ແຫລ່ງຂ່າວຈາກ ແຂວງຫລວງນ້ຳທາ ໃຫ້ຮູ້ວ່າ: ການຈັດຕັ້ງບ້ານ ແລະ ພໍ່ແມ່ປະຊາຊົນ ບ້ານຫ້ວຍດຳ ເມືອງຫລວງນໍ້າທາ ແຂວງຫລວງນ້ຳທາ ສະເຫລີມສະຫລອງບຸນເກຣີ ຫລື ບຸນປົດປີຂອງຊົນເຜົ່າກຶມມຸ ໃນວັນທີ 27 ທັນວາ 2023 ໂດຍການເຂົ້າຮ່ວມຂອງທ່ານ ສຸກສັນ ພະກາສີ ຫົວໜ້າຫ້ອງການຖະແຫລງຂ່າວ, ວັດທະນະທຳ ແລະ ທ່ອງທ່ຽວເມືອງຫລວງນໍ້າທາ ພ້ອມດ້ວຍພໍ່ແມ່ປະຊາ ຊົນເຂົ້າຮ່ວມ.
![](https://medialaos.net/wp-content/uploads/2023/12/414745648_797756645711977_1859073899449052302_n.jpg)
ການເຮັດບຸນປະເພນີບຸນເກຣີ ຫລື ບຸນປົດປີ ຂອງຊົນເຜົ່າກຶມມຸ ຈັດຂຶ້ນໃນລະຫວ່າງເດືອນຈຽງຫາເດືອນຍີ່ ກົງກັບເດືອນ 12 ຕໍ່ໃສ່ເດືອນ 1 ສາກົນ ເຊິ່ງການເຮັດບຸນເກຣີນີ້ ເປັນການເອກອ້າງເຖິງຜົນງານການເກັບກ່ຽວຜົນລະປູກຕ່າງໆໃນຮອບ 1 ປີຜ່ານມາ ແລະ ເອກອ້າງເຖິງວັດທະນະທຳຮີດຄອງປະເພນີອັນດີງາມ ທີ່ເຄີຍສືບທອດກັນມາແຕ່ດຶກດຳບັນ ທັງເປັນການສືບສານວັດທະນະທຳຮີດຄອງອັນດີງາມ ເພື່ອໃຫ້ຄົນຮຸ່ນໃໝ່ໄດ້ຮັບຮູ້ ແລະ ຮັກສາຮີດຄອງປະເພນີອັນດີງາມນີ້ໄວ້ໃຫ້ໝັ້ນຄົງ. ບຸນເກຣີ ມີຄວາມໝາຍວ່າ ຄືບຸນຄຸນເຂົ້າ, ເຜືອກມັນ, ພໍ່ແມ່, ປູຍ່າຕາຍາຍ ຕາມການນັບຖືຜີຂອງບັນພະບູລຸດຂອງຕົນເອງ ເມື່ອຮອດມື້ບຸນເຂົາເຈົ້າໄດ້ຫ້າງຫາກະກຽມໄກ່ຜູ້ໂອກ ແລະ ໄກ່ແມ່ ແນວລະໂຕ, ມີເຫລົ້າໄຫ, ເຄື່ອງຜົນລະປູກ ແລະເຄື່ອງມືການຜະລິດທຸກຢ່າງມາປະດັບເອ້ ມື້ທຳພິທີນັ້ນເພີ່ນຈະເອົາເລືອດໄກ່ມາທາຫົວເຂົ່າຂອງສະມະຊິກທຸກຄົນຢູ່ໃນຄອບຄົວ, ເພື່ອໃຫ້ສິ່ງຊົ່ວຮ້າຍຕົກໄປນໍາປີເກົ່າໃຫ້ໝົດ ແລະ ນໍາເອົາສິ່ງທີ່ດີໆໃນປີໃໝ່ເຂົ້່າມາສູ່ຄອບຄົວເຮືອນຊານ, ໃຫ້ມີຄວາມອຸດົມສົມບູນຕະຫລອດໄປ ພ້ອມນັ້ນທຸກຄົນພາຍໃນບ້ານ ແລະ ແຂກຖືກເຊີນໄດ້ພາກັນແຫ່ຕີຄ້ອງ, ຕີກອງ, ຕົບແສ່ງ, ຟ້ອນດາບ, ຂີ່ກົງກວຽນ ແລະ ອື່ນໆ. ນອກຈາກນີ້, ຍັງມີການຂັບເຕີມ ຟ້ອນແຊ ອ້ອມຫລັກຄ້ຳຫລັກຄູນ ຕາມຮີດຄອງປະເພນີຂອງເຜົ່າຢ່າງມີຄວາມເບີກບານມ່ວນຊື່ນ.
![](https://medialaos.net/wp-content/uploads/2023/12/415478863_797756669045308_5341330574183870182_n.jpg)
ບຸນດັ່ງກ່າວ ຈັດຂຶ້ນເພື່ອເປັນການອະນຸລັກ ຮັກສາຮີດຄອງປະເພນີ ອັນດີງາມຂອງເຜົ່່າ, ທັງເປັນການໂຄສະນາເຜີຍແຜ່ມູນເຊື້ອ ໃຫ້ແຂກພາຍໃນ ແລະ ຕ່າງປະເທດ ໄດ້ຮັບຮູ້ຢ່າງກວ້າງຂວາງ ພ້ອມທັງເປັນການຊຸກຍູ້ສົ່ງເສີມການທ່ອງທ່ຽວລາວປີ 2024 ໃຫ້ມີບັນຍາກາດຄຶກຄື້ນມ່ວນຊື່ນ.
ຂ່າວ: ພັນທະມິດ ສີ່ສະເກີ່ງ