ໃນລະຫວ່າງວັນທີ 17-21 ກັນຍາ 2023, ທ່ານ ນາງ ຊິຕິ ໂຣໄຊເມຣິຢັນຕີ ດາໂຕະ ຮາຈິ ອັບດຸນ ຣາມັນ ເລຂາທິການໃຫຍ່ສະມັດຊາລັດຖະສະພາລະຫວ່າງຊາດອາຊຽນ (AIPA) ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກ ເພື່ອປຶກສາຫາລື ແລະ ກະກຽມຄວາມພ້ອມ ຮ່ວມກັບສະພາແຫ່ງຊາດລາວ ໃນການເປັນເຈົ້າພາບຈັດກອງປະຊຸມສະມັດໃຫຍ່ AIPA ຄັ້ງທີ 45 ທີ່ ສປປ ລາວ ໃນປີ 2024.
ໃນໄລຍະ ຢູ່ ສປປ ລາວ, ທ່ານເລຂາທິການໃຫຍ່ AIPA ພ້ອມດ້ວຍຄະນະ ໄດ້ພົບປະເຮັດວຽກກັບ ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ແລະ ຮ່ວມກັນຈັດກອງປະຊຸມສຳມະນາກັບຄະນະນຳຂອງກຳມາທິການທີ່ກ່ຽວຂ້ອງ, ສະມາຊິກສະພາແຫ່ງຊາດ ແລະ ພະນັກງານ-ວິຊາການ ຂອງສະພາແຫ່ງຊາດລາວ ເພື່ອປຶກສາຫາລືກ່ຽວກັບການກະກຽມເປັນເຈົ້າພາບຈັດກອງປະຊຸມໃຫຍ່ AIPA ຄັ້ງທີ 45 ຢູ່ ສປປ ລາວ ໃນປີ 2024 ທີ່ຈະມາເຖິງ.
ນອກຈາກນັ້ນ, ທ່ານເລຂາທິການໃຫຍ່ AIPA ພ້ອມດ້ວຍຄະນະ ຍັງໄດ້ເດີນທາງດ້ວຍລົດໄຟຄວາມໄວສູງລາວ-ຈີນ ໄປຢ້ຽມຢາມ ແຂວງຫຼວງພະບາງ ເພື່ອເບິ່ງການພັດທະນາທາງດ້ານການເຊື່ອມໂຍງເຊື່ອມຈອດ ຂອງ ສປປ ລາວ ກໍຄືການສົ່ງເສີມການພັດທະນາເສດຖະກິດ-ສັງຄົມ, ການທ່ອງທ່ຽວ ຢູ່ເມືອງມໍລະດົກໂລກ ຕາມນະໂຍບາຍສົ່ງເສີມການເຊື່ອມໂຍງເຊື່ອມຈອດ ຂອງ ສປປ ລາວ.
(ຂ່າວ: ສພຊ)
