ເມື່ອບໍ່ດົນມານີ້, ມີປະຊາຊົນສ່ອງແສງຜ່ານສື່ອອນລາຍວ່າ: ມີປາຕາຍຈຳນວນຫນຶ່ງ ແລະ ມີກິ່ນເນົ່າເໝັນຢູ່ຫ້ວຍນໍ້າທຳ ມະຊາດ ເຂດບ້ານຄົກເຂົ້າດໍ, ເມືອງຊະນະຄາມ, ແຂວງວຽງຈັນ.
ຕໍ່ຂ່າວດັ່ງກ່າວ, ທ່ານ ແກ້ວ ພິມມະວົງ ເຈົ້າເມືອງຊະນະຄາມ ໄດ້ຊີ້ແຈງຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວວ່າ: ຜ່ານການກວດກາຕົວຈິງຂອງເຈົ້າໜ້າທີ່ກ່ຽວຂ້ອງ ເຫັນວ່າຂ່າວດັ່ງກ່າວມີມູນຄວາມຈິງແທ້. ສາເຫດຂອງປາຕາຍແມ່ນເກີດມາຈາກອ່າງບໍາບັດນໍ້າເປື້ອນຂອງໂຮງງານມັນ ຕົ້ນແຫ່ງໜຶ່ງທີ່ກໍາລັງກໍ່ສ້າງຢູ່ເຂດໃກ້ຄຽງບໍ່ສາມາດຮອງຮັບນໍ້າໄດ້ຍ້ອນມີຝົນຕົກ ເຮັດໃຫ້ນໍ້າເປື້ອນລົ້ນອອກຈາກບໍ່ບໍາບັດແລ້ວໄຫລລົງສູ່ຫ້ວຍທໍາມະຊາດທີ່ຢູ່ໃກ້ຄຽງ ຊຶ່ງເປັນຫ້ວຍນ້ອຍເຮັດ ໃຫ້ປາຕາຍຈໍານວນໜຶ່ງ.
ພາກສ່ວນທີ່ກ່ຽວຂ້ອງຂອງເມືອງຮ່ວມກັບເຈົ້າຂອງໂຮງງານມັນຕົ້ນ ແລະ ອົງການປົກຄອງບ້ານຄົກເຂົ້າດໍ ປະເມີນຜົນເສຍຫາຍຢ່າງລະອຽດ ຊຶ່ງເຈົ້າຂອງໂຮງງານຮັບປາກຈະຮັບຜິດຊອບຜົນເສຍຫາຍທັງໝົດຢ່າງສົມເຫດສົມຜົນທັງສອງຝ່າຍ. ນອກ ຈາກນີ້ ອົງການປົກຄອງເມືອງ ໄດ້ແຈ້ງເຕືອນປະຊາຊົນບໍ່ໃຫ້ນໍາໃຊ້ນໍ້າໃນເຂດທີ່ມີປາຕາຍ ແລະ ຫ້າມທໍາມາຫາກິນໃນເຂດດັ່ງກ່າວເທື່ອໃນໄລຍະນີ້.
ເຈົ້າເມືອງຊະນະຄາມ ກ່າວຕື່ມວ່າ: ຫ້ວຍທີ່ມີປາຕາຍຍ້ອນນໍ້າເປື້ອນຈາກໂຮງງານມັນຕົ້ນ ເປັນຫ້ວຍນ້ອຍ ຊຶ່ງໃນໄລຍະຍາມແລ້ງມີນໍ້າບໍ່ຫລາຍ ແລະ ປະຊາຊົນບໍ່ໄດ້ທໍາການຜະລິດຢູ່ໃນເຂດໃກ້ ຄຽງຈິ່ງບໍ່ມີຜົນກະທົບຕໍ່ຄົນ ແລະ ສັດຊະນິດອື່ນ, ນອກຈາກມີປາຕາຍຈໍານວນໜຶ່ງເທົ່ານັ້ນ.
ຢ່າງໃດກໍຕາມ ທາງເມືອງໄດ້ເນັ້ນໃຫ້ເຈົ້າຂອງໂຮງງານເລັ່ງກໍ່ ສ້າງອ່າງບໍາບັດນໍ້າເປື້ອນ ກໍຄື ໂຮງງານໃຫ້ສໍາເລັດໂດຍໄວ ແລະ ຮັບ ປະກັນຄຸນນະພາບ ເພື່ອບໍ່ໃຫ້ເກີດເຫດການແບບນີ້ອີກ, ພ້ອມນີ້ ທ່ານໄດ້ຝາກມາຍັງສັງຄົມຈົ່ງບໍລິໂພກສື່ສັງຄົມອອນລາຍຢ່າງມີສະຕິ ເພາະປາຕາຍຢູ່ເຂດບ້ານຄົກເຂົ້າດໍທີ່ເກີດຂຶ້ນໃນຄັ້ງນີ້ ເປັນ ພຽງປາຕາຍໃນໜອງທໍາມະຊາດທີ່ບໍ່ໃຫຍ່ຄືສື່ສັງຄົມອອນລາຍ ໄດ້ລາຍງານຂ່າວອອກໄປ.
Cr: ຂ່າວອອນລາຍ, ວສລ
