ໃນການດໍາເນີນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX. ສະມາຊິກສະພາແຫ່ງຊາດ ໄດ້ຊັກຖາມຕໍ່ຂະແໜງການທີ່ກ່ຽວຂ້ອງກ່ຽວກັບການແກ້ໄຂໜີ້ສິນ ຕໍ່ໂຄງການລົງທຶນຂອງລັດດ້ວຍຮູບແບບອວ່າຍໜີ້ສາມແຈ ໃນບ້ວງ 8,000 ຕື້ກີບ ໄດ້ສໍາເລັດ ຈໍານວນ 7,390 ຕື້ກີບ ເທົ່າກັບ 92% ຂອງແຜນການ, ສ່ວນທີ່ເຫຼືອຈໍານວນ 610 ຕື້ກີບ ເທົ່າກັບ 8%, ລັດຖະບານ ຈະມີການດໍາເນີນຄືແນວໃດ? ຫຼື ຈະສືບຕໍ່ອວ່າຍໜີ້ສາມແຈ ຕໍ່ໂຄງການທີ່ລັດຕິດໜີ້ຫົວໜ່ວຍທຸລະກິດທີ່ສໍາເລັດໂຄງການ ແຕ່ຍັງບໍ່ທັນຮັບເງິນ?.
ທ່ານ ສັນຕິພາບ ພົມວິຫານ, ລັດຖະມົນຕີກະຊວງການເງິນ ໄດ້ຊີ້ແຈງຕໍ່ຄໍາຖາມດັ່ງກ່າວໃນວັນທີ 13 ມິຖຸນານີ້ວ່າ: ຜ່ານການຈັດຕັ້ງປະຕິບັດມາຮອດປັດຈຸບັນ ໄດ້ເພີ່ມຂຶ້ນຈາກ 92% ມາເປັນ 94%, ສ່ວນທີ່ເຫຼືອ ກະຊວງການເງິນ ຈະສືບຕໍ່ຈັດຕັ້ງປະຕິບັດ ຈົນຮອດວັນທີ 01 ກໍລະກົດ 2024 ຕາມແຈ້ງການຂອງກະຊວງ ການເງິນ ສະບັບເລກທີ 1688/ກງ, ລົງວັນທີ 14 ພຶດ ສະພາ 2024. ຖ້າກໍລະນີຍັງເຫຼືອກໍຈະສືບຕໍ່ສົມທົບກັບ ກະຊວງ ແຜນການ ແລະ ການລົງທຶນ ແລະ ທະນາຄານ ແຫ່ງ ສປປ ລາວ ຄົ້ນຄວ້າຈັດສັນຄືນ, ພ້ອມທັງຈັດຕັ້ງປະຕິບັດໃຫ້ສໍາເລັດໃນປີ 2024.
ທ່ານ ສັນຕິພາບ ພົມວິຫານ ຊີ້ແຈງຕື່ມວ່າ: ການແກ້ໄຂໜີ້ ສິນດ້ວຍຮູບການດັ່ງກ່າວເຫັນວ່າ ເປັນການແກ້ໄຂໜີ້ສິນແບບບໍ່ຂາດໂຕ, ພຽງແຕ່ເປັນການຍ້າຍໜີ້ຈາກຫົວໜ່ວຍທຸລະກິດໄປເປັນໜີ້ຢູ່ທະນາຄານ. ພ້ອມນັ້ນ, ລັດຖະບານ ຍັງຕ້ອງແບກຫາບພາລະດອກ ເບ້ຍປະມານ 5-6% ຕໍ່ປີ. ອີກດ້ານໜຶ່ງ, ໃນດ້ານມະຫາພາກອາດຈະເປັນສິ່ງທ້າທາຍ ຕໍ່ການຄຸ້ມຄອງປະລິມານເງິນໃນລະບົບເສດຖະກິດ. ສະນັ້ນ, ກະຊວງການເງິນ ຈະລົງເລິກຄົ້ນຄວ້າກົນໄກການແກ້ໄຂໜີ້ສິນໃນຕໍ່ໜ້າ ດ້ວຍຫຼາຍຮູບແບບໃຫ້ມີປະສິດທິຜົນກວ່າເກົ່າ.
