ສະໂມສອນບານເຕະ ໂຣມ່າ ໄດ້ອອກຖະແຫຼງການຢືນຢັນການປົດ ໂຈເຊ່ ມູຣິນໂຢ ແລະ ທີມງານຂອງເຂົາອອກຈາກຕໍາແໜ່ງ ໂດຍມີຜົນທັນທີ.
ໂຣມ່າ ທີມດັງໃນກັນໂຊ ເຊເຣຍ ອາ ອອກມາຖະແຫຼງຂ່າວດ່ວນ ຄືການປົດ ໂຈເຊ ມູຣິນໂຢ ຄູຝຶກຊາວປອກຕຸຍການ ອອກຈາກຕໍາແໜ່ງແບບສຸດຊ໊ອກ.
ກ່ອນໜ້ານີ້ ໂຈເຊ່ ມູຣິນໂຢ ສາມາດນໍາພາທີມ ໂຣມ່າ ຄວ້າແຊັມ Conference League 2021/22 ແລະ ໃນປີຕໍ່ມາ ກໍນໍາພາທີມໄປສູ່ຮອບຊີງຊະນະເລີດ Europa League ທີ່ ບູດາແປສ, ແຕ່ເຮັດໄດ້ພຽງຮອງແຊັມ.
” ເຮົາຂໍຂອບໃຈ ໂຈເຊ່ ມູຣິນໂຢ່ ໃນນາມຂອງພວກເຮົາທຸກຄົນທີ່ ອາແອສ ໂຣມ່າ ສໍາລັບທຸກເວລາ ແລະ ຄວາມພະຍາຍາມຂອງເຂົານັບຕັ້ງແຕ່ເຂົາມາທີ່ສະໂມສອນ “
“ ເຮົາຈະມີຄວາມຊົງຈໍາທີ່ດີຕະຫຼອດການດໍາລົງຕໍາແໜ່ງຂອງເຂົາທີ່ ໂຣມ່າ ແຕ່ເຮົາເຊື່ອວ່າ ການປ່ຽນແປງທັນທີຈະເປັນປະໂຫຍດສູງສຸດຂອງສະໂມສອນ “
ເຮົາຂໍອວຍພອນໃຫ້ ໂຈເຊ່ ມູຣິນໂຢ່ ແລະ ຜູ້ຊ່ວຍຂອງເຂົາໂຊກດີກັບຄວາມພະຍາຍາມໃນອະນາຄົດ ” ສະໂມສອນອອກຖະແຫຼງການ.
ຜົນງານໃນລະດູການນີ້ຂອງ ໂຣມ່າ ບໍ່ຄ່ອຍດີປານໃດ ໃນເກມລີກ ບໍ່ຊະນະໃຜ 3 ນັດຕິດຕໍ່ກັນ ຈົນຫຼົ່ນໄປຢູ່ອັນດັບ 9 ຂອງຕາຕະລາງ.
ລວມເຖິງຍັງສ້າງສະຖິຕິເກັບຄະແນນໄດ້ໜ້ອຍທີ່ສຸດ ຫຼັງຈາກຜ່ານ 20 ນັດໃນຮອບ 21 ປີ ຫຼືນັບຕັ້ງແຕ່ລະດູການ 2002-03 ໂດຍເກັບໄດ້ພຽງ 29 ຄະແນນເທົ່ານັ້ນ ແລະ ຍັງຕົກຮອບບານເຕະ Coppa Italia ອີກດ້ວຍ.
ຫຼັງຈາກປະກາດປົດ ໂຈເຊ່ ມູຣິນໂຢ ອອກຈາກຕໍາແໜ່ງຫົວໜ້າຄູຝຶກໄປໄດ້ບໍ່ດົນ ຫຼ້າສຸດ ໂຣມ່າ ທີມດັງແຫ່ງ ກັນໂຊ່ ເຊເຣຍ ອາ ອິຕາລີ ກໍໄດ້ປະກາດແຕ່ງຕັ້ງ ດານີເອເລ ເດ ຣອສຊີ ຂຶ້ນເປັນຫົວໜ້າຄູຝຶກຄົນໃໝ່ຂອງທີມແທນ ໂດຍເຊັນສັນຍາຄຸມທີມຈົນເຖິງວັນທີ 30 ມິຖຸນາ 2024 ພ້ອມກັບມີທາງເລືອກຂະຫຍາຍສັນຍາຕໍ່ ຫາກຜົນງານເປັນທີ່ໜ້າພໍໃຈ.
