ຮອງລັດຖະມົນຕີກະຊວງການເງີນ ແລະກະຊວງອຸດສາຫະກຳ ແລະການຄ້າລົງຊຸກຍູ້ວຽກງານຢູ່ແຂວງຫຼວງພະບາງ

———————————–

ໃນລະຫວ່າງ ວັນທີ 4-5 ກັນຍາ 2023 ນີ້, ທ່ານ ພູທະນຸເພັດ ໄຊສົມບັດ ຮອງລັດຖະມົນຕີກະຊວງການເງີນ, ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກໍາ ແລະການຄ້າ ພ້ອມດ້ວຍຄະນະທິມງານ ໄດ້ລົງຊຸກຍູ້ວຽກງານກ່ຽວກັບການຂະຫຍາຍຖານອາກອນມູນຄ່າເພີມ ແລະເຜີຍແຜ່ການຕິດຕັ້ງລະບົບໂປຣແກຣມ ບັນຊີໃບເກັບເງີນ ເອພິ ແທກ (AP TAX ) ຢູ່ແຂວງຫຼວງພະບາງ ໂດຍການເຂົ້າຮ່ວມຂອງທ່ານ ນາງ ສີລິພອນ ສຸພັນທອງ ຮອງເຈົ້າແຂວງ, ມີຮັກສາການຫົວໜ້າພະແນກການເງີນແຂວງ ມີຮອງຫົວໜ້າ ແລະພະນັກງານວິຊາການ ຈາກພະແນກການເງີນແຂວງ, ສ່ວຍສາອາກອນປະຈໍາແຂວງ, ພາສີປະຈໍາແຂວງ ແລະຄັງເງີນແຫ່ງຊາດປະຈໍາແຂວງເຂົ້າຮ່ວມ.

ໂອກາດດັ່ງກ່າວ ທ່ານ ຄໍາມົນ ຮັກສາການຫົວໜ້າພະແນກ ການເງີນແຂວງ ໄດ້ລາຍງານສະພາບການຈັດຕັ້ງປະຕິບັດວຽກງານການເງີນ ພາຍໃນແຂວງຫຼວງພະບາງ ໂດຍສັງເຂບໃຫ້ແກ່ທ່ານຮອງລັດຖະມົນຕີ ແລະຄະນະໄດ້ຮັບຮູ້ວ່າ: ການຈັດຕັ້ງປະຕິບັດແຜນງົບປະມານແຫ່ງລັດ 08 ເດືອນ ພາຍໃນປີ 2023 ລາຍຮັບທັງໝົດ ລວມທັງສູນການ ແລະທ້ອງຖິ່ນຕາມແຜນປີ 732,58 ຕື້ກີບ ປະຕິບັດໄດ້ຕົວຈີງ 454,66 ຕື້ກີບ ເທົ່າກັບ 62% ຂອງແຜນການປີ. ໃນນັ້ນລາຍພູດສູນກາງຕາມແຜນ 21 ຕື້ກີບ ປະຕິບັດໄດ້ 5,2 ຕື້ກີບ, ສ່ວນລາຍຮັບພູດທ້ອງຖິ່ນ ແຜນການປີ 711,58 ຕື້ກີບ ປະຕິບັດໄດ້ 401,63 ຕື້ກີບ ເທົ່າກັບ 62% ແລະດ້ານລາຍຈ່າຍ ຕາມແຜນການປີ 678,89 ຕື້ກີບ ປະຕິບັດໄດ້ 415,64 ຕືກີບ ເທົ່າກັບ 60%.

ໂອກາດດຽວກັນນີ້, ທ່ານຮອງລັດຖະມົນຕີ ກະຊວງການເງີນ ໄດ້ມີຄໍາເຫັນເນັ້ນຢໍ້າ ຕໍ່ຈຸດປະສົງການລົງເຮັດວຽກຢູ່ແຂວງຫຼວງພະບາງ ຄັ້ງນີ້ວ່າ: ເພື່ອເປັນການລົງຊຸກຍູ້ວຽກງານຄຸ້ມຄອງ, ຂະຫຍາຍຖານລາຍຮັບ ແລະຫັນໄປສູ່ທັນສະໄໝ ໂດຍການຫັນເອົາລະບົບເອເລັກໂທທັນສະໄໝ ເຂົ້າໃນການຄຸ້ມຄອງໃນການເກັບລາຍຮັບພາສີ, ອາກອນ, ຄ່າບໍລິການຕ່າງໆ ເຂົ້າສູ່ງົບປະມານແຫ່ງລັດ ເປັນຕົ້ນແມ່ນລະບົບ ແທກຣິດ TAX RIS ທີ່ໄດ້ນໍາມາຕິດຕັ້ງນໍາໃຊ້ເຂົ້າໃນການເກັບລາຍຮັບງົບປະມານ ໃຫ້ໄດ້ຜົນດີກວ່າປີຜ່ານມາ ແລະນອກຈາກລະບົບ ແທກຣິດ ແລ້ວ ກົມສ່ວຍສາອາກອນ ຍັງມີເປົ້າໝາຍຕິດຕັ້ງ ລະບົບໂປຣແກຣມ ບັນຊີໃບເກັບເງີນ ເອພິ ແທກ (AP TAX ) ຊຸກຍູ້ກ່ຽວກັບການຂະຫຍາຍຖານອາກອນມູນຄ່າເພີມ ຢູ່ແຂວງຫຼວງພະບາງ ໃນຕໍ່ໜ້າ.

ພາບ-ຂ່າວໂດຍ: ດາວອນ ມະນີວັນ