຍາຍວຽກງານມໍລະດົກ ແລະ ວັດ ທະນະທໍາ ແມ່ນຍັງມີຈຳນວນຈຳກັດ ແລະ ບໍ່ທັນສອດຄ່ອງກັບການຈັດຕັ້ງປະຕິບັດເຂົ້າໃນວຽກງານຕົວຈິງ. ສະນັ້ນ, ໃນຕໍ່ໜ້າເພື່ອຈໍາເປັນຕ້ອງໄດ້ພິຈາລະນາຈັດສັນງົບປະມານເຂົ້າໃສ່ຕື່ມ ເພື່ອເຮັດວຽກງານປົກປັກຮັກສາ ແລະ ເສີມຂະຫຍາຍວຽກງານດັ່ງກ່າວ ໃຫ້ດີຂຶ້ນ.
