ວັນທີ 8 ກັນຍາ 2023 ພະແນກກະສິກຳ ແລະ ປ່າໄມ້ ແຂວງຄຳມ່ວນ ໄດ້ຈັດພິທີປາຖະກະຖາ ວັນເກີດປະທານ ສຸພານຸວົງ ຄົບຮອບ 114 ປີ (13 ກໍລະກົດ 1909-13 ກໍລະກົດ 2023), ວັນສ້າງຕັ້ງແນວລາວສ້າງຊາດ ຄົບຮອບ 73 ປີ (13 ສິງຫາ 1950-13 ສິງຫາ 2023) ແລະ ເຜີຍແຜ່ແຈ້ງການແນະນຳ ກ່ຽວກັບການຈັດຕັ້ງເຜີຍແຜ່ ຂໍ້ຕົກລົງຂອງທ່ານເຈົ້າແຂວງຄຳມ່ວນ ວ່າດ້ວຍການຄຸ້ມຄອງ ແລະ ຈັດສັນຄວາມເປັນລະບຽບຮຽບຮ້ອຍ ຂອງເມືອງທ່າແຂກ ໂດຍມີທ່ານ ບຸນເລີງ ເລີດບຸນຊູ ຮອງຫົວໜ້າຄະນະໂຄສະນາອົບຮົມແຂວງ, ທ່ານ ຄຳແກ້ວ ລັດຖະຍອດ ຄະນະພັກຮາກຖານພະແນກກະສິກຳ ແລະ ປ່າໄມ້ແຂວງ, ມີບັນດາຂະແໜງການອ້ອມຂ້າງ ຕະຫຼອດເຖິງພະນັກງານ-ວິຊາການພາຍໃນພະແນກເຂົ້າຮ່ວມ.
ສຳລັບການເຜີຍແຜ່ ວັນເກີດທ່ານປະທານສຸພານຸວົງ ແມ່ນໄດ້ເລົ່າຄືນເຖິງຊີວິດ ແລະ ການເຄື່ອນໄຫວປະຕິວັດ, ຜົນງານ ແລະ ຄຸນງາມຄວາມດີຂອງປະທານສຸພານຸວົງ, ທ່ານແມ່ນຜູ້ນຳທີ່ມີຄວາມຈົງຮັກພັກດີຕໍ່ອຸດົມການປະຕິວັດຢ່າງສຸດກົກສຸດປາຍ, ຕໍ່ສູ້ຢ່າງກ້າແກ່ນພິລະອາດຫານ, ຍາມໃດກໍ່ໄດ້ຍົກສູງສະຕິ, ລະບຽບວິໄນຕໍ່ການຈັດຕັ້ງ, ມີຄວາມນັບຖືຕໍ່ໝູ່ຄະນະ, ເອື້ອເຟື້ອຮັກແພງມິດສະຫາຍ ຢ່າງຈິງໃຈ, ດຳລົງຊີວິດຢ່າງຊື່ສັດສຸດຈະລິດ ແລະ ງ່າຍດາຍ, ທ່ານເປັນປັນຍາຊົນຜູ້ຍິ່ງໃຫຍ່ ມີນໍ້າໃຈຮັກຊາດ ອັນດູດດື່ມ, ມີທັດສະນະຫຼັກໝັ້ນອັນໜັກແໜ້ນ ແລະ ນໍ້າໃຈເສຍສະຫຼະອັນສູງສົ່ງ ເພື່ອຊາດ ເພື່ອປະຊາຊົນ, ຕະຫຼອດຊີວິດຂອງທ່ານ ບໍ່ວ່າຈະຢູ່ໃນຕຳແໜ່ງໃດ, ຄວາມຮັບຜິດຊອບອັນໃດ ເພິ່ນກໍ່ໄດ້ອຸທິດໝົດຈິດໝົດໃຈ, ໝົດຄວາມສາມາດ ແລະ ຫົວຄິດປະດິດສ້າງຂອງຕົນໃຫ້ແກ່ພາລະກິດ ປົກປັກຮັກສາ ແລະ ສ້າງສາພັດທະນາ ປະເທດຊາດ ເພື່ອເອກະລາດ, ອະທິປະໄຕຂອງຊາດ ແລະ ຄວາມສົມບູນພູນສຸກຂອງປະຊາຊົນ.
ສ່ວນວັນສ້າງຕັ້ງແນວລາວສ້າງຊາດ ເຊິ່ງແນວລາວສ້າງຊາດ ຫຼື ແນວລາວອິດສະຫຼະ ໃນສະໄໝກ່ອນ ແມ່ນໄດ້ປະຕິບັດບົດບາດອອກໜ້າແທນພັກເພື່ອເຕົ້າໂຮມກ້ອນກໍາລັງສໍາພັນທະພາບ ລະຫວ່າງຊົນຊັ້ນກໍາມະກອນ-ຊາວກະສິກອນ ແລະ ບັນດາກໍາລັງການເມືອງ, ການຈັດຕັ້ງສັງຄົມຕ່າງໆ, ອອກແຮງເຕົ້າໂຮມຄວາມສາມັກຄີປອງດອງທົ່ວປວງຊົນອ້ອມຂ້າງເປັນຕົ້ນ: ສໍາພັນພິເສດກັບກອງທັບ ແລະ ປະຊາຊົນຫວຽດນາມອ້າຍນ້ອງ, ສໍາພັນ 3 ຊາດອິນດູຈີນ, ເຮັດສໍາເລັດພາລະກໍາປະຫວັດສາດອັນສະຫງ່າອົງອາດຄື: ປົດປ່ອຍຊາດອອກຈາກແອກປົກຄອງລ່າເມືອງຂຶ້ນແບບເກົ່າ, ບັງຄັບໃຫ້ພວກລ່າເມືອງຂຶ້ນແບບເກົ່າຕ້ອງເຊັນສັນຍາເຊີແນວ ໃນປີ 1954 ຍອມຮັບຮູ້ເອກະລາດ ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ, ເຮັດໃຫ້ຊື່ສຽງ ແລະ ບົດບາດຂອງລາວພົ້ນເດັ່ນຂຶ້ນໃນເວທີການເມືອງຂອງໂລກ, ກໍາລັງປະຕິວັດໄດ້ມີ 2 ແຂວງເຕົ້າໂຮມຄື: ຜົ້ງສາລີ ແລະ ຫົວພັນ ທັງມີຖານະຖືກຕ້ອງຕາມກົດໝາຍ.
ສະເພາະການເຜີຍແຜ່ແຈ້ງການແນະນຳ ກ່ຽວກັບການຈັດຕັ້ງເຜີຍແຜ່ ຂໍ້ຕົກລົງຂອງທ່ານເຈົ້າແຂວງຄຳມ່ວນ ວ່າດ້ວຍການຄຸ້ມຄອງ ແລະ ຈັດສັນຄວາມເປັນລະບຽບຮຽບຮ້ອຍ ຂອງເມືອງທ່າແຂກ ເພື່ອໃຫ້ຮັບຮູ້ເຖິງການກຳນົດຫຼັກການ, ລະບຽບການ ແລະ ມາດຕະການໃນການຄຸ້ມຄອງ, ຈັດສັນຄວາມເປັນລະບຽບຮຽບຮ້ອຍ, ຄວາມສວຍງາມ ລວມໄປເຖິງຄ່າບໍລິການໃນການຄຸ້ມຄອງບໍລິຫານຕົວເມືອງ ເພື່ອຫຼຸດຜ່ອນຜົນກະທົບທາງດ້ານສິ່ງແວດລ້ອມ-ສັງຄົມ ທີ່ຈະເກີດຂຶ້ນຄຽງຄູ່ກັບການພັດທະນາຮອບດ້ານ ແນໃສ່ເຮັດໃຫ້ຕົວເມືອງທ່າແຂກ ເປັນຕົວເມືອງທີ່ທັນສະໄໝ, ສະອາດ, ສະຫງົບ, ສະຫວ່າງ, ສົດໃສ ກ້າວຂຶ້ນເປັນເທສະບານໃນຕໍ່ໜ້າ.
